معلومات ونصايح واسرار للمستجدين والمستجدات بكليتنا

[M!sS chocolate]

أبغى أسأل اللي تخصصه مختبرات سؤال
كتاب الكيمياء حق التحضيري هل ححتاجه في التقنيه الطبيه
وهل احتجتوه انتوا في دي السنه بما انكم كنتوا العام تحضيري...

ثانيا / أتمنى تنزلوا لنا نصايح للطلاب اللي بيدخلوا مختبرات
/ تغذيه / علاج طبيعي / اشعه كل واحد وتخصصه ينصحنا
بخصوص الدراسه والمواد وكيف نذاكر وهل في ملخصات
نصايح تحسوا اننا حنحتاجها...

[JuStice]

.

بالنسبة للي راح يدخلوا أشعة .. مواد الترم الأول :

ثقافة وعربي , أناتومي (تشريح) , فسيولوجي (وظائف الأعضاء) , فيزياء الأشعة , الحاسب الآلي (دروس خاصة عن أجهزة الأشعة) , ومادة الحماية من الأشعة ,

- الأناتومي : يحتاج تركيز كبير وقوة حفظ بالذات في البداية لأنه راح تواجهكم كمية كبيرة من الأسماء الغريبة والمصطلحات الجديدة .

- الفسيولوجي : مادة حلوة , ممتعة ومفيدة .. راح تتعرفوا فيها على وظائف أجهزة الجسم الرئيسية .. كل جهاز المفروض يعطيكم هو دكتور غير اللي أعطاكم الجهاز اللي قبله .

- فيزياء وأجهزة الأشعة السينية : المادة دي مررررررة حلوة .. راح تدرسكم هيا د. حنان عباس ما شاء الله عليها شرحها جدًا ممتاز .. تعيد وتكرر كتير لغاية لما توصل الفكرة والكل يفهم .

- الحاسب الآلي : مادة خفيفة , بأول كم محاضرة حـ تاخدو أساسيات في الحاسب الآلي وفكرة عمل أجهزة الأشعة من الناحية الحاسوبية وطريقة تحليل بيانات الصور , ومن بعدها في كل محاضرة راح تدرسوا نبذة

عن جهاز معين من أجهزة الأشعة وبعد ما يخلص الدرس في الكلاس بالمستشفى تروحوا وتشوفوا الجهاز وتتعرفوا على أجزاءه .

- وختامها مسك مع مادة الحماية الإشعاعية : أعطانا هيا د. محمد عبدالرحمن - مصري الجنسية - ويشتغل بالمستشفى الجامعي , فيه احتمال إنه ما راح يدرسكم السنة دي لأننا سمعنا إشاعات عن إن العقد معاه انتهى ..

يعني ما صار يدرس لكنه مستمر بالعمل في المستشفى , المادة شرحها حلو ومفهوم لكن المشكلة الكبيرة في الإختبارات ! إحنا نذاكر من السلايدات حقت الدكتور لأن الشرح منها لكنه يجيب أسئلة من الكتاب !

كلنا أخدنا نسخ من الكتاب لكنه فيه تفصيلات كتيرة وحاجات مو معانا وما أنشرحت لنا بس بـ تجي في الإختبار !!

كنا نخاف من اختباراته لأنه دايمًا يجيب أسئلة غريبة ما ندري من فين , المادة دي ينطبق عليها تمامًا مقولة إن الواحد يذاكر كل شي وأسئلة الإختبار كأنها من مادة تانية !

بس لا تخافوا احتمال كبير ما راح يدرسكم الترم دا ^_^"

موفقين

.

[JoudY]

بالنسبة لمواد العلاج الطبيعي

بايوكميستري ( كيميا حيويه )
ندرسها بس في الترم الاول اضحك عليكم لو اقولكم سهلة يبغالها مزاكرة مرررررة اول بأول وفهم

أناتومي ( تشريح )
في الترم الاول راح تدروس في الاسابيع الاولى أشياء جينيرال زي الجهاز الدوري الجهاز الهضمي والجهاز التنفسي
كان سهل شبه الاحياء اللي اخدناه بالثنوي بس بالانجليزي وبعد كدا راح تدرسو
الـ lower limb ... راح تدرسو كل عضلة موجوده في الاطراف السفلية بالتفصيل من فين تبدا وفين تنتهي والعصب المغذي لها والحركة اللي تسويها وفي الترم التاني راح تاخدو الـ upper limb ونفس هرجة اللور ليمب
في البداية راح تكون صعبة شوي لانو الاسماء غريبة وجديدة بس بعد كدا راح تشوفوها سهلة بس المزاكرة يبغالها زكاء ومزاكرة اول باول

فسيولوجي ( علم وظائف الأعضاء )
ما راح اضيف ع اللي قالو justice وراح ندرسها ترم اول وترم تاني

وبالنسبة لمواد التخصص

ميجرمينت ( اختبارات وقياسات في العلاج الطبيعي )
راح تدرسكم هيا دكتورة ايزابيل للبنات وبالنسبة للاولاد دكتور خالد ممدوح ... المادة دي تعتمد اعتماد كلي ع الاناتومي
لو مزاكر الاناتومي تمام راح تمشي في المادة دي ... مررة ما ينفع تزاكرووها ونتو مووش مزاكرين اناتومي

هايدرو ( علاج مائي )
ماادة جدا سهلة ... راح تدرسو الاجهزة اللي نستخدمها في العلاج المائي .. حلوة الاجهزة ومسلية في المعمل
وراح تدرسكم دكتورة ايزابيل للبنات ودكتور رضا سرحان للأولاد والمادة دي بس ناخدها ترم اول

الكترو( علاج كهربائي )
راح تدرسو الاجهزة اللي نستخدمها في العلاج الكهربائي ...وراح يدرسكم دكتورخالد ممدوح بالنسبة للبنات والاولاد بس طبعا مووش سوا ... والمادة تسهل بشرح الدكتور خالد

ثيرابيوتك ( تمرينات علاجية )
راح تكون سهلة لو فهمتوها راح تدرسو تمرينات واجهزة وادوات نستخدمها في العلاج راح تدرسكم دكتورة هدى للبنات في الترم الاول وفي الترم التاني دكتورة سلوى... ودكتور رضا سرحان للأولاد في الترمين
---------------------
وفي الترم التاني
راح تكون في مادة بايوميكانك ( علم الحركة )
مااادهـ جدددددددددددا سهلة وحلوهـ ودكتور رضا راح يدرسكم هيا للبنات والاولاد .. والدكتور مرررة ممتاز ويعيد الشرح كذا مرة ما تخرجو من المحاضرة الا وانتو فاهمين .. شرحو مرة حلو

وطبعا عندنا عربي وثقافة

وبالنسبة للكتب والملخصات
بس الاناتومي اللي لوه كتاب .. باقي المواد راح يعطوكم ملخص كل محاضرة قبل المحاضرة بكم يوم او بعد المحاضرة ع طووول


التخصص حلو .. بس مووش سهل ولا صعب مستحيل
لو زاكرتو أول بأول وتحضرو المحاضرات راح تشوفوه سهل

واختبارات مواد التخصص سهلة وما تخرج ابدا عن ملخص المحاضرة اللي يعطونا هيا الدكاترة
وبيييييس

ولو في أي سؤااال احنا حاااضرين

[JuStice]

.

سوري نسيت مادة !

مادة اسمها الأخلاقيات الطبية (Medical Ethics) ..

جدًا سهلة إلى درجة مملة .. يعني زي الوطنية كدا بس بالإنجليزي .. وطبعًا المادة دي بالإضافة إلى الثقافة والعربي

لازم الكل يستغلها ويجيب فيها a+ لأنها مواد سهلة وترفع المعدل فلا تهملوها (:

.

[M!sS chocolate]

أفاااااااااااااا وين أهل المختبرات ليش كدا تزعلوني

جودي & JuStice سلمت يداكم على النصايح
والله يعطيكم ألف عافيه ..

[عبوور]

المختبرات اكيد مشغولين ولا عادة مانقصر أعطوني المواد بس وأنا أكتب عنها لاني ما أعرف ايش درسوهم السنة اللي فاتت بالنسبة لكتاب الكيماء لا ماراح تحتاجيه بتاتا البتة بس اتاكدلكم اليوم انه نفس الكتاب اللي درسنا سنه اولى

[قصة غروب]

وعليكم السلااام ورحمة الله وبركاااته.
احم احم احم نحنا هنا شبااااب المختبرااات.
حبااايبنا باللنسبه لدرااسة المختبرااات دراااسه جدا ممتعه وجميله واترككم مع المواد اللي درسنااهاا خلااال السنه.
*الترم الاول*
بايو كمستريbiochemestry(الكيميااء الحيوية)
طبعا هذي ماااده جدا ممتعه ويبغاالها فهم اكثر من الحفظ,طبعا هيا تتكلم عن التفااعلاات داخل جسم الانسان. وبعض الدوراات داخل جسم الانسان زي مثلا دورة كربس. دورة كوريا,ومثلا كيف جسمنا يكتسب الطاقه وبعض الانزيمات اللي تااثر ع التفاعلااات وبعض الادوية اللي تعالج هذي المشااكل وكده يعني.
والشباااب اللي قبلي مااقصروا.
anatomy(تشريح)
طبعا هذي مااده جدا ممتعه احنا بس نااخذ فيها كورس واحد بس ,
وطبيعتها نعرف التراكيب والاشكال الداخليه داخل جسم الانسان يعني مثلا العضله الفلانيه ايش اسمها مثلا في القلب الوريد هذا ايش اسمه وايش يسوي وهكذا.
phesyology(وظائف الاعضاء)
مااده حلوه وممتعه بس نفهمها,وهذي طبيعتها تعرفي مثلا القلب ايش وظيفته وتعرفي كل صغيره وكبيره عن القلب هذا مثال وغير كذا في الجهاز التنفسي وباقي اجهزة الجسم.
Mt Skills(مهااراات المعملية)
طبعا هذي ماااده سهله جدا جدا لكن وااجهتنا صعوبه في توصيل المعلوومه من الدكااتره,لكنها حلووه وسهله.وطبيعة هذي الماده يعني في شوية رياضيات, وبعض الاشياء اللي راح نستخدمها زي مثلا التخفيف, والتركيز والتحويلات والاشيااء اللي زي كذا.
instromentaion(علم الاجهزه):
مااااااااااااده سهله بس تحفظ وشوية فهم عكس الا ام تي تحتااج الفهم اكثر من الحفظ.
طبيعة الماده تتكلم عن الاجهزه,يعني مثلا نشووف الجهااز هذا كيف طريقة شغله والمباادئ حقته ومن ايش يتكون وفي ايش نستخدمه وهكذا.
+الثقافه الاسلامية واللغه العربية.
بصفة عااامه الترم الاول يعتبر ترم موااد عاامه يعني ما فيها تعمق في التخصص.
*الترم الثااااني*
ترم ممتع جدا جدا جدا والصراحه ترم علشان ترفع معدلك,وهوا بيكوون متعمقين في تخصصنا اكثر من الترم الاول.
HEMATOLOGY(امراااض الدم):
يااااااااااقلبي يااا الهيماااتووووو.ان شاااء الله رااح اتخصصها في اخر سنه بااذن الله.
مااده لا تعليق عليها الصرااااحه ممتعه جدا جدا جدا.طبيعتها طبعا من اسمها نعرف انها تتكلم عن الدم والخلااياااا,هذي بشكل عاام نعرف مراحل تكووين خلااياا الدم وقبل كذا ايش الخلاايااا الموجووده في الدم وبعض الامرااض زي الانيميا وهكذا.IMMUNOLOGY(علم المنااعه):
مااده جدا سهله وزااده سهووله البرنس الدكتوور رفعت الفيووومي,طبيعتها احنا نعرف من اسمها انها تتكلم عن المناعه نعرف طبعا ايش الخلايا المسؤله عن المناعه داخل جسمنا وكيف تشتغل وكيف تتطور وتنمو ولو مثلا جسمنا اتعرض لفايروس ايش اللي يشتغل ولو اتعرض لبكتيريا ايش الليش يشتغل وبرضوا الفطريات والاشيااء هذي,لا تخافوا الماده بطبيعتها سهله يعني.
MELOCULAR BIOLOGY(احياااء جزيئة ووراثه):
ماده روعه وسهله وطبيعتها تتكلم عن الجينات والاشيااء الدقيقه هذي وبعض الاختبارات اللي نسويها وفيها الوراثه المندليه واشيااء كثير,بصرااحه هذي ماادة فهم ومتعه مره حماااس الصرااااحه.
HESTOLOGY(علم الانسجه):
مااده سهله بس كثيره مره وفيها معلومات كثيره,طبيعتها تتكلم عن الانسجه اللي جسمنا متكون منها, يعني مثلا الرئتين ايش الخلايا المكونه لها وايش نوعها وايش وظيفتها وكذا يعني.
+الثقاافه واللغه العربية.
عمووما الترم الثااني اسهل من الاول بكثير ومواده حلوه ومواد تخصص يعني اللي يحب التخصص رااح يستمتع فيها كثير.
والدكااتره مره ممتاازين وعلى درجه عالية من التفاهم وااالاخلاااق الصرااحه.
هذا اللي قدرت اوصله لكم واسف اني طولت حسيت اني اتحمست شوي, حباايبنا احنا طلاب وطالبات المختبراات موجوودين في الخدمه 24 سااعه في اليوم وسبعه ايام في الاسبوع و360 يوم في السنه وقبلها ثلاثين يوم في الشهر.....,
تمنااايتي لكم بالتوفيق وبرضوا اللي يبغى المحااضرااات او يبغى اي شئ يعطينا خبر وان شااء الله ماا نقصر معااكم وبرضوا شبااب العلااااج حبااايبنا وشبااب الاشعه الحلوين ماايقصروا.
تمنااايتنا للجميع بالتوفيق.
اخوكم*قصة غروووب*

[M!sS chocolate]

^^^^^
بدري

وأخيـــــــــــرا عرفت معلومات عن المختبرات والله شكلها مهي هينه ويبغالها شدة حييييييل
الله يعين ..

قصة غروب ماجاوبتني على سؤالي هل ححتاج كتاب الكيمياء حق التحضيري
طبعا القسم اللي درسته في التحضيري مارح أحتاجه لكن اللي اقصده
القسم الباقي لأنو الكتاب كبيييييييييييير لأني أفكر أبيع كتابي وأخاف اني إحتاجه
بنت عمي بايوكيمستري وتدرس من نفس كتابي ..

[JuStice]

.

إذا أي أحد يعرف طلاب أو طالبات مُقبِلين / مُقبِلات على التحضيري ,

يا ريت ينصحوهم ما يجيبوا ولا كتاب إلا إذا طلبه الدكتور .. طبيعي في أول محاضرة تشوفوا الدكتور يكتب لكم اسماء المراجع حقت المادة ,

بس دا مو معناها إنها مطلوبة منكم فيه كتيرين حسبوا إن معنى دا لازم يشتروها وجابوها عالفاضي , هو يمكن بس كتاب الإحصاء أكتر شي راح يُستخدم وكتاب الرياضيات شوية عشان الأسئلة ..

وحتى الكتابين دول لا تشتروهم من مكاتب زي جرير لأنهم حرامية بكل معنى الكلمة

في بداية التحضيري رحت أسأل عن كتاب الفيزياء عندهم طلع بـ 245 ريال ! بعدها رحت دار حافظ ولقيته بـ 145 !! وأظن في مكتبة الشقري شباب أشتروه بـ 135 !!!

وإلى الآن عندي كتاب الفيزياء ما استخدمته أبدًا والله جديد ما فيه ولا شخطة وورطان مني عارف أبيعه ولا إش أسوي بيه ؟!

والله المستعان

.

[قصة غروب]

المشاركة الأصلية كتبت بواسطة m!ss chocolate ^^^^^ بدري وأخيـــــــــــرا عرفت معلومات عن المختبرات والله شكلها مهي هينه ويبغالها شدة حييييييل الله يعين .. قصة غروب ماجاوبتني على سؤالي هل ححتاج كتاب الكيمياء حق التحضيري طبعا القسم اللي درسته في التحضيري مارح أحتاجه لكن اللي اقصده القسم الباقي لأنو الكتاب كبيييييييييييير لأني أفكر أبيع كتابي وأخاف اني إحتاجه بنت عمي بايوكيمستري وتدرس من نفس كتابي ..

معليش واسفين ع التااخير تعرفوا الاجااازه الوااحد يبغا يستغلها ولا احلى وبدري من عمرك المهم اننا وصلنا^_*
بالعكس المختبراات والله انها روووعه وممتعه خصوصا الترم الثاني ومافي شئ هين من غير دراسه.
بالنسبه لكتاااب الكيمياااء احنا ما استخدمناااه كل الاشيااء اللي نذاكرها من شيتات الدكااتره اما اذا انتي داافووره وتحبي تطلعي ع الموضوووع ويكوون عندك مراااجع للمعلوومه اللي تااخذيها كويس انه يكون عندك خصوصا في البايو كمستري,اما اذا انتي تحبي تذاكري اشيااء واضحه ومافيها لف ولا دوران زي بعض الكتب خلااص خليكي ع الشيتااات بس نصيحه خلي الكتااب يكون ليكي مرجع علشاان لو حصل اي لبس او اي شئ تقدري ترجعي له.
وبالتوووفيق.