استفسار عن قسم مهارات الاتصال الرجاء عدم التطنيش

[قصة وانتهت]

السلااااااااااااااااااام

ياصبايا ياحلوووووين

انا توي كتكوته خرجت من البيضة بعد ما جلست طوووول السنة التحضيريه جواها
المهم سكنوني في كلية الاداااب
ومارااااق لي ولاقسم
كلها ماتصلح لي ابد
وفي قسم نوعا ما عجبني
بس بسأل هو فيه قسم خاااااص له
وهل القسم جديد
وسهل والا صعب
والفرص الوظيفيه فيه كييييف


قسم مهارات الاتصال

فيه قسم كذا والا يتهيئ لي

بلييييييييييييز افزعووووو هذا وقت فزعتكم ياحلواااااات

[تفآحة نيوتن}~]

مافي قسم مهارات اتصال (:

هوا مهارات اتصال كان وحدة مهارات الاتصال ويشمل الدكاترة والاساتذة الي يدرسو مادة مهارات الاتصال

الي اخذتيها في التحضيري وحولوها لقسم

بس عموما مهارات اتصال تندرج تحت قسم الاعلام حتاخذي زي ذي المواد

واحلى وامتع كمان (:

موفقة عزيزتي


ايش يعجبك ولأيش تهتمي وميولك امكن نقدر نساعدك في التخصص الي يناسب ميولك

اذا تحبي الحاسب قسمنا يرحب فيكي << تروج لقسمها ^__^

[قصة وانتهت]

يسعدك ربي تفااحهـ
اساسا انا ادري عن شي

بس قسمكم اش فيه مسارات واش هوا دا علم المعلومات ذكرني بالمكتبة وااااكرهي لها

شوفي انا من 4 سنين اتمنى قاااانون فجأة انرمي هووون حراااااااام وربي
بس يالله الخيرة فيما اختاره الله

[تفآحة نيوتن}~]

المشاركة الأصلية كتبت بواسطة قصة وانتهت يسعدك ربي تفااحهـ اساسا انا ادري عن شي بس قسمكم اش فيه مسارات واش هوا دا علم المعلومات ذكرني بالمكتبة وااااكرهي لها شوفي انا من 4 سنين اتمنى قاااانون فجأة انرمي هووون حراااااااام وربي بس يالله الخيرة فيما اختاره الله

للاسف تفكيرك عن قسمنا غلط :/

القسم اتغير عن أول والخطة والموواد كلها أتغيرت واساسا القسم راح ينتقل لإدارة واقتصاد

لأهميته ..

شوفي ذا الموضوع http://www.skaau.com/vb/showthread.php?t=249496

لو شفتي خطة قسمنا راح تلاحضي اغلب المواد تتعلق بالحاسب

يعني زينا زي قسم التصميم الداخلي التصميم الداخلي يتناول الامور الخارجية عكس هندسة معمارية

الي يتناول ادق التفاصيل والامور والبناء والهيكل (:

نفس الفرق بيننا وبين قسم الحاسب

والفرص الوضيفية في اي مكان تتوفر مستشفيات مؤسسات بنوك مراكز معلومات .. الخ

اما المسارات مافي الا في الماستر الي ماذكر من مساراته الا تقنية معلومات الي هوا انا ابغاه

وابغى اكمل ماستر عشانو ^__^


اما القانون اذا طموحك تصيري محامية فقسم الدراسات الإسلامية يحققلك هذي الرغبة ويأهلكِ لهذي الوضيفة

لأنو قريبتي دراسات وراح تشتغل محامية

اتمنى أكون افدتك بشكل كافي وربنا يوفقك ان شاء الله والخيرة فيما إختاره الله ^_^

[قصة وانتهت]

تصدقي
بكلاااامك دااا احتل علم المعلومات 80% من تفكيري في اختيار التخصص
بس لازم ادرس الفكررره زين

ربي يسعدك ياعسل
ومنجد لو توفقت بدا القسم كلوو بسببك وبيدك
يارب يوفقك ويحقق كل امنيااااااااتك

[تفآحة نيوتن}~]

ربنا يوفقك ياعسل ويختارلك الي فيه الخير لكي دنيا واخرة (:

فكري كويس عشان ماتتورطي في النهاية

واستخيري وربنا راح يختارلك الأفضل

[شذى الليالي]

انا كمان كنت اتمنى علم نفس او اعلام بس لما فتحت الاوديس وشفت علوم مكتبات ومعلومات جاتني
صدمه مرررره كبيره وخفت كثثثير لما شفت الخطه حسيت انو المواد دسمه شويه وكثيره يعني في
السمستر الجاي حدرس سبع مواد!!! اربعه تخصص وثلاث من برا بس انا نفس الشي كلامك
عن التخصص اقنعني نوعا ما وحسيتك حابه التخصص


يلااا الله يكتب لنا اللي فيه الخير يااااااااارب

[حلاوووه]

تفاااااحه تشكورااات ياقدعه ع الموضوع الحلو زيك

[تفآحة نيوتن}~]

شذى ماحتدرس سبعة مواد النظام مايسمح بأكثر من 18 ساعة في الترم

يعني ستة مواد ونازل (:

المواد تشوفيها دسمة لكن مرا سهلة طبعا مو كلها

يعني زي انترنت عارفة ايش عملي عن المدونات وتدريب على الفرونت بيج تصممي صفحة

وتقنية تاخذي تقنيات محددة وكيف تتكون والفيروسات وانواعها واشياء مرا عبيطة

وسائط متعددة تاخذي عن الموفي ميكر وزي كذا

يعني اساسا تتعلمي وتستمتعي وتستفيدي كمان

وبعضها شوية كلام زي مدخل الى علم المعلومات تاخذي عن اكثر من حاجة منها النظم الخبيرة

والذكاء الاصطناعي واشياء زي كذا

لاتحكمي على المسميات اسألي اولا ثم احكمي

ربنا يوفقك ياعسل




حلاوة العفو ياقمر (: