إجراءات السكن والمستندات المطلوبة | للطالبات ] ،

[Eman al-hindi]

السلام عليكم ورحمة الله وبركاته ،

طبعاً لإنو في ناس حايسة وكتير ناس راحت للسكن ، وهيا مو مجهزة أوراقها والأشياء المطلوبة منها
فحبيت أوضح المطلوب وأشرح الوضع ، والمطلوب بالتفصيل :

* ملف أخضر علاقي يحتوي على :
- 8 صور شخصية ليكي
- سند القبول + صورتين منه
- شهاداتك خدي الأصل وصورة أو صورتين من كل شهادة
- شهادة حسن السيرة والسلوك وصورتين منها
- كرت العائلة وصورتين منه مع الأصل
- تعريف العمدة وصورتين منه
- بطاقتك الجامعية
- بطاقة الأحوال
- الكشف الطبي ( أفضل تعمليه في الإدارة الطبية في جدة وإزا سويتيه عندهم لازم ترجعي اليوم التاني عشان يدوكي نتيجة التحليل + الأشعة ،
لكن إزا سويتيه في مكان تاني فلازم تروحي لمدير الإدارة الطبية للجامعة عشان يختملك عليه )


وبخصوص الوكالة ، فإزا كانوا محارمك ( أخوكي ، عمك ، خالك ، جدك ... ) فهدول ماتحتاجيلهم وكالة شرعية ،

أما إزا قريبك من الرضاعة أو ولد أختك لازم وكالة شرعية عشان تثبتي إنو دا يقربلك !

وبالنسبة لوكالة المحارم ، فتحتاجي تاخدي من كل واحد صورتين شخصية له + صورة من الهوية ( بطاقة الأحوال )

وطبعاً وجود والدك معاكي جداً مهم ، لإنو حيعبي اوراااااااق يا كترها :/

،،

أولها :

يدوه ملف أبيض .. يقعد يعبي كلااااام فيه و بعدين تجي صفحة الوكالة يحط فيها اسماء اللي مسموحلك تطلعي معاهم وبطاقة أحوالهم و رقمهم أظنّ ،

يعني أنا كتبت ماما واختي واخويا وخالي وعمي ;d

وفي آآآخر صفحة تجيكي مربعات فيلها عن اللي حتوكليهم تحطي صورة لكل واحد " بس للاولاد " و تكتبي عنهم شوية معلومات يطلبوها منك ..

بعد كدا .. تديهم الملف الأحضر اللي سويتيه وفيلو كل الأوراق اللي طالبينها ياخدوها ويدوكي ملف تاني ومعاه ورقة تصريح ، يقولولك خشي جوا

تخشي جوا ياخدوا منك ورقة التصريح ويقولولك ادخلي جوووا وروحي للإدارة الداخلية وتمشيييييييي حتى توصلي

ولما تروحي هناك ياخدوا الملف منك والأوراق اللي تهمّهم ، ويرجعولك الباقي وتكتبي اسمك عندهم وإيميلك ورقمك والبنت اللي ترغبي تسكني معاها إزا تعرفي أحد ..

وبعدين يدوكي أوراق تعبيها ولما ترجعيلهم الأوراق يدوكي 3 أوراق تانية ، تطلعي برا وتديها لأبوكي يوقعها ويصدقها المشرف اللي عند الرجال ويطلب أبوكي منه " إقرار أو أمر سكن "

وتدخلي جوا معاكي الأورق اللي وقعوا عليها ،، مع الإقرار فتقوم الآدمية تاخد الأوراق منك وتصور الإقرار وتتديكي نسخة منه ..


وطبعا تاخد بطاقة الجامعة منك فتقلك هادي النسخة تاخديها وتدخلي بيها الجامعة يوم 10/10 في اختبار الانجليزي ، لما يسألوكي عن بطاقتك تقوليلهم أنا بنت سكن ودا الإثبات

وبسسسسسس .. بكدا تسيري بنت سكن والله يحفظك ويسهل عليكي :D

[بشائر الفرح =)]

يعطيك العافيه .. كفيتي ووفيتي صراااحه ..

أما يوم التسجيل في السكن كان حكايه لا تنسى ^^ من كثر الروحه والجيه والله بذلنا مجهووود ههههه

مبارك لكل اللي قبلوهم بالسكن .. و الله يوفق اللي بيقدموا وييسر لهم إن شاء الله

أهم شي وصارت لي قصه فيه .. سند القبول ( الورقه الصغيره اللي مكتوب فيها ألف مبروك تم قبلوك ) هذي تصوووووورها أكثر من نسخه وتخلوها معاكم لما تروحوا السكن لإنهم حيطلبوها > مجرد تأكيد للمعلومه الذي ذكرت فوق ^^

شكراً يا قموره على الموضوع المميز والله يجعله بميزان حسناتك إن شاء الله
عينه ترعاكِ .!

[MeeNo92]

ما شاء الله كفيتي ووفييتي


جد جد ريحتيييني ... احب اعرف انا ايش رايحة اسوي ,مدري ليش اتطمن :$

يلا ان شااء الله يا ربي تتسهل واصيير بكرة طالبة سكن


مرة مررررة ثاانكس , الله يجزاكي الف خيير

[Rmmosh]

سؤال :لازم بابا يجي معايا وقت تعبئة البيانات لانو مهو موجود عادي يكون اخويا بداله ؟؟

[Eman al-hindi]

بشائر الفرح :

هههه من جد والمشي الكتيييير تحت الشمس :/

الله يسعدك يا رب ، تسلمي


Meeno :

هههه بسيطة كلنا كدا ;D

يلا الله يوفقك ويسهل عليكم وتوصلوا بالسلامة إن شاء الله ..

[Eman al-hindi]

المشاركة الأصلية كتبت بواسطة rmmosh سؤال :لازم بابا يجي معايا وقت تعبئة البيانات لانو مهو موجود عادي يكون اخويا بداله ؟؟

مو موجود يعني مسافر ولا ؟

ينفع بس لازم يعمله أبوكي توكيل :/

وغير كدا في بيانات كتيرة عن ولي أمر الطالبة نفسو ،

[Rmmosh]

يب مسافر .. طيب مو مشكله نسوي توكيل << بس كييف؟ !

وعن البيانات عاتي نكلمه من الجوال وهو يقولنا شو نكتب : )

[Eman al-hindi]

المشاركة الأصلية كتبت بواسطة rmmosh يب مسافر .. طيب مو مشكله نسوي توكيل << بس كييف؟ ! وعن البيانات عاتي نكلمه من الجوال وهو يقولنا شو نكتب : )

اها :/

ما أعرف والله ، بس المفترض أبوكي يروح عند كاتب العدل ويقلو بدي أوكل ابني في دي الشغلة

بس طالما إنو مسافر فمدري إيش يسوي :/

[Rmmosh]

لازم يروح عند كاتب العدل !!!

يؤيؤ شو هالمرمطه : (

الله يسهل بس

[Dr.Maria]

هلاااا اختي ..

الله يجزاك خير .. وربي اشكرك على الموضوع .،

بس عندي سؤال انا سند القبول ضاع مني .. لأن الموظفه اصلا ما قالت لي عن اهميته ..
هل هوا ضروري ؟؟
يعني ع الشهاده مكتوب ان تم قبولي وكل شي ..

ابي اسأل بعد من كم الساعه لـ كم .. يستقبلو الطالبات للسكن ؟


يسسسلمو ايمان ..