جمِيعنا نمْتلكَ عالمآ اسَمه الإرادْه والطمَوح(نظام السنة التحضيرية+تجارب دفعة15)

[BODUR]

* بسم الله الرحمن الرحيم السلام عليكم ورحمه الله وبركاته بدايةً مبرُوك لكل وحده تم قبولها في جامعتنا الحبيبة، أسألي الله التوفيق وان هذه الخطوة تكون بداية لرسم مستقبلك السنة اللي فاتت لمن كنت في هذه الفترة، قلبت النت عشان أدور مواضيع متعلقة بالسنة التحضيرية وبحثت عن تجارب الطلاب والطالبات عشان أكون مُلمة بعض الشيء بالحياة الجامعية قبل ما أدخل فيها. وفعلاً أستفدت كثير " والله يجزي ويسعد كل شخص أفادني بمعلومة ولو كانت بسيطة" ودحين بعد ما خلصت التحضيري ولله الحمد، حبيت أكتب موضوع يفيد طالبات التحضيري عمومًا و طالبات المسار الإداري خاصةً (مساري) . والله يقدرني على نفعكم ولو بالقليل من دحين أنبهكم ترى الموضوع حيكون طويل عريض وكلامي كثير لذلك جهزولكم شاهي،دلة قهوة، أي حاجه تتسلوا عليها وأتحملوني عاد حأتكلم هنا عن حاجات كثير : 1/ خطوة مابعد القبول في الجامعة . 2/ اصدار البطاقة الجامعية. 3/اختبار تحديد المستوى في اللغة الانجليزية. 4/ الجدول وشرح لرموزه. 5/ الخطط الدراسية ورأيي في كل مادة. 6/ توزيع درجات المواد. 7/ خربوطات اضافية. ___ ( بعد قبولكم في الجامعة ) دحين اول ماطلع قبولكم أكيد جاتكم علامة " صح " جنب خانة ( الترشيح ) معانته مبروك انضميتي ألينا ولازم تعرفي ان هذا اكيد هو الخير اللي الله عز وجل اختاره لك بعدها حتختاروا موعد لاستلام البطاقة الجامعة وموعد ليوم اختبار تحديد مستوى اللغة الانجليزية، ما أتذكر الخطوات بالتسلسل بس الموقع كان يوضح كل شيء. ___ ( البطاقة الجامعية ) استلام البطاقة كان شيء جدًا بسيط، أول حاجه زي ماقلت حتختاروا اليوم والوقت اللي يناسبكم من التواريخ اللي محددينها لكم، وتروحي تستلميها من المبنى اللي كاتبينه لكِ ( أنا استلمتها في مبنى 29 ) دخلت وفي دقيقتين طلعولي هيا ، طبعا الصورة اللي حتكون موجودة على البطاقة الجامعية هي الصورة الشخصية اللي رفعتيلهم هيّا في وقت التسجيل على الموقع، لذلك اختي المسلمة اختاري أحلى صورة لكِ لأنك بتصبّحي عليها يوميًا وبتشوفيها في كل اختبار دوري مرتزه على يمين الشاشة الرقم الجامعي اللي على البطاقة ضروري ضرووري ينحفظ لأنه بيصير هويتك في الجامعة واسمك مسحوب عليه، بداية الرقم حتكون رقم دفعتك، أنا دفعتي 15 ف بداية رقمي 15 . ___ ( اختبار تحديد المستوى للغة الانجليزية ) الاختبار من اسمه هو لتحديد المستوى في اللغة الانجليزية عندنا في التحضيري 4 مستويات انقلش وتعتبر من متطلبات السنة التحضيرية ولازم تجتازيها عشان تتخصصي بعدين. طبعا أفضل مستوى هو المستوى الرابع الاختبار اختياري يعني لو ما اختبرتيه حتبدئي تدرسي من المستوى الأول عادي. بس أنا أشوف انه جدًا جدًا مهم ، هو زي ماقلت اختياري مو اجباري بس مرة حيكون أفضل لو اختبرتيه ليه ؟؟ لأن فيه بنات كثير قالوا "مو لازم نختبره خلينا نبدأ من ليفيل ون عادي بالعكس هذا في صالحنا و لغتنا ممكن تتحسن ومحا نخسر شيء" ، لكن اختي الفاضلة ترى بتندمي أشد الندم على هذه المقولة اذا مادخلتي الاختبار وكان مستواكِ الفعلي أعلى من ليفيل 1 أولاً : لأن ليفيل ون فيه رسوب لكن درجته ماتدخل في المعدل "يعني كرف على الفاضي" ، وبسيط جدًا يعني ياخذوا الحروف الأبجدية وكيفية كتابتها و قراءة الساعة وهذه الحاجات. ثانيًا : لأن السنة التحضيرية من وجهة نظري جدًا سهلة بس دوامها طويل، وليه دوامها طويل؟ بسبب الانقلش ( من 3 ساعات ل 4 ساعات يوميًا ) ف اذا دخلتي اختبار تحديد المستوى وطلع مستواكِِ الثاني او الثالث او الرابع او ممكن تعدّي جميع المستويات ف حيكون أفضل، لانهم حيعفوكي منها حيعادلولك هيّا وكأنك جايبة 100 في المستوى أو المستويات اللي عدّيتيها، وهذا حيرفع من معدلك أكيد وحيكون دوامك جدًا خفيف . كيفية الاختبار : الاختبار حاسوبي، وعبارة عن فراغات واختيارات ، سبيكنق و قرامر وفوكابلري واللذي منه، الوقت كافي وبالراحة يمديكِ تحلي وعلى حسب الاجابات الصحيحة يحددوا مستواكِ. ___ ( الجدول ) بعد فترة حينزلكم الجدول تلقائيا على الأوديس بلس ( نظام تواصل الطالب مع الجامعة اسمه الأوديس ) . و هنا الرابط . الجدول، الجامعة تختاره لك وماتقدري تعدلّي عليه أبدًا الا لو فيه تعارض في أوقات المحاضرات وهذا نادرًا مايصير. وكمان الجدول حيحدد اذا الجامعة حطتك في خطة ( أ ) و لا خطة ( ب ) مافرقت كل الخطتين حتاخذيها بس أنا أحس الأفضل ان الوحده تبدأ بخطة ( أ ) لأن موادها أكثر من خطة ( ب ) " وحتكلم عن مواد كل خطة ونبذة عنها" دحين بشرحلكم الجدول . نبدأ من اليمين . - العمود الثاني : المقرر : هو اختصار ل اسم المادة. - العمود الثالث : الشعبة : رقم شعبتك عشان تكوني عارفه عند أي استاذة وبداية الدوام تتأكدي اذا انتي انتِ في هذه الشعبة ومع هذه الدكتورة أو لأ. - العمود الخامس : الوحدات : هي عدد ساعات المادة اللي لازم تاخذيها اسبوعيًا، طبعا كل ماكانت الساعات أكثر كل ماكان تأثيرها على المعدل أكبر. - العمود السادس : الأيام : كل مادة جنبها مكتوب محاضراتها في أي يوم ورموز الأيّام : U الأحد M الاثنين T الثلاثاء W الأربعاء R الخميس - العمود السابع : الوقت : طبعا نظام الوقت نظام ال 24 ساعة . - العمود التاسع : المبنى : رقم المبنى واضح - العمود العاشر: الغرفة : اللي هيّا رقم القاعة مع الدور A الدور الأول B الدور الثاني C الدور الثالث تحت الجدول "المقررات المعادلة" زي ما انتو شايفين مكتوب انجليزي 1 لأني اختبرت اختبار تحديد المستوى وحطوني في ليفيل 2 ف خلاص عادلولي ليفيل 1 ___ ( الدوام ) دوامي كان يوميًا يبدأ من الساعة 8 لأني كنت آخذ انقلش الانقلش يكون فترتين وتختلف من يوم ليوم يعني ممكن 3 أيام كلاسات الانقلش تبدأ من 8 الى 11 ويومين من 11 ل 4 وفيه بريك ساعة من 12 الى 1 وممكن العكس يعني يومين من 8 ل 11 و 3 أيام من 11 ل 4 دحين ممكن تشوفوها حوسة، الزبدة ان الانقلش يكون على فترتين بسبب كثرة البنات ماينفع كلهم في وقت واحد ولو خلصتي الانقلش أو أعفوكي من جميع المستويات دوامك حيختلف طبعًا . ___ ( الخطط الدراسية ) هيا خطتين والجامعة تحدد اذا الترم الأول حتبدئي بأي خطة . خطة ( أ ) تشتمل على 4 مواد وهي : رياضيات ، مهارات لغوية 1 ( عربي ) ، ثقافة اسلامية ، مهارات الحاسب الآلي - الرياضيات : مادة يبغالها مذاكرة وتركيز بس مهي صعبة ابدًا ولو كنتي علمي في الثانوي بتكون مرة سهلة بالنسبة لكِ وحاجات مكررة،وممكن تستعينوا بمحاضرات الانتساب وشروحات اليوتيوب حتفيدكم كثير. - مهارات لغوية : مادة سهلة برضو تشمل ( نحو / بلاغة / املاء / أدب ) الجزء النحوي والبلاغي يبغاله مذاكرة، الاملاء جدًا بسيط بس لا تستهونوا فيه، كثير اسئلة في الاختبار تجي منه هو ومعاني المفردات. - الثقافة الاسلامية : مادة بالنسبة لي كانت فعلاً دسمة واسئلتها دقيقة ، يعني أنسي تذاكريها في يوم الاختبار يبغالها تكرار قراءة وبتركيز كمان، بس ماهو من مستحيل انك تجيبي فيها A+ - مهارات الحاسب : أنا عن نفسي كنت أشوفها سهلة يعني وورد وبوربوينت واكسل وآكسس وحاجات مكررة أغلبها أخذناها في الثانوي، بس التعب ان يوم اختبارها النظري في الويكند ، يخلوه يوم السبت دائمًا ويسرقوا ويكندنا الله يهديهم خطة ( ب ) تشتمل على 3 مواد وهي : احصاء ، مهارات اتصال ، مهارات تفكير - الاحصاء : أول محاضرة أنصدمت حسيته شيء صعب وان الرياضيات أسهل بمليون مرة، بس مجرد مافهمته استوعبت مدى سهولته، جدًا بسيط والقوانين كلها تجي مرفقة في الاختبار يعني ما ينشال همّها. - مهارات الاتصال : مادة خفيفة و تفيد في الحياة عمومًا ، خصوصا لو الدكتورة كانت لطيفة وفرفوشة حتحبب في المادة أكثر . المادة فيها تكاليف حأوضحها في توزيع الدرجات . - مهارات التفكير : المادة مسلية لكن برضو دسمة وفيها حاجات مكررة تلخبط شويا، بس ماينخاف منها واسئلتها تجي سهلة في الاختبارات . هذه هي مواد السنة التحضيرية، بالاضافة للانقلش لو لسا باقيلك مستويات، وطبعا تختلف صعوبتها من شخص لشخص. ___ ( توزيع الدرجات ) الاختبارات في جميع المواد كلها آلية " على الحاسب الآلي " وعبارة عن صح وخطأ واختياري والدرجة بعدد الفقرات يعني 30 درجة على 30 فقرة وتطلع نتيجة الاختبار بعد ماتنتهوا منه مباشرةً ماعدا نتيجة المواد العلمية ( رياضيات - احصاء - حاسب ) تقولكم هيّا الدكتورة بعد فترة من الاختبار. كل المواد درجتها الكاملة من 100 ودرجة النجاح 60 من 100 . و توزيعها : 30 دوري أول 30 دوري ثاني 40 نهائي * ماعدا الحاسب ومهارات الاتصال * - الحاسب ناسيه كيف كان توزيع الدرجات بالضبط بس حيكون فيه ( اختبارات نظرية و اختبارات عملية ) -مهارات الاتصال 30 دوري أول 30 تكاليف تحددها دكتورة المادة وأغلب الاحيان تكون ( عرض "برزنتيشن" - سيرة ذاتية مع خطاب للسيرة ) وحتتعلموا كيفية كتابتها مع دكتورة المادة. 40 نهائي ___ ( حاجات اضافية ) * أول حاجه الشنطة اختاروا اللي يريحكم سواء على الكتف ولا على الظهر، أنا عن نفسي ألبس على الظهر وكثير بنات كمان ومرة المنظر عادي وترى ما يخرب البرستيج أبدا خذو اللي يريحكم لأن الكتب ثقيلة ولو انتي من النوع اللي يحب يفك العباية أكيد حتحطيها في الشنطة وبرضو حتثقل عليكِ . * أغلب الوقت حتكونوا تدوروا من مبنى لمبنى تحت الشمس وحتحتاجوا نظارة شمسية أو مظلة ، أنا صراحة اشتريت الاثنين وكلهم سحبت عليهم وصرت ضب يتحمل حرارة الشمس * الكتب طبعًا كل دكتورة حتعطيكم اسم الكتاب والطبعة المطلوبة، ممكن تشتروها من مكاتب الجامعة او مكتبة الخوارزم برا الجامعة. * كوننا بنات وعفشنا كثير ف أول حاجه ممكن تحتاجوها هي اللوكر ( خزنة ) اللوكر تستأجريه من الشؤون بمبلغ رمزي مني فاكره بكم بس أظن 25 ريال ويسلموكي مفتاحه لمدة ترم كامل، تحطي فيه كتبك وعبايتك وأي حاجه ممكن تحتاجيها. * سيارات القولف في الجامعة مجانية وتسهل الوصول بين المباني، لا أشوف وحده منكم تركب القولف وتقول للي تسوق ودّيني مبنى 12 مثلا لأن القولف ماهي تاكسي ، لكنها حتوقف في محطات معينة قريبة من أغلب المباني، محا توصلك لحد المبنى نفسه، طبعًا وقت ماتركبي القولف أنسي التضحية والذوق والأدب، لأن ممكن تكوني واقفة لك ساعة وتجي وحده بكل برود تنط وتركب وتخلص الأماكن عليكِ، الا لو شفتي عاملة أو وحده حامل واقفة تحت الشمس ونفسيتها تقطع القلب ممكن تفضّليها عليكِ وتحتسبي الأجر * الجامعة يوميا تسوي نشاطات ودورات ومحاضرات وحاجات حلوة تكون اعلاناتها معلقة في كل مكان وخصوصا في مبنى الشؤون ( 65 ) ممكن تشاركوا فيها وتقضّوا وقت فراغكم بحاجه تسليكم وتنفعكم * كفتيريات الجامعة زحمة بشكل يمّوت لذلك جيبوا أكلكم من البيت أحسن لكم بدل الوقفة و ممكن محاضراتكم تبدأ وانتو لسا في الطابور تستنو دوركم . * جامعتنا مسموحة فيها البناطيل والبلايز النص كم وتكون طويلة من تحت نوعًا ما ، الليقنز و البلايز الكت ممنوعة وصراحة ماهي منظر حلو في الجامعة أبدًا . * برضو الجامعة تسمح بجوالات الكاميرا بس لا تجلسوا رافعين الجوال 24 ساعة وتصوير وتميلح قدام وحده من المسؤولات في الجامعة عشان لا تاخذولكم كلمتين * أماكن المكتبات في الجامعة ( ضروري تعرفوها لأنكم بتحتاجوها ) - مكتبة في الملتقى الغربي - مكتبة في مبنى الخنساء 42 - مكتبة جنب مبنى 12 - مكتبة في كلية العلوم 7 - مكتبة في مبنى قدام بنك سامبا ناسية اسمه اظن 11 "-.- * الخيمة الرياضية في الجامعة ممكن تسجلوا فيها ، جوّتها العاب رياضية زي كرة السلة وتنس. و وأظن أجهزة سير و دراجة يعني حاجات حلوة. صورة لخيمتنا من برا ___ وهذا جدول نسب القبول في الكليات " لسنة 1437 " طبعا كل سنة تتغير النسب على حسب شطارة الدفعة : وهنا خريطة الجامعة توضّح المباني والكفتيريات وأعطونا منها نسخة مطبوعة يوم استلام البطاقة الجامعية " الخريطة فيها حاجات قديمة " : ___ و أخيرا ترى السنة التحضيرية جدًا سهلة وأبدًا مو بالصورة اللي الناس مصورتها للجميع، قبل ما أدخل الجامعة كنت خايفة من ناحية انها مختلفة عن المدرسة ومتوقعة انها شيء صعب وخلاص نهاية الدنيا بس في السنة التحضيرية بالذات تفوقك ونجاحك يكون من الله ثم اجتهادك لأن درجاتك كلها بيدك مو بيد الدكتورات، ذاكرتي كويس واجتهدتي بتحلي كويس في الاختبار ودرجتك بتصحح آليا وتنزل مافيها لعب، يعني هرجة ان " الدكتورة حاطتني في راسها وخسفتني في الدرجات " أبدًا مو موجودة. ان شاءالله اكون أتكلمت عن أغلب الحاجات المهمة واللي تحتاجوها حاليًا وأكيد من اول يوم دوام حتكستبوا خبرات أكثر وتتعرفوا على حاجات جديدة بنفسكم، وأعذروني اذا نسيت حاجة من هنا ولا من هنا. وطبعا كل كلامي كان خلاصة تجربتي ومن رأيي الشخصي يعني ماهي مُسلّمات أكيدة، وكل شخص أكيد له تجربة مختلفة وان شاء الله تجاربكم تكون جميلة وماتُنسى أتمنى انكم تنشروا الموضوع بين الطالبات المستجدات، والله يكتب لنا الأجر جميعًا بنية نشر علم نافع يُنتفع بهِ أسأل الله لي ولكم التوفيق والرفعة في الدنيا والآخرة. دعواتكم لي و لوالديّ