صوتك مسموع : موضوع متخصص في تطوير الجامعة " شاركــ/ينا برأيك "

[سمية بكر]

✿ ✿ ✿ السلام عليكم ورحمة الله وبركاته ✿ ✿ ✿

هذا الموضوع مخصص للمشاركة والمشاورة بالأراء لنساهم في الإبداع الفكري في
تطوير الجامعة ونريد معرفة الأفكار التي قد تغير من معالم الجامعة أو تزيد من فرص
جعلها جامعة مختلفة وخاصة لو ناقشنا ما أكثر الأشياء التي تضيق بها صدور الطلبة
عند رؤيتها أو انها شيء لابد من وضع دائرة حمراء نحوه للتحرك السريع الإيجابي,,,
لأن توجد جهات وظيفتها بالجامعة التطوير والتشغيل والصيانه فإحنا دورنا نوصل صدى اصواتنا,

نبدأ الحكاية باللهجة الجداوية ,,,

1- اول شيء يعني منظر الزحمة اللي بنشوفها كل وقت اختبارات الانتساب والتعليم عن بعد عاملة لخبطة في الشوارع وزحمة بلبلد مرررة مو طبيعية , حتى الطلبة المنتظمين صارو يوقفو سرا على باب الجامعة!
( هنا بدنا صوتنا يوصل يشوفوا حل لهادي المشكلة)

2- لاحظنا تغير واضح في عدد البوابات بل تجديد كامل (ماشاء الله) ولكن نتمنى كمان تتغير بوابة
غربية 1 اللي من جهة بنده و هي مخرج الباصات فيها أرصفة الشارع من برة صار فيها حالة بسبب الانفجار السكاني ولاحظت كم مرة عمن يتعلق كعب الشوز فيها...

ليش ماينعمل زي كده ,, لكن نشيل الأسماء مثلاً نكتب اول من عمل المصباح , يعني معلومات عامة



3- صح فيه سيارات الغولف مررررة الحمد لله نعمة كبيرة وخاصة للي محاضراتهم بمباني متباعده ,
4-كفتريات الجامعة اتطورت حبتين وأخص بكلامي الشمالية صارو يجيبو من البيك بعد 12 ظهرا و دونات (حركات ) .. ولكن مازال عدد من الطالبات يطلبو من كودو وماك وبيتزا بخدمة التوصيل للجامعة؟

5- أسماء بعض المباني غريبة نوعا ما حتى البوابات ايش بوابة غربية وجنوبية وشرقيه
حتى السواقين يضيعوا فيها, وليش مانقول بوابة العراقة , والأصالة, والمميزين , المبتكرين
حلو لمن يقولو روحي من بوابة العباقرة ... يعني افرض مثلا لو ...
واستتغربت انتشر اسم شارع الحب ! عشان سموه اسم على مسمى ,,,

6- كثير من المباني مافيها مصعد وهادا عامل مشكلة فيزيقية ,, ومرة تعب ياحرام على الفئات الخاصة من جد.
7- تطوير الشوارع داخل الجامعة يعني في حاجات بسيطة وشكليات بس حترقي من مستوى الجامعة المعماري :
- الكراسي اللي تحت مظلات منظرها غلط و متربنة وحالتها حالة والعملية مو حمام شمس
فالافضل وضعها داخل مكان مغلق مكيف .
- على الأقل توضع نافورة لاتستغربو النافورة بتوزع الرطوبة وتبرد الجو
مثلاً زي كده


- مسرح شطر الطالبات غير معروف ولكن لو تم وضع مثل هذه الصورة مجسم ...



عدد من ساعات الجامعة واااااقفة تستنى أحد يحط بطارية ,,

ليش مانغير من نظره الساعات القديمة ونبتكر ,,





حلو ان الطالبات في اوقات الفراغ تترفه بالللعب الرياضي ,,
ترا الخيمة الرياضية اغلبنا
مايعرف عنها حاجه وكثير ماوصلها ؟؟؟ وبرامج الخيمة غير تحفيزية ؟؟

......
الأوراق والإعلانات الكثيرة اللي بتتحط على الجدران بكل بوابة و مبنى يعني منظرها غلط وعاملة لخبطة ...
عدد من الشاشات التلفزيونية اللي اتحطت سارت مغلقة يعني كأن مالها داعي ؟؟؟
مبنى شؤون طالبات حلو لكن ياليته يتجدد ويترتب حبتين لأن النوادي كل نادي موقعه أغرب من التاني , وزحمة فظيعة من باب المكتبة للطباعة
وخلفه مصلى وقدامه كمبيوتر والجو حاار مافي تكييف و دربكة يوووه مافي ترتيب.
مكائن العصيرات والشيبس والموية والقهوة أغلبها ( خرباااانه) تاخد فلوس وتعللق ومدري ليش الأسعار فيها غاليه يعني سنكرز بــ4ريال ؟
لابد من تطوير مخارج الطوارئ بالجامعة -
تنسيق الحدائق بالجامعة من قبل الطالب -
اخيراً : توقفت حفلات تكريم الطلبة والمعلمين والموظفين و الطالبات من تعمل بالساعة ؟
يعني فجأة سار مافي الا دورات ومحاضرات ..؟
.....
يواجه عدد من الطلاب مشكلة عدم حصوله على موقف للسيارة ويضطر للوقوف بها بعيداً وسيرا على الاقدام
...............
هادي بعد وجهات و افكار واراءي اتمنى تشاركوني يا طلبة ,,,,

[Optimistic Sona]

.
.


والله ياريت نكون شركاء في تطوير الجامعة .. بس كيف ؟؟

أتفق معاكِ بالذات في حكاية الخيمة الرياضية أنا مرة متفاجئة انها شبه مهجورة !!
أتوقع هذا المكان في البلدان الثانية يكون عنده تكدس مستنية الترم الجاي عشان أسجل ان شاء الله
أحس السبب انه مافي ثقافة رياضية عندنا من زمان وكمان الخيمة ما تسوي برامج تساعد
حتى لما حطوا اعلانات عن عرض آيرويك كان خاص للمسجلين فيها !!
ما ادري اش الحكمة !!

وبرضو مبنى الشؤون كنت أكرهه بس بعد ما عرفت عن النوادي اللي فيه بالصدفة
حبييته يعني مرة حلووة النوادي بس المفروض يكون لهم مكان مرتب واضح الوحدة تعرف توصلهم


خلينا نتناقش ونشوف حلول واقعية ، تحمست معاك ^^
مثلا لو نسوي زي برا مجلس طلابي يكون بيده بعض الصلاحيات والمهام
أو ... ما أدري اش أفكارك ؟؟

[زهور العشب]

على طاري الخيمة الرياضية
بليز يا Optimistic Sona قوليلي كيف اسجل فيها او في النادي تبع الجامعة انتي او اي احد يعرف
من زمان ابغى اسجل بس مو عارفة كيف

[Optimistic Sona]

^


الخيمة حيفتحوا التسجيل شهر 3 أول ما نرجع
لازم تسوي فحص طبي في الإدارة الطبية وتاخذيه معاكي وجدولك مختوم من كليتك
وبس فيه بعد كذا انه يكون معاكِ لبس رياضي خاص محتشم

أما النوادي زي النادي الأدبي ، المسرحي ، القرآني ، الفني ... ما أفتكر اش كمان
أغلبها في 13 قدام خوارزم
انتِ شوفي نفسك إذا عندك موهبة أو هواية في اللي يناسبك تروحيلهم
يساعدوكِ إما تطوري مهارتك أو تشاركي معاهم في الأنشطة والمسابقات اللي يسووها


أتمنى أكون أفدتك ^^

[سمية بكر]

بصراحة أسعدني تواجدكم ومروركم الراقي،ومن جد نحتاج احنا نطور الجامعة

[زهور العشب]

المشاركة الأصلية كتبت بواسطة optimistic sona ^ الخيمة حيفتحوا التسجيل شهر 3 أول ما نرجع لازم تسوي فحص طبي في الإدارة الطبية وتاخذيه معاكي وجدولك مختوم من كليتك وبس فيه بعد كذا انه يكون معاكِ لبس رياضي خاص محتشم أما النوادي زي النادي الأدبي ، المسرحي ، القرآني ، الفني ... ما أفتكر اش كمان أغلبها في 13 قدام خوارزم انتِ شوفي نفسك إذا عندك موهبة أو هواية في اللي يناسبك تروحيلهم يساعدوكِ إما تطوري مهارتك أو تشاركي معاهم في الأنشطة والمسابقات اللي يسووها أتمنى أكون أفدتك ^^

بجد مشكورة يالغلا والله يعطيك الف عافية
بس عندي كم استفسار واتمنى انك تجاوبين عليها
بالنسبة للإدارة الطبية قصدك اللي عند كلية العلوم ؟ واذا فيه غيرها اتمنى انك تدليني مكانها وكيف اروح لها؟
وبالنسبة للخيمة ياريت تقوليلي كيف اروح لها ومن وين المدخل حقها وهل التسجيل راح يكون فيها ؟
ادري اسئلتي كثيرة بس معليش تحمليني شوي

[ǁ غــلأآإ ، رٍوٍحــي ǁ]

^^

جمعهآ آفككآر حلوه ف تطوير الجآآمعه :)
واتمنى تكوون في عين الٌآعتبار ،،


ولكن عذرآ آتمنى من الاخوات عدم الخروج عن صلب الموضوع !
واي منآقشات حول الانشطه والانديه تكون هنآ ،،

http://www.skaau.com/vb/showthread.php?t=449131
وآي رد خآرج عن الموضوع ،، سيتم حذف الردود :)

[sosoana121]

ممرات منزلقة أكثر

مصلى في جميع البوابات

كلينكس و صوابين في كل دورات المياه

شكرا حبيبتي ع حرصك و اهتمامك

[سمية بكر]

توفير خدمة الإنترنت الاسلكي بالجامعة شيء حلو وراااائعة والفكرة
أكثر من ممتازة انها فتحت معايا 3 مواقع فقط
وهي موقع الجامعة ,
ومنتدى الجامعة الأخضر ولكن سكاو لايفتح ,
واستغربت اشتغل معايا موقع آخر انا حجبت اسمه
كان المفروض يحجب لأن البعض بيستعمله سلبياً..
بالنسبة للمكتبة المركزية اللي البعض يقول عنها مهجورة الكتب والكثير لايستخدمها او لايعرف انشطتها و فوائدها
حتى اني لمن اتخرجت من البكالوريوس ما عندي بطاقة مخصصة للكتاب المستعار ؟؟؟
اعتقد ان المكتبة بحاجة لبعض التطوير مثلاً لو عملنا معرض الكتاب
حتى بالمسابقات الثقافيه شيء حلو إني أشجع الطلبة بعمل الروايات والقصص والقصائد بحيث توضع أسماءهم في ملف
اسمه المبدعون بالجامعة وتصنف حسب الأعوام والسيرة الذاتية؟
ليش توقفنا عن اظهار المبدعون المعاصرين واكتفينا بمؤلفات واسماء القدماء ؟

[سمية بكر]

سيتطلب الموضوع أيضاً إن سمحت لنا عمادة خدمة المجتمع بعمل مسح على المجتمع الجامعي
وذلك بعمل استبيان وجمع ملاحظات ومعرفة الايجابيات والسلبيات التي ظهرت في الآونه الأخيرة في نطاق التطوير الجامعي من جميع الجوانب ...
ويمكن ذلك من خلال وضع مجموعات من الطالبات المتخصصات على مداخل البوابات لمدة 3 أيام - أسبوع
على التوالي ,في بداية الفصل الدراسي و في نهاية الفصل الدراسي أي المدة المخصصة لاختبارات التعليم عن بعد والانتساب.