طقوسك الخاصه في المذاكره .. أرجو المشاركه

[متفائل بحذر]

السلام عليكم ..
لكل شخص طريقه مميزه في المذاكره من حيث المكان والزمان و الأجواء المرافقه ..
و أعتقد كل شخص بطريقته في المذاكره يبرز شخصيته الخاصه ..
فيه ناس يعتمدون بشكل كبير على المحاضرات بحيث انهم على الأقل يطلعوا بـ 60% من فهم الموضوع .. وفيه ناس عكسم تماما ..
فيه ناس يحبون يعرفوا كل صغيره وكبيره .. وفيه ناس يركزوا على الخطوط العريضه فقط ..
فيه اللي يحب يذاكر في العصر وفيه اللي يحب يذاكر في الليل .. وفيه اللي يذاكر بين المحاضرات ..
فيه اللي يستخدم النت للحصول على ملفات بي دي اف او غيرها من الملفات .. وفيه اللي يعتمد على الكتاب وفيه اللي يعتمد على المذكرات وفيه اللي يعتمد على الـــ lecture notes وفيه اللي يسوي تشكيله على مزاجه ..
فيه اللي يحب يذاكر في البيت وفيه اللي يحب يذاكر مع اصحابه .. وفيه اللي يحب يذاكر عند البحر او في ستار بكس ..

يعني هناك اختلافات كثيره بين الطلاب في طقوس المذاكره .. وودي اعرف الطقس الخاص لكل طالب .. وكيف يقدر يحث نفسه على المذاكره بدون ما يطفش !!


تحياتي للجميع ..

[alol]

بصراحة انا مرررررة ما اهتم بالتفاصيل
و ما اقدر احفظ شي زي ماهو لازم أؤلف شوية
و ما احب اذاكر ورا بعض لاني اطفش
و مرة انا من الناس اللي اذا زنقهم الوقت يخلصو و يبدعو ( غريب بس انا كدا)
و شكرا يا متفائل على الموضوع الحلو

[eminem lover]

موضوعك حلووو يا متفائل على الاقل نعرف طرق مذاكره جديده يمكن تكون احسن من اللي تعودنا عليها
انا عن نفسي ما اذاكر اكثر من ساعه ساعه ونص بالكثير عصريه وزيها فاليل
طبعا لازم اسمع صوت ايمنيم وانا اذاكر وشي بارد اشربو
وبس امسك ورقه وقلم وابدا اكتب عشان احفظ
ولو اللي ااذاكرو يعتمد على الحفظ ميه فالميه اخذ كتابي واتمشى واحفظ والحمد لله

[GAME OVER]

أنا بصراحه اجلس اكتب طوووووول الترم في الكشكول بخط ملخبط ومو مفهوم ،، بعدين قبل الاختبار بيومين

ارجع اكتب كل اللي كتبته من جديد في دفتر وبألوان وخط حلو ،، صحيح ما يسويها إلا واحد فااااااااااااااااضي

حتى الشباب كانوا يتريقوا عليه ، بس تعودت على هذي الطريقه من سنه رابعه ج ، بس وانا اعيد كتابة اللي

كتبته اول احاول اني افهمه واحفظه عشان كذا ما أخلص من كتابة المنهج الاو أنا فهمت 95% منه ،، ترا طريقه

مره جيده بس متعبه جدا جدا جدا

[الشاكي]

جيم أوفر

أنا كنت أسوي زيك

لكن والله تتراكم علي وأطنشها

وأصير أذاكر من كذا دفتر

قلت ياولد

أكتب بقلم واحد وسيبك من شغل العبط

[bent mankoosha]

طقوسي عادية بس مش الكل يمشي عليها

اول شي في المحاضرات
استخدم كشكول واحد لكللللللللللل المواد سواء خمسة او تمانية مواد
وما ابيض
وهو نفس الكشكول اللي اذاكر منه في الامتحانات

ما اذاكر اول بأول الا نادرا
بس بما انهم كل اسبوع بيعطونا كويز
وساعات تلات مرات او اكتر في الاسبوع
بأضطر اذاكر

ما اعرف اذاكر
غير بعد الساعة 1 في الليل
يكون البيت كله نايم
ويكون الوقت قليل فأضغط نفسي لين ما اكمل

احاول اعتمد على اني القط قد ما اقدر في المحاضرات

مع اني ادبي
بس برضه عمره الحفظ ما يمشي
قسمي ادب انجليزي
يتيح لي في بعض المرات
اني افهم الهرجة و أرصها بأسلوبي على ورقة الامتحان
يعني المهم اني وصلت المعنى الصحيح

بس و هيا دي طقوسي

ويسلمو

[wizard]

كل مادة ولها دفترها وتخطيط واي شي وتسطير لمن دحين

وانا ما اسيب ولا فتفوته كله ينكتب

[samooorah]

كيف ازاكر
تصدقوا أنو ماما ساعات تقعد تسمعلي الحاجات إلي يبغالها حفظ
مش دلع بس عن جد ما أقدر أحفظ إلا ازا سمعت لأحد !!
عادة المواد العامة >>>> الأدب أو الثقافة و الكلمات تبع كتاب 504 مادة Lane 104
بس الترم إلي فات صارت معجزة >> زاكرت الجغرافيا لوحدي و جبت مجموع 96
خطيير مش كدا؟
وقت المزاكرة يكون أممممم
أي وقت هادي و أكون هادية و شبعانة و مش نعسانة و قاعدة في حتة مريحة دافية

[ليدر أستوديو هبقات]

بالنسبة لي فطريقة المذاكرة غير لأن طريقة الدروس غير

طبعا ً رسم

لذلك كنت ما أستطيع أن أرسم إلا إذا كان البيت فاضي أو على الأقل يكونوا نايمين تلقاني أقفل على تفسي

وأمد سماعات الكمبيوتر

وأشغل أنواع الأناشيد

وأدخل أحلى جو

طبعا ً جزاها الله خير الوالدة

شوي صلطة فواكه

وشوي شاهي وبسكوت

ولا ترتاح إلين أخلص وكأنها مدرسي

لكن من هذا الترم حيكون الرسم والتصميم بالكمبيوتر

والقعده في الكلية مو في اليت

فمني داري أبش حتكون الطقوس؟؟؟

وشكرا ً على الموضوع

[متفائل بحذر]

كلام جميل جدا ..
باقي انا ما قلت طقوسي .. في المذاكره
انا ما ارتاح في المذاكره الا لازم احط كل شي يخص الماده قدامي .. من كتاب او مذكره او خطة الماده او اسئلة اختبارات .. الخ
واجيب اوراق تصوير فاضيه وابدأ .. أول شي اقرا بشكل سريع المره الأولى.. والمره الثانيه اقرا بتركيز شويه .. المره الثالثه اركز على كل كلمه وحرف .. وبعدين ارتب الأفكار والمعلومات في راسي .. وابدا آخذ عينات عشوائيه من الأمثله ومن التمارين ومن الواجبات ومن أسئلة الاختبارات .. وابدا احلها .. وطبعا لازم يكون القاموس معايه .. لأنه صديقي العزيز

وبعض المرات مو كلها اذا كنت على النت .. وفاضي .. يعني طفشت من المسنجر وما باقي شي اشوفه .. اروح لصديقي العزيز الثاني .. موقع قوقل .. وابحث عن ملفات بور بويت او دكيمونت او غيرها عن بعض المواضيع .. واحصل اشياء كثيره مفيده .. ومشروحه بطريقه جذابه ..

بالنسبه للمحاضرات .. فانا ما اهتم كثير بالكتابه .. اكتب الأشياء اللي احس انها ضروريه بالمره .. مو كل شي اكتبه .. اهم شي اركز مع الدكتور

تحياتي لكم ..