استفسار بخصوص المسار العلمي

[Taif_NFC]

السلام عليكم ورحمة الله وبركاته

انا طالبه توي متخرجه من الثانوي ومحتاااره بين المسارين العلمي والإداري!!

وشفت كتب المسار العلمي وانفجعت من الانقلش بصراحه

لغتي الانجليزيه مو مره تمام واخاف ادخل مسار علمي واتوهق ويطيح معدلي

ف ابغى استفسر الشرح يكون بالعربي ولا بالانجليزي والمواد صعبه ولا سهله والطالبات اللي كانو زيي مشوو ف السنه التحضيريه ولا حولو مسار اداي؟؟
وكمان ابغى اعرف لو مثلا تخصصت ادارة اعمال برضو المواد بالانقلش ؟
واضح مسبب لي ازمه

[المليحة]

وعليكم السلام ورحمة الله تعالى وبركاته
الكتب بالإنجلش والشرح بالعربي بس المصطلحات الي يقولوها بالإنجلش يعني الأستاذات يراعوا إنه إنتوا لسا تحضيري وكذا وعادة لما تقول المصطلح زي velocity تقول معناه سرعة كذا مرة وبعدين طول المحاضرة هذي وبقية المحاضرات تقول velocity فتطمني من ناحية المصطلحات راح تحفظينها إن شاء الله من كثر ما تسمعينها :) والاختبارات بالإنجلش ولكن كلها إلكترونية يعني ما في مقالي وهذا أسهل ، والأسئلة واضحة نادرًااا جدًا تكون فيها كلمات مو واضحة! أصلاً إنتِ لو ذاكرت الأسئلة والتمارين الاختبار يستخدم نفس الكلام والمصطلحات الي فيها يعني ما راح تنفجعي بكلمة جديدة إن شاء الله،

وبالنسبة لبنات كانوا علمي حولوا أدبي فيه، لكن الأغلب حولوا عشان صعوبة المواد ( مو صعبة ولكن الأغلب ما كان عارف من فين بالزبط يذاكر أو ما يذاكر أول بأول ويترجم الصعب فتلاقينها تتراكم ليلة الاختبار ) وبعضهم غيروا التخصص الي في بالهم وكذا ..

طبعًا كل ما كان مستواك أعلى كل ما ارتحتِ، لكن اتطمني في بنات كثير دخلوا لفل ون (أقل مستوى باللغة ) وما شاء الله خرجوا بمعدلات عالية وما كانت اللغة عائق ، أصلا عمره ما كانت اللغة عائق هم ما حطوا السنة إلا عشان يطوروكم فيها مو يخلوها حاجز بالنسبة لكم ..

صدقيني لو توكلتي ع ربك وثم أخذت بالأسباب وعرفت من فين تذاكرين و"كيف" تذاكرين ومتى ما بتوقف اللغة عائق :) ( تقدرين تشوفين تجربتي في السنة التحضيرية في المنتدى هنا ولو حبيتي كمان تجربتي مع الإنجليزي ومعادلته)

وبالمناسبة ، بما إنه إجازة حاولي تطوري لغتك شوي .. عشان تسهلي على نفسك بعدين ، اشتغلي ع حالك ساعة ساعتين باليوم وبتشكرين نفسك بعدين

وبالنسبة لإدارة الأعمال ما أعرف والله .. اسألي بمنتدى الكلية تبعهم هنا في سكاو

وبالتوفيق