استفسار هام:ثانوية مطورة أدبي وأريد الالتحاق بالحاسب (عنوان معدل)

[إدارة من غير مدير]

السلام عليكم
كيف الحال يا شباب ويا بنات
أنا محتاجة خدماتكم
أنا طالبة متخرجة من الثانويه المطور في جده للبنات وكان النظام يحتم على طالبات الأدبي مادة الحاسب طبعا المكثفة وأنا أخذت 3 مستويات حاسب هي أصلا 2 بس 3 مادة إختيارية
المهمم لا أطول أكثر أنا حابة ألتحق باقسم الحاسب أنا مجنونه حاسب وأحب أتعلم كل شيء فيه بس للأسف إلي عرفتوا أنو قسم الحاسب علمي هل هذا صحيح وهل ينطبق حتى على طالبات الثانوية المطورة ولا لاء أشكركم وأعتذر على الإطالة

[حسام بخيت]

نعم الحاسب هو علمي

ويتم دخوله بعد اجتياز السنة التحضرية للمسار العلمي
ولكن لا ادري هل يطبق على الثانوية المطورة ام لا بس
اتوقع انه فقط لطلاب العلمي

[إدارة من غير مدير]

طيب هو في طريقة بس إن شاء الله تكون صح إلحين أنا سجلت دبلوم عالي حاسب آلي قسم برمجة مده سنتين والمعهد قالي أنو لما أخلص الدبلوم أقدر أكمل في الجامعة كمان سنتين أستفساري هو هل صيح أن أكمل باجامعة ولا هذا كلو كلام بس أكثر المعاهد إلي سألت فيها قالولي أني أقدر أكمل بالجامعة بس بصراحة أنا خايفة أدفع مبلغ وقدرة وبعدين أتورط وما تقبلني الجامعة ساعدوني

[tooowwwt]

انا أنصحك تلقي نظره على شروط الكلية
هل يشترطوا انه يكون قسمك علمي في الثانوية ولا لا
غير كذا ما عليك من شيء
لأنه بمجرد ما تدخلي الجامعه خلاص مالهم بالثانوية حتبدأي بالسنة التحضيرية وان شاء الله تجيبي معدل كويس وتختاري كلية الحاسب
وعلى طول يقبلوك فيها ان شاء الله ولا تشيلي هم يا عسل
اتمنالك التوفيق

[mind glance]

وعليكم السلام ورحمة الله وبركاته
حأجاوبك على حسب آخر معرفة لي بالموضوع
بس ما أأكد لك انه هذا النظام دحين

اعتقد بأنه المهم هو اللي يكون مكتوب على شهادتك
علمي او ادبي << يفرق في الشهادة اذا ثانوية مطورة او لأ؟
وحتحتاجي تدخلي في الجامعة اول سنة مسار علمي (اتوقع لازم شهادتك علمي عشان تقدمي مسار علمي بس مو متأكدة)
يعني حتدرسي مواد علمية... اعتقد كيميا وفيزيا واحصاء ورياضيات مستوى اول
وبعدين تقدمي على كلية الحاسبات

بالنسبة الى انك تدرسي دبلوم حاسب وبعدين تكملي في الجامعة
هذا الكلام سمعته قبل 5 سنين لكن ما قيد اتأكدت من صحته
وسمعت انه عمادة القبول والتسجيل هي اللي توافق او ما توافق

واعتذر منك عزيزتي اني ما جبت لك خبر رسمي او أكيد
حاولي تدخلي على موقع الجامعة وموقع الكلية وموقع عمادة القبول والتسجيل وتبحثي عن الموضوع
وممكن تراسليهم اذا قدرتي عشان تحصلي على خبر اكيد
واتمنى لك التوفيق

[إدارة من غير مدير]

بصراحة أنتو ما قصرتوا بس أنا تعبت من كثر ما أدور طريقة على شان أدخل حاجة أحبها دورت كل الطرق على شان أدخل الحاسب بس أنتوا عارفين أنا أدبي و لازم أضمن مستقبلي لأنوا صارت الشهادة هي كل شيء تصدقوا أنا لي متخرجة 2 طول هذه السنتين وأنا بأحاول أجمع شهادات حاسب وكمان جاني شغل وأنا في البيت يعني أصمم كتب أعمل عروض حفلات تخرج عملت دورات فوتوشوب يعني ما خليت شيء يخص الكميوتر إلا سويتوا إلا حاجة وحدة أني ما كملت دراستي وبصراحة أنا دخلت هذا المنتى على شان أنتوا لكم خبرة أكثر وأكيد ما راح تقصروا معايا لأني أبتديت أفقد الأمل وصرت أستحي لما أحد يسألني أنت سنه كم ولا تعرفوا أكيد الحريم وأه يا أختي لي ما كملتي أنتو عارفين اللقافة أنا بأتمنى من كل شخص يقدر يساعدني ياليت حتى لو أنتساب طبعا على شان النسبة إلي تمشي الحال