طبختي البطلة بالصور,,

[Alaa Al ghamdi]

بسم الله الرحمن الرحيم


هذي الله يسلمكم اكلة غربية (امريكيه ) اسمها فطيرة الراعي او Shepherd's Pie (شيبرد باي)
سبب التسمية انو زمان الرعاه كانو بعد يوم عمل متعب ومضني يجمعو كل الخضار اللي عندهم
ويحطوها مع اللحم المفروم فصار اسمها فطيرة الراعي,,

المهم
انا شفتها في اكثر من برنامج اجنبي وعلى مواقع اجنبيه

تقدري يابطله انتي وهيا تحطي اي نوع خضار
خصوصا البازلا (بعض الغرب يكتفو بس بالبازلا)
تقدري تحطي كوسا وجزر وذرة
اللي تحبيه

اذا تعرفو كيس الخضار المجمد اللي يجي فيه كل الانواع تقدرو تستعملوه

انا بس اكتفيت بالجزر لاني مااحب الانواع الثانيه وخصوصا البازلا


وبالنسبة للحم المفروم سويت طريقتي انا مو طريقتهم <<حقتي احلى

استعملها في كل شي حتى المكرونة بشاميل


المهم مااطول عليكم زياده اخليكم مع المقادير وطريقة العمل

هنا المقادير بالصور





4حبات بطاطس مقطعه عشان تستوي بسرعه

لحمة مفرومة
علبة قشطة (التاج او قيمر اللي تحبوه)

جزرتين مقطعه مربعات او حلقات (او زي ماقلتلكم اي نوع خضار بالكمية اللي تفضلوها)


بصلة كبيرة مفرومة او بصلتين صغيرة
تقريبا 3حبات طماطم معصورة اذا كانت كبيرة مرة حطي حبتين كفاية

جبنة موزاريلا

جبنة تشيدر
مكعب ماجي <<نسيت اصورو
ماصورت البهارات لانو تقدري تحطي اي نوع تبغيه
انا حتى بهارات الباربكيو حطيتها هع
اي شي بس لاتحطو ملح كفايه ملح الماجي


دحين نجي للطريقة


اول شي حطي البطاطس تنسلق في قدر

وبعدين في قلاية ثانيه حطي شوية زيت وحطي عليه البصل الين مايذبل

بعدين حطي اللحم المفروم الين ماتنشف مويتو
وتحسيه قرب يستوي يصير لونو فاتح شوية

بعدين حطي الماجي +الفلفل الاسود والبهارات اللي تحبيها

قلبيها شوية بعدين حطي الطماطم المعصورة وحطي تقريبا ملعقتين اكل صلصه
قلبيها بعدين حطي الجزر والخضار اللي اخترتيها

وقفلي عليها ورخي النار الين ماتحسيها تسبكت او استوت
يعني خلاص جهزت ومويتها نشفت زي في الصورة هنا

">



انا مااحبها تكون جوسي مرة او يعني مااحبها تكون سايلة مرة
مع انهم الغرب يخلوها سايله شوية,,يحطو مرق انا مااحط

المهم

لمن يخلص اللحم
طفي على البطاطس بتكون انسلقت براحتها عشان يسهل عليكم انكم تهرسوها

صفو الموية منهاوحطوها بصحن

وابدأو اهرسوها بالشوكة او بملعقه

بعدين حطي فوقها شوية فلفل اسود

وشوية ملح مو مرة كثير

وعلبه القشطة(ممكن تحطو حليب بدل القشطة بس انا حبيتها تكون متماسكة او تقدر تحطو قشط خفق )
حتصير زي كذا







بعد ماتخلص البطاطس الهروسة

جيبو الصينيه حقت الفرن

حطو شوييييية بطاطس
تقريبا 3ملاعق بس

افردوها يعني لاتكثرو

بعدين حطو اللحم المفروم كلو فوقها
زي كذا






ووزعوه كويس
بعدين بقية البطاطس

حطوه فوقها
هذي طريقتي احط بملعقه كل البطاطس قبل لاافردها
حطيها قريبة جمب بعض عشان يسهل عليك الفرد وماتطلع اللحمة وانتي تفردي







بعد ماتخلصي حطيها في الفرن تتحمر من فوق بعدين حطي فوقها جبنة موزاريلا مبشورة وجبنة تشيدر مبشورة او اي نوع تحبوه

ورجعيها بس تذوب ولعيها

طبعا هي تتاكل اول ماتطلع من الفرن تكون حارة

ووقت الغرف ماحتكون متماسكة حتصير زي الايدام عادي هي كذا

بس انا غرفت حقتي لمن بردت وصارت متماسكة يعني اذا وحده فكرت تسويها لاتستغرب

هذي اول ماخرجت من الفرن




وهذا صحني





وبس
ترى هيه سهله وسريعه بس مع الشرح والوصف تطول


يارب تكون عجبتكم طبختي القميلة

[طالبة.مجتهدة]

يمي يمي
شكلهاااا مررررة لزييييييز
الاء







تسلم يدك بجربها...
الف مبروووك الاشراف

[سكووت]

اختي الصغننة ..مرررررررة الاكلة كانت دمار حسيت اني من الريف بامريكا يوم ذقتها <<براا
بس مرة خطيرة وطعمة ..بس نسيتي تذكري شي موووهيم مرة مرة
اني دعمتك اثناء الطبخة بابتسامة مني يوم صحيت متاخر فاكرة ولا افكرك ,,

[طالبة.مجتهدة]

^^^^
يا زين الدعم والله
خخخخخخخخخ

[مني يغار الورد]

ماشاء الله تبااااااااارك الله شكلها وااااااااااااااو
من يد مانعدمها ربي يعطيك العافية
شكرا سكوت ع الابتسامة اللي دعمتي فيها الو هههههههههههههههههه
يسعدكم ربي
:)

[Alaa Al ghamdi]

المشاركة الأصلية كتبت بواسطة طالبة.مجتهدة يمي يمي شكلهاااا مررررة لزييييييز الاء تسلم يدك بجربها... الف مبروووك الاشراف

الله يسلمك ياعسل,,

المشاركة الأصلية كتبت بواسطة مني يغار الورد ماشاء الله تبااااااااارك الله شكلها وااااااااااااااو من يد مانعدمها ربي يعطيك العافية شكرا سكوت ع الابتسامة اللي دعمتي فيها الو هههههههههههههههههه يسعدكم ربي :)

ويسعدك يارب,,

المشاركة الأصلية كتبت بواسطة سكووت اختي الصغننة ..مرررررررة الاكلة كانت دمار حسيت اني من الريف بامريكا يوم ذقتها <<براا بس مرة خطيرة وطعمة ..بس نسيتي تذكري شي موووهيم مرة مرة اني دعمتك اثناء الطبخة بابتسامة مني يوم صحيت متاخر فاكرة ولا افكرك ,,

الريف مرة وحده هههههههه
بالنسبة للابتسامه فكريني هع

[Glamor Mada]

يا سلام عالطبخه السهله .. والله مره سهله حجربها
بس جالس اتخيل طعمها مدري كيف بيكون ههههههههه
ثانكيوووو سو متش ^^

[DANoOo.R]

امممم يمي يمي مرررره نايس وسهله
تسلم يدك ألوو^^
وبالنسبه لابتسامة سكووت اكيد خلت الطبخه أحلى خخخ

[بستانة]

ماشاء الله مره روعة تسلم اناملك
اختك بستانة

[ستأتي أيامي]

حركااااااااااااااات والله شكلها مره خطير ..
ماشاء الله تبارك الله ..

كأني سمعت عنها الاسم مو غريب ..

وصار انتي أخت سكووت ..

الله يخليكم لبعض ..

تشكراتي الجزيلة ,,