سؤال لجميع الاعضاء والمشرفين ... ليش اخترت تخصصك ؟

[XHUNTERX]

السلام عليكم ورحمة الله وبركاته اخواني واخواتي في منتدانا الحبيب اكيد كل واحد فينا ايام السنه التحضيريه او الثانويه كان عنده هدف او طموح يبغى يوصله هل التخصص الي انت الان فيه هوا التخصص الي انت كنت تحلم فيه؟ طيب اذا ما كان هوا التخصص الي انت كنت تحلم فيه هل بعد ما درسة حسيت انك بديت تحبه ؟ سؤالي مهم لانه اي انسان او انسانه يكون او تكون مبدعه في مجال عملها او مجال عمله صدقوني اول شرط للابداع حبك لتخصصك او مهنتك و اقتناعك التام بضروريتها ارجو من الجميع المشاركه تحياتي

[JuStice]

.

وعليكم السلام ورحمة الله وبركاته ,

موضوع جميل (:

في الابتدائية والمتوسطة كان نفسي أصير طيّار , وفي بداية الثانوية كنت أفكر في الهندسة بشدة .. لكن على نهايتها وفي التحضيري قررت

إن أي مجال طبي هو المناسب لي وما راح أنفع في غيره .. والحمدلله تحقق حلمي سواء لما كنت في الأشعة أو الآن ,

أهم شي إني في مجال طبي مرتاح وسعيد جدًا والمواد تتناسب مع عقليتي وطريقة تفكيري .

.

[قصة غروب]

وعليكم السلام ورحمة الله وبركاته.
اشكرك اخوي الحبيب ع الموضوع الرائع ولي الشرف بان ارد عليك.
حقيقة مايخفى عليك وع الجميع
كلنا واحنا صغار كنا نتمنى نكون دكتور او طيار لكن ما ان تبدء عجلة حياتك بالسير ويتفتح عقلك احيانا تتغير بعض الطموح والمفاهيم.
انا كانت لي رغبه اني ادخل طب اسنان هذا قبل لا ادخل الجامعه ولا اعرف ايش فيها
طبعا بعد السنه التحضيريه كنت اتمنى اني ادخل اي مجال طبي والحمدلله اتيسرت ودخلت كلية العلوم الطبية التطبيقية.
وبالنسبه لتخصصي انا سالت ناس كثير ونصحوني بالمختبرات ولكن السوال هو اني احبه او لا
ف البدايه كنت اواجه صعووبه وقلت اني باحول
لكن بس اتعمقت ف التخصص الرااائع هذا بعد كذا صرت مو احبه وربي اعشق شي اسمه مختبرات لانه تخصص خياال وحيااة مرضى تتعلق بيدك وبتشخيصك وانا احب التحديات وبكذا يكون عمري كله تحديات وخصوصا ان المختبرات مجالات الابحااث فيها كبيره جدا,طبعا ومع بداية السنه الثالثه جاني قبول التحويل للاسنان لكن رفضت وبشده وقلتML teachnologist for ever
وانا غرضي من اني اقول كذا انه لا نحط انفسنا ف اماكن نكتشف مع مرور الزمن اننا نتحمل فوق طاقتنا ورحم الله امرئ عرف قدر نفسه.
تحيااتي اخي الغالي واشكرك ع الموضوع الرائع
تقبل مروووري
لك ودي واحترامي

[weddah]

حلوووو الموضوع ومررره يحمس

انا بالنسبة لي بالثانوي والتحضيري كنت أبغى أدخل تغذية اكلينيكية ومابغى غيرها
وما اعرف باقي اقسام الكلية بس ابغى العلوم الطبية عشان التغذية
وفجأة في التحضيري اكتشفت شي عجيب اسمه علاج طبيعي
مره حبيته وصرت محتارة بين القسمين
الين بدأت الدراسة وقدمت الرغبات وانا محتارة في القسمين وراضية بأي واحد منهم

بس الحين اقول مررره الحمدلله اني في علاج طبيعي لانه الوحيد اللي يناسبني ومره مبسوطة فيه
ولقيت نفسي فيه
واحس هذي الشغلة اللي أبغى أقضي عمري وانا اشتغلها >> كلام كبييير

وشووكرا ليك على الموضوع الحلوو
ننتظر نقرأ أجوبة باقي الأخصائيين وجوابك أنت كمان نبغى نعرفه

ويستاهل موضوعك

[Amal.S.A]

أنا من يوم عرفت نفسي وأنا أبغى أصير دكتورة ..لما تخرجت من الثانوي صح انقهرت من حكاية السنة التحضيرية
بس قلت يلا هيّ حتكون الفترة اللي راح أفكر فيها تمام أنا ايش أبغى بالزبط ..
طبعا ايش أبغى من المجالات الطبية .. لأنه عمري مافكرت اشتغل غير في مستشفى ومع مرضى ..
المهم على نهاية التحضيري أنا لسه متعلقة بالطب .. وحطيته أول خيار..
بس للأسف الفرق بيني وبين آخر وحدة انقبلت فقققط 0.02 .تخييييلوووا !!
زعلت وانقهرت وحقدت وكل شي بس بعدين قلت خليني أفكر من أقسام كليتنا ايش فيه قسم حيكون قريب من المرضى ..
لأني من جد ترى أعشق النقطة هذه وهيّ التعامل مع المريض ..مااعرف ليش !!
واخترت الأشعة .. ومرة حبيته (مع اني متأكدة اننا فاقدين متعة كبييرة بسبب تدريس بعض الاساتذة فيه )
وحبيت البنات اللي معايا خصوصا اننا قليلين فكلنا عارفين بعض ومتعاونين جدا..
جا في بالي أحول على آخر سنة ثانية ..فكرت كثيير .. وخفت لو اني حولت يطلع من جد الطب مو قدي
وحتعب كثير فيه لأنه الأشعة مرة حلو وبسيط مقارنة بالطب
وكمان خفت ماألاقي قرووب بنات زي اللي معايا ..( لأنه أنا مؤمنة بأنه جزء من النجاح والتقدم اللي يوصل له الشخص يكون بسبب أصدقائه في القسم)
وعشان كذا ماطلبت تحويل .. مع انه الى الآن الطب عشقي الأبددددددددددي ..
وبإذن الله بعد ماأخلص البكالريوس رح أكمل طب بس في تخصصي الرائع الاشعة ..

قرأت تخصص لسه جديد في الأشعة ومررررررررررة حلو وممتع *وأهم شي اني راح أتعامل مع المريض شخصيا* المهم حاطته في بالي
وبأذن الله راح أوصل له ..
ويارب اني أجي بعد5 سنوات واكتب هنا في نفس الموضوع هذا .. اني حققت حلمي أخيرا ..

مررررة شكرا لصاحب الموضوع .. واعذروني على الكلام الكثيييييييييير ^_^

[rory55]

يسلمو ع الموضوع مرررة يجنن
أنا من يوم كنت في الثانوي وأنا حاطة فبالي إني أبغى أدخل طب أسنان
بس بعد السنة التحضيرية ربنا ما قدرلي ودخلت تمريض مع إني كنت حاطته آخر خيار بالنسبة للكليات الطبية
وما كان عندي أي مشاكل إني أدخل أي تخصص طبي ما عدا التمريض
طبعا من أول ما عرفت تخصصي انصدمت وبكيت وكل حاجة
بعدين قلت يمكن لمن ننزل المستشفى أغير رأيي
بس بعض الاحيان احس إني مرة حابته ومرات أكرهه لدرجة إني نفسي أسحب من الجامعة
عموماً كثير نصحوني ما أحول لأنه تخصص جدا إنساني وكمان وظايفه مرة كثيرة بس الاهم إني أكون مرتاحة
إلى الان مترددة وماني عارف أيش رح يصير
و إن شاء الله ربنا يكتب اللي فيه الخير للجميع.

[So0o0o0my]

اول شي احب اشكرك على مووضوعك الحلو واللي يذكرني بالماضي

انا بالنسبة ليا من ايام المتوسط والثانوي كنت اتمنى اصير طبيب دخلت التحضيري في الجامعة تقريبا انقتل الطموح

ماكانت السنة التحضيرية عادلة حقيقة على كل حال جلست ادور على بديل قبل تخلص السنة التحضيرية لاني كنت

عارف انو ماراح انقبل في الطب البشري حطيت كلية العلوم الطبية كان اسمها المختبرات الطبية

وبعدها اول يوم دوام طلعت فووق الدور الثاني عشان نعبي الاوراق مختبرات علاج اشعة اتصلت على عمي سألت واحد من حقين الشؤون الادارية المفهييين قاالي هما يقبلو التخصص اللي معدلو اعلى اشعة والله دخل في راسي شي اسمو اشعة

بعدين قلتلو شوية واجيك طلعت كلمت عمي طبيب عام قلتلو عندي علاج اشعة مختبرات

قال عمي اما مختبرات او علاج طبيعي كان يتكلم على الوظاائف المتاحة << والله مااحبطكم والسماء رزقكم وماتوعدون هههههههههههههههه المهم وقالي بس انصحك مختبرات لانو موادها نفس مواد الطب البشري بس هما اكثر منكم مواد يدرسووها وانتو ماراح تدرسووها بس الاغلب نفسو

دخلت المختبرات وواجهت صعوبة في البدايه وجاني تحويل على طب الاسنان استخرت ولا ارتحت وماارحت لانو وقت جاني التحويل فعلا كنت وقتها مرتاح في المختبرات واحس هوا هذا الشي اللي يناسبني وقلت الحمد لله اني ماررحت الطب البشري عشان لاادخل في متاهات انا في غنى عنها فعلا كان الطب البشري لزوم مالايلزم

والى الان اقول في بعض الاحيان لاتنال ماتريده وربما تكون محظوظا في ذلك ...

وفي الاخير مااحد يااخد الا نصيبو لو كان لك شي في ابعد ارض راح تاخدو ولو كان شي مو لك لو كان بين عيونك ماراح تاخدو

خالص ودي ..

[Dr.candy]

فكررررة رائعة

انا كان نفسي ادخل طب ( جراحة )
بس كلنا عارفين مع التحضيري نزل معدلاتنا والفرووووق بسيطة

ودخلت قسم التمريض لانو اقرب شي للطب .. اقرب شي للمريض

دحين لو احد قالي احول .. ما راح ارضى طبعا .. لاني منجد حبببييييتها من قلبي
مدري بس حسيت اني مرتاحة ..
لانو مهنة التمريض مررررررررة حلوة ورائعة تتكون شخصيتك .. اسلوبك .. كلامك .. تعاملك .. صبرك .. ودا اهم شي

صح الدراسة صعبة ... بس في المستسفى غير


candy :)

[XHUNTERX]

بصراحه تفاعل جدا جدا جميل وبصراحه ماني عارف كيف اشكركم وبالنسبه لـ weddah وهوا انو انا ليش اخترت التخصص كان طموح كلفني كثير اكثر مما تتخيلو عشان كذا كتبت الموظوع وهل انا احب تخصصي صراحه انا ما اشوف نفسي الا في قسم الاشعه ومستحيل اكون في مكان غيره تحياتي