Teach Me Medicine..ملخص لأهم الأشياء

[hadeel a]

بسم الله الرحمن الرحيم
السلام عليكم و رحمة الله و بركاته
بسبب أن كتير ما قدرو يحضرو الدوره فحأحاول أنقلكم أهم اللي أنقال في الدوره وإن شاء الله ما أنسى شي .
تقريبا كان أكتر من نص الوقت كانو البنات يعطيهم العافيه بيشرحو جزئيات من مواد سنه تانيه طب بشري يعني من كل ماده بشرحوا كم حاجه عشان يورونا طريقة الدراسه و يدخلونا بالجو أنا عن نفسي كنت بس بأسمع يعني ما بحاول أحفظ وحتى بأول يوم بنت و هيا بتشرح قالت مو لازم ترجعو البيت و تحفظو اللي تقال لأن في النهايه حيرجعو الدكتورات ويشرحوها من جديد .
و في أول تلاته أيام كانو بيشرحوا تقريبا في أول نص ساعه مصطلحات طبيه و هدي الجزئيه موجوده في الملزمه من صفحه 11 ل17 يعني جزئيه بسيطه أنا حسيت دي الجزئيه لو حفظنها قبل ما تبدأ الدراسه مرره حيكون شي كويس و لو ما حفظنها برضو ما أظن أن حيكون في أي مشكله.
نجي دحين لأهم جزئيه اللي هي تخص طب الأسنان :
جاتنا يوم التلاتاء بنت سنه تاني طب أسنان يارب يسعدها و يوفقها فاهمتنا عن أشياء كتير أول حاجه المواد :

تشريح الأسنان
dental anat.& occlusion
التشريح العام
gross anatomy
علم الأنسجة والأجنه
histology & embryology
علم وظائف الأعضاء
physiology
كيمياء حيوية
biochemistry
اللغة العربية (1-2)
arabic language (1-2)
الثقافة الاسلامية (1-2)
islamic culture (1-2)

هدي هيا المواد اللي إن شاء الله حناخدها سنه تاني و مجموعها تمانيه مواد .
مادة التخصص الوحيده هيا dental anat.& occlusion وهدي هيا الماده الوحيده اللي بنختبر فيها في نهاية السنه الجزئيه حقت الترم الأول و التاني .
أما بقية المواد بنختبر في الترم التاني بس جزئية الترم التاني من غير ما تدخل الجزئية اللي أخدناها بالترم الأول .
histology & embryology بتعتبر مادتين منفصلتين بالمحاضرات بس في الاختبارات نختبرها مع بعض و أكتر الأسئلهhistology يعني متلا لو كان الاختبار 40سؤال حيكون 30 منهم histology.
physiology : هدي الماده بس بنختبر فيها شورت كويز يعني مافي ميد تيرم و كمان نختبر فيها نهايه كل ترم .

arabic language (1-2)
islamic culture (1-2)

راح ناخد الترم الاول عربي و تقافه اسلاميه 1 و في الترم التاني 2 و كدا بإذن الله في نهاية السنه بنكون خلصنا العربي و يبقالنا مستواين قي الثقافه الاسلاميه ناخدها سنه ثالث .
و العربي و الثقافه الاسلاميه هي المادتين الوحيدتين اللي بتداكرمن الكتاب أما بقية المواد من الشيتس و راح نحتاج كم كتاب للصور بس مو اكتر امكن اتنين .
و أتفقو كتير بنات أن أحسن مكتبه لبيع الكتب الطبيه هيا مكتبة المريخ يعني دايما فيها الكتب و أسعارها كويسه ؟
الدوام في سنه تانيه حيخلص تقريبا من 2 ل4 .
وجدول الاختبارات يتفقو ليدر البنات مع ليدر الاولاد و يكون جدول موحد تقريا مده الاختبارات شهر من غير العربي و الثقافه الاسلاميه لأن بنختبرها قبل ده الشهر .
و كتير بنات قالو أن أحسن طريقه للمداكره سواء للطب البشري أو الأسنان أننا كل يوم نقرأ المحاضره بفهم و نراجعها بالويكيند .
و أكتر حاجه ركزت عليها البنت اللي كانت بتشرح عن طب الأسنان أن لازم نتعاون في كل حاجه عشان نستفيد من بعض و تسهل علينا الدراسه و شرحتلنا كيف ماشاء الله عليهم كيف كانو دفعه متعاونه يعني و حده تجيب المحاضرات من الدكتور أو الدكتوره و التانيه تصورها و التالته تتأكد أنها وصلت لكل بنت و كده في كل المواد و أتوقع أن أحنا كمان باين علينا من دحين أننا دفعه متعاونه .
أتمنى أن تكونو أستفدتو من الموضوع .
هدا ما عندي فإن أحسنت فمن الله و إن أخطأت فمن نفسي و الشيطان و لكل للي حضرو الدوره ادا في أي حاجه غلطت فيها فصححولي و ادا في حاجه ما قلتها فياريت تضيفوها و للي ما حضرو الدوره ادا عندكم أي أسأله قلوها و و إن شالله نقدر نجاوبكم .
ادا عجبكم الموضوع فما أبغى منكم غير أنكم تدعولي في ظهر الغيب .
و شكرا .

[~RAN~]

مره شكرا على الموضوع الرائع

قرأته كلمه كلمه والله مراا مفيد
وحسستيني اني حضرت الدوره

ربي يسعدك وباذن الله تكون دفعتنا متعاونه ~

[THE HILL]

مآ شآء الله عليگ دكتورة هديل

والله مستنيتگ تكتبي الموضوع من زمان والحمد لله شفتو لاني عارفه انگ حريصة و راح تفيدي البنات هنآ ،،


والله استفدت من موضوعگ ف الاشيآء المشتركه بيننا وطريقه المذاكرة والنصايح


يعطيگ العافيه مرة ثانيه ^^

[hadeel a]

~ran~ : عفوا .. شكرا لكي أنتي يا عسل على الرد ما تصدقي قد اي انبسطت لمن عرفت انك استفدتي من الموضوع بإذن الله حنكون متعاونين ادا احنا من دحين و قبل ما نبدأ دراسه و متعاونين في المنتدى كيف لمن نبدأ دراسه و نسير نعرف بعض كويس .

The hill :الله يعافيكي يا عسل .. شكرا على المدح الحلو و إن شاء الله دايما نشوفيك منوره المنتدى ..

[Dr.rori]

يسلمووو :)
كنت بستنا شي زي كدا
الله يسعدك و يوفقك

[goodone]

الله يعطيكِ الصحة والعافية يا دكتورة هديل ، بصراحة ما قصرتي :)

عندي سؤال :

- هل الملزمة متوفرة في احدى المكتبات ؟



تحياتي

[hadeel a]

Dr.rori:الله يسلمك يا عسل و شكرا على الرد و الدعوه الحلوه .

goodone: الله يعافيك .. و الله ما أعرف ادا هي متوفره في أي مكتبه بس في بنت قالت حتنزلها في منتدى الطب البشري و ادا تبوني أعملكم كوبي من الملزمه و أحطها في مكتبه فعادي ما عندي أي مشكله .

[Dr~NanoOok]

د. هديل ^_^

يعطيك الف عاااااافية يارب .. ماشالله عليك ذكرتِ التفاصيل
العشم فيكِ والله وزي ما اتوقعنا منك يا عسل

ربي يسعدك ..

وبالنسبة للمصطلحات .. ممكن اذا تقدري تحملي الملزمة اللي اعطوكم هي بالدورة
عشان يستفيدوا منها الأعضاء هنا

يصير بالإضافة للملزمة اللي عملناها ..
وهنا رابط تحميلها
http://www.mediafire.com/?hnl2hqcc18jaxfm


~


و كـ مقدمة لمادة الـ Dental Anatomy لقيت عندي ملف مختصر لأهم التعاريف والمعلومات مُجمعة من الفصل الأول في المادة

يصير اتطلعوا عليه .. بالنسبة للصور عشان يسهلكم فهم المصطلحات ..
تقدروا تدخلوا موضوع المعلومات العامة عن الأسنان بالقسم
أو تبحثوا عنها بالنت ..

وهذا رابط التحميل
http://www.mediafire.com/?kw6wrtmuhd85887

دفعة 07 عملوه .. أنا فقط أعدت تنسيقه من جديد

بالتوفيق ..

وشكرا مره تانية ليكِ هدولا ^_^

[hadeel a]

Dr~NanoOok: الله يعافيكي يا عسل و الله أحرجتيني بكلامك الحلو و إن شاء الله حأحمل المصطلحات اللي في الملزمه وشكرا على الأشياء الحلوه اللي أضفتيها ماشاءالله دايما نستفيد منك .

[Glamor Mada]

مشكوره الله يجزاكي الف خير .. ويجعله في ميزان حسناتك :)