حملة مقاطعة كافتريات ومكائن الجامعة (الترم الثاني سنة 1433)

[السلطة4]

السلام عليكم ورحمة الله وبركاته
نحن طالبات من جامعة الملك عبد العزيز ونعمل من أجل تغيير الوضع الراهن لكافتيريات ومكائن الجامعة من ناحية الأسعار ومستوى نظافة الأطعمة والمكان والخدمات.
وهاذي حملة مقاطعة إن شاء الله كلنا نقاطع وحأنزل كل أسبوع أعداد البنات اللي قاطعوا في الجامعة لأني أقوم بجمع تواقيع البنات في الجامعة للمقاطعة..إنت وأنا وهي وهما لو قاطعنا حنغير الوضع! وأنا جدا متفائلة وحاليا جمعت عدد لا بأس به لطالبات في الجامعة قاطعوا..
وإنتي لما تقاطعي مو بس تقاطعي لنفسك إنتي حتساعدي على تغيير الوضع لكل البنات .. وإذا السلعة ما صار لها طلب حيبدؤا الناس المسؤولين يسألوا عن السبب وحيعدلوا الوضع.. و لكل البنات اللي يفكروا إنو الموضوع مو لدرجة دي يعتبر مشكلة لدرجة المقاطعة! أقولكم إنتي لا تفكري بنفسك بس !فكري في البنات اللي وضعهم مو زي وضعك وفكري في بنات السكن اللي غصبا عنهم يضطروا يشتروا من الجامعة والبقالة اللي عندهم غااااالية مره وما عندهم غير المكافأة والبنات اللي يجوا بباصات.. وغير كذا إنتي كيف تتحملي أحد ينصب عليك؟؟ هذا نصب عيني عينك ناس نصابة بس تبغ تجمع أعلى ربح في أقل وقت ويذلونا لأننا بنات ما نقدر نطلع ويذلونا لأنه هو ذا المتوفر وغصبا عننا نشتري!..
وحأقولكم قصة عن فرع جامعة الملك عبد العزيز بعسفان زي ما انتوا عارفين عسفان مافيها خدمات ولا بقالات قريبة من الجامعة ولا بوفيهات فالكفتريا تبع الجامعة أستغلت الوضع وزودت السعر على الطلاب وأخويه كان يدرس فيها تحضيري فعملوا الطلاب مقاطعة وصاروا يطلعوا من الجامعة ويحركوا سياراتهم ويروحوا للمحطة! في الخط السريع وكانوا يخسروا نفسهم بنزين ووقت وتعب بس أهم شيء """""ما يشتروووووا من نصاااااااااب""""
وتخيلوا أيش صار؟؟؟
بعد أسبوع أو أسبوعين الكافتريا نزلت أسعارها والعاملين فيها يقولوا للطلاب تعالوا أشتروا من عندنا لا تروحوا للمحطة

بنات بطلوا دلع وقبل ما تدخلوا للجامعة في بقالات وبوفيهات بالهبل يعني الطلاب طلعوا أقدع مننا..

تابعوا الموضوع حأنزل كل أسبوع أعداد المقاطعين وأنشروووووووووا الخبر وحأنشرووووا من قلبي

"كن أنت التغيير الذي تريد أن تراه في الجامعة"