ارجوو افادتي....

[جالكسي22]

السلام عليكم ورحمة الله وبركاته


اولا : اعرفكم بنفسي

انا طالبة (بل ضحية)من ضحايا السنة

التحضيرية ...تخرجت من الثانوية بنسبة مرتفعة

والحمدلله كان حلمي الوحيد انذاك هوو الالتحاق بالجامعة

(وليس اي جامعه بل جامعة الملك عبدالعزيز) وبالفعل التحقت

بها بعد عدة مشاكل واجهتني اثناء التسجيل ولكن الحمدلله ع

كل حال كنت اطمح بدخول كلية العلوم الطبية التطبيقية(قسم

المختبرات الطبيه)وهذا هوو حلم طفولتي ولكن.......




عندما بدأنا الدراسة هنا تحطمت كثيرا نتيجة صعوبة المناهج والاختبارات والدرجات السيئة التي حصلت عليها

فبدأت احاول ان اتنازل عن حلمي لأني لا استطيع ابدا الالتحاق

به بعد مارأيت هذه الصعوبات فقررت ان التحق بقسم الكيمياء

الحيوية نظرا لانه هو الاقرب لحلمي الضائع ولكن


الان بعد ظهور نتائج نهاية الفصل ايضا هذه النتائج لاتبشر

بالخير فوضعت في بالي قسم التغذية لعل وعسى ان اُقبل به ان لم اُقبل في الكيمياء الحيوية....


ثانيا: بعد مارأيتم قصة حياتي هذه....اريد منكم مساعدتكم في اختياري هذاا ؟؟....؟؟
اريد ان اتعرف ع المزيد من هذا القسم؟...
كيف طبيعة الدراسة فيه؟...
وماهي المواد التي تدرس؟...
وهل يوجد صعوبة فيه؟..
وماهي مجالات العمل بعد التخرج منه؟...
وهل هناك حاجة الى المتخرجين من هذا القسم في هذه السنوات الاخيرة؟....




اخيرا : اكووون شااااااكرة لكل من يمر في موضوعي ويرد ع استفساراتي....

...اسفة ع الاطالة (اعذروني)...

لكم حبي وتحيتي

[روح متفائلة]

عزيزتي،،،
إن شاء الله كله خير
ادعي ربنا بس يختار لك الخير فين ما يكون

أنا عارفة أنه وضعك صعب
بس الواحد ما يعرف فين الخير
و ربنا ما يضيع لك تعب
ويااارب تدخلي تخصص تنبسطي فيه و يعوضك حلمك
والدنيا ما انتهت لو ما اتخصصنا اللي نبغاه

و أنا مثلك تمام
كنت أبغى ادخل تقنية طبية و ما أراد ربنا
و دخلت تغذية و أتخرجت ولله الحمد

بالنسبة لقسم التغذية
صراحة رااائع ومفيد
ولو مافادك في مجال عمل
يفيدك على الأقل في كل شي
سواء أتوظفتي أو لا
والدكتورات فيه تمام مررة
من جد قسم رائع

الدراسة فيه حلوة لو تحبيها
يعني مو صعبة
بس تحتاج منك جهد
يعني لازم تذاكري أول بأول
لأنه فيه مصطلحات إنجليزية
وبعض المواد بالأنجليزي (المراجع فقط وليس الشرح)

حتدرسي فيه مواد عن الأغذية و السموم اللي تتعرض لها و كيف تحافظي عليها
و في مواد عن تخطيط الوجبات للأصحاء(الحامل والطفل والمرضع والرجل والرياضي..إلخ)
وفي برضه تغذية علاجية لمختلف الأمراض بس مو بصورة مرة متعمقة
في مواد عن طريقة التثقيف
كيف تثقفي المجتمع و كيف تقدمي الاستشارة

بصراحة
المواد تأهلك أنك تتوظفي أخصائية في المستشفيات
لأنه أصلا هناك كلها نماذج جاهزة تمشي عليها و لا تحتاج منك شي
و في كم وحدة من صاحباتي صاروا أخصائيات في مستشفيات
يعني أهم شي تروحي مكان العمل و تثبتي وجودك
وتدعمي نفسك بتدريبات
ممكن من أول ما تتخصصي
تحاولي تتدربي في مستشفيات حتى لمن تتخرجي يكون عندك خبرة
ترى أهم شي خبرة العمل

لكن رسميا
ومن وزارة الصحة
خريجات التغذية يكونوا على مرتبة فنية تغذية و ليس أخصائية تغذية
فنية يعني بصراحة شغل فلبينيات مررة،،،تغلفي كيك وتعبي صحون و حاجات زي كدا
ولمن تاخذي الماجستير تصيري أخصائية

لأنه وانتي على مرتبة البكالوريوس يكونوا خريجات التقنية الطبية تخصص تغذية علاجية أولى بمرتبة أخصائية

بس الوظيفة نصيب
وقلت لك كثير للآن بيتوظفوا عااادي وهم خريجات بكالوريوس بالخبرة اللي عندهم
بس للاحتياط يكملوا ماجستير أحسن

والمستشفيات محتاااجة مرررة
لأنه لو لاحظتي كثييير مستشفيات كل اللي فيهم فلبينيات
والله يعلم بشهادات ولا بس كدا

والمرضى يعانوا منهم مرررة
لأنهم ما يفهموهم كلامهم عربي مررة مكسر

عزيزتي طولت عليك معليش
بس استخيري الله
وربنا يختار لك الخير ياااااااارب فين ما يكون
ويرضيك به

[روح متفائلة]

معليش
نسيت اكتب لك

مجالات العمل
مش بس أخصائية
لكن بالنسبة لي هذا أعتبره المجال الوحيد اللي أرضى به
ممكن يكون شغل في مصانع
إشراف على خطوط الإنتاج أو اختبارات الجودة
وممكن تصيري مثقفة اجتماعية في أي مكان
ممكن مشرفة أغذية على مقاصف المدارس أو جمعيات أو أي مكان

وبالتوفيق

[جالكسي22]

[b]اختي ((روح متفائلة))

جزاااااااكي الله الف الف خييير...
مااقدر اوصف شكري وامتناني لك ع كل كلمة كتبتبها لي بجد شكراااااا ع مجهودك الرائع
ومعليش تعبتك معايا...
بس بصرااحة مررة عجبني التخصص وفتحتي عيوني على اشياء ماكنت عارفتها

الله يوفقك ياااااارب ويحقق لك كل اماانيك...[/
b]

وشكرا لك مرة تانيه

[روح متفائلة]

آميييييين يااارب
والقارئين

وماسويت إلا الواجب
في المنتدى بناخذ و نعطي
ونفيد ونستفيد

و إن شاء الله ربي يوفقك ويسعدك فين ما تكوني
ويختار لك الخير يااارب

و لو اتخصصتي إن شاء الله تنبسطي
في كمان تدريب ميداني مررة حلو
لو تحبي المجال
فيه تدريب ترم كامل في مستشفى ومصنع
وحتشوفي منه كيف يكون الشغل

والله يوفق الجميع يااااارب