الى المشرفه @ساكنه في بيتنا @ والى كل من لديه معلومه عن الحضانه

[الانس]

السلام عليكم ورحمة الله وبركاته

كيفكم جميعا .. ومبروك للجميع

استفساري بخصوص الحضانة الموجودة في الجامعه

انا طالبة انتساب وودي أحول لإنتظام
بس تحويلي متوقف على مدى ايجابية الحضانه وسلبياتها
لأنه عندي طفله عمرها سنتين و 10 شهور
وماعندي أحد أقدر اسيبها عنده

فلو كانت الحضانه مكان آمن ونظيف ومعاملتهم كويسه مع الاطفال ممكن أحط بنتي عندهم وأحول انتظام

ولو كان المكان مايأهل .. افضل اني أكمل انتساب ..

فياريت اللي عندها أي معلومة مهما كانت بسيطه تكتبها ولا تبخل علي فيها

سواء عن وقت دوامهم , أو معاملتهم , نظافتهم , العاملات عندهم , رسومهم , كل كل شي

واتمنى من أي طالبة جربتهم واتعاملت معاهم تفيدني بخلاصة تجربتها

وأجركم عند ربنا مايضيع ان شاءالله

وجزاكم الله عني كل خير وسعادة 00 في انتظار ردودكم

أختكم الانس

[بنت جدة المنكوبة]

أظن الترم ب5000ريال
وتعاملهم نظيف مرا
وفي بعضهم إلي يشتغلوا هناك 3منهم صحباتي
ودوامهم يخلص 2 أو2ونص

[الانس]

جزاك الله خير ياقلبي .. ماقصرتي

بس انت قصدك 5000 ولا 500 ؟

قلت يمكن زاد معاك صفر بالغلط ... ههههه

[بنت جدة المنكوبة]

5000
والله أعلم من الأفضل تنتظري أحد غيري يرد لأن مو متأكد
بس كنت أعرف وحدة من صحباتي كانت تبغى تدخل بنتها بس علشان الغلا ماقدرت
فأظن والله أعلم وأتوقع وأعتقد Ithink إنو 5000ريال

[الانس]

إي والله حبيبتي ‏
5000‏ مرررره كثييير ‏
بس ان شاء الله يكونوا عملوا تخفيض
تسلمي ياقلبي ؛ الله يسعدك ماقصرتي
في انتظار البقيه ؛ ؛ ؛

[ساكنه في بيتنا]

و عليكم السلام و رحمه الله و بركاته



حطيها و انتي مرتااااااااااااااااااااااحه ..

لو سألتيني قبل سنه من الآن كان الكلام شي تاني .. بس تحين مررررره الوضع اتغير

مررررررررررره المكان مريح و نظيف و ان شاء الله تكوني مرتاحه انتي و بنتك :) ..

المعلمات + العاملات اللي هناك كلهم نظيفين و أخلاق ومعاملتهم حلوه ..

الدوام يبدأ من 8 المفترض .. بس اللي يكون عليها مناوبة تكون موجوده من 7 ونص ..

و ينتهي 2 بس اقصى حد ممكن تكون مفتوحه لـ 3 و تكون معاهم المعلمة المناوبة ..


الرسوم 5000 في الترم .. بس سمعت انها حتصير 6000 ..


ممممم ما اظن فيه مكان باقي .. لأنو التجسيل بدأ من بدررري تقريبا قبل شهر ونص ..

في كل الأحوال أول ما يبدأ الدوام تعالي شوفي و اسألي ,, الإداره موجوده في غرفه 5 .. اول ما دخلي من الباب على طول تلقيها في وجهك ..


اي سؤال تاني نحن حاضرين ..


بنت جده .. مين اللي تعرفيهم هناك ؟؟

[بنت جدة المنكوبة]

أعرف صفاء وإيمان وسمية وانوار

امسحي اسمي واكتبي بنت جدة
http://ccart.kau.edu.sa/Contacts.asp..._ID=138&Lng=AR
وأسمائهم موجودة هنا

[ساكنه في بيتنا]

المشاركة الأصلية كتبت بواسطة بنت جدة المنكوبة أعرف صفاء وإيمان وسمية وانوار امسحي اسمي واكتبي بنت جدة http://ccart.kau.edu.sa/contacts.asp..._id=138&lng=ar وأسمائهم موجودة هنا

:)

حماس .. انا كمان اعرفهم و صحباتي ..

[بنت جدة المنكوبة]

غريبة تعرفيهم وماتعرفيني دولا دفعتي
طيب تعرفي رولا ميمني
حليمة الصالحي
لمياء عسيري
صحارى

[ساكنه في بيتنا]

اعرف لمياء و رولا ..

ممممم اغلبهم معايا في التخصص عشان كدا اعرفهم .. بس صفاء عرفتها من مركز الطفوله .. ( الروضة ) ..