المواد الحرة والإختيارية بالصور + أسهل المواد لقسم التسويق - مهم جدا ..

[ميمونة ..]

السلام عليكم ورحمة الله وبركاته
صبحكم / مساكم الله بكل خير ...
تقبل الله منا ومنكم صالح الأعمال ..

طبعا الكلام كثير حول المواد الحرة والاختيارية ، والغالبية يتفلسفوا من راسهم ، وهما ضايعين ومضيعينا معاهم ..

اللي بقوله باختصار: كل المواد اللي بالجدول الطويل تعتبر مواد اختيارية سواء كانت من قسمك أو من خارجه ماتفرق أبدا ..

لحد يلعب براسك ويقول لك لازم تاخدي تلاتة من القسم الفلاني واتنين من القسم العلاني ، أنا صار معاي موقف الترم الماضي وأرسلت ايميل للكلية وردوا علي ساعات التجارة الالكترونية مارح تنحسب لك لأنها مو موجودة بالجدول الطويل ، وقالوا لي انتي ماخذة مواد حرة اكثر من اللازم قصدهم استخدام الرعاية والتجارة الالكترونية ووقتها كنت منزلة بجدولي مادة نظم معلومات موارد بشرية والحرمة شرحت لي بالايميل تقول لازم تاخذي ثلاث مواد mrk ومادتين أي قسم تاني ووقتها كنت ماخذة العلامات التجارية وتصميم الانترنت لو كلامهم صحيح كان ما انحسبت لي ساعات التجارة الالكترونية ، يعني لا تعتمدي على كلام أي أحد كملتي ساعاتك المطلوبة منك حتنحسب لك كلها وحتتخرجي وبالتوفيق ..

طيب المواد الحرة ايش هرجتها ؟
المواد الحرة هي المواد اللي تقدري تضيفيها وماهي موجودة بالجدول الطويل الأخير من أي قسم كانت هذي كلها نسميها مواد حرة ..
أهم شي بالموضوع دا كله انك تاخذي 15 ساعة سواء تاخذيها كلها من الجدول الطويل أو تاخذي نصها من الجدول الطويل والنص الثاني برا الجدول ..

كيف يعني من برا الجدول ؟
يعني من خاصية البحث والإضافة تختاري القسم اللي تبغيه وتخلي الصح عند القيود ، وهو حيطلع لك المواد اللي تقدري تضيفيها ..
وهالمواد لو ركزتي فيها ممكن ماتكون موجودة بالجدول الطويل ، ولو أضفتيها تنزل بجدولك الدراسي عادي جدا زيها زي أي مادة أساسية عندك ..

ولمن تدخلي عالخطة حقتك حتلاقي انها مصنفة ضمن جدول المواد الحرة ، ولو نجحتي فيها تنحسب لك ساعاتها ضمن الساعات الـ 15 المطلوبة منك ..

لاحظي التجارة الإلكترونية ماهي معانا بالجدول الطويل صار لها جدول لحالها باسم مواد حرة

لاحظي كمان ان ساعاتها انحسبت ضمن الساعات اللي عديتها بالمستوى .. 3+9=12

بالنسبة للمواد السهلة :
1- مادة إدارة العلامات التجارية.
أنا أخذتها مع د. رانيا أبو بكر ، كانت سلايدات وكانت سهلة جدا وممتعة والدكتورة كانت ممتازة بالشرح وأسئلتها واضحة ومباشرة ، ود. رانيا غنية عن التعريف لكنها مع الأسف ماصارت تدرس بجامعة الملك عبد العزيز ، المادة عموما سهلة وبتكون أسهل حسب اللي بتدرسكم المادة ..

2- مادة تصميم وتطوير وإدارة انترنت.
أنا أخذتها مع أ. ألفت عبد القادر ، كانت سلايدات كمان ، واتذكر انها كانت ست فصول ، الأربع فصول الأولى كانت معلومات بسيطة وسبق ومرت علينا قبل ، والفصلين الأخيرة كانت فهم ، يعني لازم تركزي مع الأستاذة وهي تشرحها لأنها تتكلم عن تصميم المواقع ومعلوماتها جديدة بس سهلة جدا ، بالنسبة لـ أ. ألفت كان شرحها جدا رائع وسلايداتها كانت واضحة وأسئلتها كانت سهلة وواضحة ومباشرة ، صح ان نتيجتي ممكن ما تقنعكم بصحة كلامي ، لكن اللي خلاني أجيب هالنتيجة أني ذاكرت المادة قبل اختبارها بشهر ومارجعت راجعتها ، واعتمدت على مذاكرتي ، غير انه كان عندي بنفس اليوم مادة ثانية اختبرت فيها ، وغير هذا كله كنت مواصلة يومين مانمت ، فأنصحكم فيها وذاكروها كويس ..

3- مادة استخدام خدمات الرعاية الصحية.
أخذتها الترم الماضي مع أ. دينا الجحدلي الله يسعدها ، كانت سلايدات وسلايدات قليلة كمان وأعطتنا أسئلة مراجعة وجابت منها بالاختبار ، كمادة كانت جدا جدا جدا جدا سهلة وأسئلتها كمان ، أما عن الشرح فأنا للأمانة ما حضرت محاضراتها عشان أقدر أحكم على شرحها ، أسلوب الأستاذة بالأسئلة مباشر وواضح جدا ، والإختياري تبعها يعتمد على نظام ماعدا ثلاث اختيارات صح والإختيار الغريب هو اللي نختاره ، يعني بالعربي تحفظي التعدادات زي اسمك ، اغلب الاختياري كان ماعدا ، فأنصحكم بالمادة هذي ، وبمواد الأستاذة دينا لاتترددوا فيها ..
سلايداتها : http://skaau.com/vb/showthread.php?t=795223

4- مادة التجارة الإلكترونية.
أخذتها الترم الماضي مع أ. سوسن أبو طالب ، كانت مادة سهلة سهلة سهلة جدا وسلايداتها جدا قليلة ، ومعلوماتها معروفة تقريبا بالنسبة لي ، ما كان فيها شي جديد علي ، غير ان الاستاذة اعطتنا أسئلة مراجعة ، والأسئلة في الاختبار كانت سهلة جدا ومباشرة وواضحة وجابت من أسئلة المراجعة اللي اعطتنا ياها بالضبط ، أنصحكم بالمادة لأنها سهلة ، بالنسبة للأستاذة برضه ما حضرت محاضراتها بالتالي مقدر احكم على شرحها ، غير كذا الأستاذة ماصارت تدرس بالجامعة الترم الماضي كان آخر ترم لها ..
سلايداتها : http://skaau.com/vb/showthread.php?t=795196

5- مادة نظم معلومات موارد بشرية.
هذي المادة نزلتها بجدولي الترم الماضي وحضرت محاضراتها كانت مع د. سناء حلبي ، المادة كانت سهلة والأستاذة شرحها حلو واللي حلو بشرح الأستاذة انها كانت بعد ماتخلص كل فقرة تقول لنا كيف تجي الأسئلة عليها وتعطينا كم سؤال مراجعة على كل فقرة ، أما عن أسئلة الاختبار ماا اقدر احكم عليها لأنه ضاق علي الوقت وحذفت المادة بآخر لحظة ، بس البنات اللي اختبروها اعطوني انطباع ممتاز عن الأسئلة لدرجة ندمت اني حذفتها ، وللأمانة سمعة د. سناء حلبي طيبة بالأسئلة دايم طالباتها يمدحوا أسئلتها ..
سلايداتها : http://skaau.com/vb/showthread.php?t=794700

6- مادة تمويل اسلامي.
هذي مادة حرة ، نزلتها بجدولي الترم قبل الماضي وحضرت محاضراتها مع أ. أماني مبارك ، للأمانة المادة مرررة سهلة وحلوة تشبه مادة الفقه اللي كنا ندرسه بالثنوي ، الأستاذة شرحها جدا رائع وسلايداتها كمان مرتبة ومتعوب عليها ماكان فيها ولا غلطة ومنسقة صح وقليلة ، << نقطة ضعفها السلايدات المرتبة اللي مافيها أخطاء ولا عيوب ، بس هذي المادة ما اختبرت فيها لاني حذفتها بآخر لحظة برضه ، ناوية آخذها الترم الجاي اذا الله اراد ونزلوها لنا لأنهم ما نزلوها الترم الماضي ولا حتى الترم الصيفي ، بالنسبة لأسئلة الأستاذة في الاختبار البنات مدحوها كثير ومدحوها بعبارة ( الجواب الصح يقول لك تعالي اختاريني ) من كثر مو الأسئلة واضحة ومباشرة وفيه بنات جابوا فل مارك فيها والباقيات جابوا بالتسعينات ، أنصحكم فيها وبقوة ..

بالمناسبة حطيت لكم بعض روابط سلايدات المواد اللي نزلتها بالمنتدى ، للي حابة تاخذ فكرة عن المواد ..

وبس أنصحكم بهذي المواد بقوة لأني فعلا اشوفها سهلة وأنا وكثير بنات غيري جبنا فيها درجات عالية ماشاء الله تبارك الله ولله الحمد والمنة ..
بس ضروري تذاكروها صح ، مو عشانها سهلة ما تذاكروها لازم المذاكرة ولازم تحضروا المحاضرات عشان ترسخ المعلومة بذهنكم اكثر ..
اعتمدوا على الله وذاكروا .. المذاكرة ثم المذاكرة هيا اللي حتنفعكم بعد الله مهما كانت المادة سهلة بدون مذاكرة مارح تجيبوا نتيجة مرضية ..
الله يوفقنا واياكم لكل خير ويرزقنا من واسع فضله وييسر لنا امورنا ..
آآآآآمين ..


*اختموا اعجابكم بـــــ ماشاء الله تبارك الله ..

اللهم اجعل اعمالي خالصة لوجهك الكريم ، وتقبل مني وجميع المسلمين ..
اللهم صل وسلم على سيدنا محمد وعلى آله وصحبه أجمعين ..