من قصص العزابية !!

[دلوعة ابها]

من قصص العزابية !!

أكثر الشباب مروا بحيات العزابية وأكيد فيها قصص ومغامرات حلوة أو مؤلمه
هذا الموضوع يخص أخواني الشباب أكثر لأنهم معروف عنهم هذا الشيء .
ولا مانع من مشاركة الأخوات .... نبي نضحك ونستأنس

لا تبخلوا ........أتمنى أنها تكون القصص حقيقة ،،،،


&&وكل عام وأنتم بخير&&
تقبل الله منا ومنكم الصيام والقيام

[Enrique Iglesias]

مرحباا دلووعه

موضوووع حلو وانا عن نفسي


قبل شهر سافرو اهلي وتركوني بالبيت اسبوعين

على اساس يتعود عالغربه


وصااار لي موااقف كثيره من بينها حادث



وربك ستر



وعرفت بعدها ان العزوبيه ماهي سهله ومسؤوليه


وتقبلي مروروري

[الباسل3003]

قصة أكشن

كان عندي اختبار انقليزي محادثة (نهائي)
صحيت قبل الإختبار بنص ساعه قلت باقي يمديني وما قمت من النوم الا قبل الاختبار بـ 5 دقائق
وانا عشان البس واطلع من الشقة يبغى لي 5 دقائق هذا غير الطريق يعني متأخر متأخر وصلت بعد بداية الإختبار بـ 5 دقائق<< صح كلها خمس دقايق بس عند بعض الدكاترة أسمك متأخر وانتهى الموضوع- و بليز دكتور ايام سوري تكفى طلبناك و سمح لي ادخل والحمدلله .

نصيحة : اذا عندك إختبار لا تذاكر في الليل , خلص أمورك و مذاكرتك قبل صلاة العشاء بالكثير بالكثير 11 وانت نايم و وقت ساعتك أو جوالك قبل الإختبار بساعه كاملة لا تقول كثيرة الوقت يسرقك على بال ماتلبس و تجهز نفسك و تطلع تفطر و توصل الجامعه الا الساعة قربت تنتهي واختبارك قرب


مشكورة أخت دلوعة على الموضوع.

[قلب البحار]

والله العزوبية عذاب وفيها مسؤولية مرة كثير من جد والله ياحظ البنت اللي بتتزوج انسان عاش العزوبية
حيجيها متعلم كل فنون الطبخ والغسيل والكوي يعني جاهز من مجاميعه

[cOrAbEcA]

ههههههههههه..

والله موضوع جلو..

أنا ما جربت العزوبية إلا الشهر اللي فات...

سافرت لحالي أدرس في معهد إنجليزي,,

والله في حكايات..

بس خلوني أتذكرها وأرجع لكم...


تسلمي أختي على الموضوع...



راجع لكم...

[سوسا]

يريتني اجرب العزوبيه >>>>>>>>>>تكره البيت




احب اجلس ولوحدي بس للاسف ما اقدر



مخططه تتوظف و تشرد من البيت

[!!توصي شيء!!]

سوسا الله لا يوريك

عذاب بس احيانا وناسه
\
/
\

[دلوعة ابها]

بزعل ولا قصه جديده

[الشــامخ]

موضوع جميل جدا دلوعة ابها .. والله يادلوعه حياة العزوبيه صعبه والعزوبي له مواصفات كثيره منها مسكين ومطفر وجائع ومضطهد ومريض ... الخ
طبعا انا نزلت موضوع قديم وهو تقريبا مغامرات العزوبيه وراح اكتبه هنا مره ثانيه :-
في البدايه اول شي احب اعطيكم فكرة عن شغالتنا
شغالتنا يا كرام مخروشة ومطفوقه الى ابعد حد يعني لما نشوفها جايبه الشاهي نعلن حالة الطوارئ ونزل البزران للملاجئ
لانه عادي عندها تشيل 13 بريق شاهي بيد و10 دلال قهوة بيدها الثانيه وتمشي صافطه الطبلون يعني كنها تصاقط ظلالها من سرعتها
انا اقول لامي احس انها مسكونه بجني (كان يشارك في اختراق الضاحية)
> > يعني لو تبي تعذبها خلها لا تتحرك بس ثواني
> > وبعدين عادي تناديها وتسالها عن شي ما تدري إلا وهي رايحه ومخليتك.... مو تطنييش لا بس دباشه ودلاخه
انا احس انها ما قد شافت بشر ولا تدري وشلون يتعاملون مع بعض
تقدرون تقولون انها مخروشه وفي روايه اخرى سبيكه
المهم انا صار لي معها موقف قوي
مرة وانا راقي لغرفتي مروق وادخل غرفتي وانا من عادتي اني ادخل غرفتي وبعدين اعطي الباب كعب قوي واصكه واقفل غرفتي
واطلع جوالي واحذفه على المخده مع انه دايم يطيح ورى السرير وابلش ادوره
وافسخ ثوبي واحطه في مكانه المعتاد اللي هو اجدعه على الارض
بعدين اشيل فنيلتي واصفطها لين تصير مثل الكوره واشوتها على المعلاق قصدي الشماعه
المهم حمامي الله يعزكم جوا غرفتي
المهم يوم فسخت ثوبي قعدت قدام المرايه اتميلح واطالع نفسي واكلم روحي وانكت شوي وامسك المشط واتخيله مكروفون واغني الامااااااااااااااااااااااكن <<< قمة الطرب
واستعرض عضلاتي والعب كراتيه مع صورتي بالمرايه .. واكلم نفسي بالمرايه واقول بتعقل انت والا يععععع كععععع وبقية الحركات اللي انا دايم اسويها بشرط ما يكون عندي احد
عاد انا دايم انهي حركاتي هذي بقفزه على السرير وكنت دايم وانا انط اقول دووووووق فليــــب
عاد وانا ناط وبين السماء والارض حانة مني التفاته<<< والله واخيراً قلت حانه من زمان وانا ودي اقول هالكلمه المهم يوم حانة مني التفاته للحمام وش شفت
> > صليحه<<< اسم شغالتنا .... واقفه بوسط الحمام وماسكه مكنسة وسطل وهي منصدمه
قلت لها صليحة خيررررر وش عندك .. زي العاده ما ردت ...رجعت مرة ثانيه بالاشاره اسالها وش عندك..... كل هذا وانا بين السماء والارض ما بعد وصلت السرير<<<< ما يكذب ابـــــــــــــــــــــــد
وجلسنا نناظر بعض اللي يشوفنا يقول والتقى الحبيبان وانا ودي اخذ المكنسة اللي معها واكنس الكلف اللي بوجهها... ثم امسك راسها وادخله بوسط السطل اللي فيه مويه علشان اشوف من وين ينسم راسها
واصرخ عليها يا دلخه ورى ما تكلمتي وعلمتيني انك هنا>> وكالعاده كنك تكلم جدار
المهم لاني عارفها دريت انها يوم سمعت صوتي انخرشت ولا درت وش تسوي
وبذهانتها وفطنتها الخارقه قالت بقعد هنا ومهب شايفني .... لعنبو دارك ودار مخك
عاد انا قعدت اتذكر وش كنت اسوي يلعن ابو الفشيله بس اللي مهونها علي... قلت اشوى اني ما فسخت كل شي
المهم اني قلت لها خلاص امشي اطلعي وانا ابي افتح باب غرفتي .. اسمع امي جايه لغرفتي وتناديني
يا سلاااااااااااااااااااام على الحظ
انا والشغاله بغرفة نومي والغرفة مقفله وانا كاسي عاري ما علي الا سروال نص
يعني امي لو هي عمياء بيروح علطول بالها لشئ تاني
يعني التهمة لبساني لبساااااني
علشان تعيشون معي الموقف
> > انا ما علي الا سروال نص والشغاله جنبي واقفه ,,,والباب مقفل وورى الباب امي<<
وانا اعرف امي ماراح تروح الا اذا فتحت الباب
في هاللحظه .... خطرت في بالي فكرة انما ايه ما تخرش الميه
لي اخو يدرس برى وامي تموووووت فيه واذا اتصل تركض امي ركض كأنها بنت جايتها رسالة جوال خخخخخخخخخخ
فقفزت على السرير واخذت الجوال ودقيت على بيتنا ورد على ولد اختي من تحت قلتله انا خالك بدر وين جدتك بسرعه انا اكلم من برا
فقام البزر يصوت لامي خااااااااااااااااالي بدررررررررررررر بالتلفووووووووووووون
امي اول ما سمعته يصووووت تدروشت وتلخبطت وقامت تقول يووووووه قله انها فوووووووق وصارت تمشي وتدور التلفون اللي فووووق وهي تقووول افففففففف وين ودت التلفون هالشغاله
وانا في نشوة الفرح لنجاح خطتي الجهنميه اذا بصليحه <<<< مرة ثانيه اسم شغالتنا
اذ بها يوم سمعت امي تقول (وين ودت التلفون هالشغاله) اذ بها بأعلى صوتها تقول... فوق مكتبه يا ماما
انا من قوة غبائها والحركة اللي سوتها ما استوعبت الموقف قعدت لحظات ..علشان مخي يتعرف على هالموقف بس ما لقى اي موقف مشابه قد مر عليه يعني سبق مو صحفي سبق غبائي لهالشغاله
الادميه ذي ذكائها خارج التغطيه الا مخها منتهي الصلاحيه هذي طفرة في الدباشه والدلاخه
المهم انا صرت ..ما اسمع لامي صوت ..مدري هي سمعت الشغاله والا لا
يوووووم جت المصيبه
وانا واقف عند الباب اتسمع والشغاله جنبي
اذ بصليحه تمسك عروة الباب وتبي تفتحه فرمقتها <<<< حلوه رمقتها ذي صح خخخخخخخخخخ
المهم رمقتها بعيني ..يعني وش تبين.. قالت لا بابا افتح الباب لا بابا حرااااااااااااااااااااااااااااااااام لا باب ايش يبغى انتا لا بابا انا حرمه كبير انا حرمه فيه بيبي حرااااااااااااااااااااام بابا
ياسلاااااااااااااااااااااااااااااااااااااام الاخت فاهمه غلط تحسبني اسوي كل ذا لان في بالى شى !! مدري اضحك والا اصيح والا وش اسوي فيها من زينك انتي ووجهك اللي كأنه رسمة ولد بالروضه عيون يبيلها كروكي علشان تلقاها وخشم افنس كأنه محول غاز
المهم الآدميه مصره تفتح الباب وما دريت الا هي فاتحه القفل وامي جنب الباب تقول ,,,, صليحه!!!! صليحه انتي هنا
وقبل ما تفتح امي الباب دورت بسرعه فنيلتي ولقيتها على الارض وامد ايدي باخذها.<< ... في هاللحظه فتحت امي الباب
ولا لقيت تصريفه لوضعي وانا ماد ايدي للارض باخذ الفانيله الا اني لا ارادياً قلت
> > اللللللللللللللللللللللله اكبررررررررررررررررررررر<<<<< ايه سويت نفسي اصلي واسجد خخخخخخخخخخخخخخخخخخخخخخخخخخخخخخخخ
وش اسوي ما لقيت اي تصريفه وبعدين ما ابي امي تسالني عن شي فاحسن شي اسوي نفسي اصلي
المهم اني في نفسي اقول يارب انها ما تلاخظ اني اصلي وانا شبه عاري
امي دخلت وتنحت شوي بعدين قالت للشغاله وش قاعده تسوين لكن كالعاده الشغاله اكلت تبن وسكتت وطلعت
وقفت امي شوي وانا قاعد اصلي واقول في نفسي اشوى انها ما انتبهت اني متفسخ
المهم شوي الا و يوم قالت لي اجل تصلي هاه !!!!!!!!!! وانا اللي ابلع ريقي مو بس ريقي الا حتى اللوز بلعتها
قالت اجل تصلي,,,, زين بس ترى القبله غرب وانت تصلي شرق
وطلعت وصكت بالباااااب بقوووووووووووه
يوووووووووووووووووووووووووووووووه انوااااااااع الصدماااااااات ياربيه وش اسوووووووي
> > واقعد افكر يارب وش اسوي والله اني مظلووووم <<<<< واقعد افكر وافكر ,,,,, قلت احسن حل الصرااااحة واللي يصدق يصدق واللي مو مصدق لا يصدق
ولا انتبهت لنفسي الا بعدين طول فترة تفكيري وانا قاعد اكمل صلاتي خخخخخخخخخخخخخخ
المهم لبست ملابسي ونزلت ورحت لامي وهي من هوووول الموقف قاعده تتنافض وتحتري ابوي
يوم جيت صرخت بوجهي لا تكلمني ولا تلمسني ابعد
قلت اسمعي
الصدق مجراه والكذب مفراه
قالت ايش
قلت الصدق منجاه والكذب مفتراه
قالت وش تقول انت
قلت الصدق زين والكذب شين<< وشوله الفلسفه
وقعدت اقولها كل اللي صار واحلف يمين واقسم بالله
والحمد لله لان امي واثقه فيني صدقتني
> > بس مدري ليه سفرو الشغاله بعد يومين<<< الى الحين ما فهم انهم سفروها لانهم ما صدقوه خخخخخخخخخخخخخخخخ
بالنهايه احب انصح اخواني الشباب انتبهو تتفسخون بغرفكم وعندكم شغاله اسمها صليحه<<<< تجيب لكم فضيحه خخخخخخخخخخ

[منتسب بهمة]

أختي دلوعة موضوع جمييل ولا يخلو من الطرافة
ذكرتيني أيام خلت يعني قبل عشر سنين كذا>>>>>>>>>> يعني شوفوني شايب
كنا ندرس في معهد شركة الكهرباء بالشرقية وساكن مع مجموعة من الشباب حوالي ستة أشخاص>>> ليه حوالي مو أكيد؟ لأن معنا واحد إذا طفر جاء سكن معنا وإذا أغتنى سكن لحاله وهذه حالته - والله - طول فترة الدراسة
كان من بيننا واحد دافور ما يحب الغياب ولا التأخير لو دقيقة
والبقية حنا ما نداوم إلا بعد المحاضرة الأولى أو الثانية
ذاك اليوم جاء أخونا هذا يصحينا للدوام كالعادة \"طبعاً أنا لو يجي أحد يصحيني غيره ما أكلمه بس أرفع يدي بالإشارة برقم واحد أو رقم اثنين >>>>>>> يعني متى أقوم بعد المحاضرة الأولى أو الثانية
بس لمن يجي هو يصحيني لا إشارة ولا رد طناااااااااش
وفيه واحد ثاني نفسي وهو اللي مشجعني\"
المهم أخونا جاء يصحينا فرفعت يدي بالإشارة برقم واحد
فهمها وطلع وراح لخوينا الثاني وناداه ورفع له يده بالإشارة برقم 2 فهمها وطلع
الساعة 8 صباحاً قمت بكل همة ونشاط >>>>> ياشيخ
ورحت لخوينا اللي مشجعني وصحيته ورفع لي يده بالإشارة برقم 2 فرفسته وقلت ترى أمس معطينك إنذار نهائي صدق وقام بسرعة ولبس ملابسه وفي هذه الأثناء أنا أدور مفتاح سيارتي وما لقيته وأتذكر أن أخونا الدافور كان ماخذها البارحة وأروح لغرفته وياللهول مما رأيت رأيت أخينا الدافور نائم فناديته فرفع لي يده بالرقم ثلاثة
ملاحظة كان النظام اللي يغيب ثلاث محاضرات متتالية في نفس اليوم يعتبر غائب طول اليوم
هذا اللي أتذكره الآن ولي عودة بأذن الله