مستجد هندسة شمال جدة ؟ ادخل هنا

[اكوس نفرر]

السسسلام عليكم ورحمةة الله وبركاته

كل عآآم وانتوا بخير

في هذا الموضوع .. راح اشرح كل شي ل أول سنة هندسة في فرع شمآل جدة

وراح اقسم الموضوع كم قسم ..

القسم الاول : الجداول

اول شي لازم تعرف انو الجداول راح تنزلك جآهزة اول 3 اترام

وانتي اللي المفروض انك تسويه

تروح اول يوم دوآم .. وتختار ما بين خطة A or B

القسم الثاني : المواد والدكاترة

اول شي راح ابدأ بمواد خطة (A)

ce201

هذي المادة جددا خطيرة .. اسالني ليش

انا اقلك .. هذي المادة اذا ما طبقت اول ب اول وحليت جميع التمارين في البيت راح تصعب عليك في النهايه

كل اللي عليك تشتري كتاب المادة ( الكتاب مررة حلو ومرتب ) وكل محاضرة تمسك تمارين الكتاب وتحلها لا تعتمد ع تمارين الدكتور بس

انا درست المادة الترم الاول .. وفي الترم الثاني غيرو الدكتور وما اعرف عنو شي

فيزياء202

المادة حلوة .. تعتبر متوسطة الصعوبة او فوق المتوسطة بشويه :)

اهم شي تركز مع الدكتور وتحل معاه وتحفظ القوانين اول بأول

لانهها مشكلة الفيزياء في قوانينها الكثيرة

دكتور المادة كان هو المنسق .. بصراحه كان دكتور شرررريح بس نسيت اسمه

وطبعا للمادة معمل .. جدا سهل ما عليك الا تكتب التقارير اللي يطلبوها ووقت الاختبار اقرا التقارير وخلاص

ورش

مادة سهله مرة ما تحتاج اي مجهود

والدكتور كان طيب اسمه محمد الغامدي اهم شي زبطو في الواجبات حقته وما عليك

IE255

هذي المادة جددا بطله وتنزلكم مع دكتور مافي زيه في الجامعه

كل اللي عليك تحضر كل محاضرة وتكتب اللي في السبورة

والاختبارات تجي نسسسخة من الدفتر

ثقافة اسلامية

المعروف لا يعرف

سهاله كل اللي عليك قبل الاختبار ب يوم اقرا الكتاب وادخل الاختبار

معمل الفيزياء281

هذا المعمل يختلف عن فيزياء202

في هذا المعمل راح تطبق تجارب اللي اخذتها في فيزيا110

مادة سهله واللي ماسكينها معيدين طيبين جدا :)

كذا خلصنا خطة (A)
....


نبدأ في خطة (B)

رسم هندسي

المادة حلوة .. 70 درجة ع كراسة الرسم و 30 درجة ع البرنامج

طبعا في البدايه اول ما تشتري الكراسه راح تنبسط وتحس نفسك مهندس

كل اللي عليك انك تتمرن وتتمرن وتتمرن وكمان تتمرن :)

EE201

مادة مضمونها جدا سهل

حكايه المادة كلها تتكلم عن برنامج وكيف تحل فيه معادلات جبرية

ذاكر اول ب اول وحاول انك تطبق في البيت ع البرنامج

ماث202

ما راح اصعبها عليكم

بس هذي اكثر مادة كرفت فيها

بس الحلو فيها انك قد ما تكرف تاخذ درجات

وبعدين ترا يمكن اكثر من ربع المادة محذوفه في فرعنا

انا بصراحه اخذتها عند خصوصي مع انه الدكتور كان شرحو كويس

IE200

تدرسوا في هذي المادة شوية قرامرات في الانقليزي

مادة سهله جدا جدا جدا

تقسيم الدرجات 10 ع الملف و 30 ع الرايتنق (يعطيكم الموضوع وتقعدو تكتبو عنو اسبوع ثلاثه مواضيع كل موضوع 10 درجات )

و 20 سبيكنق و 5 حضور والباقي اختبار نصفي ونهائي

عربي

بصراحه ما اخذتها بس يقولو مستواها اصعب من الثقافه الاسلاميه بشويه

معمل كيمياء281

تدرسو التجارب اللي اخذتوها في كيمياء110

سهاله لا تشيلو همها

ل درجة انك في الاختبارات يسمحولك تدخل بالدفتر حقك

كذا خلصنا المواد وللهي الحمد


القسم الثالث : شوية معلومات تفيدك :)

- اول اسبوع مافيه دوام .. كل اللي عليك تسويه تجي اول يوم تختار جدولك
- طبيعة الدراسه سهله نوعا ما .. بس هذا الكلام ما يخليك تهمل لانك حتجيب العيد بعدين
- الجامعه احلى مافيها صغيرة .. ما راح تمشي ع رجلك اكثر من 3 دقايق
- الجامعه فيها مطعمين واحد كبير والثاني صغير
- للي يسالو عن الاعتماد .. الاعتماد ما يجي للجامعه الا لمن تخرج كم دفعه من نفس التخصص (بس في النهايه انت متخرج من جامعة الملك عبدالعزيز)
- طبعا انا سمعت انو احتمال يزيدوا عليكم مواد ويحذفولكم مواد .. بس اكيد راح تدرسو اغلب المواد اللي شرحتها لانها الاساس
- اختيار التخصص بعد ثلاثه اترام (كهربائيه - ميكانيكيه- صناعيه ) .. طبعا ما ياثر في سنوات دراستك اذا اتخصصت بعد ثلاثه اترام

هذا كل اللي عندي واذا نسيت شي ي ليت احد يكمله

وبالتوفيق .. وحاول انك تبدأ سنتك بقوه عشان تتحمس