InstagramTwitterSnapChat


 
وصف

العودة   منتديات سكاو > الكليات الجامعية > منتدى كــلــية الاقــتصاد والإدارة > منتدى برنامج البكالوريوس العام
   
   


منتدى برنامج البكالوريوس العام قسم مخصص لطلاب وطالبات منتدى برنامج البكالوريوس العام

|موضوع مميز|مستجد الأعمال من أ إلى ي

منتدى برنامج البكالوريوس العام

إضافة رد
 
أدوات الموضوع إبحث في الموضوع انواع عرض الموضوع
منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
  #1  
قديم 10-08-2015, 01:42 AM
الصورة الرمزية مزاحمتهم

مزاحمتهم مزاحمتهم غير متواجد حالياً

الحمدالله

 
تاريخ التسجيل: Sep 2012
الكلية: كلية الاقتصاد والادارة
التخصص: التسويق
نوع الدراسة: إنتظام
المستوى: السادس
البلد: جــــدة
الجنس: أنثى
المشاركات: 110
Lightbulb |موضوع مميز|مستجد الأعمال من أ إلى ي



[size="5"]

بسم الله الرحمن الرحيم

السلام عليكم ورحمة الله وبركاته..

أكثرنا يدخل كلية او تخصص وفي راسه مليون سؤال، و أنا كنت منهم ، ولما كنت أسأل ما الاقي رد يبرد القلب.. فأرجع ألف بالمنتديات ويا تلاقي يا متلاقي ..فتخيلي كمية الوقت اللي يضيع ..
بإذن الله ححاول قد ما أقدر إني أغطي كل شيء يمكن تحتاجيه كمستجدة أعمال، وأحط لك الروابط اللي ممكن تفيدك ..
و موضوعنا متقسم ل :

* مين هما مستجد أعمال
*شامل لما يخص المستوى الثالث
* شامل لما يخص المستوى الرابع
*شامل لما يخص المستوى الخامس
*تحديد التخصص
* نصايح حتفيدك




__________________________________________________ __________________________________________________ ____________


مستجد الأعمال

أول ما تخلصي تحضيري (علمي _ انتظام )وتقرري إنك تدخلي كلية الاقتصاد و الإدارة .. حطي ببالك أنو حتجلسي 3 أترام تدرسي مواد عامة ..
المواد العامة هيا أساسيات لأي تخصص بالكلية .. يعني يا ستي حتدرسي مواد تكون مبادئ للمحاسبة و التمويل و التسويق و الإدارة و الاقتصاد و الانجليزي الخاص بالأعمال .... الخ..

حتقولي انا براسي تخصص و بدرسه دايركت زي أغلب الكليات،،لكن نظام كلية الاقتصاد والادارة كذا ،تدرسي 3 أترام وبعدها تتخصصي ، خلال هذي الثلاث الأترام بطاقتك الجامعية ب اسم مستجد أعمال .. الفكرة من هذي الثلاث أترام إنهم يعطوكي فكرة عن كل تخصص في أي شركة ، فلو فتحتي مشروع خاص تكون عندك خلفية تخليكي تقدري تديريه من أكثر من ناحية ..

شي ثاني مهم ، صعب لما تشتغلي بمكان كبير وله سمعه زي مثلا ارامكو وتكون معلوماتك محصورة على تخصصك فقط ..

مثال ثالث علشان توضحلك (لو كنتي محاسبة مثلا و ما تعرفي أي شي عن التسويق وأهميته.. يمكن ما تعطيله حقه بالميزانية.. وهذي مصيبة ..حتقولي ليه حقولك اسئلي جماعة التسويق و شوفي ردة فعلهم) ..

( حقين الادارة لو تخرجوا يشتغلوا بأي مكان )

هذا مثل غريب ينقال لخريجي كليتنا ، خريج المحاسبة عادي تلاقيه في قسم التسويق ومندوب مبيعات شغال ، خريج ادارة الأعمال عادي تلاقيه بقسم الموارد البشرية ... الخ ..
ليييه يقولوا كذا !
لأنه الحمد لله تدرسي الأساسيات والفكرة العامة لأي تخصص + دراية كاملة عن تخصصك ..

وما اخبي عليكي أنو ماعجبني المثل لأنو احتكر كليتنا ,, أي وظيفة بالعالم شوية تدريب وممارسة وقراءة تقدري تتمكني منها .. وهذا رأي يمكن أنتي تحسي زيي أو تحسي العكس .

البطل في ال 3 أترام إنها تعطيكي فرصة تتأكدي من رغبتك بالتخصص ، يعني أنا دخلت الكلية ونفسي أكون HRM (موارد بشرية )، درست مادة شبيهة لها واكتشفت انها ما تناسبني وما بسطتني ، لكن لما درست التمويل مررة حبيته هوا والمحاسبة ، و سبحان الله من خلال ال3 أترام والتفكير بالأنسب لقيت التسويق هوا اللي منجد أبى ادرسه..

** لو كانت رغبتك بتخصص إدارة مستشفيات فأنتي استثناء و تكوني دايركت عالتخصص ،والبطاقة حقك عل طول اسم تخصصك ادارة مستشفيات ، و تكون ضمن خطتكم كم مادة من المواد اللي يدرسوها مستجد الأعمال ..



_____

المستوى الثالث




كليتنا تعاملك بالأترام ، يعني لو سألتي وحدة من كليتنا أنتي كم لكي بالجامعة ؟
حتجاوبك بالأترام : يمكن تكون مستوى سادس (يعني لها 6 أترام بالجامعة ) ..أما أنتي دوبك مخلصة تحضيري ودخلتي أول ترم بالكلية فمستواكي الثالث ..

^^ إن شاء الله تكون وضحت الفكرة ..

هذا رابط للخطة الدراسية :
http://www.skaau.com/vb/showthread.php?t=671563

راح نمشي حسب الخطة الدراسية و المواد ل أول مستوى بالكلية :

• مبادئ المحاسبة (ACCT 117)
• المهارات اللغوية (ARAB 101)
• مبادئ الاقتصاد الجزئي (ECON 107)
• لغة انجليزية متقدمة 1 (ELIB 201)
• إحصاء أعمال (STAT 271)


فيه مواضيع كثيرة بمنتدى سكاو عن المواد ،، وهذا أشمل موضوع لقيته ..

http://www.skaau.com/vb/showthread.php?t=521035

وبالنسبة للدكاترة هنا تجمع للطلاب والطالبات يحطوا تعليقاتهم و تجاربهم ..


هذا للطالبات


http://www.skaau.com/vb/showthread.php?t=647923

وهذا للطلاب

http://www.skaau.com/vb/showthread.php?t=647926

مررة فادني أول رابط وكنت احمل منه وأنصحكي تدخليه ..

تجربتي مع الدكتورات حكتبها هنا و انسخها بموضوع تجارب البنات علشان يستفيد الكل ..

__ تجربتي يمكن تختلف عن اللي تسمعوه .. وحتلاحظو انو أغلبه مدح ,, مو مجاملة لكن كنت أحاول دايما لما أنزل مواد أختار النخبة وأحسن دكتورات .. وفيه دكتورات أرتحت معاهم وصحباتي مرررة لا.. يقولون ماتفهم ومو قد المدح وأنا أشوف العكس .. الفهم يختلف من شخص لأخر.. وهذي بس تجربة مطروحة.

المحاسبة1 : أخذتها مع د.إقبال خاطر .. جنسيتها مصرية و تشرح كويس .. بالنسبة لنا كانت جددا ممتازة مقارنة بالبقية .. بس لما شفنا محاسبة 2 و التمويل اكتشفنا إنها ما أدت الماده حقها .. يعني أشياء كثيرة كانت تقولنا أنها مسلمات وهيا بالواقع لها شرح وتطبيق بالحياة ينفهم .. لحد اليوم هيا الأحسن من بين الدكتورات المتواجدات بالشرح.. والمادة قد ماراح يخوفكم وتشوفون ناس ترسب إلا انها سهلة جدا..


المهارات الللغوية: كانت مع أ. سلوى بابطين .. مرررة كانت بطلة من ناحية الشرح.. تشرح من قلبها كل شي ، علشان كذا البنات يطفشوا أحيانا منها .. أمينة مررة بالشرح وتجاوبك بدقة لو سألتيها و بالها طويل ..مستعدة تضيع كلاس علشان تفهم طالبة .. تحسي هدفها انك تخرجي فاهمة .. مو مادة عامة مشي حالك .. نشاطها خليكي دقيقة فيه لأنها ماشاء الله تلقط أخطاء ما ننتبه لها .. بس ما تنقص إلا لو كان شغلك كارثي هههههههههه..

الاقتصاد الجزئي: د.نادية يوسف .. جنسيتها هندية .. شرحها تحاول تبسطه قد ما تقدر وتستخدم الانقليش المفهوم .. عن نفسي كنت مبسوطة منها وفيه بنات ما ارتاحو ..كانت مررة متساهلة معانا .. يعني تكنسل كثير و تساعد بالمشروع و لا تدقق عليه .. المادة نفسها سهلة ومفهومة وممتعة..

الانجليزي1 : فيه 3 ليفلات انقليش بخطتنا .. حقين ادارة مستشفيات مطالبين ب المستوى الأول بس.. عل قد ماكنت طفشانة من الانقليش بالتحضيري لكن هذا غير .. كل الليفلات سهلة وبسيطة ومركزة على المفردات حق البيزنيس ..أغلب البنات قرفانين منه ومن تكاليفه ,, والحق ينقال ..التكاليف والمعمل (هذا مشروع بكل ليفل حتسوونه ، وتختلف فكرته وأسلوب تقديمه من ليفل لأخر )مرررة كثيرة وتجي بأوقات أحيانا نكبة هههههههه فيبالك تكوني منظمة نفسك ووقتك ، بس مفيييييييييييييييييييييييييييييييييييييييييييييييي ييييييييييييد و يطورك بشكل مرررررة كبير .. يشتغلوا عليكي مرررة كويس خلال هذي الثلاث مستويات ، فنصيحة من دحين أنتي كذا ولا كذا بتنزلي المادة وحتحضري ف استغلي الفرصة بأنك تسوي شي بنفسك مو كوبي بيست زي مايسوي البعض .. الهدف إنك تتعلمي وتستفيدي، أسئلي دايما و ناقشي هذا حقك ..
دكتورتي كانت وحدة تدرس بنات التحضيري وجايبينها اسمها د.رحمة رخنتور .. لأنها أول مررة تدي المنهج فكانت مررة ملخبطة و تدخل أشياء بثانية وفجاة تقولنا افتحوا الكتاب فجأة الرايتينق طلعوه و معصودين ههههههه .. ما أتوقع لسه تدرس لأنو فيه بنات اشتكوا عليها ..

إحصاء الأعمال : ا. عبير الثبيتي .. المادة حلوة وأغلبها معتمد على إحصاء التحضيري .. يمكن 7 شباتر مراجعة للي أخذناه بالتحضيري.. لأنو استاذتنا شرحها من القللب و مرتبة و تبدأ الكلاس بمراجعة اللي فات كانت المادة خفيفة .. طبعا الدور الأكبر علينا كطالبات بس لما تكون الدكتورة بطلة يسهلك المذاكرة مررة .. المادة ذي كمان لللأسف مأخذة نفس سمعة المحاسبة بالصعوبة والرسوب وناس تأخرها لقبل التخرج و أكششششن ماله داعي ..دايما اتوكلي على الله و ركزي مع دكتورتك و أدي الماده حقها وربنا ما يضيع تعب أحد ..

__________________________________________________ __________________________________________________ __________



المستوى الرابع



وهذي مواد المستوى:

• مبادئ المحاسبة ACCT 213
• التحرير الكتابي( ARAB 201 )
• مبادئ الإدارة BUSS 220
• مبادئ الاقتصاد الكلي( ECON 203 )
• لغة انجليزية متقدمة (ELIB 202)


زي المستوى الثالث .. هذا رابط للموضوع شامل..
http://www.skaau.com/vb/showthread.php?t=521561

قررت بذا الليفل بما اني تعودت عل الكلية والجامعة (ما كنت ادرس بالفرع الرئيسي ).. أني أغامر وأزيد مادة فنزلت ثقافة مستوى أول ..فصارت 6 مواد مو 5 ..

المحاسبة : د.لاريسا ، جنسيتها يمكن امريكية مو متأكدة .. الأكسنت حقها واضح وتحاول تبسط الكلام وتحل بيدها كل مثال بالسلايد .. بالبداية كنت اشوفها بطلة لكن بالشباتر الأخيرة كنت اضطر أحضر كلاساتها بس صورة و أعتمد على نفسي كثيررر .. المادة نفسها مو صعبة لكن مو سهلة بنفس الوقت ..

التحرير الكتابي : اسهل و ابسط من المهارات اللغوية ، و تحسي أنه حتى لو دخلتي الاختبار وفيه أشياء ما مداكي تمسكيها حتمشي وتحلي .. دكتورتي كانت سهير .. طيبة و وشرحها تمام.. و تدي النشاط اهتمام ..

مبادئ الادارة : اخذتها مع أ. صبا .. تشرحلنا سلايد سلايد و تدي مثال مو بس تقرأ .. المادة عيبها أنها نظرية والكلام صح سهل ومفهوم بس دش .. مع أ.صبا ما حسينا بذا الشي بالكلاس لأنها كانت تدي أمثلة و تفهم .. لكن بالمذاكرة كنت أطفش صراحة ههههههه بس كلام كلام .. ماهي ممتعة .. ويختلف من وحدة لوحدة.

الاقتصاد الكلي : هذا شي ثاااااااني .. مع د.حاجة إبراهيم .. شرحها يبرد القلببببب و تفهمك قد ما تقدر.. المادة نفسها خفيفة وممتعة وتدخل المزاج.. ما كان فيها مشروع بس أدتنا ملزمة أسئلة وقالت حلوها وحددت لنا يوم لتسليمها ..

الانجليزي2: د.عائشة .. جنسيتها أسيوية .. من مشاكل الانقليش أنه 4 ساعات بالتحضيري وهنا خلوه ساعتين.. ساعتين مع دكتورة الليفل الأول كانت الدقايق ثقيييلة و مملة .. بس مع د.عائشة مررة غير .. منظمة و تغير الجو وتجلس تتحاور مع الكل وتمزح وتكنسل كلاسات .. تساعد وتراجع معاكي الواجبات الللي سلمتيها و حقانية بالدرجات ..

ثقافة 1 : نزلتها وقلت يلا أغامر وانزل 6 مواد .. أخذتها مع ا.معتوقة .. كان نفسي أستفيد من المادة .. بالبداية كانت الكلاسات الأولى مو قد المطلوب بس تلقين كلام .. وما كنت اسمع كويس لأني أجلس ورا وهيا مرتبتنا بالأرقام ورقمي كان بالتسيعينات .. سبحان الله بعد الميد الأول اتغير كل شي .. الصوت صار أوضح و بدت تجيب قصص صحابة تتناسب مع الموضوع وتسويلنا تفاعل بنقاش .. صرت أتحمس لكلاساتها ..



__________________________________________________ __________________________________________________ ___


المستوى الخامس



وصلنا للخامس .. وهذي خطته :

• إعداد التقارير( ELIB 203)
• أساسيات التمويل (FIN 230)
• الثقافة الإسلامية 1(ISLS 101) ,, "هنا حنروح على ثقافة 2 لأنه واحد اتكلمنا عنها ..
• نظم المعلومات الإدارية( MIS 250)
• مبادئ التسويق (MARK 260) "ما نزلت معايا المادة فنزلت بدالها مادة حرة فلك 201 ..


وهذا الرابط للموضوع الشامل..
http://www.skaau.com/vb/showthread.php?t=524578

تجارب الدكتورات ..

إعداد التقارير: مع د.صايمة .. دكتورة طيبة و تشرح كويس .. جنسيتها باكستانية ,, بالها مرررة طويل وتسمع للبنات وتديهم زمام الأمور ههههه ( متى تبوا الليسينينق ؟ متى تبوا تسوو ا العرض ؟ .. كله كان بمشورتنا ..) تراعي بالدرجات و تعاملها أخلااااااااق ..

التمويل : اخذتها مع الغنية عن التعريف د.خديجة حريري .. خطيييييييييرة وتشرح كل شي وتربطلك إياه بالحياة و أشياء كثيرة حتخرجي بها من الدكتورة .. حاولي قد ما تقدري تأخذي معاها .. طيييبة وتسمع للبنات ولأسئلتهم ..

ثقافة 2 : موضوعات ثقافة 2 جممميلة و مفهومة ومفيييدة .. أخذتها مع ا.منال باجابر .. مررة كلاسها رائع باستشهاداتها و بقصصها.. أسلوبها بالشرح بسيط لكن يلصق بالدماغ .. حتتذكريها كثير وانتي تذاكري .. النشاط تعبتنا شوية فيه .. ولما كنت أقولها انو تدينا فرصة ووقت لأنهم زنقونا ..كانت تقول مو بيدي الكلية حددت خلاص ..

نظم معلومات: أخذتها مع د.شيماء .. ما أحب الحاسب و شغل البرامج والأجهزة والأسلاك بس معاها كان غيررررر.. بالكلاس شرحها خطير الله يسعدها ولو سألتيها تجي إلين عندك وتجاوبك .. مررة طيبة و أخلاق و حقانية مرة بالدرجات و تقول أنا ضد البونس ..شيماء وخديجة حريري حق التمويل ما يتعوضوا .. حاولي معاهم تنزلي ..

فلك عام 201: أخذتها مع د.علاء الدين .. المادة سهلة وعبارة عن أربع ابواب .. الدكتور كان يقول : أول باب أصعب شي لأنه فيه معادلات وشغل ..أما الأبواب الأخيرة سهلة عن كواكب المجموعة الشمسية و الأرض والقمر .. الباب الأول ماكان صعب زي ماقال .. معادلات بسيطة و قوانين مباشرة وهوا كان يشرح بأمانة و يراجع أحيانا اللي اخذناه قبل .. مرررة الدكتور يساعد ويدي بونس ويعيد إختبارات .. وشرحه ممتاز ويقولك خلال الشرح ايش الأشياء اللي تركزي عليها و انتي تذاكري ، وهذا الشي يسهل علينا مرة ..


__________________________________________________ __________________________________________________

تحديد التخصص نقرتين لعرض الصورة في صفحة مستقلة



تقريبا بعد ما تخلصي اختبارات الدوري الأول في المستوى الخامس حتنزل لكم مواعيد اختيار التخصص ، ترتيب الرغبات حيكون الكتروني ، تسوينه من خلال الأوديس ، وأحيانا يقولوا لا لازم يدوي ، تروحي للكلية وترتبي رغباتك ..

^^ ايش التخصصات المتاحة بكليتنا للي مسارهم علمي ؟
 التمويل
 إدارة أعمال
 المحاسبة
 التسويق
 إدارة الموارد البشرية
 نظم معلومات إدارية
 إدارة مستشفيات


وهذا موضوع بعنوان ( دليلك للتخصص بكلية الاقتصاد و الإدارة )

http://www.skaau.com/vb/showthread.php?t=18644

كيف أختار تخصصي !

محد يعرف أنسب تخصص ممكن تدخليه قدك ..و لا تخافي وتتوتري ترا كلنا مرينا بنفس الفيلم و الحمد الله ربنا سهل ..
أهم شيء أنك تبدأي تجلسي مع نفسك وتجيبي ورقة و قلم: إيش أحب أدرس و وايش طبيعة قدراتي ..

هل أنا لكيعة بالمعادلات و أتعب من الأرقام .. ولا يمكن أكون أعاني من العبارات و الكلام وما اعرف اسوي رابط بينهم ..
ايش نفسي أصير لما أكبر ..هل أبى أكون أتعامل مع ورق و ملفات و لا احب أخرج واقابل ناس ..

وكذا طلعي كل اللي براسك الين ماتتكون عندك صورة عن رغبتك وتفكيرك .. من الأشياء اللي تساعدك هيا اختبارات الشخصية زي مثلا مقياس هيرمان والبوصلة الشخصية ..إلخ (هيا مو أساس بس مجرد فكرة يمكن تساعدك)..

__ بعد ما اكتب ايش أسوي ؟؟

جمعي كل شيء كتبتيه وخليه قدامك وابدأي تحليل .. يعني مثلا كنتي من الناس اللي يتعب من الأرقام وقدراته مو مرة فيها فأكيد المحاسبة والتمويل خيار مو جيد ..
مثلا ما تحبي تتعاملي مع الناس كثير وتفضلي دراستك وشغلك كله ورق و ملفات و تبي استقرار بمكتب فمعانها التسويق يمكن ما يناسبك ... وهكذ
ا ,
الفكرة أنك تعرفي نفسك و قدراتك .. ونجي لأهم خطوة .. تمسكي تخصص تخصص وتقري عنه بضميرر علشان يمكن براسك صورة خاطئة عنه .. شوفي المواد و الخطة علشان تعرفي هل هوا الشي اللي منجد نفسك تدرسيه ولا لأ..

لاتنسي أنو عندك فرصة 3 أترام تتاكدي من رغبتك .. وحاولي تختبري نفسك .. كيف؟

لو مثلا محطية براسك تمويل .. شوفي نفسك بكلاس التمويل كيف ؟ هل تنبسطي بالمعلومات و ما تحسي بالممل بسرعة ؟ لما ترجعي البيت هل مذاكرته مررة كارثية ولا أنتي مبسوطة فيها وماشية حتى لو الجزئية صعبة ؟
استشيري اللي حولك من اللي عندهم خلفية عن الموضوع ويتمنوا مصلحتك ..
ولا تسوي زينا ههههه .. يعني لا تسألي صحبتك اللي ب كلية الطب وهيا ما عندها أي خلفية عن اقسام الادارة غير اللي تسمعه من الناس .. ف مشورتها ماراح تكون مفيدة مرة ..

استخيري ثم استخيري ثم استخيري حتى بعد ما تختاري تخصصك استخيري وادعي بصلاتك ( اللهم يسر لي الخير حيث كان ثم رضني به ) ..



__________________________________________________ __________________________________________________ _____

نصايح حتفيدك


جاء دور بعض النصايح اللي بإذن الله حتفيدك في حياتك الجامعية ..

1) لاتحكمي على منظومة بسبب شخص

لما كنت بالتحضيري رحت يوم التسكين اللي أغلبكم قد راحوه .. كانت كل الكليات محطين ناس يفتحوا نفسك عل القسم ويحببوك فيه ..
وحقيقي كنت يومتها لسه مترددة من كلية الادارة لأنو رغبتي كانت ب تنمية الموارد البشرية والقسم الموجود هو إدارة الموارد البشرية وكان فيه اختلاف ..

رحت أدور على مكان كليتنا لقيت وحدة الله يهديها ويصلحها مالها نفس وقرفانة .. بديت اسئلها الا أدتني مطوية وقالتلي روحي أقرأيها يمكن تلاقي إجابة ..
وعل نياتي فتحتها لقيت الأقسام و النسب المطلوبة و ما في إجابة للي سألته .. وكالعادة صحبتكم تسأل وتسأل الين ماتوصل للي تباه ههههههههههه ..
وعدت عليها أسئلتي الا قالتلي : يا بنتي روحي أفتحي قوقل و اكتبي أسئلتك وبإذن الله تلاقي .. هنا أنا مررة انصدمت .. لأني ما أتخيلت أتخرج من مكان مو متعاون وفيه ناس مقصرة بأبسط شي .. وقلت يا ربي هذي اللي تمثل الكلية أجل كيف الكلية و رئيسات الأقسام..

ومرت الأيام و الحمد لله صرت جزء من الكلية والصدمة كانت أنو مافي كلية بشطر البنات معطيه وجه للطالبات زي كليتنا .. حقيقي مدلعين هههههه من ناحية الأنشطة والفعاليات وتفاعل المنسوبات معانا و الدكتورات أغلبهم متفهمين.. هذي وجهة نظري بالكلية يمكن فيه بنات يحسوا بالعكس الله أعلم .. ما أعرف كم في وحدة أتأثرت بذيك المنسوبة و غيرت رأيها .. ولا كم وحده أخذت فكرة غلط عن كليتنا بسببها ..


2) استغلي الفرص اللي توفرها الجامعة في تطوير نفسك

فيه مئات الدورات تسويها الجامعه حاولي حاولي قد ما تقدري تحضريها .. لييه ؟
راح تستفيدي من خبرات الدكتورات و حتنبسطي و حتحسي بشخصيتك تصير أوعى و عقلك بدا يرزن هههههه ..
غير كذا تخرجك من روتين الدوام .. و منها تتعرفي على ناس جدد.. الكلاسات مافيها الا بنات قسمك لكن الدورات كل بنات الجامعه..
تبداي تتعودي على الاحتكاك بالناس وكيف تتعاملي معاهم وحتتطور مهارات التواصل والحوار اللي عندك ..
أغلب الدورات فيها شهادات ومرة دكتورتنا قالت أنو كليتنا معطية لهم 5% من مجموع الدرجات للطالبة اللي تكون معاها شهادات .. فأنتي مستفيدة من كل النواحي.


3) المواد الحرة و كلام البنات

المادة الحرة هيا مادة تأخذيها من أي كلية غير كليتك .. مثلا تنزلي فلك من كلية العلوم أو تربية اسرية من الاقتصاد المنزلي ..
وكل قسم طالب ساعات معينة للمواد الحرة .. يعني لو تخصصك طالب 6 ساعات حرة .. يصير لو أخذتي مادتين 3 ساعات من برا الكلية تكوني قفلت الحرة ..

فلو قررتي تنزلي مادة حرة أسئلي عنها قبل : ايش طبيعة المادة و كيف تقييمها( يعني بحث ولا بس واجبات ) و مين أحسن وحدة تديها .. وبعدها قرري ..
المشكلة هنا لما تسألي.. كلام البنات مو دايما يفيدك اخخخخخ بس ..

خلي القرار لكي بالنهاية .. لأنو أحيانا تتعشمي بمادة من كثر المدح وتنصدمي وأحيانا العكس .. لما تسألي عن دكتورة مثلا وقالولك لا لا ماتنفع .. قوليلهم ليه ! لو طلع السبب شي يضايقك زي مثلا شرحها مو تمام وكذا تبدأي تعيدي التفكير وتسألي غيرهم علشان تطمني ،، .. ليه تسألي عن السبب؟ لأنو في أسباب أحيانا غريبة زي مثلا: أنها تهزأ اللي يضحك! مدري ما تأشر!..
هنا موضوع لتجارب الطالبات و الطلاب مع المواد الحرة..

http://www.skaau.com/vb/showthread.php?t=667466

4) خلي علمك يستمر مع غيرك

بعد ما يخلص الترم حتلاقي كمية أوراق وسلايدات وكتب وملفات شيء مو طبيعي .. خصوصا الملخصات .. عادة مصيرها يا تنرمي بالقاعات بعد الاختبار ،
ولو كنتي محطيتها بالبيت إلا ماراح يجي يوم وتلاقي أمك محطيتها عند باب الشارع ههههه..
ما تتصوري قد ايش ملاحظاتك والشرح اللي تكتبيه بالسلايد يفيد غيرك .. مو كل وحدة تتيسر لها دكتورة بطلة وتفهم وخصوصا المواد اللي زي التمويل والمحاسبة ..

اديها لزميلتك اللي ما نزلت المادة تستخدمها كمرجع لها لو تبى تفهم .. وحاولي تساعدي أي زميلة تأخذ مادة أنتي مخلصتها .. اشرحيلها من فين يجيبوا الأسئلة وكيف كنتي تذاكريها ولو عندك ملخص أو موقع كنتي تذاكري منه ارسليلها ..

و اخر شي فيه موقع اسمه قيم دكتورك .. كل ما خلصتي سيمستر أدخلي قيمي علشان اللي بعدك يستفيد ومنها الدكتورة تراجع نفسها ..
http://www.ratedoctork.com/


5) كمية المواد اللي تختاريها


حتشوفي ناس تنزل بالسمستر الواحد 7 مواد و ناس 6 وناس 4 مواد .. اللي يريحك ويناسب وضعك نزليه ..
لو كنتي من النوع اللي عنده التزامات عائلية متزوجة أو حتى بنت.. لا تضغطي على نفسك ..

بالمقابل فيه ناس تبى تخلص بسرعة و اللي يبى يلحق عل الماستر واللي يبى يخفف على نفسه فينزل كثير علشان يرتاح في مشروع التخرج ... وفيه مواد تكون سهلة فتقدري تزودي عليها ..

وفيه ناس تخفف جدولها لأنها مأخذتها أنها فرصة الواحد يتعلم و يروح ملتقيات أو تكون تشتغل بالمساء ..

أتذكري دايما .. وضعك غير عن صحبتك غير عني غير عن الباقي .. بس هذا مو معناه تكوني لوحدك بالكلاس .. الأحسن لو فيه صحبتك او وحدة تعرفيها بالكلاس علشان لو مشروع تكونوا ماخذين على بعض وأضمن .. لو مافي مررة أحد تعرفيه عادي حتمشي برضو.. كله خير وربنا يسهل ..





__________________________________________________ _________________________________________________



النهاية



الحمد لله انتهى الموضوع .. أتمنى يفيد كل شخص قرأه و اللي تحب تضيف حياها الله .. السابق كان خاص للطالبات اللي مسارهم علمي انتظام .. فأعتذر للي مسارهم ادبي لأنوم ماعندي أي خلفية عنكم ..

تم بحمد لله
نقرتين لعرض الصورة في صفحة مستقلةنقرتين لعرض الصورة في صفحة مستقلةنقرتين لعرض الصورة في صفحة مستقلة

التعديل الأخير تم بواسطة نــورهـ ; 05-09-2015 الساعة 09:51 PM. سبب التعديل: ختم التميز لأهل التميز بارك الله فيكِ أختي
رد مع اقتباس

 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 10-08-2015, 01:57 AM   #2

الهيملي

الصورة الرمزية الهيملي

 
تاريخ التسجيل: Jul 2012
كلية: كلية الاقتصاد والادارة
التخصص: MIS
نوع الدراسة: إنتظام
المستوى: متخرج
الجنس: ذكر
المشاركات: 637
افتراضي رد: مستجد الأعمال من أ إلى ي

يعطيك العافية وفرتي عليهم .

 

توقيع الهيملي  

 

ابن مسجد ب70 ريال أو أحفر بئر ب11 ريال أو مصلى عيد بريالين
مركز تحميل الصور

http://www.albdoo.com/vb/t42453.html

 

الهيملي غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 10-08-2015, 02:01 AM   #3

نواف بن فهد

مشرف ملتقى المنتظمين

 
تاريخ التسجيل: Mar 2013
كلية: كلية الاقتصاد والادارة
التخصص: الادارة
نوع الدراسة: متخرج - انتظام
المستوى: متخرج
البلد: جــــدة
الجنس: ذكر
المشاركات: 861
افتراضي رد: مستجد الأعمال من أ إلى ي

وعليكم السلام ورحمة الله وبركاته

الله يعطيكي العافيه

موضوع مميز .. ومحسودين لان تخصص ادارة الأعمال عليه كل الاهتمام من قبل ادارة الكلية.
واعتقد وبوجهة نظري أنه من أفضل برامج ادارة الاعمال على مستوى المملكة.

بالتوفيق لكم

 

نواف بن فهد غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 20-08-2015, 04:43 AM   #4

ناصر الشمراني

جامعي

 
تاريخ التسجيل: Aug 2014
كلية: مسار السنة التحضيرية علمي
نوع الدراسة: تحضيري علمي خطة أ
البلد: جــــدة
الجنس: ذكر
المشاركات: 8
افتراضي رد: مستجد الأعمال من أ إلى ي

بس لو في احد يدلنا على افضل الدكاترة اللي يدرسون المواد العامة
اللي هياا • مبادئ المحاسبة
• المهارات اللغوية
• مبادئ الاقتصاد الجزئي
• لغة انجليزية متقدمة 1
• إحصاء أعمال
الخ ..
اكون له من الشاكرين

 

ناصر الشمراني غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 20-08-2015, 06:23 AM   #5

مزاحمتهم

الحمدالله

الصورة الرمزية مزاحمتهم

 
تاريخ التسجيل: Sep 2012
كلية: كلية الاقتصاد والادارة
التخصص: التسويق
نوع الدراسة: إنتظام
المستوى: السادس
البلد: جــــدة
الجنس: أنثى
المشاركات: 110
افتراضي رد: مستجد الأعمال من أ إلى ي

المشاركة الأصلية كتبت بواسطة ناصر الشمراني مشاهدة المشاركة
بس لو في احد يدلنا على افضل الدكاترة اللي يدرسون المواد العامة
اللي هياا • مبادئ المحاسبة
• المهارات اللغوية
• مبادئ الاقتصاد الجزئي
• لغة انجليزية متقدمة 1
• إحصاء أعمال
الخ ..
اكون له من الشاكرين
الرابط حيفيدك



http://www.skaau.com/vb/showthread.php?t=647926

 

مزاحمتهم غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 26-08-2015, 07:24 PM   #6

همس الدمام

جامعي

 
تاريخ التسجيل: Sep 2013
كلية: كلية الاقتصاد والادارة
التخصص: محاسبة
نوع الدراسة: إنتظام
المستوى: متخرج
البلد: جــــدة
الجنس: أنثى
المشاركات: 29
افتراضي رد: مستجد الأعمال من أ إلى ي

الله يعطيكِ العافية صراحة موضوع متكامل

 

همس الدمام غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 05-09-2015, 09:53 PM   #7

نــورهـ

نائبة المشرف العام

يا رب💜.

الصورة الرمزية نــورهـ

 
تاريخ التسجيل: Feb 2009
كلية: أخرى
نوع الدراسة: متخرج - انتظام
المستوى: متخرج
البلد: جــــدة
الجنس: أنثى
المشاركات: 12,067
Skaau.com (12) رد: |موضوع مميز|مستجد الأعمال من أ إلى ي

و عليكم السلام و رحمة الله و بركاته..

ماشاء الله تبارك الله ..

كفيتي و وفيتي الله يجزاك خير و يعطيكِ العافية..

شكري و تقديري لكِ نقرتين لعرض الصورة في صفحة مستقلة

 

نــورهـ غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 01-10-2015, 04:40 AM   #8

spop

جامعي

الصورة الرمزية spop

 
تاريخ التسجيل: Jul 2013
كلية: كلية الاقتصاد والادارة
التخصص: :)
نوع الدراسة: إنتظام
المستوى: الخامس
الجنس: أنثى
المشاركات: 93
افتراضي رد: |موضوع مميز|مستجد الأعمال من أ إلى ي

الله يجزاك بالخير .. انا مستوى خامس حاليًا ومعاك في كل اغلب اللي قلتيه .. يعطيك العافية

 

spop غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 05-10-2015, 02:25 PM   #9

نهى العتيبي

جامعي

 
تاريخ التسجيل: Nov 2009
نوع الدراسة: إنتظام
المستوى: الثالث
الجنس: أنثى
المشاركات: 166
افتراضي رد: |موضوع مميز|مستجد الأعمال من أ إلى ي

حابه اسألك
احنا قبل مانبدأ مستوى ثالث فتحو لنا التخصصات ورتبناها
والحين ودي اغير
هل فيه امكانية بعدين تفتح مره ثانيه وأغير؟
ويعطيك العافيه

 

توقيع نهى العتيبي  

 

آسستغفر اللهِ العظييم وآتوب إليه !
آسستغفر اللهِ العظييم وآتوب إليه !
آسستغفر اللهِ العظييم وآتوب إليه !

( وماكان الله معذبهم وهم يستغفرون )

 

نهى العتيبي غير متواجد حالياً   رد مع اقتباس
 

منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 22-10-2015, 01:22 PM   #10

Ruze

لم يقم بتفعيل عضويته

 
تاريخ التسجيل: Oct 2015
كلية: كلية الاقتصاد والادارة
نوع الدراسة: إنتظام
المستوى: الثالث
البلد: جــــدة
الجنس: أنثى
المشاركات: 1
افتراضي رد: |موضوع مميز|مستجد الأعمال من أ إلى ي

طيب عندي استفسار اذا سمحتوا ايش اسهل مبادئ الادارة او مبادئ التسويق ؟

 

Ruze غير متواجد حالياً   رد مع اقتباس
 

إضافة رد

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

 


الساعة الآن 08:44 PM


Powered by vBulletin® Version 3.8.9 Beta 3
Copyright ©2000 - 2024, vBulletin Solutions, Inc.
Ads Organizer 3.0.3 by Analytics - Distance Education

أن كل ما ينشر في المنتدى لا يمثل رأي الإدارة وانما يمثل رأي أصحابها

جميع الحقوق محفوظة لشبكة سكاو

2003-2023