مهم لجميع طالبات اقتصاد منزلي بخصوص الملتقى ..

[أ.شذى]

السلام عليكم
كيف حالكم يا بنات ان شاء الله تكونو بالف خير
وكل عام وانتم بخير بمناسبة الترم الجديد

حابه اطرح موضوع وياريت الكل يشارك فيه برأيه

بالنسبة لملتقى الطالبات الموجود بجانب الكفتريا بقسم الاقتصاد المنزلي حابين نعمل له اعادة تصميم
وإن شاء الله وباذن الله سينفذ عن قريب

وحابه من كل وحده تكتب اقتراحاتها وايش حابه يكون فيه
ايش الاشياء الناقصة وتحب تكون موجودة في الاستراحة
ولاتبخلو برأيكم لانه كل دا راجع لكم

وشكرا جزيلا

[araweta]

جزاكم الله خير على كل شي ..

ياليت يكون فيه ستاير لأنو الشمس مرة تضايق البنات الجالسين في جهة اليمين .. وياليت التكييف يكون مركزي ويناسب مساحة الملتقى ..

ممممم وكمان أحس شكل الطاولات مع الكراسي مرة مو لايقين على بعض ^_^

وووبس

ان شا الله لو اافتكرت شي جديد حأقولك هنا .. وشكرا جزيلا مقدددما !

[أ.شذى]

شكرا على تفاعلك
واكيد الستاير لابد منها
وبالنسبه للأثاث إن شاء الله كله بيتغير
بس حابه توضحي اكثر يعني مثلا تبغي فيه مكتبه
جزء للتجمع والقاء المحاضرات من قبل الطالبات
زي كدا
ابغا اعرف احتياجاتكم
وشكرا

[تخصص 13]

اول شي شكرا ع حرصكم ع تطوير مباني الجامعه و على اهتمامكم باراء الطالبات


وبالنسبة للاقتراحات خلوني ألفلف في الملتقى بكرى واشوف اش الافكار والاقتراحات الي تجيني ^^
وفكرة المكتبة حلوة..

[أ.شذى]

شكرا لردك
الملتقى حاليا مافيه شي
بس انا الي ابغا اعرفه احتياجاتكم وايش حابين تضيفو شي يفيدكم ويريحكم

[أ.شذى]

ابغا تجاوب اكثر كل دا الشي لمصلحتكم وراجع لكم

[بطووووطه]

.
.

في الترم اللي فات .. أخدنا مادة ( أسس تصميم داخلي )
و كان المشروع تبعنا .. تصميمين للملتقى .. تقريبًا ٤٠ بنت كل وحده عملت تصميمين ..
اتوقع إنها تفيدكم إن شاء الله .. خصوصًا انها افكار و آراء منوعه و كمان تخدم مناسبات منوعه :)

و شكرًا على البادرة الحلوة :)

.
.

[نبراس النسيج]

مرررررررررررررررررررررررررة شكرا
واخيرا احد جبر بخاطرنا ووفرلنا مكان يلمنا بدل الشحططة و الجلوس في الطرقات
بين الكلاسات
عندي اقتراحات كان من زمان نفسي في كليتنا تتوفر زي كلية العلوم قمة الدلع والرفاهية في الجامعة و الاداب كمان كنا نغبطهم على الدلع الي هما فيه واحنا كنا نقول لنا الله .......
1 – اهم حاجة نفسي تتوفر مصلى لانه من جد مفتقدينه في الكليه كلها ويكون فيه زي زمان حلقات ذكر و تحفيظ
2 – دوالايب عشان البنات يجيبوا عفش البيت كله معاهم ووقت المحاضرات النظري بالذات المواد الحرة في الكليات الثانية نتورط بالعفش ما في مكان نحط الاشياء فيه زي اول في الملتقى
3 – كمبيوترات مزودة بالنت عشان اول الترم نحتاجها للجداول وطول الترم للواجبات و اخر الترم للدرجات بالذات بنات السكن مرة يحتاجوه عشان المكتبة المركزية بعيدة ومو على المشورة نص ساعة بس
ويكون عليه مراقبة طبعا ويكون مثلا برسوم رمزية مرة بالساعة او تعملو تكت اشتراك وهذا الشيء مرررررة يساعدنا
قصدي النت طبعا مو دفع الفلوس
4 – مكتبة فيها كتب ثقافية ودينية متنوعة وياليت تعملوا أكشن وحركات لتشجيع الطالبات على القراءة عشان احنا " أمة أقر " فما نبغى نكون نحن امة " لا تقرأ "
5 – يكون فيه شاشة بلازما تعرضوا فيها سيدي هات لمحاضرات متنوعة مثلا دينية لشيخ : العريفي و الجبيلان و العجمي و.....
وثقافية و لتطوير الذات مثلا : ميسرة طاهر و احمد الشقيري و الزومان و المحرزي او عن الاعجاز العلمي
وكمان حلو امن يتعمل لها جدول مثلا السبت محاضرة ثقافية و الاحد دينية و الاثنين الاعجاز وهكذا ....
ويكون وقتها مثلا من 7-8 الصباح قبل دوخة المحاضرات واهم حاجة التجديد والتنوع في الطرح
6 - ولترفيه عشان احنا حلوين ونستاهل
برادات للمشروبات الساخنة زي إلي في البوابة وللببسي والشكولاتة والشيبسات وللموية
7 – وختاما واهم حاجة عشان الفرحة تكمل
ما يتقفل الملتقى بدري زي زمااااان لانو كليتنا محاضراتها الي 3 و 4 فياليت يقفل 3 ما نبغى نتعبكم معانا الي 4
زماااان كا بيتقفل على اشيئنا وكنا نتورط مررررررررررررة
ومرة سامحيني على كثر امنياتي الي نفسي تتحقق في كليتنا

[مملكة الإحساس]

أنا اقترررح انو يكون في جزء للكتب اللي البنات مايحتاجوها خلاص بحيث للي تبي كتاب تروح هناك وتشوف اللي يناسها وتاخدوو
من باب الخير طبعا

..

[daloly]

ما شاء الله
البنات كفوا ووفا ما بقوا شي الا وقالوه

بس في كم حاجة اتمنى انكم تعيروها اهتمام كبير

1- سلة المهملات (مو بس فالملتقى فالجامعة كلها)
والله اتورط اذا كان معايا شي ابغى ارميه ما الاقي مكان غير شنتطي (ما اوصل البيت ونصها مناديل اوراق ....)
2- ياريت يكون في نت (wifi) عشان وقت الفراغ اللي عنده شغله يقضيها سواء يشوف درجات جدول واجب او حتى يشيك عالايميل
3- البسس ياريت تشوفولها مؤوى تاني غير الملتقى (شكلها مررة غلط فالجامعة)

وذا عندي شي اكيييد مارح ابخل على نفسي وعليكم

وشكررااا على تعاونكم