ساعدووني رجاااااء لأني متحطمة كفاية

[الذهبية]

السلام عليكم ورحمة الله وبركاته

يا أعضاء وعضوات احتااج لرأيكم مرررررررررررة
لأني مرررررررررة تعبت وأحس اني خلاص مدمرة ومالي هدف في الحياه

أنا طالبة الآن انتظام أولى جامعة وخلصت أول مستوى والحمد لله ودحين داخلة عالترم التاني لتاني مستوى
قسم ادارة واقتصاد وأنا والله ما عاجبني في القسم دا بس دخلت مجبرة
والآن سمعت بقسم اسمه نظم معلومات وانو مجالة في الحاسب والكمبيوتر
فياريت تفيدوني في دا القسم وهل له وظائف للبنات أو لأ؟؟

وبعدين أنا أفكر اني أحول لقسم علوم وابغى اتخصص يا حاسب يا كيمياء حيوي
لكني محتارة الآن بين اني أحول لعلوم أو إني أجلس في قسم الادراة والاقتصاد واتخصص بإذن الله قسم نظم معلومات ؟؟؟
فياريت تفيدوني ايش اسوي أنا ؟؟؟

والله اني محتارة ومني عارفة ايش ادخل لأن دي الاقسام ما كانت طموحي أبدا
لكن قدر الله وما شاء فعل
فياريت تعطوني آرائكم كطلاب وطالبات لكم خبرة في دا المجال
لأني احس اني انتهيت وما سرت أعرف إيش اسوي
ولكم مني جزيل الشكر

أختكم
الذهبية

[بدون اسم]

بالنسبة لتخصص الحاسب الالي بكلية العلوم لابد من ان يكون المعدل عالي 3.75 ويتم انهاء اربع مواد هي كيمياء وفيزياء ورياضيات واحصاء غير رياضيات واحصاء كلية الادارة والاقتصاد

بالنسبة لتخصص نظم المعلومات اللي اعرفة انه مرتبط بالحاسب الالي وهو تخصص جديد ومرغوب

[mohagerjeddah]

الأخت الذهبية :
السلام عليكم ورحمة الله وبركاته :
ببساطة اتبعي ميولك قبل كل شيء فالانسان لا يبدع في شي الا اذا أحبه ,,,

[الشاكي]

نظم المعلومات ناس كثير تمدحها

وأنا إن شاء الله راح أدخلها

[الذهبية]

مشكورين لكم أخواني

أخي مهاجر جدة
أنا في القسمين دي مالي ميول كنت ابغى أدخل قسم الصيدلو أو تقنية طبية قسم مختبرات
لكن بعد الاختبار التحصيلي حق الطب ماقبلوني ولا في أي قسم من الأقسام الطبية
وهنا بدأت معاناتي ودخلت قسم ادارة واقتصاد وانا ما ابغى القسم دا
ودحين مني عارفة اكمل ولا أحول لعلوم
نفسي أحول لقسم التقنية الطبية لكن يقولوا انهم ما يحولوا من قسم ادارة واقتصاد الى قسم التقنية الطبية
مع انه نسبتي في المستوى الأول فوق ال4.50ولله الحمد والتحويل يقولوا بعد سنه
لكن أنا إلى الآن ما اعرف أحول لعلوم ولا أكمل في قسم ادارة واقتصاد
وهل في أي وسيلة تخليني أحول من إدارة واقتصاد إلى التقنية الطبية ولا لأ ؟؟

أخي الشاكي
نظم المعلومات صح كتير يمدحوها لكن ايش اللي ندرسه في دا القسم
وهل له مجالات للبنات ولا لأ ؟؟

تمنياتي للجميع بالتوفيق والناجاح
أختكم
الذهبية

[ramy.h]

قسم نظم معلومات وجود في كلية الاقتصاد و الادارة قسم إدارة الاعمال
يعني هو مسار في إدارة الاعمال وهو مرغوب وفي أقبال علية لكن يقولو أنو صعب ويحتاج لمعدل 3.75
لكن ماعليك من الي يقولوة ترى القسم هذا مرغوب جداً حتي في التوظيف

[ramy.h]

أنا ما أدري أذا كان فية هذا القسم للبنات
لكن الاستفسار من الكلية أفضل شي
وبعدين فية دليل للكلية فيه جواب لكل الاسئلة عن الكلية و أقسامها و المواد وغيرها

[mooon_14]

اممم والله يا عزيزتي شوفي ايش هيا ميولك ..
هوا فاضلك ترم وتنتهي المواد العامة تقريبا وتختاري التخصص اللي حابتو
وفي مجالات كتير في الكلية ، لو كانت ميولك حاسب عندك نظم مجالو حلو وبالعكس سهل لو انتي راغبة فيه
أو محاسبة واقتصاد وادارة عامة ، تخصصات مختلفة ، أنا بالنسبة ليا دخلت الكلية عن رغبة واخترت تخصصي عن رغبة وشردت من العلوم بلا هم كفاية السنوية العامة >>>> :)
، فلازم من جد تقرري لأنو حرام لك سنة بتدرسي ..
وعلى العموم
عندك مجالات تانية الكلية فاتحة تخصصات جديدة كمان زي السياسة والقانون أختاري اللي انتي حابتو، وحتقدري تكملي فيه بمجهودك
بس يكون معدلك مرتفع عشان تختاري براحتك التخصص بعد موادك العامة
يعني انتي بنفسك حتقرري والله يوفقك ولا تندمي على شي حتدخلي فيه ولو تبي مساعدة أنا في الخدمة ،

والله معاكِ

[الذهبية]

مشكورين ما قصرتو

أخ رامي بالنسبة لقسم نظم المعلومات فهو موجود عند البنات
أخي مون 14
أنا عندي ميول كبير للحاسب وان شاء الله أقدر امشي فيه
لكن القانون والسياسة لسع ماجربته وسمعت انها مواد كلها حفظ وأنا ما احب الحفظ والكلام الكتير اللي في الكتب
طيب المعدل يكون مرتفع مثلا كم يعني فوق ال4.50
وبعدين سمعت انهم يعملوا مفاضله ويختاروا احسن البنات
فكيف يعملوا المفاضلة دي هل في مواد معينة لازم تكون درجاتي فيها عالية أو لأ ؟؟
أنا من يوم ما اتقبلت في التقمنية وسرت متحطمة نفسيا , النسبة في التوجيهي كانت ولله الحمد 95.39 لكن في الاختبارالتحصيلي
ما قبلوني في أي قسم
والآن أنا في ادارة واقتصاد ومافي بالي أدخل الا قسم نظم معلومات
لكن خوفي انهم ما يدخلوني القسم دا

ياريت أعرف اخ مون ايش تخصصك وهل انت مبسوط في القسم دا أو لأ
وإذا كان نظم معلومات فياريت تعطيني معلومة عن المواد اللي ندرسها في دا القسم

مع تمنياتي للجميع بالتوفيق والنجاح
أختكم
الذهبية

[][_ غــــــيــــــر _ ][]

مداخلة بسيطة
المسالة لم تعد مسالة رغبات وميول
بل عرض وطلب بمعنى أن نبحث عن التخصص المطلوب بغض النظر عن ميولك الشخصية
انا مطلع بشكل جيد على الادب بجميع فئاته ومع ذلك لم اسجل حسب ميولي
ففرق بين ما نرغب ومايريده الواقع
لذلك اخترت قسم الاقتصاد والادارة لاسباب كثيرة يمكن من اهمها
حاجة القطاع الحكومي والتجاري لمثل هذا التخصص
اضافة لامكانية مواصلة الدراسة مستقبلاً
في الماجستير او الدكتوراه ..

هذا ماجاد به الخاطر
تمنياتي للجميع بالتوفيق
دمتم بخير