في بيتنا عمل سحري / الهيئة لاتتجاوب / أحتاج مشاركتكم ونصائحكم

[إحساس ناجح]

صباحكم فل وعسل أدخل في الموضوع على طول في 15 شعبان جبنا شغالة سيرلانكية مسيحية علشان تشتغل عندنا برمضان وكانت طيبة وشغلها حلو وأعطيناها غرفة وصالة لحالها فوق البيت يعني شيء متوفر لها في يوم 25 شعبان ليلة رمضان راحت الشغالة لأمي وقالت لها عندي عشاء بروح وأجي بعد ساعتين قالت لها الوالدة روحي وإرجعي بسرعة بعد نص ساعة من خروجها جاء أخوي الكبير مستغرب ويسأل ليش شغالتكم شايلة معاها عفش كامل أنا من أول حاس إنو وراها شيء مو طيب طلعت غرفتها بالفعل مافي ولاشيء شالت كل عفشها عدت ساعيتن ولارجعت إتصلت فيها الوالدة وأخواتي الجوال مقفل بديت أوسوس وأشك وكل خمس دقايق أطلع وأفتش الغرفة حقتها وما أحصل شيء وتاني يوم صحيت الصباح شفت الوالدة متوترة وقدامها كيس في شيء أسود سألتها إيش الهرجة أمي قالت صحيت الصبح بدري ورحت أشيل زبالة الحمام ( أكرمكم الله ) تقول ما أدري إيش خلاني أقوم وأروح أشيل كيس زبالة تقول لما دخلت الحمام وشلت الزبالة حصلت فانيلة ستريتش أسود حقت أخوي الصغير في كيس لوحده طلعتها وحصلت فيها دبابيس وعقد شريط أحمر وأبيض طبعا هي كم طويل بس الأكمام مو موجودة تقول الوالدة طاحت عيني على علبة الكلوريكس نزلتها وفتحتها وحصلت الأكمام داخلها وطلعتها وللمعلومية أنا كنت لابسها الليلة اللي خرجت فيها الشغالة ونزلتها وشكلها أخذتها بعدي وجمعت كل الأشياء وحطتها كلها في كيس وحطتها على جنب بس أختي الصغيرة الله يهديها فتحت الكيس وجلست تفك العقد وتقرأ المعوذات عليها ( لقافة زايدة ) اخذت الكيس ورحت أقرب مركز هيئة ويا ليتني مارحت أول ماوصلت أعطيتهم الكيس وشرحت لهم الموضوع وأكدو لي إنو سحر وقالو لي يصير خير بس إلين مايجي المختص بفتح الأعمال السحرية إرتحت وشكرتهم أنا ماهمني السحر إن شاء الله أكون أنا المسحور مو مهم بس مارفع ضغطي غير مركز الهيئة إلى دي اللحظة لا أحد إتصل علي ولا أحد يتجاوب معاي كل ما أتصل يقولون لي المختص مو فيه أمس إتصلت عليهم وشوفوا إيش ردهم أول ما إتصلت عليهم سألتهم : فين الشيخ قالوا لي الشيخ مو فيه قلت له والنهاية ثلاثة أسابيع ولاتقدرون تفتحون سحر قال لي معليش الكيس اللي جبته ضاع قلت له هذي نهايتها لاتهمتون ولا تقدرون قال يمكن كانو الموظفين يأكلون سمبوسة ونسو موضوعك ( شوفو الإحترام ) نهاية الموضوع إن الشيء اللي صار مايهمني بس مايزعل إلا لما تروح للمسؤولين وتحصل إهمال منهم ويستخف عليك والشيء اللي إستفدته إنو تنتبهوا لأي شغالة تجيكم مو شرط تكون طيبة ومحترمة ومسلمة أو كافرة أشكركم على مشاركتكم في مواضيعي وتقبلو تحياتي [motr] محبكم / إحساس ناجح [/motr]