جبت لكم الكلام الاكيد من الجامعه بالنسبه للتخصص والتحويل والاعفاء...

[خنفشاريه]

اولا /"السلام عليكم ورحمة الله وبركاته"

ثانيا /ياجماعه اليوم السبت الموافق7/10/1433 رحت الجامعه واستفسرت عن الامور اللي تهمني وهي كالتالي...

سالت الاستاذه لمياء في القبول والتسجيل اسئله وجاوبتني عليها..
اولا سالتها عن "التسكين اي التخصص" قلتلها الحين انا اخترت رغبتي كلية الاقتصاد والاداره تخصص علوم اداريه بس ماعرف هل يعتبر خياري هو التخصص النهائي؟؟ قالت لي:هل تغيرت معلوماتك في الموقع ؟يعني بدل السنه التحضيريه صارت كلية الاقتصاد والاداره؟؟ قلت لها::اي قالت: خلاص مادام تغيرت بياناتك معناتها هذا التخصص اللي قبلوكي فيه وبكذا تخصصتي علوم اداريه..قلت لها:طيب اذا انا تخصصت ليش مكتوب لم يتم الفرز؟؟قالت :ماعليكي كلام بس لاتهتمي بها.مادام تغيرت بياناتك يعني تخصصتي بس عليكي تنتظري موعد السداد والجدول.وبالنسبه للتخصص اللي يبي يراجع من بنات الانتظام يراجع هذا الاسبوع.لكن نتيجة الانتساب والتحويل وكل امور الانتساب تطلع بعد اسبوعين من الان...انتهى

ثانيا سالتها عن "التحويل من الانتساب للانتظام" قلتلها يا استاذه انا طلبت تحويل من الاودس لكن ابي اعرف لو حولت حافضل نفس تخصصي والا يتغير؟؟ قالت لي: اذا حولتي من انتساب لانتظام على طول تروحي فرع الفيصليه ومافيه الا كلية الاداب فقط.ومافيه علوم اداريه..قلت لها مابغى كلية الاداب انا ابغى علوم اداريه ومادام مافيه علوم اداريه في الانتظام خلاص مابغى احول انتظام كيف الغي التحويل؟؟قالت لي:مايتلغي! لكن اذا طلعت نتيجتك انهم وافقو على التحويل على طول تجي الجامعه عمادة القبول والتسجيل وراح يخيروكي اذا تبغي الانتظام او تبقي في الانتساب.وقتها انتي قولي لا مابغى اغير من الانتساب وماراح يغيروكي.واهم شئ و"ضروري"انك ماتكوني عملتي اخلاء طرف من الانتساب...قلت:كويس لا ماعملت اخلاء طرف الحمدلله .اجل نستنى النتيجه ونجي الجامعه..انتهى

ثالثا سألتها بالنسبه "للاعفاء من الرسوم" هل يستمر معاي والا لازم اقدم من اول وجديد؟؟ قالت:كم معدلك؟ قلت 4.66 قالت كويس اذا حيستمر اهم شي ماينزل معدلك عن 2.50 ولو نزل يتلغي الاعفاء..

وهذا كل اللي استفسرت عنه واتمنى اكون افدتكم وريحتكم من الروحه للجامعه..دعواتكم ..