"مشكلة" اللغة الانجليزية

[JuchiKazunashi]

السلام عليكم ورحمة الله وبركاته يا زميلاتي وزملائي في الجامعة ^^

انا حابة أناقش في موضوع من جد تعبني طول عمري.. صراحة احنا الين متى حنفضل نقول "انجليزي صعب" و"انجليزي مو قادرين نفهمه" وما شابه؟

طول عمري وانا جالسة أسمع كده.. من ايامي في المدرسة الين دحين.. كنت أسمع نفس الكلام وأقول لهم "لا حرام! والله الانجليزي سهل! خذوه على انه لغة مو مادة".. انا دارسة في 3 مدارس أهلية (نقلت من واحدة لثانية), معناه انه انا بادرس انجليزي من صغري.. وأعرف ناس دارسين في مدارس حكومية لكن يعرفوا يتكلموا انجليزي ويكتبوه ويقروه ما شاء الله

شرط إنه الواحد يكون في مدرسة أهلية أو حكومية عشان يتحدد إنه يقدر يتكلم انجليزي ولا لا؟! مو شرط! زي ما قلت قبل إنه من وأنا في المدرسة باسمع الكلام ذا, وهي مدرسة أهلية!!!

المشكلة مو في أي مدرسة درست, المشكلة في الشخص نفسه اذا هو يبغى ولا لا.. ودحين لو الناس تبغى تطور نفسها في الانجليزي او تتعلمه, في دورات بتتعمل, وفي انترنت يا كثر مواقع التعليم فيه بالهبل, وفي كتب تعليمية كمان

وفي نقطة أخيرة حابة اقولها كمان.. انا الصراحة عن نفسي, أبغى أتعلم لغات ثانية جنب الانجليزية.. حاليا, نفسي أتعلم اللغة اليابانية على أصولها.. الحمد لله اعرف افهمها شوية لو سمعت الناس بتتكلمها, بس برضو لازم أتعلمها على أصولها.. وعلى فكرة, اتعلمت الفرنسية بس شوية مرة.. انا بس قلت كده للي حاب يتعلم لغات ثانية جنب الانجليزية

معليش طولت عليكم أنا.. بس أتمنى إني ما أسمع كلام زي كده ثاني, أوكي؟

Peace ^^v