تجربتي للسنة التحضيرية لطالبات دفعة 14

[ReRe.H]

بسم الله الرحمن الرحيم

السلام عليكم اخواتي حبيت اكتب لكم تجربتي في السنة التحضيرية لعل واحدة منكن تستفيد ..
زي ما انا استفدت من خبرة اللي قبلي حابة افيدكم اول شي ترا السنة التحضيرية حلوة ! بس .. نفهمها

لو أهملتي شوي حتروحي في خبر كان .. بالجد والاجتهاد حتوصلي للي تبغيه
هذا مو بس كلام .. فعلاً انا لما أهملت الترم الثاني نقصت كثير وتمنيت الزمن يرجع وأعدله !! واعترف انه نتيجة اهمالي من البداية .. الجدية الجدية يا اخواتي
..
طبعاً اول شي رح تنزلك في الاودس خطتك أ او ب
خطة أ تبدأ بالرياضيات والفيزياء والحاسب ومهارات الاتصال
وخطة ب تبدأ بالاحياء والكيمياء والاحصاء
والحبيب الانجلش مرتز في الخطتين ..

انا بدأت خطة أ




الرياضيات
طبعاً مع كل مادة حكتب درجتي من حقك تعرفي مستوايا مدام تاخذي مني كلام عن الدراسة !
درجتي : A+

طريقة مذاكرتي .. اتوقع انتوا حتستخدموا الكتاب العالمي بس احنا كنا نستخدم كتاب صغير من الجامعة ..
طريقتي كنت اذاكر الدرس بعدين الأمثلة والتمارين .. طبعاً التمارين نهاية كل درس كثيرة ف مو كلها معانا ..
تحملي شي اسمه مخطط المنهج من موقع دكتورتك وتمشي عليه مكتوب فيه التمارين اللي معاكم وكل شي ..
وكان في تمارين كانت واجب طبعاً محد حيسألك عنها وليش ماحليتي ! ولا حتحلها استاذتك في الكلاس ! لا هي لنفسك انتي المستفيدة منها وطبعاً كان يجي منها في الاختبارات ..
وفي شي اسمه الورك شوب تحمليه برضو من مواقع الدكتورات ..
برضو يجيبلك كل الحالات اللي ممكن تجي عن الدرس وفي حلول بعض من فقرات الواجب !
وفي الاخير أثبت مذاكرتي بنموذج للإختبار برضو من موقع الاستاذة ..




الفيزياء
درجتي : A+
طريقتي في المذاكرة .. من الكتاب والدفتر اقرى الدرس واحل البروبلمز اللي هي التمارين اللي تحلوها في المحاضرات طبعاً هي اصعب من اسئلة الاختبار واطول
بس على قول دكتورتي لما نتعود على الشي الصعب حيكون سهل علينا الفقرات القصيرة
زي اللي تجي في الاختبارات .. واهم اهم اهم شي وانتي تذاكري الفيزياء نماذج اختبارات قديمة < اهم شي ..
ترا ماتخرج افكار الاختبارات عنها الا سؤال ولا سؤالين الباقي اغلبه افكار مرت علي وانا اذاكر النماذج ..
وفي شي اسمه محاضرات السكشن محاضرات حل التمارين لازم تحضروها مهمة جداً ممكن تجي في الاختبار





الحاسب
درجتي : A+
أبد منهج الثانوي نفسسسه كوبي بيست ياصبر الارض بس احتسبوا الاجر وانا اختكم ..
صراحة كنت اذاكره قراءة بتركيز وفهم !
لأنه الاسئلة تحتاج فهم سواء الاختبار النظري او العملي ..





مهارات الاتصال
درجتي : A+
زيها زي اختها اللي فوق مذاكرتي لها قراءة وهي والحاسب يعتبروا من المواد السهلة في الترم وبالذات الاتصال اقرأي المنهج بتركيز مرة مرتين
وان شاء الله بتحلي في الاختبارات.. طبعاً في تكاليف لازم تسووها وعليها درجات ومهي صعبة
بس اهم شي تسوي من بدري وماتزنقي نفسك في الوقت .. التكاليف :
ارسال ايميل , كتابة سيرة ذاتية , نقد مقالة , تقديم عرض يعني كلها اشياء حتفيدك في مسقبلك ..
البرزنتيشن كان شي جميل اول مرة ف حياتي اسوي برزنتيشن وكنا قروب طبعاً ذكريات جميلة
والله < فاكرة يابلقيس



نجي لمواد الترم الثاني ...







الإحصاء
درجتي فيها : A+
والله هي سهلة وحلوة وممتعة وانتي تذاكريها حتى كنت أخلص بسرعة بس تحتاج كمية هائلة هائلة من التركيز في الاختبار وانتي تحلي ..
والله منجد يعني في اختبارات الدوري لما كنت اراجع أخطائي الاقيها اشياء تافهه جداً بسبب السرعة وعدم التركيز .. نصيحتي خذوا وقتكم في الاختبار الى آخر رمق
طريقتي في المذاكرة الكتاب جداً مهم .. او السلايدات .. محاضرة حل التمارين
زي اللي في الفيزياء كمان مهمة مرة مرة بالذات الدوري الثاني والنهائي افكار الاختبار ماتخرج عن امثلة الكتاب ومحاضرات حل التمارين ..
والنموذج اللي ينزلوه قبل كل اختبار ...






^سبحان الله حتى التصميم طلع معي خايس


الاحياء
درجتي فيها : A
وفرحت فيه ترا سبحان الله انا والاحياء متضاربين من ايام المدرسة ماحبه والمصدر الوحيد اللي نذاكر منه السلايدات
وينزلولنا اسئلة مساعدة يجي منها نصاً في الاختبار .. طريقتي في المذاكرة في البداية كانت خطأ بعدين تداركت خطئي ..
في البداية كنت أقرى وأحفظ قبل الاختبار بأربعة ايام وطبعاً المنهج جديد عليا لا اركز مع الدكتورة ولا اذاكر أول بأول ...... تطبيقاً للقاعدة الشهيرة ( الأحياء = حفظ )
في ناس سبحان الله حفظة وتمشي معاهم لكن انا مامشيت معي درجاتي كانت ماش في الدوري ..
في النهائي قلت لازم افهم المنهج !! واقتنعت بإني انسانة يا تفهميني الهرجة ياتحلمي انها تثبت ف مخي وفعلاً ف جزئية النهائي كنت اركز مع الدكتورة واقرى المحاضرة في البيت واتفرج
فيديوهات علمية ملياان النت حاجات حلوة عن مناهجنا ! بس نعود نفسنا نبحث عن المعلومة .. مو كل شي يجينا جاهز مجهز والحمدلله الدرجة كانت جميلة في النهائي والاختبار كان جميل






الكيمياء :
درجتي : اصطب ابكي شويا وارجع ههههه لا امزح درجتي A
الحمدلله على كل حال ... طريقتي ...اللي كان يقهرني في الكيمياء كنت مرة اتشتت ليلة الاختبار ماني عارفة امسك ايش ولا ايش اكثر من دكتورة عندها سلايدات وفي كتاب < قلبتها تشكي

.. المهم من البداية لا تشتتي نفسك اختاري سلايدات دكتورة وحدة وخلي معاك مخطط المنهج ..
المهم طريقتي الدرس وأمثلتو والتست بانك تحملوه من مواقع الدكتورات مهم جداً جداً وفي النهاية نموذج وصلى الله وبارك ..
ياخي مجروحة ماني قادرة اتكلم عنها ههههههه



عاد آخر حاجة الانجلش ..
طبعاً 4 مستويات كل مستوى ستة أسابيع والاسبوع السابع اختبار شفوي وكتابة واختبار الكتروني ..
المستوى الأول مايدخل في المعدل بس لازم تنجحي فيه حرام تاخذي صيفي او تعيدي سنة بسببه :( انا بدأت من ليفل 3 < يقولوا اصعب ليفل ..
مادري حسيته زي 4 ممكن اصعب بشوية !
من ليفل 3 تحسي إنك تاخذي انجلش وتمر عليكي مصطلحات جديدة ..
حسب كلام صحباتي 1 و 2 مرة مرة سهلة وأشياء بسيطة ..
المهم طريقة مذاكرتي .. القاعدات والفوكابلري اللي هي المصطلحات !
والسيدي اللي يجي مع الكتاب ! أهم شي في الانجلش الممارسة
ما ادري صراحة ما اعرف ايش اقول عنه !! مشيت فيه بالبركة ..

كلمة أخيرة ..



دفعة 12 وماقبلها .. أشكركم أشكركم من كل قلبي جزاكم الله كل خير
عالمساعدات اللي ساعدتونا هي .. عاللي كتب تجربته عاللي يجي يدينا نصايح واللي يكتب لنا عن تخصصه وكل شي في ميزان حسناتكم ان شاء الله ..


دفعة 14 أتمنى تسامحوني عالقصور ..
وان شاء الله يكون موضوعي واضح ! مابي اشرح كل شي بالتفصيل ويصير موضوع طويل وممل < يعني ذحين مو ممل !!
ان شاء الله نكون خير خلف لخير سلف ونساعدكم ومانقصر معاكم والله يوفقكم ان شاء الله وتكون سنة جميلة عليكم
ترتفع منزلتكم فيها في الدنيا والأخرة وتمر عليكم مثل نسمات الربيع .
وأي استفسار انا جاهزة .. عارفة انه الموضوع مو مفصل وكثير حاجات حتستغربوا منها عشان كذا اسألوا اي شي يخطر على بالكم وان شاء الله اقدر اجاوبكم


دفعة 13 .. اخواتي حبيباتي عشنا هنا أيام حلوة من بداية السنة لنهايتها واحنا قلوبنا على بعض .. اختلفنا كثير !! اتضاربنا كثييييير
بس ساعدنا بعض كثير كمان واستفدنا من بعض ومهما حصل نبقى اخوات
ومستمرين مع بعض على طول ان شاء الله أتمنى تسامحوني على أي شي
بدر مني احنا هنا نبغى العلم والفائدة والاهم الاجر ان شاء الله ..
وحتى أخواننا الطلاب والطالبات كلكم أتمنى تسامحوني لو انفعلت في المناقشة وقلت كلام ماحبيتوه ..
أتمنالكم كل التوفيق واتمنى كل أحد يتخصص في مجال يحبه ويبدع فيه ونشوفكم ناجحين في كل مجال ..
كل الشكر للجميع وسامحوني عالقصور .

[ReRe.H]

الرد الأول حخليه ليا لو لقيت ملفات استفدت منها في جهازي

حرفعها لكم في هذا الرد

[لورد جدة]

جزاك الله خير اخوي
وم قصرت ويعجبني اللي م ينسى الدفعات اللي بعده

وم بقول الا حاجه وحده
حسبي الله على اللي ما خلى التحضيري 3 مسارات زي بقيه الجامعات
لانو اللي بيدرس هندسة وش فايدة الاحياء

[ططال عمري]

الف شكر لك على هالمجهود ,
متيقن انه بيفيد البنات الجدد ,

الله يوفقكم و يوفق التحضيري الجدد يارب , = )

[حيــــــاة]

جميـــــل جـــداً جميل ،،
اسهابك البسيط وتركيزك عالنقاط المهمه بإختصار
يعطيكي العافية جهد تشكرين عليه ،

وبيفيدني كمان انا وضعي متوسط بين دفعه 13 ودفعه 14
لاني بديت الترم الثاني لسى معكم وبأتعايش مع دفعه 14 كمان <<عايشت عصرين مخضرمة

جزاكي الله خير وتتخصصي في الي تتمني : )

[ĴusŦĪce ♣]

وعليكم السلام ورحمة الله وبركاته

ماشاء الله الله يوفقك من تقدم لتقدم

وتشكري على المبادرة الراائعة والمفيدة

أبي أسألك بالنسبة للغة الدراسة الانجليزية كيف البنات ماشيين فيها؟؟

يعني أحياء الدششش المصطلحات لوحدها يالله ،اجل كيف كل الكلام مصطلحات

بالانجليزي والفيزياء المسائل انجلش كيف تنفهم

، كثير قالو ضيعنا عمرنا بالتحضيري في عبد العزيز بسبة الانجليزي

طمنيني عن هذا الناحية وياليت تنقلي آراء غيرك كمان

أبي آراء المتوسطين دراسيا ولا عليك كلافة

[ReRe.H]

لورد جدة
أنا فتاة ويجزاك خير
ططال عمري
ان شاء الله يفيدهم
أمين يارب ويوفقك
حياة
الله يعافيك أمين يارب وياكي
والله يوفقك ويسهل عليك يارب

[R..F]

الله الله عالمواضيع اللي كذا
يا شيخة يا بخت الدفعه اللي بعدنا
ماشاءالله عليكي كفيتي ووفيتي ، جميييل موضوعك
والتصاميم كمان حبيتها.. تسلم ايديكِ

الله يوفئيك و يوفقئنا كلنا يا رب

هاه برضو رسميه؟
معسلامة

[3zzouzz]

يعطيكِ الف عااافيه
كل يوم اقول انا كمان بكتب موضوع لكن بكسل ،
ان شاء الله اذا دخلوا دفعة 14 للمنتدى اعطيهم الكلمتين المهمة
عن الحاسب والرياضيات بالذات ، وبعض الاشياء عن بقية المواد
الله يوفقنا جميعا ، والتسكين يكون في اول رغبة بحول المولى

[ReRe.H]

المشاركة الأصلية كتبت بواسطة ĴusŦĪce ♣ وعليكم السلام ورحمة الله وبركاته ماشاء الله الله يوفقك من تقدم لتقدم وتشكري على المبادرة الراائعة والمفيدة أبي أسألك بالنسبة للغة الدراسة الانجليزية كيف البنات ماشيين فيها؟؟ يعني أحياء الدششش المصطلحات لوحدها يالله ،اجل كيف كل الكلام مصطلحات بالانجليزي والفيزياء المسائل انجلش كيف تنفهم ، كثير قالو ضيعنا عمرنا بالتحضيري في عبد العزيز بسبة الانجليزي طمنيني عن هذا الناحية وياليت تنقلي آراء غيرك كمان أبي آراء المتوسطين دراسيا ولا عليك كلافة

لا بالمرة لا تشيلي هم اللغة في البداية أوكي ممكن حسينا بصعوبة لانه جديد علينا وكذا
بس مع الأيام خلاص تعودنا بالنسبة للأحياء كل سطر مترجم ويمكن هوا المادة الوحيدة
اللي حتحفظي فيها مصطلحات انجليزي وممكن في الاختبار يترجموا كلمات إذا منتي
فاهمة كلمة معينة بس لو كانت الكلمة من الاختيارات مايترجموها ..
بالنسبة للفيزياء صراحة أنا والله حبيتها بالانجليزية أكثر .. حتى القوانين أحسها تنحفظ
اسرع بالانجلش أما المسائل عشان كذا أقولك لازم تتدربوا على نماذج اختبارات
وخلال الدراسة الدكتورة تترجم كل كلمة في المسالة فحاولي تترجمي معاها
ومع الأيام خلاص أن شاء الله تصير حصيلتك من الكلمات اكثرررررر ويسهل عليكي
هذا رأيي الشخصي بالنسبة لصحباتي ماقد احد اشتكى من اللغة ف لا تخافي أبدا
ماهي عائق .... بالتوفيق