طالبات الاقتصاد ...سؤال!! بخصوص

[رنــــا]

السلام عليكم ورحمة الله وبركاتو


صحبتي عندها سؤال وقلتلها هسالك عنو

هي ناوية بعد السنة التحضيرية بإدن الله تدخل دراسات طفولة وتبغا تعرف ادا

التربية الخاصة تدخل ضمن دراسات الطفولة



وياليت اللي يعرف عن كيف القسم ممتع اولا يفيدها

ومررة شوكرن

[&رهف&]

هلااااا والله

انا قبل ماتخصص كنت ابي ادخل طفولة عشان بعد كذا اتخرج وادرس ذوي الاحتياجات الخاصه بس رحت كلمت رئيسة قسم طفولة وقالتلي ان قسم الطفولة في جامعه الملك عبدالعزيز لاعلاقة له بذوي الاحتياجات الخاصة (التربية الخاصه) وان أتخرج معلمة لرياض الأطفال ... واقترحت علي ان ادخل إدارة سكن ومؤسسات فهذا القسم ..أقرب الى التربيه من حيث يمكنني ان اكون مديرة للمدرسة التربيه الخاصه او من هذا القبيل <<هذا كلام رئيسة قسم الطفولة
واستخرت الله ودخلت إدارة سكن ومؤسسات ...

وبالنسبة لقسم طفوله والله كل صحباتي يمدحوووه ومبسوطين ومرتاحين فيه الله يوفقهم ويوفقك ويوفق صحبتك

[kikiwiwi]

ساكنة في بيتنا طفولة أكيد حتفيدك <<< ما شالله أشوف بنات طفولة كتار ^^

مثل ما قالت رهف بس بأكدلك على نقطة إنه إحنا شغلنا في الإدارة هذه المؤسسات فقط مالنا شغل في تأهيلهم ^^
و بالتوفيق

[رنــــا]

رهف مررة شوكرن ربي يديكي العافية

وشوكرن كمان لكِ kikiwiwi

صحبتي راحت تدور على مديرة القسم بس كول شوية انو يقولولها جوابك عند فلانة وتروح اللي بعدها تقول لها لفلانة ....وهكذا
فمررة ثانكس انكم ساعدتوها



سؤال هادا القسم خاص للادبي او للعلمي ؟؟

[kikiwiwi]

أنا لمن دخلت الجامعة قبل 4 سنوات الإقتصاد لمنزلي عموما كان للعلمي و الأدبي و اللي معاهم شهادة من معهد..

بس دحين مافي طالبات معهد.. و قبل الخطة الجديدة كانوا يقولوا حيصير بس علمي.. بس شكله علمي و أدبي

إسألي و أكيد يجاوبوك << معلوماتي قديمة .^^.

[ساكنه في بيتنا]

وعليكم السلام ورحمه الله وبركاته


الا ليه دخل يا قلبي و دخل ونص ونصين كمان

عندنا ماده في التخصص اسمها احتياجات خاصه و فيه مواد تانيه زي موهوبين و دمج و صعوبات تعلم كل دي المواد تتكلم عن الاحتياجات الخاصه وقريبا ان شاء الله راح يفتح مسار في القسم خاص بالاحتياجات الخاصه ..

قوليلها تشد حيلها و ربنا يوفقها ان شاء الله :) ..

القسم مو ممتع ال ممتع

هو للعلمي الادبي بس اللي اعرفه لازم نسبتك في الادبي تكون جيده

[ساكنه في بيتنا]

المشاركة الأصلية كتبت بواسطة &رهف& هلااااا والله انا قبل ماتخصص كنت ابي ادخل طفولة عشان بعد كذا اتخرج وادرس ذوي الاحتياجات الخاصه بس رحت كلمت رئيسة قسم طفولة وقالتلي ان قسم الطفولة في جامعه الملك عبدالعزيز لاعلاقة له بذوي الاحتياجات الخاصة (التربية الخاصه) وان أتخرج معلمة لرياض الأطفال ... واقترحت علي ان ادخل إدارة سكن ومؤسسات فهذا القسم ..أقرب الى التربيه من حيث يمكنني ان اكون مديرة للمدرسة التربيه الخاصه او من هذا القبيل <<هذا كلام رئيسة قسم الطفولة واستخرت الله ودخلت إدارة سكن ومؤسسات ... وبالنسبة لقسم طفوله والله كل صحباتي يمدحوووه ومبسوطين ومرتاحين فيه الله يوفقهم ويوفقك ويوفق صحبتك

يوووووووووووه لو اقلك الحاجات اللي ممكن تشتغل فيها اللي تتخرج من قسمنا اتعب ..

بجد والله فيه اشياء كتيره بس للي يفكر << لو احد يبغا اقله ايش في بالي انا و صحباتي ان شاء الله ,, وظايف على قفا من يشيل


سؤال ايش اسمها اللي كلمتيها ..

[&رهف&]

قولييييييييلناا الاشيااااء اللي رااح تسووهاا يااساكنة في بيتي ؟؟؟
د.نجود

[ساكنه في بيتنا]

اي شي يخص الطفل ممكن تدخلي نفسك فيه ..

طبعا اول شي يجي في بال اي احد معلمة رياض اطفال ,, تاني شي معدة برامج للأطفال سواء في التلفزيون او النوادي الصيفيه ,, رسامه لقصص الاطفال ,, كاتبه قصص اطفال ,, اخصائيه استشاريه في تربيه الاطفال ,, ممكن تعملي الاعمال الفنيه اللي تفيد المعلمه وتبيعيها ( في بيتك ) ..



د. نجود يمكن قالت كدا لانو كان في ضغط على القسم و ما يتحمل انو يستقبل طالبات كمان .. ( مره قالتلنا دا الشي ) ..

لو مالو التربيه الخاصه مالها دخل اجل ليش ندرس ماده احتياجات خاصه و المواد التانيه و ليش عندنا دكاتره متخصصين في الاحتياجات ؟؟

على العموم نصيبك انك تدخلي الاسكان لو كان ليكي خير تدخلي معانا القسم كان ربنا يسر امروك ,,

الله يوفق الجميع يارب :) ..

[rapid fire]

السلام عليكم ورحمة الله
أنا جديدة بالمنتدى بس مرة فرحت لما شفت قسم خاص للاقتصاد المنزلي
وبالنسبة للأمومة والطفولة هوقسم رااااائع جداً وزيلاتي اللي فيه مرة مبسوطين لكن دراستها تعتمد على علم النفس بدرجة كبيرة، فإذا ما تحبي علم النفس مو مرة رح تمبسطي، لكن أنا أعتقد إنو القسم حلو مرة ورئيسة القسم إنسانة رائعة،
أما أنا فتخصصي إدارة السكن والمؤسسات، وبجد أنا مرة مبسوطة فيه وإذا عندك أي سؤال بخصوص أي تخصص أنا حاضرة لأنو زميلاتي منتشرين في كل الأقسام الخاصة بالاقتصاد المنزلي :):):)