ابغى أغير اسم الكلية

[red tea]

السلام عليكم ورحمة الله وبركاته...
أنا طالب انقبلت في كلية الصيدلة الحمد لله وأنا عارف إنها كلية حلوة بس الصراحة اسمها لازم يتغير وذلك للأسباب التالية:
1.الناس ماعندهم خلفية عنها ويحسبوك ماحتشتغل إلا في صيدلية زي النهدي مثلا....
2.بعض الناس يكلجو فيها ويقولو صيدلية بدل كلية الصيدلة (اختصار ماشاء الله).
3.الناس مايعرفوأي شي عن وظايفها يعني زي ماقلتلكم في السبب الأول .
4.إدا واحد سألني ها ماشاء الله فين انقبلت طبعا اديه إبتسامة واحد مبسوط بعدين أقلو كلية الصيدلة يقلي طيب ماحصلت في كلية الطب( أنا دحين قاعد أنحرق) تراهم نفس المجهود(أنحرق أكثر وأكثر) بعدين يقلي بس يالله حتى الصيدلة حلوة(لاياشيخ فرحتني دحين) .
فعشان كدا أنا قررت أغير اسمها إلى:
1.كلية علوم الأدوية (مع إنو حينزل من قيمتها شوية).
2.يخلوها من ضمن تخصصات كلية الطب (وهادا إختياري).
3.ولا إن شاء الله يسموها (كلية المستحين من اسمها).
أرجو من الكل اختيار واحد من الاختيارات الثلاثة أو اقتراح اسم من أكياسكم الحلوة.
عارف إني طولت عليييييييييكم بس أعذرووووووني ومشكوووووووووووووووورين
( ترى لعلمكم هادي أول مشاركة ليا )

[ميعاد]

بالعكس انا عاااجبني اسمها , كذا اسمها صيـــــــدله , مررره حلو والله..

[د.كيــف]

المشاركة الأصلية كتبت بواسطة red tea السلام عليكم ورحمة الله وبركاته... وعليكم السلام ورحمة الله وبركـآته أنا طالب انقبلت في كلية الصيدلة الحمد لله وأنا عارف إنها كلية حلوة ألف مبـروووكـ .. مو بس حلوة الا احلى من الحلى نفسه بس الصراحة اسمها لازم يتغير وذلك للأسباب التالية: 1.الناس ماعندهم خلفية عنها ويحسبوك ماحتشتغل إلا في صيدلية زي النهدي مثلا.... النـآس .. مهمتك انت كطـآلب تنتمي للكلية .. وعـآرف تخصصك لازم توضح لهم .. 2.بعض الناس يكلجو فيها ويقولو صيدلية بدل كلية الصيدلة (اختصار ماشاء الله). ههههههههههههههههه ضحكتني ,, من جد .. هذا الحـآصل ه 3.الناس مايعرفوأي شي عن وظايفها يعني زي ماقلتلكم في السبب الأول . أعيد وأكرر .. انت المسوؤل عن توضيح تخصصك للنـآس خذ مثـآل .. أتكلم من واقع .. بالعيد هذا .. وأنـآ على مـآئدة العشـآء ( سفره .. منسدح فوقها مفطح ) المهم .. كنا نتكلم .. ونتجاذب اطراف الحديث .. سألني واحد من اللي على السفرهـ .. قال ماشالله .. ونظر الي بتبسم .. انت وش تدرس ؟؟ ( طبعا قال ماشالله لاني كنت ماكل شوي من الجو مو بكله في النقاش اللي كان حاصل ) تبسمت له .. وقلت , كلية الصيدلة . قـآل , حلو صيدلي يعني .. ! قلت لا مو صيدلي . قـآل : أجل ؟؟ قلت دكتور صيدلي .. قـآل : هـآآآآآآآآآآآ !!!!!!!! طبعا جلست أوضح له التخصص .. من طقطق الى سلام عليكم .. بعد مـآفهم التخصص .. قـآل مـآشالله يعني انت مثل اخوك .. بس انت في الادوية .. ( للتوضيح : أخوي , طبيب ..) قلت اسلللللللللللللم وانبسطت لاني قدرت اوصل له : من أنـــآ 4.إدا واحد سألني ها ماشاء الله فين انقبلت طبعا اديه إبتسامة واحد مبسوط بعدين أقلو كلية الصيدلة يقلي طيب ماحصلت في كلية الطب( أنا دحين قاعد أنحرق) تراهم نفس المجهود(أنحرق أكثر وأكثر) بعدين يقلي بس يالله حتى الصيدلة حلوة(لاياشيخ فرحتني دحين) . ولا تنحرق ولا شي .. وضح للشعب من انت ؟؟؟ وأعطيهم ابتسامه .. لكن لا تكون مزيفه .. فعشان كدا أنا قررت أغير اسمها إلى: 1.كلية علوم الأدوية (مع إنو حينزل من قيمتها شوية). 2.يخلوها من ضمن تخصصات كلية الطب (وهادا إختياري). 3.ولا إن شاء الله يسموها (كلية المستحين من اسمها). اوما المستحين .. ههههههههههههه يـآعزيزي .. أول شي انت احترم تخصصك عشـآن الغير , يحترمـه اذا انك انت الطالب المنتمي للتخصص هذا وتستحي منه لان الشعب ما عنده خلفيه .. أكيد غيرك ما راح . يقتنع فيه .. أرجو من الكل اختيار واحد من الاختيارات الثلاثة أو اقتراح اسم من أكياسكم الحلوة. عارف إني طولت عليييييييييكم بس أعذرووووووني ومشكوووووووووووووووورين للاسف كيسي ما فيه غير ( كلية الصيدلة ) ( ترى لعلمكم هادي أول مشاركة ليا )

هلا وغلا , منـــــــور يـآوحش ..

[Dr.HMD]

طيب وش رايكم باللي يرد عليك بعد مايعرف تخصصك
"يعني تبيع ادويه " <<< بقطعه بسناني

عالعموم احنا عاجبتنا كليتنا واسمها

واللي يرد بذا الكلام او غير يعرف نفسه ولو اني ماابغى اقولها انه جــــاهـــــــل

ومصيره يجي اليوم اللي بنثبت فيه ذا الشي

[drug]

وعليكم السلام ورحمة الله و بركاته

تصدق أعاني من نفس المشكله

كل ما أقول لأحد صيدله يجي بباله وظيفتي أبيع أدويه في الصيدليه و بسسس و في ناس تقولها بتريقه كمان

تعبت و أنا كل ما أحد يسألني أشرحله و أقوله عن الفارم دي و القصه الطويله دي ياريت أقدر أسجل الكلام في شريط و أشغله كل ما أحد سألني

و بعد القصه الطويله دي كلها ناس تفهم و ناس ما تستوعب أو ما تقتنع

بس على العموم أهم شيء إنتا تقتنع بإلي اخترته و مو مهم إيش الناس تقول

الحمدلله مقتنعه باسم الكليه و ما أتوقع في اسم أنسب لها غير " الصيدله "

و أهلاً فيك معانا

[LIFE IS ...]

اجل مو لوحدي اللي قالبين الدنيا عليه ...
واحد يقولي اتخرج .. و انا عندي واسطة ف صيدلية السديس >> اومااا يبغالها واسطة !!


والله تقعد تشرح منها ليوم الدين .. الناس ف بالها انو كلية الصيدلة >> صيدلي ف النهدي وغيرها !!

الله يعين بس ع الشعب اللي زي كده

[pharm.d .s]

ههههههههه
هههههههههههه
اكتر شيء يقهر اول سنة ليا بالكلية
ماما جالسة تحكي خوالي عن تخصصي
المهم بعد ماخلصت قالولها بنت جابت الكلام دا من كيسهااا
يا اوما عصبت تعصيب واي احد يبغى استشارة في يوم من الايام ماراح اعبروا
المهم كليتنا مظلمومة من جد وحالتنا صعبة بس الصراحة احنا الي نقدر نغير الصورة
لانو لو جيتوا للصيادلة السعودين مرا قليل فيعني لسة ما احد اخد فرصة يبين الصورة كويس
بالنسبة للاسماء راح تطلعوا مليون اسم واسم بس استنوا لما الدراسة تبدا
بالتوفيق للجميع

[دنيا صغيره]

ياجماعه ليش زعلانين خليهم يقولو الي هما يبغو
والي تحاول تفهمو ايش معنى دراستك مارح يقتنع
اهم شي انت عارف نفسك ايش..........دكتور غصب عن الي مايعجبو
وبيني وبينك افضل لك انهم مايعرفو عشان العين<<<<خخخخ

[د.كيــف]

المشاركة الأصلية كتبت بواسطة دنيا صغيره ياجماعه ليش زعلانين خليهم يقولو الي هما يبغو والي تحاول تفهمو ايش معنى دراستك مارح يقتنع اهم شي انت عارف نفسك ايش..........دكتور غصب عن الي مايعجبو وبيني وبينك افضل لك انهم مايعرفو عشان العين<<<<خخخخ

هههههههههههههههههههههههه

حلوة ..

[rarba]

آآآآآآآآآآآآآه, كلنا بنمر بنفس الموقف
بس أنا في موقف يقهرني أكثر
لمن تقول لواحد انك دخلت صيدلة بعدين يعطيك نظرة
هذي الظرة معناها-مسكين ما قدر يخش الطب راح خش صيدلة-
نفسي ادخل في عيونهم زي الرصاص وأقولهم إن معدلي أعلى من معظم إلي دخلوا الطب إن ما كان كلهم
والصراحة كنت أقولها في بعض المرات, لأني ما قدرت أمسك نفسي
أبغى بس أفهمهم إني دخلت الصيدلة بإختياري
بس خلاص, برد دمي شوية, وخليهم يفكروا إلي يبغوا, المهم ايش أنا أفكر بنفسي