لكل طالبات الانتساب قسم اللغات الاوربيه بخصوص اساتذة هذا الترم 2017

[منال محمد الشهري]

السلام عليكم

عزيزاتي طالبات قسم الللغات الاوربيه

زي ما شفتو في الشعب كلها استاذات لهذا الترم 2017

وانا وكثير غيري نبغا نتخرج و نبغى معدل طيب ومانبغا تحطيم نفسيات و ضياع مجهودنا في الدراسه و المذاكرة وكمان والاهم من هذا كل(((ما نبغا درجاتنا لا تساوي الجهد المبذول )))

لانه في دكاترة و اساتذه يجعل الماده السهله صعبه, بمعنى انه فيه بعض أعضاء هيئة التدريس يصعب الماده و هيا سهله, وفيه العكس يسهل الماده و هيا صعبه و معقده و يبسطها ويجعلها في مستوى "امخاخانا " <بالعاميه.
يعني يخلي الماده في مستوى قدرة استيعاب الطالب و لا يعامل الطالب/ة وكأنه دكتور و على قدر من العلم و المعرفه و يعتقد انه على الطالب ان يلم بالعلم الي موجود عند الدكتور و يبغا الطالب يجاوب في الاختبار وكأنه خلص ماجستير و دكتوراه و ماشي في البروفيسوراه.

وفي بعض أعضاء هيئة التدريس بدون ذكر أسماء يقرأو فقط و يقلك الكتاب كله معانا و انتم عارفينهم كويس ياطالبات.
و البعض يشرح من سلايدز و يطلب الطالب/ة تذاكر من الكتاب طيب يا دكتور/ة انت ماشرحت الكتاب حضرتك بتشرح في مكان ثاني كيف تطلب مننا نذاكر من مكان ثاني غير الي قاعد تشرحو!!!
وفي بعض الدكاتره اسمحولي أقول الكلمه هذه مع انها ثقيله جداَ و اعذوروني و سامحوني عليها بس الكلمه الي راح اقولها هيا الوصف الوحيد وهيا ان في بعض الدكاتره هم "مصيبة" الطالب/ة ليش: لانة طال عمرهم في محاضرة البلاك بورد يفتح موقع ينسخ و يلصق منه و طول المحاضرة يقراْ من الموقع والطالب/ه ماعنده مادة يذاكر منها يعني ماعنده مرجع يذاكر منه يعني مافي شي يذاكر منه ياااااا الله على الاستهتار بالطالب/ة, طيب يا دكتور/ة حضرتك مانت فاهم الماده و قاعد تنسخ كلام الموقع الي حتى مايقول للطالب مثلاَ استعين بالموقع الفلاني لا لا لا ابداَ بالعكس روح يا طالب/ة ضيع و دبر نفسك في موقع و لا أي نيلة تذاكر منها , إن شاء الله يضيع و قتك كله وانت دور و تفهم نفسك انا مالي, والله ثم والله اني حتى بعد تفريغ المحاضرة يجيبلك شي في الاختبار ماذكرة في المحاضرة او قالك مش مهم النقطة الفلانيه و يجيبها في الاختبار! و الادهى انه حتى وهوا يقرأ من الموقع يغلط في نطق الكلمات يعني حضرتك بتقرأ من قدامك و كمان بتغلط دكتور ايه ده يابو دكتور << خلاص فصلت قسم بالله.

انا و كل الطلاب و الطالبات نبغا احد يدرسنا يفهمنا يشرحلنا يفسر لنا الأشياء المبهمه الأشياء الي فيها لبس الأشياء الي كطالب علم لا يعلمها و يحتاج احد يعلمو هيا و ينورو نبغا يضيف على المعلومات الي عندنا نبغا معلومات ترفع مستوانا العلمي نبغا كل ما استفدنا و استخدمنا المعلومه نقول جزاهم الله خير اساتذتنا هما الي علمونا , مانبغا احد يقرأ لنا الكتاب و يجي ماشي, تعال يا أستاذ/ة الله يسلمك حضرتك ماشرحت حضرتك قرأت فقط يا أستاذ/ة ياقدير فين الشرح و تسمع ذيك الكلمه والسلام عليكم و رحمة الله و يركاته و يقفل المحاضرة. وروح ياطالب/ة فرفر عشان تفهم بنفسك وروح يا طالب/ة انطحن عشان تفهم و لف العالم كلة عشان تقدر تفهم و تلم بالماده عشان لو انسألت في أي سؤال تعرف تجاوب.

المعروف جدأ ان المواد الادبيه كل شخص او مدرسه يفهما و يشرحها من منظور مختلف لذلك تلاقي الطالب انفرم مذاكرة من موقع معين بس الموقع لا يتناسب مع منظور الدكتور القدير فيحسبلو اجابتو غلط او مايعطيه الدرجه كامله لذلك المواد الادبيه زي الدراما القصص المسرحيه و شكسبير لابد من الي يدرس يوضح للطالب هوا ايش يبغا هوا من أي منظور شايف تحليل الماده.

يا ناس نبغى احد يشرحلنا و يعطينا (((مرجع محدد))) يتناسب مع الوقت المتاح للانتساب و بعدين حاسبنا على كل غلط في الاختبار اما لاشرح ولا مرجع تقعد تقرأ واخر شي تحاسبنا على كل غلطة. يعني الي ذاكر وجالو شلل في مخه من المذاكرة الا الا الا ماينقص درجات كثييييير و ما حياخذ درجه تساوي المجهود و الوقت الي بذله.

انا طولت عليكم أتمنى أتمنى أتمنى من إدارة القسم و من كل شخص له سلطه له طريقه على قسم الطالبات لغات أوربية يفتح لنا شعب مع الدكاترة التاليه أسمائهم.

1- الدكتور عمر باقبص (شكسبير - شعر).
2- الدكتور سلطان الحاتمي (صوتيات وعلم أصوات ونحو و صرف و لغويات تطبيقيه و اجتماعيه) وجميع المواد اللغويه. (والله ثم والله ثم والله اول مرة افهم الأصوات و اللغويات معاه) مع العلم اني رسبت مع الدكاترة المذكورين أعلاه و معاه جيبت 98!!!
3- الدكتور محمود عبداله السبحي.

و أي احد يساعدنا بوضع أسماء الدكاترة الي يشرحو و يعطو الطالب مرجع للمذاكرة يتكرمو و يكتبو أسمائهم.

طبعاَ فيه غيرهم كثير بس هذولا الي لي تجربه معاهم.


خلاص يا ناس ارحمو من في الأرض يرحمكم من في السماء انا تخرج ابغا اتخرج وغيري كثير.

الرجاء إيصال الرساله للأشخاص المعنين .

والصلاة و السلام على اشرف الخلق نبينا و حبيبنا محمد عليه الصلاة و السلام.