حصريا : كل ما يخص كلية الطب & الهندسة .. نبذة شاملة

[خالد9921]

.خالد شكرآ على الطرح الأكثر من رائع أستاذي طبعآ عارف أن الأجازة الكبيرة لازم الطاللب يستغلها أكبر أستغلال وكمان تعرف أن نحن مشكلتنا مو في الدراسة في الفتره الحاليه لكن المشكله في اللغه والأساس الرياضي( الرياضيات)وأنا أبغى هندسة كهربائيه يقولون صعبه لان يحتاج لها هذي امشكلتين مع العلم أن المشكله الأولى أنا في حلها الأن أما الثانيه في الصيف لكن كيف أحلها وما الكتب التى تنصحني بها عشان أدخل وما ورايا مشاكل ؟ وهل الكهربائية صعبة

هلا يا استاذي ,, العفو منك ,,
طيب كويس اذا انك بتحل مشكلة الانقليش
وانصحك كمان اذا لسه بتحلها شوف لك معهد قوي باللغه ومعروف او سفريه بالصيف او حتى اذا ما تقدر مره في بعض الكتب بجرير ممتازه ومختصه بالانقليش العلمي
اما بالنسبة للماث حلّها سهل وبسيط
خاصة انك راح تدرس لاحقا تكمله للي درسته بالتحضيري تقريبا
انصحك تستوعب الفصول الاولى اللي بكتاب الماث حقكم اكبر إستيعاب
يعني حتى لو نجحت فيها بدرجه كويسه بس حاسس نفسك مو مغطي فهم المنهج كويس
ارجع وافهم كل شي فيه بحيث انك خلاص مرره فاهم وما يحتاجلك
ولو قدرت كمان بالصيف تبدأ في شابتر 5 بكتاب الماث حقكم حلو على حلو وشي كويس مرره
ادخل يا سيدي لا يردّك شي اذا معدلك ودرجاتك تسمح راح تتسهل ان شاءالله (:
اما بالنسبة للكهربائية شوف يا غالي انا ما اؤمن بالكلام اللي زي كذا
اي تخصص بالدنيا خاصة بالكليات العلميه يبغاله جهد وإجتهاد وإعطائك لحقه من الوقت والدراسه
عشان كذا اذا همتك عاليه بالحصول على معدلات اعلى اي قسم بالهندسه تدخله راح تشد حيلك فيه مره (:
بالتوفيق ان شاءالله ,,

هلا و غلا بالمهندس عندي سؤال لاهنت طبعا كله بـ اراده الله ومشيئة الله لكن بشكل عام يعني ،، لو معدلي اربعه وربع ،، 4.25 إلى 4.45 هل فيه أمل ادخل هندسه ؟؟ ،، طبعا كله بمشيئة الله سبحانه لكن بشكل عام ،، هل من الممكـــن ؟ و بالتوفيق

هلا فيك زود .. ومن قال (:
طبعا ان شاءالله فيه امل كبير جدااا للدخولك الهندسة اذا معدلك من 4.25 فأعلى
لانك تقريبا ما حتجيب هذا المعدل الا و الموزونه العامه حقك تسمح لك بدخول الهندسة
ويبقى عليك فقط تحقيق الموززنه الخاصة 80 بالماث والفيزيكس والانقليش ..
الله يوفقك اذا وضعك قريب من هذا المعدل اتوقع لك بشكل كبير جدا ان شاءالله تنقبل بالهندسة
موفق ان شاءالله (:

اممممممواهـ .. اممممممواهـ لكـ ياخالد << عارف انكـ قاعد تقول ليتكـ بنت :p ..

خخخخخ اتحطمت لما شفت نوع الجنس ذكر

عندي توضيح واستفسار التوضيح : المواد الداخلة في الموزون الخاص 6 مواد : 3 انجلش .. فيزكس .. ماث .. إحصاء :( استفسار : من فين ممكن أتعرف على طبيعة كل تخصص وايش اللي ادرس فيه .. لأني إلى الآن مضييع جداً ومو عارف ايش أدخل بالزبط .. مافي شي يوضحلي ايش ممكن أدرس في كل تخصص وايش حيكون مجالي الوظيفي

اها شكرن على توضيحك ما قصرت
بس انا مدري بالنسبة للاحصاء ما شفته بالموقع حق آلية التسكين فيما يخص القبول بالهندسة
ولا احنا كان الاحصاء مطلوب علينا بالخاصه
مدري قالو لكم الاحصاء بالاسبوع الارشادي ؟ يا ليت مصدرك عشان لو متأكد نعدل بالموضوع هاذي المعلومه (:
طبيعة كل تخصص روح شوفها على هذا الرابط حق كلية الهندسة

http://engineering.kau.edu.sa/Default.aspx?site_id=135&lng=AR

لما تفتحه تلقى عاليمين قائمة فيها ايقونة الأقسام العلمية اختار منها اي تخصص حاب تشوف عنه معلومات
وراح تلقى بكل التخصصات معلومات كثير عالموقع زي خطة القسم والمواد حقو واغلب الاشياء
او راجع الشؤوون التعليمية في الكلية اذا حاب تاخذ معلومات اكثر
لان مجالات الهندسة يطول فيها الكلام ..
العفو منك ,, بالتوفيق ..

عبدالرحمن - خالد .. توجهوا للقبله و ارفعوا ايديكم وقولوا امين لو سمحتوا يا جعل ربي يسهل اموركم و يسعدكم و يوفقكم ويحقق مرادكم <~ تحمس معكم

< توجّهه للقبلة وقال آمين
تسلم يا غالي ومن قال ان شاءالله (:

بس عندي سؤالين للمهندس خالد / 1- طريقه حساب النسبه الخاصه متأكد منها ؟ " معليش على السؤال احسه غبي بس انصدمت منها , لاني اعرف طريقه وبالاسبوع الارشادي اقصد اليوم الارشادي قالوا لنا طريقه :\ و الطريقتين تختلف عن طريقتك ؟ "

يب يب معاك حق انا كتبتها بشكل مختصر مرره وحسبه سريعه مش الكل راح يفهمها
بس هيّا تؤدي الى نفس النتيجه بالاخير
ولكن هي عموما عن
درجات كل مادة × عدد ساعاتها
ثم تجمع اللي يطلع لك من كل المادة
وتقسم على عدد ساعات المواد هاذي كلها
كمثال فيزيكس 90 درجة × 3 ساعات
ماث 90 × 3 ساعات
انقليش 90 × 3 ساعات
راح يساوي ... 270 + 270 + 270 = 810
810 تقسيم على عدد الساعات الكلي لهاذي المواد اللي هو 9 .. = 90 بالموزون الخاص حقك

اذا عندك طريقه ثانيه قولها كمان نستفيد

2- انا رغبتي هندسه كيمياء ان شاء الله , وابي منك تعطيني نصيحه لا هنت , :$ انا حطيت رغبتي الاولى فرع السليمانيه .. وان شاء الله تجي =) بس محتار في الرغبه الثانيه ! احط رابغ او شمال جده ؟

الله يكتبها لك ان شاءالله .. وحاول تشد حيلك من اول يوم بالكلية عشان تخصص بالهندسة الكيمياء
وبعد كذا كمان تشد حيلك بالتخصص ,,
الرغبه الثانيه على راحتك وحسب مكان عيشتك كمان !!
اذا تبغى شمال جده قبل رابغ اكيد حط شمال جده وبعدين رابغ
الترتيب حطه عالشي اللي تبغاه اولويات
ما راح يأثر ترتيب كل وحده اذا ما انقبلت باللي فوقها ,,

خايف اروح لرابغ وانصدم بالواقع هناك "من المختبرات و اعضاء التدريس والاسلوب " لاني ما اعرف نظامهم ! واخاف يختلف عن جده !

والله يا عزيزي للاسف ما اقدر اقولك شي ما رحتها الكليه هناك اصلا
بس شوف اظن فيه تجمع لطلاب رابغ بقسم منتدى كلية الهندسة
ادخله واسألهم ممكن يساعدوك ان شاءالله ويقولو لك كل شي (:

او احط شمال جده واتخلى عند رغبتي هندسة الكيمياء :( لاني سألتهم باليوم الارشادي وقالوا لي ان ما في تخصص هندسة الكيمياء في شمال جده ! وقالوا لي ان التحويل صعب او شبه مستحيل لفرع السليمانيه حتى لو كان معدلي يسمح لي ان ادخل هندسة كيمياء بفرع السليمانيه !! " هالمعلومه متأكد منها اخذتها من العميد "

اجل ما يبغالها كلام يا بطل حط اول شي السليمانية وبعدين رابغ اذا رابغ فيها كيميائيه كمان
طالما انت ما تبغى الا كيميائيه وهاذي مش موجوده بشمال جده على كلام العميد
بالتوفيق حبيبي وان شاءالله تنكتب لك باللي تبغاه لا تشيل هم بس شد حيلك عالآخر (:

الف شكر للكل هنا .. ويارب يفتحوا هندسة للبنات

[الحلم الضآئع !]

الصرآحة مرة حسيت آلطب يحممس .. دخلت جو ^^ .

آلله آلله آلله يسهل + شكرآ .

[Doux Rash]

والله أحسن شي اسويه اني ادعيلكم
يارب يوفقكم دنيا وآخره ويسهل أمركم ودربكم ..
وشوووكرن ماقصرتو والله ..
دحين سرت فاهم كل شي الحمدلله :]

[fatoom sweety]

بارك الله فيكم على المجهود الكبير.بس عندي تساؤل انه اللي درس بس مستوى الرابع في الانقلش كيف يحسبوها لاني مادرست الاول والثاني والثالث وحضرتك كتبت في الطب ياخذوا الاول والثاني؟؟؟؟؟؟؟؟؟؟؟؟؟؟

[mohanned kattan]

بالنسبة للمعدل اللي مكتوب بالجدول لهندسة الطيران 3\5 قصدك في ( السنة التحضيرية ) ولا اية سنة ؟؟؟؟

[محمد بن عيضه]

شكراً لكم على اثراءنا بهذه المعلومات
وكفيتو ووفيتو

[طالب طب في المستقبل]

سلام من جديد

شاكر جميع من مرو على الموضوع

وبالعكس ماسوينا شي ....

بالنسبة للطلاب اللي سألوا عن المقابلة الشخصية اليوم رحت واستفسرت من مدير الشؤون التعليمية للكلية

وقالي بالحرف الواحد ...

يقول : المقابلة الشخصية ليست عائق ....

وقال لو مثلا واحد اهله جابرينه للطب او شي من هذا الكلام ....

فيسألوا كم سؤال وبس ... يعني اللي ينقبل وهوه يبغى طب ... يحط في بطنه بطيخة صيفي

ولا في ولا شي من الكلام اللي قالوا الاخوان انو مستندات ويعرضوا جثث مافي شي من هذا القبيل

وبالنسبة للأنجلش قال ماعندي اي فكرة وقال لي روح اسأل عمادة القبول والتسجيل ..

وإن شاء الله راح امرهم بكرة واسأل لكم عن الموضوع هذا ...

واعتذر اني مارديت على الردود لاني قريتها كاملة لانها جميعها تدور حول النقطتين اللي وضحتها فوق

واتمنى اي استفسار .. احنا تحت الخدمة

بالتوفيق للجميع....

[rano00nah]

^
^

شكرررن دكتورهـ الله يسعدك . .

>< الله يعين :(

[zera]

الله يجزاكم خير ...

[الأمير المدريدي]

المشاركة الأصلية كتبت بواسطة طالب طب في المستقبل سلام من جديد شاكر جميع من مرو على الموضوع وبالعكس ماسوينا شي .... بالنسبة للطلاب اللي سألوا عن المقابلة الشخصية اليوم رحت واستفسرت من مدير الشؤون التعليمية للكلية وقالي بالحرف الواحد ... يقول : المقابلة الشخصية ليست عائق .... وقال لو مثلا واحد اهله جابرينه للطب او شي من هذا الكلام .... فيسألوا كم سؤال وبس ... يعني اللي ينقبل وهوه يبغى طب ... يحط في بطنه بطيخة صيفي ولا في ولا شي من الكلام اللي قالوا الاخوان انو مستندات ويعرضوا جثث مافي شي من هذا القبيل وبالنسبة للأنجلش قال ماعندي اي فكرة وقال لي روح اسأل عمادة القبول والتسجيل .. وإن شاء الله راح امرهم بكرة واسأل لكم عن الموضوع هذا ... واعتذر اني مارديت على الردود لاني قريتها كاملة لانها جميعها تدور حول النقطتين اللي وضحتها فوق واتمنى اي استفسار .. احنا تحت الخدمة بالتوفيق للجميع....

كعادتك يا دكتور ما تقصر دائما وبالتوفيق لك بانتظار تكملة موضوع المقابلة