سؤال مررررة مهم عن مادة اقتصاد نفط مع اسعد جوهر

[دعاء م ف]

السلام عليكم
بنات لو سمحتو اختبارنا النهائي يوم السبت بعد بكرة ودرجات الاختبارات جدا جدا سيئة مو بس انا لكل الطالبات مرة التصحيح ما كان فيه حكمة ابدا ولا رحمة
المهم ابغا اسئل البنات الي اخذوا المادة دي قبل كدا
كيف اسئلة النهائي هل هيا زي الدوري الاول والتاني
هل يجيب اسئلة من خارج المنهج (اسئلة تحليل للنفط )
وكيف درجاتكم النهائية هل يحسن الدرجات ويزودها من عندو ولا لا

وللحلوين الي دحين بيأخدو المادة في احد فاكر الاسئلة ولا لا ؟؟؟
وايش الاجابات الصحيحة
والله يوفقنا كلنا يارب
يليزززززززززز

[n-70]

هلا خيتو ..

مااعتقد انو الدكتور كان شديد في التصحيح .. انا اشوف انو كل طالب اخذ حقه
والمعروف عن دكتور اسعد انه لديه مرونة في التصحيح مع البنات خاصة
انا مثلا اخذ 54 من 60 رغم انو سؤال التحليل الرسمة مو كامل ..

وبالنسبة للطلاب الاترام السابقة كل الطلاب 60 و 65 ماعدا طالب او طالبين ياخذوا 80 و 85
هذي سياسة الدكتور اسعد منذ سنوات .. هذا الكلام بالنسبة للطلاب

اما بالنسبة للاختبار النهائي اللي اعرفه يوم الخميس 20 /2 10 ونص صباحاً

ونفس الكلام هذا بالنسبة للاولاد .. مدري يختلف الموعد عن البنات .. ارجو التاكد ؟

وبالنسبة لاسئلة الاختبار كلها واضحة ومن الدفتر << اذا كان طبعا دفترك كامل
ماعدا سؤالين التحليل
هو قال في اخر محاضرة يوم انتوا ماحضرتوها قال لنا :
بجيب سؤال ماعلاقة النفط بالدولار ؟ علاقة عكسية ابحثي اكثر في النت
والسؤال الثاني ماعلاقة النفط بالمزانية المعتمدة من قبل حكومة المملكة ؟
ج/ يتم تقدير المزانية بناء على متوسط سعر النفط المتوقع


هذا بالنسبة لاسئلة التحليل

اما الاسئلة الاخرى فكانت مقالية موجودة في الدفتر نصاً

وبالتوفيق .. واتمني ان اكون افدتك

فيصل الخالدي

[احلاهم واتحداهم]

انا اخذت الماده مع الدكتوراسعد
وجبت 91 مو بس انا كل صحبااتي
والدكتور يراعي بالتصحيح مرره عكس كلامك
غير كذا هو مع البنات مرره مرن
والاختبار النهائي جابه نفس اسئله الدوريات
مع اضافه كم سؤال بسيطه
اهم شي تكونين فاهمه وذاكري زين من الدفتر ويكون دفترك كامل كاتبه كل كلمه قالها وركزي عى الي يقول عليه مهم

n-70

الدكتور اذكر قال يبي يجيب لنا اسئله تحليل واعطانا هي خلانا ندور ونحل وفي الاخير ماجابهاا

جاب سؤال حق السوق الاحتكار لما يحقق ربح ايش شرط التوازن مع الرسمه ؟

وجاب هل امريكا دوله منتجه ام مستهلكه صح وخطا

امممم اذا تذكرت شي رجعت لك

[دعاء م ف]

ما ادري يمكن الدكتور اتغير اسلوبو
بس انا الحمدلله علاماتي في كل المواد ممتازة مرررررة
الا في دي المادة
اعلى درجة كانت 31 من 40 في الدوري التاني ويمكن بس بنت ولا بنتين الا جايبينها
اما البقية الله لا يوريكي علاماتهم وانا وحدة منهم للاسف

[n-70]

احلاهم واتحداهم .. يسلمو على النصايح والتذكير

وفقكي ربي

[naseem]

انا عندي اقتراح اذا البنات اللي بياخذو معاه دي السنة معانا
بما انو اسئلة النهائي زي الدوري الاول والثاني
كل بنت تكتب الاسئلة اللي تفتكرها من الاختبار الدوري الاول او الثاني واذا كان( سؤال صح او خطا) ومتاكدة من الاجابة تحطها


وانا ابدا
*ماهو أثر انخفاض اسعار النفط على الدول المصدرة-على الدول النامية الغير منتجة-على الدول المستهلكة<<صراحة مااعرف جواب حق الدول المستهلكة ولا اعرف من فين جابو اللي تعرف ياريت تفيدنا
*اذكر اظن 5 من خصائص النفط
من هم المتعاملون في اسواق النفط
*ماهو شرط التوازن في سوق الاحتكار التام
*وضح ذلك بيانيا في حالة تحقيق ارباح عادية -ارباح غير عادية خسائر
*اذكر اهم خصائص اسعار النفط في المرحلة مابين 1970-1980/مابين 1980-2000
*التضخم هو ارتفاع في مستوى اسعار بعض السلع والخدمات (خطأ) جميع السلع والخدمات
*تكاليف حقول النفط البحرية اقل من تكاليف الحقول البحرية (خطأ) العكس
*هناك فرق بين السعر الحقيقي والسعر النقدي >>مني متاكدة بس اظن (صح)
*السماسرة من المتعاملون في اسواق النفط(صح)
*هناك علاقة عكسية بين اسعار النفط والدولار (صح)


هذا اللي افتكرو الى الان ونستنى منكم الباقي

[naseem]

افتكرت سؤال
*ماهي القواعد التي يستند عليها التحليل الاقتصادي لاسواق النفط العالمية
وفي سؤال صح وخطا مني عارفة صياغتو بالظبط بس عموما كان عن شي زي كذا
*الاسواق الفورية تحدد اتجاه اسعار النفط في الاسواق الاجلة <<على مااعتقد انو (خطأ)ابدا مني متاكدة لانو اقتناعي الشخصي يقول انو صح بس البنات قالو انو الدكتور قال غلط
وفي برضو شي تاني مني مفتكرتو كويس
*العوامل المؤثرة على الطلب على النفط هيا نفس العوامل المؤثرة على الطلب على السلع والخدمات<<الصيغة بديعة بس المضمون شي زي كذا برضو نفس الحالة الأولانية اقتناعي الشخصي يقول صح بس على مااعتقد الدكتور قال انو (خطأ)
اي احد عندو تصحيح او فاكر الصيغة نصيا او عندو تعليق لا يبخل علينا:)

[احلاهم واتحداهم]

*هناك فرق بين السعر الحقيقي والسعر النقدي >>مني متاكدة بس اظن (صح)

صح الجواب انه في فرق وكلما له الفرق يزيد

وراح يجيب لكم في النهائي عددي 3 منهم المضاربون في اسواق المال

وفي سؤال حق قارني بين الازمه الاقتصاديه والازمه الماليه ؟؟<< هذا السؤال يحبه اذا ماجابه في الدوريات يعني في النهائي يجيبه

هذي كررها وجابها في النهائي
*ماهو شرط التوازن في سوق الاحتكار التام
*وضح ذلك بيانيا في حالة تحقيق ارباح عادية -ارباح غير عادية خسائر


الله يوفقكم

[تولين^_^]

السلام عليكم

نسيم بالنسبه للسؤال حق ماهو أثر انخفاض اسعار النفط على الدول المصدرة-على الدول النامية الغير منتجة-على الدول المستهلكة؟

ترى هاذي كانت محاضره كامله بس شكلها ناقصه عندك ؟؟؟؟؟؟؟

فى ادكر 4 خصائص للنفط؟

وفى الطلب على النفط يختلف على طلب السلع الاخرى صح

تكاليف بحريه اقل بكثير من البريه خطا

السعر النقدى لبرميل النفط يختلف عن الحقيقي صح

التضخم هو ارتفاع اسعار بعض والله انا منى فاكره الجمله المهم ان هالجمله خطا الصح جميع مو بعض

وبالتوفيق:)

[تولين^_^]

طيب فى صح وخطا جا سؤال

الوسطاء او السماسره لهم مكان فى سوق النفط ( صح ولا خطا)
طبعا صيغه السؤال مو هيا بالضبط بس تقريبا

وفى سؤال هل تختلف نفقات النفط فالمدى الطويل عنها فالقصير او لا؟؟؟؟؟؟

ماهى المخاطر المترتبه على انخفاض النفط عن التكاليف؟

ونسيم تفتكري ايش هيا الاسئله اللى قال حيجيبها من برا او لا؟

ولو سمحت الخالدى في شي ركز عليه قال مهم ولامافى شي معين؟وشكرا