!! .. دورة شبكات (Cesco) للطالبات .. !!

[Nosa]

المشاركة الأصلية كتبت بواسطة mind glance يا هلا بك نوسا الدورة ان شاء الله تكون ممتازة وتفيد الكل واعتقد حيكون موعدها من 2-4 خلاص لكن ايام الاسبوع مو متحددة لسة ممكن سبت- اثنين- اربعاء او احد- ثلاثاء- اربعاء او شي تاني بس انا متلخبطة ومو حابة ازيدكم معاية :d

أهلييين بيكي

يب يب .. خلاص تحددت انه من 2-4
3 ايام بالاسبوع
لمدة 3 أسابيع
وحتبدأ ان شاء الله بعد اسبوع

بس باقي تتحدد اش هيا التلاتة أيام

سبت - اثنين - اربعاء
أو
سبت - احد - اربعاء
أو
احد - ثلاثاء - اربعاء

نبغى نشوف رأي الأغلبية ..

وحياااك يا بيغ بووس (;

[الحمادي2009]

ربي يوفقكم في الدوورة جميع

[loly]

السلام عليكم
لو سمحتو أنا أبغى أشترك بس مني عارفه كيف لإنه انا يناسبني سبت و اثنين و ربوع بس المشكله كيف اشترك يعني عند مين اسجل اسمي ومتى أوقات الدوره ومين هيا الاستاذه اللي ماسكه التسجيل عشان اسجل عندها في الجامعه ...؟؟
الله يخليكم فهموني على التفاصيل كلها وخاصه تاريخ ويوم بدأ الدورة .. وشكرا ..

[Nosa]

وعليكم السلام ورحمة الله وبركاته

أهلين لولي ..

التسجيل رح يكون عند د. مي فاضل (رئيسة نادي الحاسب)
الدورة رح تبدأ بعد اسبوع ان شاء الله
بس الأيام لسه ما تحددت .. بنشوف رأي الأغلبية
وأكيد رح تشوفي الاعلانات في الكلية وفيها كل التفاصيل
وكمان رح نعلن هنا في المنتدى عن بداية التسجيل
ولو مشتركة في قروب النادي
برضو رح نعلن فيه ان شاء الله

أتمنى أكون أفدتك :)

منورة خيتووو ..

[loly]

شكرا على الرد نوسا
بس فين استاذه مي فاضل ( يعني فين ألقاها) وفي أي مبنى وأي غرفه
الله يخليكي لإني رحت اليوم ومني عارفه فين شويه يقولولي في الخنساء وشويه في خدمة مجتمع فلو سمحتي قوليلي فين ألقى أستاذه مي ؟؟
بعدين معليش أنا اول مره اسمع انه في نادي للحاسب في أي مبنى دا الكلام ,,,,,,,,,؟؟؟؟!!!!!

[red flower]

د. مي مكتبها في العلوم الجديد

لا في الخنساء ولا خدمة المجتمع


اذا تعرفي مكتب أ. اروى لنجاوي .. هناك في نفس الصف تلاقي مكتب د. مي
بس ماني فاكره رقم الغرفه للاسف

[Nosa]

العفو لولي .. ما سوينا شي ^_^

د. مي دكتورة حاسب عندنا في القسم
مكتبها في المبنى الجديد 1-124
زي ما قالت رد فلاور
مكتبها جنب مكتب أ. أروى لنجاوي
أول ما تدخلي على المبنى الجديد من عند مكاتب دكتورة زينب ومنال ولبنى
تلقيه على يدك اليمين
بس التسجيل لسه ما بدأ
مستنين نشوف رأي البنات في الايام
وانتي ازا حابة تشتركي .. اش الايام اللي تفضليها؟؟
وزي ما قلتلك .. رح نعلن اول ما يبدأ التسجيل ان شاء الله

ونادي الحاسب .. نادي جديد
لسه ما عندنا مقر ثابت
بس في لنا قروب على الياهو نتواصل بيه

لو حابة تشتركي .. ممكن أرسلك القروب على الخاص :)

منورة مرة تانية ..

[loly]

شكرااااااااااااااااااا
نوسا
تخيلي رحت ودخت سبع دوخات من 42 الى خدمة مجتمع وفي الآخر تطلع مكتبها جنب استاذه اروى (خخخخخخخخخخ)
بس المشكله انه في يوم يتعارض معايا اللي هو الثلاثاء ايش اسوي ؟؟؟

[loly]

معليش نسيت اسألك سؤال برا الموضوع بس قلت يمكن تعرفي ..,,
تعرفي أستاذه اسمها فاطمة باعثمان ؟؟؟
فين مكتبها وفي اي مبنى ؟؟

شكرا ,.,.,.

[Nosa]

اهليييين لولي

لا عادي مرررة .. تحصل في أحسن العائلات ^_^

والله ماأدري .. بس حاولي تكلمي اللي بتعطيكي يوم التلاتاء انه تطلعك بدري شوية ازا كان الفرق حق نص ساعة بس (يعني تخلصي 2:30)
لانها كلها 3 أيام بسسسس
حرام تضيع الدورة عشان كدا!!

انتي حاولي .. وربك يجيب الخير ان شاء الله

وبالنسبة لدكتورة فاطمة باعثمان .. هيا دكتورة عندنا في الحاسب بس عمري ما شفت مكتبها ولا شفتها الا في التلفزيون :p

العفو يا قمر ^_^