أول يوم , , , الجميع إلى هنا !

[JuStice]

.

أول يوم ,

كل واحد يحكي إش صار له من "طق طق" لـ "سلامو عليكوم"

إنطباعاته عن الكلية وأقسامها وفكرته لها هل أتغيرت .. وطريقة التعريف بالأقسام والجولة وكل شي !

وأنا حبدأ بنفسي في الرد الجاي بإذن الله .. شكلي أول واحد رجع !

.

[JuStice]

.

بسم الله الرحمن الرحيم

باختصار شديد جدًا هدا اللي صار معايا اليوم وإنطباعاتي وتقييمي و و و :

- أول حاجة تعبت أنا وصاحبي على ما لقينا الكلية ربع ساعة نلفلف وكل شوية نخش شارع ويطلع غلط .. هدا غير الزحمة ! الله المستعان منها

واللي مر من جنب مبنى 29 فيه تجمع شباب هناك مدري همّا تحضيري ولا إيش ..؟

وبعد عناء لقينا الكلية .. طلعت محشورة جوا بين كزا مبنى وما تبان من برا ! كان المبنى حلو زي مباني الطب جديد ويفتح النفس والمواقف مضللة ومزبطة

>> وأخيرًا حتنتهي معاناة المواقف والخوف من سحب الونش في أيام التحضيري الله لا يردها ووداعًا إلى لا لقاء

- دخلنا جوا وكان المبنى كبير وفاضي ما فيه غير أنا وصاحبي وخمسة أولاد متفرقين كل واحد بمكان منهم اللي يعبي الإستمارة واللي يتكلم مع زميله و ....

بعدها جا معيد علاج طبيعي وطلعنا فوق .. وبعد تلت ساعة على ما جوو الشباب بدأ البرزنتيشن وكان مش ولا بد ! وطبعًا لاحظت أستاذ جهاد أول ما طلعت

والبرزنتيشن كان يعني .. مقبول .. وقالوا لنا إن المبنى جديد - New - السنة دي فتح وكل الأجهزة جديدة بالنايلو ولسا مكرتنة فكوا بعضها قدامنا بعدها الجولة التعريفية قسمونا تلات مجموعات ..

أول شي رحناه العلاج الطبيعي .. غرف العلاج الطبيعي جدًا ممتازة ومجهزة بكل شي وتشرح النفس صراحة مع ضوء الشمس اللي داخل ,

وتاني شي رحنا الأشعة .. وما أدراكم ما الأشعة !!

قسم الأشعة تحس فيه غموض وألغاز منتظرة إني أحلها وأعيش مغامراتها واللي شرح لنا وعرف القسم هو أستاذ جهاد .. كان شرحه وبدون مجاملة هو الأفضل وكله حماس ,

بعدها تقنية المختبرات .. بصراحة ما دخلت مزاجي .. قاعات مختبراتها كبيرة ومجهزة بس حسيتها كئيبة .. الله لا يكتبها علي

- بعدين رجعنا تاني للقاعة الرئيسية وأعطونا محاضرة كيف تختار التخصص والنجاح وكلام كتير

- وآخر شي جا العميد والوكيل ودكتور ممدوح قاري وبدأت الأسئلة والإجابات عليها والاستفسارات والردود ..

رغم رغبتي الشديدة في الأشعة إلا إنه فيه شي زاد من توتري وخفت شوية ,

اللي هيا حكاية الجهاز الصغير اللي يشيله كل طلاب الأشعة حتى يقيسوا مقدار الأشعة اللي تم التعرض لها وفي حال كانت زايدة يتم إتخاذ الإجراء اللازم ..

ولما خلصنا خلاص وخرجنا من القاعة وتفرقوا الشباب .. بقيت أنا عشان أسأل واحد من المعيدين كم سؤال ..

إلا فجأة على حين غرّة وبدون سابق إنذار .. طلعت تلات عناصر نسائية مشعة ومروا من بيننا بس مدري بعدين فين دخلوا ! كانوا لابسين بالطو أبيض ..

بعد ما خلصت كلامي واستفساراتي نزلت من المصعد إلا لقينا قدامنا بنت لابسة بالطو وطلعت بعدنا بالأصنصير ! المهم خرجت من المبنى وكان فيه باص وبنات كتير واقفين برا الباص

استغربت جدًا .. مدري همّا بنفس المبنى معانا ولا كيف

- إستيعاب الأقسام :

الأشعة : 15 , العلاج الطبيعي : 25 , تقنية المختبرات : الباقي

عدد الطلاب المستجدين بالكلية : 75 .. واللي حضر اليوم حوالي 51 طالب بس ..

طولت عليكم .. سامحوني بس من الحماس ويا رب أنقبل بالأشعة

.

[LPRocks]

<< تعجبني على شرحك الرهيب

اليوم كان بسيط الكلية فيها طلاب قليل و المستجدين زي ماقلت 51 طالب

شخصيا العلاج الطبيعي حسيته حلو بس مادخل مزاجي الأشعة نص نص و كمان الواحد يخاف من اضرارها المختبرات اكثر شي حمسني حسيتها ملائمه ليا

اخير عندي سؤال مهم مره ؟؟

بكره في احد راح يجي لاني سئلت واحد من المعيدين قالي مافي شي بس في احد عندو نية يجي بكره يقول ؟؟

و ثانيا حسيت الكلية جدا جدا جدا ممتعة يعني مافيها كئابة التحضيري والكليات الباقية , تحس جوة كليتنا في عمل تدريب حب شغف صراحة متعة جدا عالية ,,

ملاحظة / استاذ جهاد كان من افضل المعيدين في الشرح عن قسمه شكرا له وموفق في مسيرته المهنية ^_^

[لصمتي كلاام]

بالتووووفيق لكم

مرررهـ حلووو شرحكم <<اعذروووني دخلت عرض بس حبيت اشوووف

واشجعكم هع

المهم انا ماعندي شي اقولو لانو لسهـ جديدهـ ومادخلت الجامعهـ

ان شاء اللهـ راح ادخلها قريب وهذا مو تخصصي <<وليش داخلهـ ههههههههه

سلامو

[weddah]

احنا صار معانا نفس الفلم حقكم

ولمن خلصنا قالوا تعالوا شوفوا معامل الاولاد
ورحنا بالباص واتفرجنا معامل الاشعة والعلاج الطبيعي

وكلمونا دكاترتكم واستاذ جهاد طبعا اولهم

وبس رجعنا مكاننا

لا تخافوا ما حناخد كليتكم

[υикиσωи]

حماااااس ما شالله ..
حلوو انو اخدتو جولة ..
مو احنا يا حسرة ..

احس اتلصقنا عالكراسي ..


ربي يوفقكم ان شالله ..
وتتخصصو في اللي تبغوووه ...

=)


<< معليش داخلة عرض ( رقم 2 .. )

[JuStice]

.

ما أعتقد بكرة أحد حيجي .. إلا طبعًا اللي ما حضروا اليوم ..

على فكرة أظن إني عرفتك (-:

لاحظت إنه أول ما الدكتور كان بيأشر على المعيدين بالخلف وأستاذ جهاد قال اسمه .. واحد كان على يميني على طول طالع ورا ..!

قلت في نفسي .. بس ! أكيد هو دا LPRocks (: كان لابس بدلة سودة .. صح ولا غلطان ؟ ^_^"

.

[LPRocks]

المشاركة الأصلية كتبت بواسطة justice . ما أعتقد بكرة أحد حيجي .. إلا طبعًا اللي ما حضروا اليوم .. على فكرة أظن إني عرفتك (-: لاحظت إنه أول ما الدكتور كان بيأشر على المعيدين بالخلف وأستاذ جهاد قال اسمه .. واحد كان على يميني على طول طالع ورا ..! قلت في نفسي .. بس ! أكيد هو دا lprocks (: كان لابس بدلة سودة .. صح ولا غلطان ؟ ^_^" .

خخخخخخخخخخخخخخخخخخ

تراني قبلت استاذ جهاد في الدور الأرضي قبل مادكتور يصرح عن اسمه في القاعة و كمان كنت لبس ثوب

[miss me]

لن اضيف شيئا على كلام وده

بس انا عكسك يعني لمن استاز جهاد ورانا الجهاز دا حق اللي يبين الأشعه قلت كويس يعني يسير كل واحد عارف حدود معينه ما يتخطاها و بس الله يوفقنا كلنا

و في شي مرررررررررررره مقهوره منو انو مررره ما اعطو التغزيه حقها ابدااااااا يعني تقريبا اكتر شي اشعه و علاج طبيعي كأنو مافي غير دي التخصصين قهروووني الله يسامحهم

[JuStice]

.

هههههههههه طيب انت كنت بأي مجموعة : أ , ب , ج ؟

أديني أي لمحة عنك خخخ (:

.