استفسار هام جدا بخصوص كلية العلوم

[no0ona.s]

السلام عليكم ورحمة الله وبركاته
انا حابة استفسر عن اشياء مهمة عن كلية العلوم اول شي انا اتسكنت حاسب ومالي رغبة في ابدا وأبغا احول لكلية طبية ولكن التحويل للكليات الطبية بعد سنة يكون ورحت كلية العلوم الطبية التطبيقية عشان احول مختبرات وقالولي انو مافي دحين وقفل ومافي غير بعد سنة وقالتلي ارفعي معدلك وتعالي انا معدلي دحين 4 ونص تقريبا بس المشكلة قالتلي انو غالبا ما اقدر احول من كلية الحاسب لكلية طبية يعني ما اقدر احول من حاسب لمختبرات فقالتلي روحي اتسكني في كلية العلوم كيمياء حيوي هوا اقرب شي وارفعي معدلك ونحولك بس انا صراحة مارحت لأنو خفت ما اقدر احول واتورط واجلس في قسم انا ما ابغا بس دحين صراحة انا شفت انو مرة ما اقدر اكمل في الحاسب ولازم احول بأي طريقة هل في امكانية انو اتسكن دحين في كلية العلوم كيمياء حيوي او كيمياء يعني اخد مواد عامة عشان اقدر ارفع معدلي انا ادري انو اتأخرت مرة بس كنت احاول اتأقلم في الحاسب بس مررة مررة ماقدرت وابا احول وسمعت قبل كدا في بنات حولو لتخصصات تانية بعد شهر من الدراسة بس للمعلومية انا لمن رحت استفسر في كلية العلوم التطبيقية كان تقريبا قبل اسبوع ونص او اسبوعين لمن قالتلي روحي اتسكني في العلوم بس دحين مني عارفة لوسمحتو اذا تعرفو اقدر احول ولا لأ عشان لازم يوم الاحد اروح اشوف واروح لمين بالزبط في كلية العلوم لأنو منجد حالتي صعبة واكتشفت انو محا اقدر امشي في دي الكلية واخاف اجلس الترم دا فيها ويطيح معدلي مرة لأنو الوضع مرة مو ماشي معايا فعشان كدا الي يعرف يفيدني لوسمحتو مررة ضرورري وشكرا

[بيو كيميائية ^_^]

و عليكم السلام

بجد ياريتك جيتي قبل كان أرشدناكـ أول شيء أنتِ ماشاء الله معدلك عالي و في ترمين راح ممكن يوم 4.75 و فوق يعني أنتِ 100% راح تتحولين

الحين روحي عمادة القبول و شوفي جربي حظك و لو يصير تعتذري مثلًا هالترم و تبدي الترم الجاي في العلوم و عادي تتحولين فأنصحك تعملي هالطريقة عشان لا ينزل معدلك

و لا تنسين إن التحويل مرة وحدة فسأليهم لو تحولتي لعلوم تقدرين تتحولين لعلوم طبية

فما حد يقدر يفيدك غير العمادة أسأليهم و شوفي ايش ممكن تعملي

هذا اللي أقدر أفيدك فيه بصراحة ما أقدر أفتي من راسي و أضيعك روحي العمادة عشان هم الأضمن

و إذا مرة تعسرت معاكـ أنصحك تروحي كلية خاصة و حققي حلمك لا تجلسي في شيء أنتِ مو متقبلته و لا قادرة تمشي معاهـ

أتمنى تنحل مشكلتك و تحققين حلمك يارب

و خبريني ايش يصير معاكـِ

[no0ona.s]

يسلمو حبيبي مرة شكررا حأشوف عمادة القبول والتسجيل إن شاء الله وفكرت برضو زي ماقلتي لو في اسوء الاحوال لاسمح الله اعتذر الترم دا عشان ماينزل معدلي بس مني عارفة كيف نظام التحويل اضن انو لازم اكون سنة كاملة في كلية العلوم اخاف لو درست فيها الترم التاني بس مايرضو يحولوني ومن ناحية اروح جامعة خاصة والله رحت كم جامعة بس ما اتسهلت مررة عشان كدا انا بأحاول احول من هنا بس بأسالك الكيمياء والكيمياء الحيوي معتمد لاني سمعت انو الكيمياء الحيوي مو معتمد برة فبس ابا اعرف ومن ناحية التحويل انا قالتلي الحرمة انو اتسكن في العلوم وبعدين اروح مختبرات يعيني المفروض انو مسموح انو احول مرتين وحتى في بنات قالولي انو عادي التحويل مرتين زي كدا بس انا ابا احاول انو دحين احول علوم عشان ما اخش في متاهات اكتر من كدا بس دحين التحويل من كلية العلوم نفسها ولا من عمادة القبول والتسجيل ؟

[LeLou]

و عليكم السلام و رحمة الله و بركــاته..

كلام بيوكيميائية مزبوط 100% الله يعطيها العافية..

التحويل من عمادة القبول و التسجيل العلوم ما لها دخل بالموضوع..
+
التحويل بعد سنة المقصد منه أنه التحويل للكليات الصحية يكون بداية كل سنة..
لأنه نظام الدراسة عندهم سنوات مو أترام..
لو اعتذرتي ترم أو لا دا ما له شغل..

بالنسبة للتحويل في فرق بين التحويل و تغيير التسكين..
تغيير التسكين ما يعتبر تحويل..
شوفي أسأليهم و جربي أنا أعرف ناس حولت أكثر من مرة بس داخل الكلية نفسها بين الأقسام مو من كلية لكلية..
على حد علمي التحويل مرة واحدة..
عمومًا انتِ خبر مشكتك عند العمادة..

ربنا يعينك و يفتح عليكِ||~

[no0ona.s]

اها اوكي شكررا بس كيف يعني التحويل مو نفس تغير التسكين يعني اذا دحين رحت علوم ايش يعتبر واذا اعتذرت الترم دا والترم التاني رحت علوم يكون ايش تسكين ولاتحويل مني فاهمة صراحة

[بيو كيميائية ^_^]

أنا أتوقع و لست متأكدة مجرد توقع من راسي لو إعتذرتي الحين ممكن لو حولتي يعتبرونه تغير التسكين لأنك مادرستي شيء

بس مثل ماقلت لك روحي العمادة و سألي كل اللي أشياء هذه و إكتبيها في ورقة عشان لا تنسي شيء و طبعًا عند وحدة مسؤولة مثلًا الوكيلة حقت القبول

لأن بصراحة حرام أقول لك شيء و يطلع شيء ثاني و أضيعك

ثانيًا بالنسبة للكيمياء و الكيمياء الحيوي كلهم معترف فيهم برا و أصلًا جامعتنا كلها معتمدة برا و إلا كيف الناس تكمل برا

دخلي كميياء حيوي عشان تاخذي كيمياء حيوي و تخفف لك هذه المادة في التخصص لما تحولين ما أظن هذه بس راح تخليهم يعادلوها لأن كانوا البنات ياخذونها مع أيض و إنزايم و يتعادل لهم البايوكمستري

و طبعًا أنتِ ماتقدرين تاخذي أيض و إنزايم لأن كيمياء حيوي متتطلب لهم بس راح يكون عندك خلفية عن المادة

و كمان خذي مصطلحات طبية هذه راح تتعادل لك و عربي و ثقافة طبعًا يتعادلون لك و كمان مواد حرة عشان المعدل يرتفع و جيبي 5 و بإذن الله متحولة

أنا من الحين قلت لك عشان ما أدري الواحد يكون عايش للين الترم الثاني أو يدخل فسجلي هالأشياء عندك

ربي يسر لك أمورك

[LeLou]

يعطيها العافية بيوكيميائية ما قصرت الله يسعدها..

بس حابة أوضح لك معنى تغيير التسكين..
تغيير التسكين معناها انتِ من يوم تتسكني قبل لا تدرسي تروحي و تغيري الكلية اللي اتسكنتي فيها..
لو صار لك كذا دا ما يعتبر تحويل و أنا من الناس اللي غيرت تسكيني و أزيدك من الشعر بيت مرتين كمان..
لكن أنا اللي صار لي دا كان قبل 3 سنين و الجامعة بصراحة كل شوية بقرارات لذلك الأفضل أنك تتأكدي منهم بنفسك..

ممكن زي ما قالت بيو كيميائية لو اعتذرتي على اعتبار أنك ما درستي شي يعتبر تغيير للتسكين..
و زي ما قالت بيو كيميائية كمان حرام نقول لك شي و في النهاية تروحي لهم و يقولوا لك كلام ثـاني..
لذلك الأفضل تروحي لهم بنفسك..
و اسألي أحد مسؤول كمان زي ما قالت لك لأنك لو رحتي عند أي موظفة ممكن تقول لك كلام من راسها عشان تمشيكِ بس..

روحي بإذن الله الأحد و ربنا يسهل عليكِ..
موفقة||~

[no0ona.s]

يب يب مررررة شكررا على مساعدتكم ليا وانا إن شاء الله حأروح يوم الاحد اشوف العمادة واقلكم إن شاء الله ايش حيسيير معايا بس عمادة القبول والتسجيل الي عند شمالية واحد الي اروحها مو مبنى65 الي عند شمالية 3 صح عشان اتأكد بس وع المواد الي اذا حولت إن شاء الله اخدها عشان ترفع معدلي عادي لو كلها كانت مواد عامة او حرة يعيني ما اخد شي من التخصص عشان يسهل عليا ؟ وكمان لو اضطريت اعتذر الترم دا لاسمح الله الإعتذار موجود ولا برضو يكون قفل >>اتعقدت مررة صح

[بيو كيميائية ^_^]

المشاركة الأصلية كتبت بواسطة no0ona.s يب يب مررررة شكررا على مساعدتكم ليا وانا إن شاء الله حأروح يوم الاحد اشوف العمادة واقلكم إن شاء الله ايش حيسيير معايا بس عمادة القبول والتسجيل الي عند شمالية واحد الي اروحها مو مبنى65 الي عند شمالية 3 صح عشان اتأكد بس وع المواد الي اذا حولت إن شاء الله اخدها عشان ترفع معدلي عادي لو كلها كانت مواد عامة او حرة يعيني ما اخد شي من التخصص عشان يسهل عليا ؟ وكمان لو اضطريت اعتذر الترم دا لاسمح الله الإعتذار موجود ولا برضو يكون قفل >>اتعقدت مررة صح

الله يفتحها عليكِ يارب

ايوا هي اللي عند 1 مو مبنى 65

المادة سهلة و ماراح تصعب عليكِ بإذن الله

موجود و مايقفل إلا يمكن بداية صفر أو نهاية محرم فلا تخافي

الله يكتب لك الخير

روحي و طلعي صدقة و أكثري من الإستغفار عشان ربي يفتحها عليكِ

[no0ona.s]

ايوة إن شاء الله بأحاول انو احول دحين عشان اخاف لو اعتذرت لاسمح الله الترم دا بعدين هما الي اعرفو انو التحويل يفتحو في الاودس اخر الترم الاول او الترم التاني فأخاف عشني معتذرة مايفتحلي تحويل في الاودس فبس إن شاء الله دحين تتسهل يارب