بنات الانجليزي تجاربكم في تدريب 2 ..!!

[loneliness]

السلم عليكم ورحمة الله وبركاته
كيفكن يابنات الانجلش الله يعين الجميع..

حبيت يكون الموضوع داه عن تجارب البنات في التدريب 2 اللي اخدوه...
مع مين من الاستازات..؟ كم ساعة بالضبط..؟ فين تدربتو..؟

يالليت يابنات تفيدونا ...واللي عندها معلومة لا تبخل بيها علينا ..



لكم حبي

[مســـألة وقت]

صبـــاحكم سعادة ورضا يااارب
بأقول عن تجربتي طبعا الترم اللي فات مااستوعبو انو عندنا تدريب الا بوقت متأخر وكان عندنا جدا وقت ضيق عشان ندور على مكان
((يعني الفكرة انك تتدورين لنفسك مكان يقبل تتدربي فيه وتاخذي من عنده موافقه وتديها للقسم وهم بالبدل يعطوكي ملف فيه خطاب مع استمارة التقييم اللي تعطيها للمشرف أو المشرفة عليك بمكان تدريبك))
المهم انهم اختارولي المكان مو انا اللي اخترته بحجة اني اتأخرت
واختارولي مدرسة اسمها دار الحنان((مدرسه خاصه))
اعطوني الملف وحددولنا مهلة اسبوعين تنهين فيها أقل شي 40 ساعه
مشرفتي كانت أ/ كوثر الدوسري

ماابغى اكثر كلام ف اذا عندك اي استفسار معين تفضلي وان شاء الله أجاوبك
بس حبيت اقول
انو مع اختلاف المشرفات ومع ان فيه بنات ادو كثير حلو في تدريبهم واخذوا درجات حلوه
الا ان الدرجات مع كثير بنات ماكانت فوق ال85 مع انو البنت تكون ماخذه الدرجه كامله من المكان اللي تتدربت فيه
ماابغى احبطكم بهالمعلومه بس استفسروا عن كل شي قبل لايختبروكم وتنظلمو
احنا طبعا كنا أول تجربه لهم ف التدريب فتحسي ماكانو مهتمين كثير

على فكرة المكان مايهم اذا بتمارسي فيه اللغه الانجليزية أو لا يعني بأي مجال تقدري تتدربي

لو افتكرت معلومات بعد مهمه وتفيدكم راح اقول اكيد

((للبقية اللي تتدربو شاركو اللي أصغر منكم
تذكرو تجربتنا قد ايش مالقينا احد يفيدنا فخلوهم يستفيدون حتى لو بس باسم المكان))

[LADY GAGA]

يااااااليت الموضوع يتثبت لانه مرره موهم جدا
تكفون بنات اللي جربت التطبيق تقول تجربتها عشان الكل يستفيد والاخطاء اللي وقعت فيها عشان نتجنبها
بنات تفاعلوا مع الموضوع بليييييز

[loneliness]

شكرا حياتي " مسألة وقت" و " ليدي جاجا " ع الرد ..
انا صراحه مره متخوفه من التدريب احسه مجهول كم ساعه بالضبط ؟ 40 او 60 ساعه؟
هل يشترط فيه ممارسة اللغه الانجليزية؟
مع مين تدربتي؟
اش الاشياء او الطلبات المطلوبة منك لتأديتها ؟ هل هي اعمال اداريه ؟؟ ام خاصة بالتدريس ؟

سالت وحده من صحباتي قالت:
لما جيت اسوي مناقشة سيمنار ما بعد التدريب تقولي فيه كوووووول حاجه سويتيها
سألتني د. هند بن فريج اسئلة غريبة.. كم عدد الطالبات في الكلاس؟ واسئلة مفاجئة...

انتهى كلامها...


كل اللي ابغى اعرفه ماهية التدريب العملي 2؟
ياليت يا عسل " مسألة وقت " ماعليك امر تقولي لي بالتفصيل الشبه ممل لكل حاجه سارت لك وسويتيها او طلبوها منك من الالف الى الياء...!!


بخصوص مسألة تثبيت الموضوع .... يالييييت والله المشرفة تثبتو عشان يكون مرجع لطالبات الانجلش مع التدريب..
وشكرا,,

[مســـألة وقت]

صباحك سعادة وتوفييق يااارب
ماطلبتي شي
بس بأفصل الكلام ف أكثر من رد عشان اقدر اعرف اني كتبت كل شي تقريبا
أول شي بخصوص الساعات
هوه أقل شي 40 وأكثر شي60
يعني على حسب المكان اللي تبغي تتدربي فيه
انا كنت تقريبا 45ساعه يعني عادي
بس لما رحنا للمدرسه قلنا لهم انو نبغى 40 ساعه فسوولنا جدول ايام لحد مانوفي هالساعات
بالتالي موضوع الساعات انتهى

ثانيا موضوع ممارسة اللغة
سألناهم وقالو مو شرط
يعني بنات كثير مامارسوا اللغه
بس انصح وبشده تاخذي مكان تمارسي فيه اللغه وبعدين بأقول ليه

ثالثا مشرفات تدريبنا كانو
أ/بهية قشقري- أ/كوثر الدوسري-د.سمر الجحدلي-د.خديجة عقبي-د.ريم مغربي
ماافتكر غيرهم

الحين بخصوص تدريبي في المدرسه اللي رحتها كنا 6بنات
مشرفة اللغة الانجليزية رفضت انو ندرس وقالت لنا شغلنا انو نساعد مدرسات الانجليزي
يعني نصحح معهم ونجمع كتب ونوزع اوراق عمل واشياء زي كذا
وبنفس الوقت انو نراقبهم عشان نتعلم عن التدريس لأنا قلنا لها انو ماتدربنا من قبل
سوت لنا جدول ووزعتنا بحيث ندخل على كل المراحل تقريبا ونمر بكل الأستاذات

فماكان العمل تدريس ولا اداري كان نص ونص

[مســـألة وقت]

نجي لموضوع المناقشة
أول شي تقسيم الدرجات كان
40 في يد مشرفتك اللي تتدربي عندها
20 بيد مشرفتك من الكلية لما تجي تزورك تقيمك
40 على التقرير النهائي والمناقشة

40 اللي في يد مشرفة التدريب شدي حيلك وفهميها انو فعلا تحتاجي تاخذي درجة كويسه
((في استمارة التقييم اللي تعطينها لهم
فيه تقسيم ال40 من ناحية التطبيق العملي للغة-الانضباط-تأدية المهام الموكله اليها وأشياء زي كذا ماافتكرها))

نجي عند ال20 حقت مشرفتك
عادي هذا يعتمد على المشرفة
يعني ماشاء الله صحباتي جوهم المشرفات سألوهم اسئلة بسيطة وقعدو معهم يمكن 5 دقايق
ومشو
عاد انا لا قعدت تقريبا ساعه وسألتني اسئلة غريبة عجيبة
يعني شوفي مابأقلك انها شينه لا وربي العالم بس كنت انا الوحيدة اللي حسيت اني ف تحقيق
من أسئلتها
-كم عدد الطالبات ف الفصول :-)
-عن اعمالي اللي اسويها
-هل شاركت ف الاذاعة
-هل شاركت ف الحفلات والأشياء اللي يسووها
-هل عرضت اني اشرح درس
((يعني المشرفة رفضت هالشي اتفلسف واعاند مثلا))

المهم نجي عند ال40 النهائية
مقسومة 20 على تقرير من تقريبا 5صفحات تسوينه عن كل اللي سويتيه
وراح يعطونكم ورقة فيها الاشياء اللي تضمنونها جوت التقرير
و20 على المناقشة الشفوية معهم
والمناقشة الشفوية تكوني مسوية باور بوينت وفيه برضه كل شي تقريبا وتعرضي عليهم ويناقشوك

نجي برضه عن المناقشة اللجنة كانت 3
أ/ كوثر-أ/ بهية-د.سمر
مثلا فيه بنات عرضو ولا سألوهم ولا سؤال بس قالو لهم شكرا :-)
وفيه بنات انا مثلا
رجعو سألوني الأسئلة اللي قبل

تقريبا هذا كل شي
الأشياء الاضافية
-في المدرسة وقبل نستلم ملفاتنا
خلتنا مشرفة اللغة نحضر درس ونشرحه قدامها عشان تقيمنا ونستفيد من خبرتها
-الأماكن الثانية اللي سمعت ان البنات تتدربو فيها
*الجاليات الاسلامية ومكاتب الدعوة والارشاد
*اكاديمية نفيسة
*الروضات
*المدارس الحكومية
*المستشفيات((اما ككتابة تقارير أو كمساعدات))
المدارس الخاصه
*شركات غريبة أول مره اسمع فيها

تقريبا هذا كل اللي عندي
الله يوفقكم يااارب ويجعلها تجربة جميلة جدا وتنتهي بدرجات عااالية وترضيكم
اذا افتكرت شي زياده حأكتب

[مســـألة وقت]

ايوووه بخصوص انو تاخذي مكان تمارسي فيه اللغه
يعني زي مثلا مااعتبر مارست اللغه
فمن ضمن اسئلتي انو ليه ماشاركتو ف كذا وكذا
وليه ماعرضتو تشرحو وتختبرو البنات وتسوو كوزات واشياء كذا
يعني جدا قعدت لي باعتبار انو مابذلنا مجهود في لغتنا

الله يغفر لنا ويغفر لهم

[LADY GAGA]

كفيتي ووفيتي ياعسل..معليش لونلي مصختها شوي في موضوعك ..اتحمليني
بس ياليت المشرفات يثبتو الموضوع عشان يكون مرجع للطالبات سواء انتساب او انتظام
واي طالبه تنهي التطبيق والتدريب تجي تسدح تجربتها هنا عشان الكل يستفيد واأنشاء الله مالراح ننساها من الدعاااء
بنات الانتساب ..اللي تدربو وطبقوا ياليت تقولوا ايش صاار وكيف كانت التجربه ولكم جزيل الشكر

[دايخة في كلية بايخة]

بالنسبه للتدريب 2 : أنا اخذتو في الصيف لأنها هي الماده الوحيده اللي باقيتلي ؛؛ أخذتها مع الدكتوره ريم مغربي <<ربي يسعدها مرررره طيوبه ومتعاونه .. الماده عباره عن : تختاري مكان عشان تتدربي فيه ,, طبعا في الصيفي مافيه مدارس فأنا اخترت البنك الأهلي وبالقوه رضيو البنك ؛؛ يعني الاغلب لازم واسطات ومن الكلام دا ؛؛ بس فيه بنات اعرفهم راحوا للفرع الرئيسي عند مدير التوظيف وطبعا بعد روحه وجيّه وافقولهم .. يعني الرجال مع بعض يجيبوا نتيجه بس لو تروحي فرع النساء مررره معقّدين ؛؛ بعد مااخذت المواقفه واخترت الفرع ,, انا اخترت فرع صاري ,, بصراحه كانت تجربه جدا رائعه ؛؛ كان معايا 3 متدربات بس كانوا تدريب بنك يعني مو زينا جامعه ,, مررره انبسطنا واتعرفت على اشياء كثيره ,, طبيعة العمل : اممم كنا نتعامل مع العملاء ونساعدهم في الاجراءات وطباعة الاوراق ,, تعبيتها ,, مطابقة التواقيع ,, ترتيب ملفات ,, يعني بصراحه كان الشغل حلو وخفيف .. صح ماكان متصل بطريقة مباشره بالقسم (اللغه الانجليزيه ) بس كنت احاول قدر الامكان استخدم لغتي مع العملاء الاجانب وكانو كثير ؛؛ ممرضات فلبينيات وافريقيات ,,وفيه كمان عملاء اجانب يعني هذا الشي خدمني مررره وخلاني امارس اللغه بشكل اكبر .. طبعا الدوام كان من 9 ونصف الى 4 ونصف ,, يعني مااخذ معايه التدريب اكثر من اسبوع ويوم .. طبعا قبل مااخلص تدريبي لازم انسّق مع المشرفه اللي هي الدكتوره ريم عشان تجي البنك وتقيمني .. التقييم كان عليه 20 درجه ,, سألتني فيه عن طبيعة العمل واتكلمت مع مشرفتي في البنك شويه وراحت .. في نفس الزياره تدّيك ورقه فيها الخطوات الرئيسيه لكتابة التقرير ( يكون عبارة عن 5 ورقات ) يتضمن نقاط كثيره وتقدري تكتبي فيها وبعدين تسوي عرض مختصر عنها .. وتجي يوم وتقدمي التقرير وتعرضي وصلّى الله وباركـ ..

^ هذا ردي في التجمع ؛؛ وترى الماده جدا ممتعه والحمدلله كثير اعرفهم جابوا a

[lee min ho]

انا اخذت التدريب في الصيف في جمعيه مراكز الاحياء
وكنت مره مرتاحه الحمدلله
بالنسبه للاشاء اللي عملناها : تدريس البزارين كل شي انجلش فنون قصص مسبح وحاجات ز كذا
اعمال اداريه يعني طباعه نسخ اوراق واشياء ثانيه نسيتها
وبث
بصراحه مره وناااسه هناك وماتحسي انك بتدربي
وبالنسبه للمناقشه انا ناقشتني الدكتوره ابتسام باجري وبهيه قشقري واعتقد نوف الخطابي مو فاكره
اهم شي عندهم كان اللغه وانا الحمدلله لغتي ممتازه وبالنسبه لي كانت المناقشه مره سهله واخذت 97 الحمدلله
وترى السالفه ماتخوف بالعكس خذيها بسهاله ورح تمشين فيها

وبالتوفيق للجميع