مساعده بخصوص مواد المستوى الخامس والسادس ..

[أنفاسك لذتــــي ..]

السلام عليكم ورحمة الله وبركاته ،

إخواني أخواتي : حابه أسألكم عن مواد المستوى الخامس و السادس ،،

لتذكير

مواد المستوى الخامس :
1- تراكيب البيانات (1) Cpcs204
2- تراكيب متقطعة (1) Cpcs222
3- مبادئ التسويق Bus232
4- تنظيم وبيان الحاسب Cpis210
5- مقرر حر 3 ساعات

مواد المستوى السادس :
1- مبادئ نظم تشغيل Cpis222
2- نظم إدارة قواعد بيانات Cpis240
3- مقدمة إدارة مشاريع النظم البرمجية Cpis334
4- هندسة البرمجيات Cpis250
5- مبادئ شبكات البيانات Cpis370
6- السلوك التنظيمي Bus233

أولا : ابغى شرح مبسط لمحتوى ومفهوم كل ماده ؟
ثانيا : أفضل دكتورات أو دكاتره يدرسوها ؟
ثالثا : أفضل طريقة لمذاكرتها (كتب أو سلايد أو ملخصات معينه ) ؟
رابعا : أسهل مقرر حر في وجهة نظركم ؟


* السؤاااااال الأهم :' (

المستوى الخامس احسو سهل بس السادس خوووووفني مرا ؟!

أيش رأيكم أضيف ماده من المستوى السادس في المستوى الخامس
ممكن يكون دا أسهل في دراستها بالنسبة لمواد المستوى الخامس " يارب فهمتوا " ؟!
او أحذف ماده من السادس واخليها لسنة الي بعدها إن شاءالله ؟!

أرجوكم ساعدوني مايكلفكم الرد شئ أنتو دارسين هالمستويين وكل واحد يحكيني عن تجربتو ؟
أبغى أرائكم و نصائحكم ولكم مني دعوات بظهر الغيب وكل الشكر والتقدير

[alsahm]

في البدايه حذكر لك مدى صعوبة الماده وسهولتها ( من خلال دراسيتي )
اللي بالاحمر صعبه واللي بالاسود متوسطه او سهله

مواد المستوى الخامس :
1- تراكيب البيانات (1)Cpcs204
الماده هذي مهمه جدا لفتح ااغلب المواد .. تعتمد على الستركشر وانواع الداتا
كان يدرسها طيب الذكر الدكتور شهاب ( سلايدات كانت )

2- تراكيب متقطعة (1) Cpcs222
الماده هذي سهله ومافيها صعبه تذكر .. كانت سلايدات ودرسها عمرو شرف ( ابداااع )



3- مبادئ التسويق Bus232
4- تنظيم وبيان الحاسب Cpis210
سلايدات عندنا محتكرها الدكتور محمود كامل
5- مقرر حر 3 ساعات

مواد المستوى السادس :
1- مبادئ نظم تشغيل Cpis222

هذي تتكلم عن بيئة نظام ويندوز وطرق تنفيذ الاوامر من CMD كومند لاين الشاشه السوداء
شويه صعبه ويبغالها تركيز كثير

2- نظم إدارة قواعد بياناتCpis240

\تتكلم عن الداتا بيس وطرق التعامل معاها وانشاء الجداول وربطها بـ برايمري كي وفورين كي

3- مقدمة إدارة مشاريع النظم البرمجية Cpis334
هذي سهله اداريه بحته

4- هندسة البرمجياتCpis250

اتوقع الماده هذي تم تغير محتواها لكن ما اذكر لايش بالضبط

5- مبادئ شبكات البيانات Cpis370

الماده هذي تتكلم عن الشبكات وانواعها وطرق تنفيذها

6- السلوك التنظيمي Bus233

ماده اقتصاد سهله

طبعا تقدري تلعبي بأختيار المواد ع كيفك لو تبغي رايي
حطي ماده 370 في المستوى الخامس فقط .

[أنفاسك لذتــــي ..]

أخوي سهم : باااااااااااااااااارك الله فيك وجعل ردك علي بميزان حسناتك
إن شاءالله الكل يستفيد من نصائحك

أنا مآخذه ترم صيفي : مادة حره و ماده عامه
إن شاءالله يفتحوا الترم الجاي مادة 370 وأستخير الله وآخذها
مشكووووووووور خففت همي ياخوي ^^

سمعت أنهم بيفتحوا إدارة المشاريع الترم الجاي
بس يقولوا صعبه في الإنتظام في الصيفي مرااا أحسن وأسهل لانو مشاريعها كتييير
إن شاءالله أسمع نصيحتك وأخذ 370 وأترك المشاريع لصيفي
والباقي ربنا يسهلو

[أنفاسك لذتــــي ..]

حبايبي أبي ردود أكثررررر ..

راح أنتظر وأصبر : لأنو إجازه وعاذرتكم على قلة تواجدكم بالمنتدى

خصوصا البنات بحكم أن دكتوراتنا مثل بعض

ولا ينهانوا الشباب : ومنكم نستفيد طبعاااا

[men]

السلاام عليكم
اهلا بيكي يا اختي:)
انا دوبني خارجة طازة من مواد المستوى السادس:p
بحكم تجربتي اللي كانت مريرة نوعا ما في دا المستوى على قد ماكان دا المستوى ضغط مرة الا انو يرفع المعدل وكثير من البنات اللي اعرفهم معدلاتهم اترفعت من بعد دا المستوى بحكم انو موادو كتيرة وكلها تخصص نصيحتي ليكي حضور المحاضرات كلها ولا ربع محاضرة المفروض ماتفوتك حتى المراجعه والاكسترا كلاسس وكل شي الشي التاني خودي نماذج امتحانات للسنوات الماضيه جدا مفيدة وتخليكي اخدة فكرة طيبة قبل ماتدخلي الامتحان خصوصا الفاينل الحاجة الاخيرة والاهم الامر المفروغ منه مذاكرتك اول باول ابدا لا تحاولي تراكمي لانها مواد تخصص ومليانه كلام كل مادة مفهومها ومصطلحاتها غير
كمان في حاجة مهمة حاولي انك تحلي الواجبات وتاخدي في المشاريع الفل مارك لانها بترفع متير ممن درجتك في المادة
موا المستوى الخامس عادية زي المستوى الرابع واللي قبلوو:)
يارب اكون افدتك
لا تنسنا من دعوة حلوة في ظهر الغيب

[أنفاسك لذتــــي ..]

أهلين إختي : مبروووك النجاح بدي السنة ماشاءالله ربي يوفقك ويسهل لك الجاي

جابه أسألك : أيش أكتر مادة تنصحيني آخودها في المستوى الخامس من مواد المستوى السادس ؟؟
بدل الماده الحره لأنو ماخدتها صيفي دحين

وكمان كيف كانوا أستاذاتك ؟؟ ربي يسعدك فرحتيني أنو المستوى الخامس سهل
رغم إني خايفه مرااا من الدتا ستركتشر

أنتظر ردك وجزاك الله خير

[men]

اهلين يا اختي
حاولي تنزلي مقدمة مشاريع اوسوفت وير عشان كمان لا تنظغطي في المستوى الخامس بزيادة وراكي ضغطة المستوى السادس
واسفه عالتاخير

[أنفاسك لذتــــي ..]

لا حبيبتي مافي تاخير الترم لسى مابدأ

إن شاءالله آخوذ مادة مقدمة إدارة مشاريع النظم البرمجية Cpis334 أو
مادة مبادئ شبكات البيانات Cpis370
الترم الجاي بدل المادة الحره لو فتحوها وماكان لها متطلب ،،

أعذريني أختي مافهمت قصدك بمادة "سوفت وير"
ممكن تحددي لي أسمها بالزبط ؟؟؟

مشكوره على نصيحتك الله يجعلها بميزان حسناتك ،،
سامحيني غلبتك معايا

[men]

مادة سوفت وير انجنيرينق رمزهاcpis 250
software engneering
مع دكتور سارة خان اروع انسانة في كلية الحاسبات
لا تنسينا من دعوة حلوة في ظهر الغيب:)

[أنفاسك لذتــــي ..]

الله يسعدك حبيبتي ،،

جزاك الله خير .. ورضي الله عنك وأرضاك .. وأعطاك .. وكفاك .. وهداك .. وأغناك ..
وعافاك .. وشفاك .. ووفقك لخير الدعاء .. وأجاب لك الرجاء .. وأحبك بلا ابتلاء ..
وجعلك ساعيا للخير .. مؤثرا ف الغير .. وآمنك بين أهلك وأدخلك الجنة .. آمين