اختفاء طلاب الماجستير السابقين عن المنتدى ؟؟؟

[ام معاذ و رانسي]

السلام عليكم ورحمة الله وبركاته
عتاب بسيييط لأخواننا واخواتنا طلاب وطالبات الماجستير والدكتوراة بمستويات أعلى..
اولا::احنا مسلمين واخلاقنا الاسلامية توجب علينا التعاون بيننا بالمعروف ..
ثانيا:طلاب علم وطالب العلم الحقيقي وليس المتعيلم يحرص على نشر المساعدة للغير
كم لنا كطلاب ماجستير مستجدين نسأل وما نلاقي احد يرد وين اختفييتم كنتم مثلنا العام مو معقول تجمع الماجستير مافيه إلا طالبة وحدة من العام وترد قد ماتقدر بيو الكيميائية الله يسعدها ويفرج عليها ..
مو كلنا من جدة وسؤال صغير وتافة عند غيركم مهم جدا للسائل مو الكل يقدر يراجع العمادة ويسأل اللي من خارج جدة لو حسبناها مادي عشان الاقي جواب لكل سؤال عندي احتاج الفين ريال وزيادة كمان عشان احجز واجي جدة..
احتسبوا الأجر في الرد علينا المستجدين ...
ثانيا::ارقام الجامعة اللي مايردوا عليها ليش حاطين تحويلات ومافي رد وخاصة الأقسام العلمية..نعرف انكم مظغوطين لكن نحتاج نفهم ليش مايتم تفعيل الإرشاد الأكاديمي لكل طالب دراسات عليا ونرتاح ...

تذكروا:::من نفس على مؤمن كربة من كرب الدنيا نفس الله عليه كربة من كرب يوم القيامة...ليش تضيعوا الاجر ..احنا كلنا زملاء بنفس المرحلة ونفس التخصص و زكاة العلم والمعرفة تعليمها ...المفروض نكون يد وحدة الفاهم يعلم اللي مو فاهم مو كذا سلبية وكل شخص مشغول بنفسه وبس...مجتمعنا يحتاح عطائنا جميعا .

يّ طُلاب العِلم / جَددوا نيتكم******
وتذكَروا “أن الملائكة وحتى الحيتان في البحر والنملة في حجرها يستغفرون لطالب العلم وأنتِ منهم”ا
فهنيئاً لنَا هذهِ الكرامَة =)

[n e v e r]

الله يوفقك

ماحبيت امر بدون ما ارفع الموضوع

[بطالة مع مرتبة الشرف]

وعليكم السلام ورحمة الله وبركاته

الحقيقة يااختي طلاب الماجستير الحمدلله فيهم الخير والبركة و يوجد ناس بترد عندك بيوكيمائية عماد الحسن ريم العمري وشواطئ البحر وسمو العلم وعبدالعزيز المقبل كثير ناس بترد والحمد لله استفدنا من الردود وعندي كم تعليق بسيط :
أولا: بالنسبة للردود تعتبر عمل تطوعي حسب جهد الإنسان ووقته ويؤجر عليها اذا اخلص لله وبالتالي مااقدر اقول ليش يافلان مااعطيتني من وقتك وجاوبتني وبرضوه انا المفروض احترم عدم وجوده لأني اعرف انه حيكون مشغول
ثاني شيء خلاني اجي ارد انه فيه اعضاء ربنا يهديهم يسأل سؤال اتكرر كثير وكم مرة اتجاوبولو عمل شوية بحث أو قرأ المواضيع المثبتة واستخدم محرك بحث المنتدى حيلاقي جواب لكل الاسئلة فعفوا يعني الشخص اللي حيجي يجاوب هو إنسان مش آلة ملزوم يرد على كل استفسار لازم نتعب شوية ونقرأ والشيء اللي غير واضح حيجي اللي يساعده غير كذا فيه منتدى للجامعة الرسمي وبيردوا فيه مسؤولين والعميد برضوه بيرد ايميل وتويتر والوكيل كمان ، وعندك موقع الجامعة اغلب الاشياء موجودة فيه والحمدلله المعلومة متوفرة بس تحتاج اللي يجري وراها
وانا بصراحة مش طالبة ماجستير سابقة لكن لو لقيت استفسار وكنت فاضية ممكن اجاوب باللي اعرف واللي مااعرف اسيبوه لانه مااحب افتي غلط
وأنا متأكدة يا أم معاذ انه شاف موضوعك ناس بتسأل عن قبول السنة الجاية وبرضوه بتنتظر منك جواب حول اجراءات القبول واختبارات اللغة والمفاضلة ومواعيد التسجيل ..الخ ويمكن يستغربوا انك حطيتي الموضوع هذا وانت ماجاوبتيهم على اسئلتهم اللي تعرفيها ومرت عليك أثناء التسجيل والقبول فعشان كدا اقولك نلتمس لأخواننا العذر وكل انسان له طاقة وحدود ومايقدر يكون آلة أو شمس مشرقة على الجميع والتكاتف شي جميل ورائع وحلو يكون فيه اخذ وعطاء من القدماء والجدد

وأتمنى ماتفهمي من كلامي إني ضد كلامك بالعكس انا معاك تماما اتفق بأهمية التعاون التطوعي واصلا مرة تفرحي لو احد دعا لك في ظهر الغيب عشان وقفتي معاه بس حبيت اشاركك بالنقاط اللي فوق والله يوفقنا جميعا لكل خير

[ام معاذ و رانسي]

عطالة مع مرتبة الشرف أسأل الله ان يغنيك بفضله عمن سواه ويقر عينك بالوظيفة في القريب العاجل ويبارك لك فيها ..
يمكن شديت امس شوية ع زملائنا السابقين لكن حب لخدمة الكل واكيد انهم مشغولين بالنسبة للطلاب المستجدين اي تساؤل اشوفه واعرف له رد احاول ارد بالرد الصحيح

[بيو كيميائية ^_^]

عزيزتي ايش مشكلتك يمكن نقدر نساعدك ؟؟

هو بإختصار الناس وقت التسجيل تلقينهم و بس تتطلع النتايج خلاص مافيه أحد إلا القلة

و هم نفسهم اللي يردون سنويًا ما يتغيرون :)

لو كل واحد حط في باله إن مثل ماساعدوني أجي أسعد الطلاب اللي بعدي عشان لا يضيعون مثلي كان الدنيا بخير

الله لا يحوجك و لا يحوجنا لأحد :)

[بطالة مع مرتبة الشرف]

المشاركة الأصلية كتبت بواسطة ام معاذ و رانسي عطالة مع مرتبة الشرف أسأل الله ان يغنيك بفضله عمن سواه ويقر عينك بالوظيفة في القريب العاجل ويبارك لك فيها .. يمكن شديت امس شوية ع زملائنا السابقين لكن حب لخدمة الكل واكيد انهم مشغولين بالنسبة للطلاب المستجدين اي تساؤل اشوفه واعرف له رد احاول ارد بالرد الصحيح

آمييييييييييييييييييييييييين يارب الله يسعدك على دعواتك الطيبة

والله يوفقك ويوفقنا لما يحب ويرضى