ما رايك في كلية العلوم الطبية

[شقاوة طفلة]

السلام عليكم ورحمة الله وبركاته
كيفكم اخباركم ان شاء الله تمام ؟؟


انا طالبة حتخرج دي السنة ان شاء الله
و حابة احط في بالي تخصص محدد يعني عشان يكون دافع ليا اني اجتهد



ايش رايكم في التخصص ؟؟
و كيف الدراسة فيه (ما حسالكم من حيث الصعوبة لان كل صعب بالاجتهاد يصير سهل )
يعني ايش تدرسو و ايش طبيعة المواد ؟؟
و ايش حتكون الوظيفة بعد التخرج ؟؟
و هل التخصص مطلوب ومرغوب فيه ولالا ؟؟
و بالله كيف القسم يستاهل الواحد يدخلوا ولالا ؟؟

يعني حرام الواحد يدرس ويكرف و ما يدخل قسم عليه القيمة

اسفة طولت عليكم بس دا مصير لازم الواحد يفكر في تمام

[nano-nano]

كل سنه وانتي طيبه ... والله يوفقك ان شاء الله بالنسبه للعلوم الطبيه او اي تخصص تبغي لازم انتي تقري عنو وعن المواد اللي في ايش اللي تحوبيها في وايش اللي ماتحبي في..ايش تبغي تكوني بعد البكالوريوس تقدري تكملي هل تخصصه متعدد مطلووب بس بصفه عامه العلوم الطبيه مرغووووووب كل التخصصات خاصة بنات .. وانتي خودي فره ع المواضيع والمواد ..والاخوه والاخوات مقصرو الله يعطيهم العافيه في دي المواضيع روحي قسم العلوم الطبيه هنا واقري عنو .. تقدري تروح نفس الكليه تسالي عن التخصصات يعطوكي مطويات فكره الشروط الله يوفقك يارب ويخترلك الطيب ..تحياتي

[شقاوة طفلة]

المشاركة الأصلية كتبت بواسطة nano-nano كل سنه وانتي طيبه ... والله يوفقك ان شاء الله بالنسبه للعلوم الطبيه او اي تخصص تبغي لازم انتي تقري عنو وعن المواد اللي في ايش اللي تحوبيها في وايش اللي ماتحبي في..ايش تبغي تكوني بعد البكالوريوس تقدري تكملي هل تخصصه متعدد مطلووب بس بصفه عامه العلوم الطبيه مرغووووووب كل التخصصات خاصة بنات .. وانتي خودي فره ع المواضيع والمواد ..والاخوه والاخوات مقصرو الله يعطيهم العافيه في دي المواضيع روحي قسم العلوم الطبيه هنا واقري عنو .. تقدري تروح نفس الكليه تسالي عن التخصصات يعطوكي مطويات فكره الشروط الله يوفقك يارب ويخترلك الطيب ..تحياتي

يب يب انا عارفة عشان كدا طلبت منكم تجاوبوني

لاني مرة مشغولة دي الفترة و ما اقدر اقرا المواضيع يدوب اشوف
اشياء بسيطة

الله يجزاك خير ع الرد

[صدى الأحلام]

اهلا يا عسل

الله يوفقك و تدخلي التخصص اللي تتمني سواء ف كليتنا او غيرها وتجتازي السنه التحضيريه و بمعدل عالي

الوظيفه طبعا تكون ع حسب تخصصك يعني اذا كنتي تخصص مختبرات حتسيري تشتغلي ف المختبرات و اذا كنتي علاج طبيعي حتسيري اخصائيه علاج طبيعي و زي كدا قيسي عليها التغذيه و الاشعه و الاقسام صراحه اغلبها مرغوبه و مطلوبه ولا تنسي انو اولا و اخرا الارزاق بيد الله

بالنسبه لسؤالك انو يستاهل او مايستاهل صراحه اذا انتي حبيتي التخصص حيستاهل انك تدرسيه وتكرسي وقتك فيلو وانتي اللي حتقدري تطوري نفسك و تبدعي فيلو

موفقه يارب واي استفسار احنا حاضرين :)

[XHUNTERX]

ان شاء الله ردي تلاقي فيه الي يريحك الي فهمتو من كلامك انو انتي ثانوي واخر سنه اذا كان كلامي صح اتمنى انك تحددي رغبتك من الان والتحضيري هيا الي حتحكم على مستقبلك بعد الله سبحانه وتعالى يعني درجاتك فالتحضيري تجبرك احيانا على تخصص انتي ما تبغيه طبيعة الكليه عباره عن دراسه عمليه يعني شغلنا ما يتعلق بالمكاتب الشغل يبغاله انسان اكتف وطبعا ما حيكون اكتف في عمله اذا ما كان حاب تخصصه فلي ابغى اوصله لكي انتي حتختاري مثلا اشعه ليش طيب مختبر ليش وهكذا جميع التخصصات مسمى وظيفتك بعد التخرج اخصائي تقني وتحت تقني الف خط يعني مو طبيب واتمنالك التوفيق تحياتي

[XHUNTERX]

ادخلي على هذا الرابط يفيدك اكثر عن تخصصات الكليه

http://www.skaau.com/vb/showthread.php?t=597794

[شقاوة طفلة]

جزاكم الله خير ع الرد

شكررا ع الدافع و انا كنت افكر دراسة دا القسم ما فيها تشريح

ادا التشريح في ظهري ادخل طب احسن

يسلمووو ع المعلومات

[صدى الأحلام]

التشريح كل المجالات الطبيه لازم تدرسو بما انك دخلتي. مجال طبي و لكن تختلف كميتو من تخصص لاخر ف مثلا قسم العلاج الطبيعي يدرسو بشكل مفصل جدا عن العضلات و الاشعه عن العظام و المختبرات ماعندهم كتير تشريح يعني كميتها مو مره كتيره و الطب يدرسو كل شي ف التشريح و بشكل مفصل يعني اكتر من العلاج الطبيعي و الاشعه. والصيدله و زي كدا وترا التشريح ماده مررره حلوه و ممتعه

موفقه يارب

[شقاوة طفلة]

المشاركة الأصلية كتبت بواسطة صدى الأحلام التشريح كل المجالات الطبيه لازم تدرسو بما انك دخلتي. مجال طبي و لكن تختلف كميتو من تخصص لاخر ف مثلا قسم العلاج الطبيعي يدرسو بشكل مفصل جدا عن العضلات و الاشعه عن العظام و المختبرات ماعندهم كتير تشريح يعني كميتها مو مره كتيره و الطب يدرسو كل شي ف التشريح و بشكل مفصل يعني اكتر من العلاج الطبيعي و الاشعه. والصيدله و زي كدا وترا التشريح ماده مررره حلوه و ممتعه موفقه يارب

يعني تبي تفهميني انو التشريح ممتع و ما يخوف ؟؟

جزاك الله خير ع التوضيح

[AM00NA]

الاناتومي ماده زي باقي المواد تتطلب حفظ بشكل كبيير لانك
حتحفظي اسماء العظام والعضلات والاعضاء بالانقلش طبعاً
وبالنسبة لل لاب فيه جثث ( محنطة ) والدكتوره تشرح لنا عليها واحنا نتفرج ><"
والاختبارات mcq والاختبار العملي يعرضو لنا صور واحنا نكتب البيانات
بس ماادري على دفعتكم مممكن يتغير نظام الاختبار "العملي"
لانه المشرحه فتحوها على نهاية السنه على حظكم الحلوو ..