الى الاستاذ فيصل البلادي .. لا يضيع مستقبلي و عمري بسبب (1. ) جزء من العشرة

[ابغى ماستر فيزيا]

السلام عليكم و رحمة الله و بركاته

الى الاستاذ فيصل البلادي

موضوعي باختصار شديد .... انا انسانة الطموح ياكل في روحي .. و يتغذى من دمي

مو قادرة اشوف التقديمات تعدي من قدام عيوني و اتابع اخبارها و لا يكون لي نصيب فيها بسبب شي ما يسوي ... والله باتقهر و باتقطع من الالم

جايبة توفل من 400 نقطة و معدلي 2.17 من 4 وكل الشروط مستوفيتها

بس اللي واقف لي المعدل ... وبسبب شي يسير يطلع 0.1 اضيع يعني يبغالي هذا الرقم بس حتى اتماشى مع الشروط

العمر بيمضي و مستقبلي واقف .. واشوف الفرص بتضيع من قدامي وانا مو ناقصني شي حتى اخذ نصيبي منها و ابدع في اللي راح ادخل فيه ..

ياليت تنظر في امري و تريح بالي بجواب شفي ... وتفرج عني همي اللي اكل مخي و تفكيري واقلق راحتي ... الله يفرج لك من كل ضيق و هم مخرجا و فرجا

بس ابغى احد يقبل اوراقي للدخول للامتحان ... بس هذا مبلغ املي .. و لو ما استاهل فيكم تكنسلون ظهور نتيجتي ... بس احتاج فرصة ... وحدة لا اكثر

امانة اذا شفت موضوعي ... لا تهمل الرد عليه ... والله راح تكسب ثواب في الرد علي .. بجواب يطمني

اعذرني على الكتابة بالاسلوب البسيط ... بس ضعف و قلة حيلتي ... مو مخليني اتحمل اللي يصير لي من صعوبات

وما صرت اقوى على تكسير الطموح و الامل من نفسي


شكراً

[فكر]

عزيزتي :::)

ربك كريم

بس معدلك ؟ من أربعه ؟ كيف ؟ معانته مانتي متخرجة من جامعة الملك عبد العزيز ... :)

طيب ترى الماستر مدام جبتي تقدرين تروحين للقسم اللي بتقدمين عليه وتكلمينهم :)
يعني ممكن إنهمم يسمحون لك والله أعلم
لا تتضايقين ولا تحزنين ربك ما يضيع إيمان أحد :)

وإن شاء تقبلين بس راجعي الجامعة لانه من الشروط لمجلس القسم النظر في التقدير يعني اذا تستحقين او لا ..
وان شاء الله انك قدها وقدود

وربنا يوووفقك
آمين

[sbelady]

الله يفرج همك ... المعدل المطلوب من 4 هو 2.25 بس إن شاء الله الفصل الاول القادم سوف يتم النظر في كثير من الانظمة وهناك دراسة لخفض المعدل الى جيد فقط

[ابغى ماستر فيزيا]

ماقدرت اقوم من الصفحة حتى اشوف الرد ... و الحمد لله انه جا الرد .. من حضرتك و من الاخت الكريمة فكر

الله لا يحرمكم اجر .. الرد .. و الله ينالكم .. بفضله و رحمته و تحقيق ما تطمح له انفسكم

والله من قلب صادق و ربي بادعيها ... الدعوة هذه ... والله يفتح لها ابواب السماء .. و يستجيبها يا رب

الخبر هذا لو يتحقق ... راح اكون اسعد انسانة .. والله

بالله يا استاذنا الفاضل ... نحتاج تغير هذا القرار في المعدل ... والله نستاهل فرصة لو وحدة نثبت اننا مو مقصرين

بس فرصة اللي نحتاجها .. اما نثبت وجودنا او نتراجع عن حلمنا

بس لا يتقفل الباب في وجوهنا بسبب ارقام صغيره و قريبة من المطلوبة

يعلم الله علام الغيوب .. انا ما اتخفض معدلي اهمال مني .. او تقصير

ما اتخفض الا بسبب تحويلي من كلية الطب .. لاني امضيت فيها فترة طويلة

وتحويلي هوا السبب في تخفيض المعدل .. وكنت قد ما اقدر باحول ارفعه بس مو راضي

ترا الناس مو كلها بتنخفض معدلاتها ... اهمال ... لكن لظروف اقوى منها ..

ارجوك يا استاذ فيصل .. اضغط عليهم للنظر في قرار المعدل .. او يجعلون لنا من سبيل في اخذ فرصة لو اخيرة

لدخول امتحانات القبول

وشكر الله لك حسن تجاوبك معاي و افادتك لي .. انت و اختنا الكريمة فكر

جزاكم الله جنةً عرضها السموات و الارض

[sbelady]

هناك برامج مدفوع التكاليف تقبل معدلك هذا وانا اختى العزيز معك كثير من الطلاب في حدود هذا المعدل ويمكنك تغيير تخصصك اذا رغبتى ذلك

[ابغى ماستر فيزيا]

لحظة انت فتحت علي باب الامل ... وربي لادفع اللي و راي و اللي قدامي

بس ما اتوقف عن طموحي .. و اوصل للي ابغاه

راح ادخل في المدفوع التكاليف بس يشمل تخصصي ( الفيزيا ) انا اتصلت على الجامعة و كلمت موظفه فيه

قالت لي ... لا لا لا .. تخصصك مافي .. وبسرعه عدت المكالمة معاي .. و لافهمت منها شي و لا لحقت اسئلها الا و المكالمة انتهت منها

بس بغيت اقولها ممكن اقدر ادخل اي واحد و اغير للفيزيا .. و راح اظل ادفعلكم الرسوم مثل لو ادرس تخصص من مدفوع التكاليف .. واستمر معاكم بس اهم شي يكون ضمن تخصصي

والله اجابتك كانه هم عن قلبي ... و بدا يتزحزح ... راسي ارتفع ضغطه من كثر التفكير

انت لو تعرف يا استاذ فيصل .. قد ايه اتمرمرت عشان حلم اكمال دراستي

وربي خرجت من مكة لمنطقة تبعد 800 كم ادرس في كليه تخصص فيزياء عامه لطالبات الاقسام العلمية
وعدوني يكملوا لي دراستي و وافقت معاهم .. و بس انتهيت من الفصل الدراسي .. وانتهى عقدي .. اعتذروا

ان الشرط ما يقدرون يحققونه ... لان ماعندهم تخصص فيزيا من الاساس .. فما راح يحتاجوني الا عشان فصل دراسي .. و يكتفون بتجديد العقد معاي ... !!

انا ابغى اروح للمدفوع ... و راح ادفع كل اللي يطلبوه ... بس يكون في اختصاصي

وروح الله يسهل لك طريق للجنة ... مثل ما تساعد انسانه تكمل تعليمها

والله يجعل كل دعوة ترجوها من الله ... ينالك بتحقيق اجابتها .. وينالك برضاه و مغفرته .. مادمت حيا

والله بسبب افادتك لي ... لاروح بيت الله الكريم .. و ادعيلك في ظهر الغيب .. دعوة كريمة .. من اخت لاخوها
يساعدها لوجه الله العظيم

جزاك الله كل الاجر و الخير يا رب

[sbelady]

فيه برامج مدفوعه في تقنيات التعليم ،ارشاد وتوجيه ، ادارة تربويه ، ادارة اعمال ، ادارة عامة ، محاسبة ، علم التشريح والانسجة ) اما الفيزياء حتى الان لم يفتح برنامج مدفوع التكاليف

[Dido]

الله يوفقك اختي! من جد الواحد يزعل على الناس الطموحين الي يستاهلو يدرسو و مو قادرين. ما فكرتي تطلعي بعثة؟

[nona22]

الله يوفقك
و إذا ندك إمكانية شوفي الابتعاث

[فكر]

لا حول ولا قوة إلا بالله

الله يسهل لك إنت نفس مشكلتي نقريبا نزل معدلي بسبب التخصص وتغييره
المفروض اللي يحول من تخصص يحذفونه ويحسبون التخصص الجديد

لانه درجاتي فرق شاسع
لكن الحمد لله وما هو إهمال مننا ...:)
الله يكون بعونك يا أختي ويسهل لك كل ما تتمنين

وشكرا على الدعوة آمين آمين آمين