خ َـواطر ッ

[M7mmd.Y]

*

أعاني من حالة finalism عويصة

رتبت غرفتي ومكتبي وشلت الاوراق الزايدة، رحت رتبت ملفات الكمبيوتر، ورجعت اليوم للفوتوشوب

ومسكت غلط إلا ازبط التايم لاين حقي في الفيس بوك

ساعدت اهلي في البيت شوية ورحت للكهربائي عشان يصلح شيء لي فترة مأجله

وطالما اني خرجت قلت اسدد كم فاتورة بالمرة

كل دا يحلى وقت الاختبارات

[M7mmd.Y]

*

أغبى وأغرب اللحظات، لحظات الصمت في المصاعد، ما تعرف تتكلم احسن او لأ

ولو حتتكلم لازم يكون حوار مدته من 5 - 20 ثانية، واحيانًا الآدمي اللي اكلمه

يعجبه الموضوع ويجي دوره انه يخرج فـ يقوم يوقِّف المصعد لين ما تخلص الهرجة...

وبعدها اقول ليش فكيت فمي

واللي يقهرني اللي يجي مع صاحبه وما تكون تعرفهم... وإلا وإلا يدخلك معاهم في الهرجة

يقول كم شي بعدين يوجه لك سؤال: " ولا كيف؟ " ... ياربي على السماجة

والأسمج لما يكون جالس يستظرف مع صاحبه ويضحك ويطُل فيك، منتظرك تضحك معاهم

يعني هي كلها نصف دقيقة لكن احيانًا يكون فيها جرعة من السماجة تكفي سنة قدام

[M7mmd.Y]

*

ولا كافيين الدنيا كله يقدر يسوي مفعول زي لما يكون عندك نهائي ماث في الصباح

لو كان الاختبار بكره في الليل، كان ممكن اسهر شوية بعدين انام، بس في حالتي... :'\

معلومة للفايدة:

حسب دراسة من المدرسة الدولية في ايطاليا، تنصح الطلاب وخصوصًا ايام الاختبارات

بالإبتعاد عن جميع مصادر الكافيين بالخصوص القهوة والشاي، لأن الكافيين يسبب ضُعف للذاكرة المؤقتة

فـ تنسى بعض الاسماء، او المصطلحات... إلخ

المصدر:

ويكيبيديا - كافيين

،

الله يسهل عليكم وعلينا الاختبارات، ونخرج بمعدلات عالية من الترم الي صارلو سنة هذا

[M7mmd.Y]

^

هههههههههههههههههههههههه اختباار المااااث وااااو

ياسااتر بس، كان شيء عجيب!! احلى شيء مو انك تنقص بالدرجة والدرجتين،

احلى شيء انك تنقص بالـ علامات، وانا داخل الاختبار كنت بـ grade وانا خارج تقريبًا طارو 2 او 3

كلو كوووم، والأسئلة المكررة كوم، يختار اكثر سؤال يخليك تلُف حول نفسك، ويكرره

يلا الحمدلله على كل حال،،

والله يستر على باقي المواد

[M7mmd.Y]

،

انتهى ~

يارب درجاتنا تكون عالية، يارب وفق اللي لسه عنده اختبارات وسهلها له

’

دحين بس ابغا انااااااااااااااااااااااااااااااااااام

ابغا اطلع كرف الترم هذا كلو في النوم :\

[M7mmd.Y]

المشاركة الأصلية كتبت بواسطة الامام الحسن البصري رحمه الله الصبر كنز من كنوز الجنة، وإنما يدرك الإنسان الخير كله بصبر ساعة

الصبر رائع، يلقى العبد جزاؤه في الدنيا قبل الآخرة

كل فصل دراسي هو خطوة اخطوها نحوكِ، والحمدلله قد اقتربت منكِ ومن تحقيق احلامي

اسأل الله القدير ان يلهمنا الصبر جميعا،،،

[M7mmd.Y]

اليوم اكتشفت اني كنت عايش حياة وردية...

ماصرت عارف ايش الصح من الغلط صراحة

المجتمع اتغير... كنت اعرف هذا الشيء بس مو للدرجة هذي، ولما اقول رأيي في الموضوع

يقولو "ترا الشعب يتطور، والتربية تختلف، والحياة اتغيرت.. الموضوع هذا مررة عااادي، واللي مو كدا

هذا فين/مو عايش!"

لو شايفين انو هذا تطور... خلوه لكم ما ابغاه

بالعافية عليكم

[M7mmd.Y]

في مرة كنت واقف قدام مطعم مع اصحاب لي، وكان فيه محل آيسكريم جنب المطعم

شفت واحد لابس ثوب مقطع، وشكله مبهدل، وماسك يد ابنه اللي تقريبا عمره ما يتجاوز 6 سنوات

وكان فيه مجموعة غيرنا من الشباب،

لقيته قرب مننا ومن الشباب وطلب نساعده بفلوس،، فيه اللي اعطاه واللي ما اعطاه

الشي اللي اثر فيني، انه بعد ما اخذ الفلوس ودوبو حطها في جيبه، ابنه شاف محل الآيسكريم وشفته يأشرله عليه

الأب جلس يطُل في ابنه وفي المحل، وبعدين لقيته دخل المحل وجاب لأبنه، والمحل معروف اسعاره +10 ريال

وواحد في حالة الرجل هذا ما اعتقد رح يرضى يدفع زي كدا

المهم خرج الأب وابنه مبسوط، ولقيت ابنه مصمم إلا يخلي ابوه ياكل معاه الآيسكريم..

ابوه مبتسم والولد معصب إلا ياكل معاه،

وفي الآخير شال ابنه، يحضنه، والإبن مع اصراره حط الملعقة في فم ابوه بالغصب، وابوه جالس يضحك

كان منظر ما ادري كيف، وما اعرف اذا كان ينفع ينوصف بالكلام اصلا،،،

،

اللهم احفظ لنا اباءنا وامهاتنا، واغفر لمن رحل منهم، واجعل قبره روضة من رياض الجنة

اللهم اجمعنا بهم في الفردوس الأعلى

أحِبُكم ♥

[M7mmd.Y]

،،

المشاركة الأصلية كتبت بواسطة ابن القيم رحمه الله - الفوائد “ من أراد صفاء قلبه فليؤثر الله على شهوته، إذ القلوب المتعلقة بالشهوات محجوبة عن الله تعالى بقدر تعلقها. القلوب آنية الله في أرضه، فأحبها إليه أرقها وأصلبها وأصفاها، وإذا غذي القلب بالتذكر وسقي بالتفكر ونقي من الدغل رأى العجائب وألهم الحكمة ..”

* الدَّغَلُ: عيبٌ في الأَمر يُفسِدُه

’’

[M7mmd.Y]

،

سؤال...

صاحب يعز عليك صارت له مشكلة ومافي امل انها تنحل، وانت تعرف هذا الشيء

وجا يسألك اذا تعتقد ان كان فيه حتى بصيص امل

ايش بيكون تصرفك؟ :

- تقول له انه انقطع الأمل خلاص بطريقة لطيفه فيها تقدير لموقفه

- تعطيه امل " وانتا عارف انو مافيه " بس عشان تشوفه يبتسم مرة ثانية

i في الاختيار الأول ح ينصدم، والشيء اللي هو فيه مهم جدًا بالنسبة له .. فـ انت عارف مقدار الألم

والقهر اللي في قلبه، وبيجيك احساس بالذنب كأنك انت السبب في المشكلة، وقلبك ما يستحمل تشوفه كذا

ii مع الاختيار الثاني رح تحس انه رجعتله روحه وبتشوفه رجع لطبيعته المرحه

وتسيب الأمر لله، إن شاء الله يصير شيء مع الوقت يغير وضعه، وتنحل مشكلته اللي تحتاج معجزة

لكن لو لا قدر الله ماصار شيء، استحمل وقتها انك حتكون السبب في صدمته الثانية...


؟؟؟؟