الخطاب الذي يتكلم عن سنة الامتياز ..

[دافئ الإحساس]

السلام عليكم ورحمة الله وبركاته


في خطاب تم وكان جاهز من قبل اختنا بيو كيميائية

وكان يتكلم ع سنة الامتياز


ياريت تقولولي اش سار معاكم بهادا الموضوع

..؟؟

.......

بالنسبة ليا قدمتوا لرئيس القسم الدكتور جلال


بعد ما اخدت تواقيع اغلب الطلبة لكن ......


بلا جدوى



اللي حصل فهمتوا مقصدي من هادا الخطاب


وفهمتوا نحتاج سنة الامتياز اللي نحتاجها اش اسبابها

ولكن قالي لا تعطيلي الورقة دي !!



قلتلو لي !


يقولي ما بيدي شي انا شخصيا



قلتلو بيد مين لو مو بيدك !


قالي بيد اللي هما اعلى مني وبعدين مافي شي اسمو سنة امتياز !


اش الكلام الفاضي


قلتلو لو نحنا خايفين ع مستقبلنا دا اسمو كلام فاضي !!


قالي ومين قالك محد بيتوظف


بالعكس يا ابني الكل بيتوظف وجميع الطلاب وحتى بقسم الطالبات بيتوظفو ولله الحمد


قلتلو متاكد !


قالي طبعا شوفهم كلهم بالشركات وبعضهم مدرسين بالمدارس وبعضهم بالمستشفيات


قلتلو دكتور بس هما كده فنيين وفنيات




يقولي بغض النظر فنيين او شي اهم شي بيتوظفو


قلتلو الكل بيتكلم عننا وما بنلقى اي كلام غير دا


قالي انا بتوصلني اخبارهم كلهم وحتى من قسم الطالبات بيتوظفوا


اما بالنسبة لسنة الامتياز هادا شي ممنوع ومافي شي اسمو سنة امتياز

للكيميا الحيوية


اش السبب دكتور ؟؟


لنو سنة الامتياز فقط للطب والعلوم الطبية التطبيقية

يعني للاقسام الطبية فقط


وبعدين لو رحت لامريكا حتى وشافو واحد متخرج من الكيميا الحيوية

واخد سنة امتياز حيستغربو


لنو حتى في العالم كلو مافي شي اسمو سنة امتياز لطلاب وطالبات الكيميا الحيوية


وقلتلو الحل .؟

قالي الدكتور طه قمصاني >>حسبي الله بس

هوا اللي مسك هرجة الاخصائي

يعني هوا اللي ورى هرجة معاملة انو نسير مو فنيين في المسمى الوظيفي

بل اخصائيين


لنو قالي نحنا ارسلنا معاملة بهذا الخصوص وحتطول

يعني تقريبا حتقعد سنة الى سنتين ومو بعيد اكتر


ومسكت الباب وخرجت وانا مهموم

.............


بالنسبة ليا مني شايل هم الدراسة قد مني شايل هم الوظيفة


الله يسهلها يارب


والحمدلله يارب ع كل شي

[shoshooooo]

وين الي توظفوا من الطالبات كل الي اعرفهم قاعدين في البيت ,
كرف اربع سنين ع الفاضي .

[نسيم الوجود]

قالي انا بتوصلني اخبارهم كلهم وحتى من قسم الطالبات بيتوظفوا

...!
يَ رجُل ..لو توظفو على قولتك يَ دكتور جلال ماتوقع ان شكاوي الخريجين وصلت لبرنآمج يَ هلا

وحتى لو لو فرضآ بنتوظف يبغالنا خطه جديده بحياتنا فوق البكالوريوس
مدآرس =لازم كورس تربوي
مستشفيات = نحوس لين ناخذ التصنيف اول عشان ترضى علينآ الصحه
وشركات ممكن تطلب دورات معينه ويَ لييييل

انآ من حقي اتوظف بالبكالوريوس حقي مو اتمرمط بأشياء ثانيه

::

ومآ دآم الشغله فيها (اللي أكبر مني )فـ يصير خير ان شالله ...!

::

اش اسم الدكتور جلالـ ايش ؟ عشان انا ناويه اذا تخرجت ارسله خطاب ابشرهـ اني توظفت <










نسيمــ

[دافئ الإحساس]

المشاركة الأصلية كتبت بواسطة shoshooooo وين الي توظفوا من الطالبات كل الي اعرفهم قاعدين في البيت , كرف اربع سنين ع الفاضي .

المشكلة يا شوشو اش اقولو

انتا كداب!!

ولا اقولو بتكدب عليا ولا ايش !!

ما ينفع الا اني اسايرو وخلاص

وحسبي الله ونعم الوكيل

[دافئ الإحساس]

المشاركة الأصلية كتبت بواسطة نسيم الوجود ...! يَ رجُل ..لو توظفو على قولتك يَ دكتور جلال ماتوقع ان شكاوي الخريجين وصلت لبرنآمج يَ هلا وحتى لو لو فرضآ بنتوظف يبغالنا خطه جديده بحياتنا فوق البكالوريوس مدآرس =لازم كورس تربوي مستشفيات = نحوس لين ناخذ التصنيف اول عشان ترضى علينآ الصحه وشركات ممكن تطلب دورات معينه ويَ لييييل انآ من حقي اتوظف بالبكالوريوس حقي مو اتمرمط بأشياء ثانيه :: ومآ دآم الشغله فيها (اللي أكبر مني )فـ يصير خير ان شالله ...! :: اش اسم الدكتور جلالـ ايش ؟ عشان انا ناويه اذا تخرجت ارسله خطاب ابشرهـ اني توظفت < نسيمــ

قولتلو ع هرجة يا هلا

قالي مادري انو سار كده

بس قالي ها شفت اني دريت قبلي


ونحنا شغالين ع انو ناخد المسمى الوظيفي كاخصائين

واسمو

جلال الدين اعظم جلال اولياء خان

[دافئ الإحساس]

في واحد دقيت عليه وكلمتو امس وهوا اظن من دفعة يا 07 او 06


المهم

وقلتلو اش سار معاك في الوظيفة


فاللي سار بعد ما اتخرج قعد سنة او سنة ونص بدون وظيفة وبعد كده لقى في

المستشفيات وكده


لكنو ما قبل ورفضها


سالتو السبب !!


يقولي الدوام من 8 الى 4 العصر والراتب 5000 فقالي مع نفسهم


والشركات يكرهها ويكره دوامهم


فالآن هوا يشتغل في مدرسة اهلية ابتدائية ويدرس مواد الدين

والراتب 4500 ويقولي مبسوط ودوامي ينتهي الساعة وحدة الا ربع

والاجازات مع الطلبة ومره تمام والعب كورة مع الصغار وقت الطفش

...............

قالي انصحك بالتدريس بس خد ترم تربوي

قلتلو لي واش الفرق بينك وبين اللي ما اخد التربوي دا !

قالي الترم التربوي اول ما تتوظف من بعدو براتب 8400 ويزيد كلي سنة اظن 400

فيقولي المستوى افضل وافضل

ونصحني بالتدريس منها راتب ومنها اجازات كلي الساعه والتانية مع الطلبة ومنها اخرج بدري من الدوام مو اطلطع للساعه 4 العصر


................

سألت امي بهذا الخصوص لنها ممرضة فبدي النصيحة


قالتلي الصحة افضل من التعليم

سالتها ليش ..!


قالتلي العلاوات تكون افضل من التعليم وصحيح العمل متعب الين 4 العصر

لكن راتبك يزيد اسرع من المدرس

وغير كده لو شافو شغلك مزبوط وشغلك كلي مالو يتحسن مو بعيد يخلو رئيس قسم

المختبرات في المستشفى



قلتلها انا بس فني والاخصائي هوا الاولى يكون رئس المختبر


فقالتلي مو كلي اخصائي شغلو تمام


والاكتر دي الايام الفنيين شغلهم احسن من الاخصائي بمليون مره

والترقيات في الصحة تجيك افضل من التعليم

..............

نرجع للادمي اللي كلمتو ... قالي كمان ع هيئة التغذية والدواء

طبعا زي ما الكل عارف راتبها الاساسي 12 الف

فقلتلو متعقدين في القبول ولا سهالات

قالي يقبلو اي شخص وما يتعقدو ابداً


بس المشكله اللي واجهت جمييع اصحابو انهم يرموهم بعيد عن جده


يعني في الحدود الشمالية وعرعر والشرقية والرياض

قلتلو ماقدر انقل لجده ؟


قالي ولا بعد 5 سنين تقدر تحول... يقولي حتتكي هناكـ خلاص


فجاتو الوظيفة دي بس رفضها لبعده عن اهله

فأانا لو جاتني ان شاء الله ورموني للشرقية محا اتاخر عليها ويفضل في الجبيل

اما لو الحدود الشمالية والرياض ومدري فين .. فالله يسهلهم

...........

حبيت اقلكم ببعض الوظائف وميزاتها عن بعض

[بيو كيميائية ^_^]

مع نفسه

آآخ ويبوني أتفائل

أنا خلاص إستسلمت ويأست :(

هيئة الدواء فيها حق بنات ؟؟

وعلى فكرة صاحبك إلا شاف 5000 في مستشفى يعتبر كويس مستشفيات دوامين وراتب 1000 وشوي أو 2000

:( :(

[دافئ الإحساس]

اش قالتلك رئيسة القسم ع الخطاب ..؟

.........

هيئة التغذية والدواء ماعندي فكره عنها الصراحة لو فيها بنات او شي

الله اعلم

[بيلف]

ماشاء الله عليكم برفو لكم

حلو خططنا أكبر من نتخرج بلا وظايف

الله يقويكم أكثر

[لوفه]

واحد باكستاني مسؤول عن مصيرنا
ياعالم لازم مانسكت دا تعب 4 سنين و نكمل ع بديناه
بيو اتفائلي وخلي جواك مقولة "لايأس مع الحياة ولا حياة مع اليأس "