ماهي مواد السنه التحضيريه

[مكتوب]

السلام عليكم ورحمة الله وبركاته
انا نفسي اسجل انتساب مدفوع بس يقولولي مره صعبه الدراسه وفيه رياضيات وانا اكره الرياضيات وكمان خريجة ثانوي ادبي ويالله مشيت في الثانوي
وكمان ظروفي صعبه ويتيمه وبدفع فلوس الجامعه من راتب الضمان الاجتماعي بس خايفه ادفع فلوس ع الفاضي وماانجح
حابه تعطوني رأيكم يااخواتي اسجل اولا لاني مره محتاره
وايش المواد اللي تدرس في السنه التحضيريه وسهله والا صعبه وكم تكلفة الكتب ياربي وكمان شايله هم المواصلات الله يعين
وجزاكم الله خير

[هاويه حنانك]

الله يكون فى عونك

هناك خطتين اوب

خطه أ

رياضيات_ثقافه اسلاميه_عربى_حاسب_انقلش101

خطه ب

احصاء_مهارات اتصال_تفكير والبحث العلمى_انقلش 102

شدى حيلك وربى يسهلك

[قروووشه]

حبيبتي انا ماكنت ناويه ادخل والله بس تعاطفت مره مع موضوعك ..

انا زيك ادبي وكان عندي رعب من الاحصاء والرياضيات ورسبت فيهم لاكن باهمالي اعترف .. لان الرياضيات ماهي صعبه نهائيا بس ركزي فيها شووي ولاخذي مدرسه ..

وباقي المواد سهله شدي حيلك اول سنه وجيبي معدل عالي وحولي انتظام ..

لااحد يضحك عليكي ويقوولك المواد صعبه مافي شي صعب كلو درسناه ..

الله يووفقك فديتك ..
واي شي تبغيه ولا مساعده انا حاضره ..

دعواتك ..

[قروووشه]

والشاعر يقول وما نيل المطالب بالتمني ولكن تأخذ الدنيا غلابه

يعني انتي سوي اللي عليكي وخلي الباقي على الله ..

مافي شي سهل ومافي شي صعب كل مين على قد نيتو ومجهودو ياخذ..

وانا اعترف اني اكسل طالبه فعزوز ماامسك الكتب .. ولكن الحمدلله معدلي التراكمي 2.85 وانا راسبه في الاحصاء والرياضيات ..

ومافكيت الكتب الا ليلة الاختبار يعني لو شديتي حيلك باذن الله حتعدي ..

وبعض المواد رحت فيها على عمايا حسب معلوماتي في الثانوي ..

عشان كيذا اطمنك ترى السنه التحضيريه اسهل من السهاله ولان نظام الاسئله فيها فقط اختياري ..
..


يعني لازم تنتهزي الفرصه هذي لانو لو تخصصتي الاسئله حتكون مشكل وهذا اللي انا خايفه منو ..

عموما انتي شدي حيلك والله يوفقك ويوفقنا ..

والقسم هذا فالمنتدى لو فضل كبير عليا بعد الله ساعدووني كثيرر وماشاءالله كلهم متعاونين

اي استفسار او مشكله اكيد الكل بيكون معاكي ..

سلام ودعواتك ^^

[قروووشه]

ولعلمك انتي بما انك في الضمان تقدري تدرسي على حساب الضمان ..من غير لاتدفعي من راتبك ..

لمن تقدمي ويجيكي القبول المبدئي تطبعيه من النت وتوديه للضمان يدوكي افاده انك مستفيده من الضمان .. وتوديها الجامعه قبل فوات مدة التسديد وحيدوكي اعفاء على طول .. قوليلهم انا مقدمه على اعفاء وانا مستجده ..

انا مالي فالضمان بس رحت مع صحباتي زيك مستجدات وسووينا الاوراق سووا ^^

[missgogo]

حبيبتي بما انك يتيمه وتبع الضماان الاجتمااعي روحي قدمي اثباتك وراح تاخذي اعفاااء من الرسوم كثيراعرفهم نفس وضعك وماخذين اعفاء من الرسوم...
موووفقه خيتووو..

[مكتوب]

هاويه حنانك -قروووشه -missgogo
وكل اللي ردوا عليا شكرا الله يوفقكم ويحقق امالكم يارب
بس اول كيف اصدق شهادتي انا ليه 8 سنوات متخرجه من الثانوي واول اسجل وبعدين اروح الضمان لاني اروح بلموزين ومابغى اروح ع الفاضي الله يسعدكم

[انتساب 2010]

المشاركة الأصلية كتبت بواسطة مكتوب هاويه حنانك -قروووشه -missgogo وكل اللي ردوا عليا شكرا الله يوفقكم ويحقق امالكم يارب بس اول كيف اصدق شهادتي انا ليه 8 سنوات متخرجه من الثانوي واول اسجل وبعدين اروح الضمان لاني اروح بلموزين ومابغى اروح ع الفاضي الله يسعدكم

تصدقيها من مدرستك اللي تخرجتي منها والله يكون في عونك.

[مكتوب]

حسبي الله مدرستي في مكه وانا ساكنه بجده
لازم اروح مكه عشان اصدق الشهاده والاينفع من الرئاسه سمعت انه ينفع من الرئاسه

[حبيبه خلووودي]

انا اخذت ورقة من الضمان والحمدلله اعفوني من الرسوم بس الترم الاول دفعت