تجربة طالب من دفعة 13 مستواه متوسط دخل هندسه

[khalid al]

السلام عليكم ورحمة الله وبركاته

كيفكم ان شاء الله بخير

انا سيئ في كتابة المقدمه احب ادخل في الموضوع على طول فاعذروني

من بداية ظهور التسكين كنت حاب اكتب هذا الموضوع لاكن كنت مشغول وخايف بخصوص موضوع معين بعدين اقولكم وش هو في النهاية.. هذا هو سبب تاخري عن كتابة هذا الموضوع المختصر والمفيد ان شاء الله بس لو تقراه كويس

انا شفت كم طالب جديد من دفعة 14 حايس ومن حقه لان قبل سنه بضبط كنت مثله وكانت طموحي ادخل هندسه حتى لو اتعاطى ههههههههههههه

انا واعوذ بكلمة انا مستواي متووسط + حظ حلو هههههه وماشيه اموري ولله الحمد

اولا بقولكم الشعور والتجربه باول سبوعين تقريبا من الدراسه + وبعدها بقولكم وش تسوون والنصايح الي مريت فيها

انا بديت بالمستوى الاول في الانجلش
اول اسبوع طبعا راح تدرس انقلش بس اما باقي المواد بتبدا بدراستها بالاسبوع الثاني ويمكن كم ماده يجي دكتورها بالاسبوع الثالث (بيقولكم كان في لخبطه في الشعب وتلاقيه كان متكي في احد الدول الاوروبيه ههههههههه )
لاني اذكر مادة الرياضيات ومهارة الاتصال بدينا فيها بنصف الاسبوع الثالث وكمان استاذ مهارة الاتصال تغير 3 مرات هههههه

نرجع لموضوعنا اول سبوع راح تدرس انقلش فقط وباول يوم الي هو السبت اعتقد مافي شيء يوم الاحد راح تجي بجدولك وتدور المبنى والقاعه وكل طالب يسال الثاني ومحد يدري وينها هههههه ولما تحصل قاعة بتدخل بتحصل الطلاب جالسين متفائلين وتحصل كم واحد يشارك مع الدكتور كلامه انقلش وشوية هياط وانت تنفجع تقول والله شكلهم دوافير بضيع بينهم(وبنهايه تحصل ذولا مايكملون ترم الا وسحبو ولا حاملين كم ماده بينما انت ناجح بكل المواد) والدكتور يسالك وش اسمك تجاوبه وتجلس راح تنفجع اول شيء ان الدكتور مايتكلم الا انقلش ولا يرد عليك الا انقلش واذا كلمته بالعربي ماراح يفهم واذا كان الدكتور جنسيته عربيه ماراح يرد عليك ويسوي نفسه مافهم
هنا تنصدم وتجي اليوم الثاني ونفس الموال ينتهي الاسبوع الاول وكل ماتتذكر الانقلش بيجي فيك خوف لان بمجرد ماتدخل القاعه مافي ولا كلمه عربيه الا مع خويك وكمان الدكتور يقولك لاتتكلم معاه عربي (هذي حركه من الدكاتره عشان يعودونكم ) بس بصراحه كلهم اخلاق ومحترمين يعني افضل مدرس خلقا بالثانوي تاكد بانه اسوء دكتور انقلش بالجامعه

سبوع سبوعين تبدا تدريجيا تخف الصدمه مايمر شهر الا خلاص متعود وصررت تفهم عليهم كم كلمه مايمر الاختبار الدوري الاول الا وصرت هاه تاخذ وتعطي معه وعلى فكرة لغتي الانجليزي كانت من ضعيفه الى متوسط لاكن تحسسن مع السنه التحضيريه اقدر اقول صارت متوسطه .. وملاحظه لاحظتها مستوى الطالب بالانقلش لاينعكس على باقي المواد اعرف كثير طلاب ممتازين بالانقلش جايبين في التسعين ولاكن بالمواد الثانيه في السبعينات وانا عكسهم بضبط وراح تلاحظها بنفسك .

تخلص من هذي العقده وتصير تشوف الانجلش عادي بس انه ممل شوي لان وقته طويل وكرف لاكن اذا فعلا كنت تبغى تتعلم لغه راح تستفيد جدااا اكثر من أي معهد برسوم

بالنسبه للمواد الثانيه كلها كانك بالثانوي وكانك تدرسها بالعربي لان الدكتور يتكلم عربي معكم لاكن بكلمات ورموز وارقام انجليزيه ومصطلحات جديده تحفظها بنفسك مع الوقت لا تشيل هم ابدا مثل بالفيزياء speed و acceleration وكذا والدكاتره كلهم يتكلمو عربي بهذي المواد (طبعا باستثناء مهارات الاتصال والحاسب لانها عربيه من الاساس فاكيد يتكلمو عربي خالص) والشعور بيكون عادي بعكس الانجلش لان المود فيه جديد عليكم

خلصنا من التجربه الاولى والحاله الي بتمر فيها اهم شيء انك تعرفها وتعرف انه بالكثير اسبوعين وتجتاز الشعور هذا والخبطه وتصير طبيعي وتزبط امورك وتبدا تركز بالمذاكره.

الحين نصايحي لكل ماده وش تسوي فيها :

اول شيء الانقلش : المستوى الاول لايدخل في المعدل بس ذاكره بشكل اسبوعي وشوف نقاط ضعفك وحلها وتخطاها ولا تهتم بالغلط لانه مو داخل بالمعدل ابدا المهم انك تصحح اخطاء البديهيه مثلا تلخبط بين is و are ولا كم كلمه سهله ماتعرف الاسبيلنق حقها وهكذا .. المستوى الثاني طبعا داخل بالمعدل تابع الدكتور اول باول وذاكرها بكل يوم او يومين وراجع التمارين والمستوى الثالث والرابع نفس الطريقه لاكن لو حسيت انك ماجبت درجه حلوه في المستوى الثاني يعن مو فوق 85 عليك بالمدرس الخصوصي راح يساعدك كثير ومع مذاكرتك ومتابعتك بتجيب درجه حلوه صدقني .

تجربتي : باختصار شديد كنت مهمل الانقلش وغياباتي كثير وكابرت ولاخذت مدرس خصوصي بنهايه درجاتي بالمستوى الثاني 83 والثالث 75 والرابع 70 .. طيح معدلي جدا

انتبه : من الغياب الغياب الغياب هو الي بينزل مستوااك في الانقلش ولا بتجيب درجات حلوه لاتغيب اكثير من 5 غيابات في المستوى نصيحه (بيقولولك الرسوب من 18 لاكن في الواقع لو جبت من فوق 60 وحتى لو غبت 30 غياب راح تنجح )


ثاني شيء الرياضيات : من غير فلسلفه وكلام طويل عندك خيارين اما تروح لمنسق الماده حمزه ابو جبل وتدرس عنده ولا تغيب وتتابعه اول باول وتذاكر معاه اول باول او تاخذلك المدرس الخصوصي جمال السعدي وتسحب على دكتورك بالجامعه اذا مايحضر اما لو يحضر لازم تحضر عشان التحضير وتمشي على كلام جمال بكل حرف وراح تجيب 100 . (هذي زبدة زبدة الزبده)

تجربتي : دكتوري الرياضيات ماكان يحضر ولا حضرت عنده الا ثلاث مرات فقط وكان عندي الدكتور الخصوصي جمال السعدي وماشي على كل كلمه يقولها وكل اسبوع يوم الخميس اذاكر من المذاكرات الي يعطينا هيا والي يشرح منها ايضا والاسئله الي يعطيني هيا .. النتيجه : جبت 88 بالرياضات (طبعا هذا مع اهمالي ماكنت اذاكر اول باول ااخرها شوي )

انتبه : لاتشتت نفسك ابدا عندك خيار من الخيارين الي اعطيتك غيرها ودع الدرجه الحلوه في الرياضيات الا اذا كان عندك طريقه اخرى والله اعلم عنك


ثالث شيء الفيزياء : الفيزياء للاسف عندك خيار واحد لاغير انك تاخذ مدرس خصوصي وتسحب على ابو الدكتور اذا كان مايحضر اما اذا يحضر لازم تحضر عنده عشان يحضرك ولا يرسبك وعندك الدكتور الخصوصي احمد العربي جدا ممتاز .

تجربتي : نفس الكلام ساحب على الدكتور كنت احضر فقط عشان التحضير واطلع وكنت ماخذ احمد العربي ومتابعه واذاكر من ملخصاته الي يعطينا فققط .. والنتيجه : 90 ولله الحمد هذا ومع صعوبة الفيزياء

انتبه : لاتشتت نفسك ابدا ابدا اهم شيء لاتمشي على كلام دكتور الجامعه بقولك هذا بيجي وهذا مابيجي وتنصدم بورقة الاسئله ان ماحصل ولا شيء من كلامه وهذا من تجربتي الشخصيه .


الكيمياء : والكيمياء ايضا نفس الطبخه اسحب على الدكتور الا اذا كان يحضر احضر من اجل التحضير فقط وخذلك المدرس خصوصي السيد ابراهيم وهذا الدكتور جدا اخلاق ماشاء الله ويفهم ويرتب امورك والكيمياء اكثر الاقسام الي تحس حتى منسق الماده يقول كلام ويجيك بالاختبار كلام اخر فعشان كذا اعتمد على الدكتور الخصوصي الي قلتلك عليه لانه بيشرحلك المنهج كامل ومكمل وراح تكون مستعد لاي اختبار كيمياء 110 وهذا الكلام ينطبق على الفيزياء والرياضيات.

تجربتي : سحبت على الدكتور ولانه ماكان يحضر وزميلي علمني والله اني ماشفت وجهه حتى ولا اعرفه حتى ولا قد حضرت عنده ولا محاضره ومشيت مع دكتوري الخاص الله يوفقه السيد ابراهيم لاكن لانها كانت بترم الثاني بصراحه اهمملت وااخرت المذاكره وراكمتها لاكن شديت نفسي بالنهايه والنتيجه : 85

انتبه : من التشتييت وامشي على كلامي وانتبه من كلام الطلاب وطنشهم وكانك ماتسمع لانهم بيخفونك فقط


الاحياء : ايه يالاحياء هذي اسوء ماده درستها بصراحه مالي تجربه فيها نعم لاني بكل اختصار ماكنت اذاكرها مرره كنت اذاكر الثلاثين السؤال الي قبل كل اختبار ويجي منها 10 اسئله كنت مهملها جداا وكان التحضير بورقه يعني زميلي يحضرني فكنت ماحضرها ولا اذاكرها ماعدا الثلاثين سؤال الي يعطونا اكيد بتسالون ليه مجتهد بكل المواد الي هذي الماده لاني كنت ناوي هندسه والاحياء مو داخله بالنسبه خاصه لكية الهندسه طبعا هذا جداا غبااء لانها طيحت نسبتي العامه مرره .. نصيحتي طبعا انك تذاكرها السلايدات فقط + والثلاثين سؤال وتذاكرها اول باول ولا تسوي غلطتي الي كادت انها تبعدني عن كلية الهندسه ذاكرها اول باول وراح تجيب الفل مارك لان الشغله سهله بس حفظ مايبغالها معادلات صح كثير بس تقدر اذا ذاكرتها اول باول تجيب الفل مارك؟

تجربي : ماعندي تجربه فيها مثل ماذكرت وسوي الي قلتلك عليه ذاكرها اول باول السلايدات والثلاثين سؤال فقط... النتيجه المخيبه للأمال : 65 :(:(

انتبه : بكل بساطه انتبه تكرر غلطتي .


الاحصاء : الاحصاء هي الماده الاسهل من المواد العلميه الي فوق عندك خيارين اما تروح عند منسق الماده داغستاني وتشتري الكتاب حقها صغير وتتابعه وتذاكر معه اول باول وانا كنت عنده او تاخذلك جمال السعدي يدرس احصاء ايضا .

تجربتي : انا كنت عند داغستاني لاكن خفت اكثر لاني ماضمن دكاترة الجامعه اخذت ايضا جمال السعدي بصراحه كنت احضر عند الداغستاني عشان يحضر فقط ولاكن استفيد ايضا معه كنت اذاكر من ملخص الدكتور جمال السعدي فقط ولاكن للامانه تتقدر تستغني عن الدكتور الخصوصي في الاحصاء اذا كنت تدرس عند داغستاني لانه يففهم جداا واسئلته جدا جدا سهله يجيب الي اسهل شيء لاكن حرصا مني اخذت ايضا دكتور خصوصي لاني ماكنت اعرف الطبخه .. النتيجه : 92 ولله الحمد ( هذا وانا بصراحه اهملتها كنت اذاكرها قليل واي كلام)

انتبه : انتبه انك تدرس عند غير الداغستاني وان درست عند غيره مافي مشكله لاكن هنا يصير لازم تاخذ الدكتور الخصوصي جمال السعدي وتشتغل معاه فقط وتتابع معاه فقط واضمن لك فوق التسعين بالراحه.


مهارات الاتصال : طبعا الماده عربي كلها اسهل اسهل ماده في الحياه مثل الوطنيه فقط لاتغيب ابدا احضر اول باول لان فيها DN محقق لا محاله (دي ان يعني اذا تعديت عدد معين في الغيابات لهذي الماده تررسب حتى لو جبت فل مارك) فقط احضر وسوي الواجبات الي يعطيك وكلها سهله وقبل الاختبار بيومين اقراها قرايه مع تركيز وبس لان الاختبار سههل .

تجربتي :(طبعا هو كتاب واحد تشتريه وتذاكر منه فقط ) بعد كل درس اقراه قرايه مع تركيز وفقط وقبل الاختبار اقرا الجزء الي داخل بالاختبار مره ومرتين وثلاث ومع حفظ بعض النقاط وتدخل الاختبار وتجيب درجه عاليه .. النتيجه : 95 ولله الحمد

انتبه : انتبه من الغياب ابدا لاتغيب وسوي الي قلتلك عليه. (نصيحه حاول تروح عند استاذ سعودي لانه يدفك )


الحاسب : طبعا الماده عربي كلها قبل لاافهمك الاستاذ راح يعلمك كل حااجه الحاسب فيه اختبار عملي تافهه كله الوورد وكيف تغير الخلفيه وو الاكسل وراح يساعدك فيه واختبار نظري سهل المهم انك ماتغيب مثل مهارات الاتصلال

تجربتي :(طبعا هو كتاب واحد فقط تشتريه وتذاكر منه( اذاكر من الكتاب بعد كل درس اقراه وقبل الاختبار اقرا الجزء المحدد الي داخل بالاختبار وتدخل تحل بالاختبار لانه سهل نوعا ما بس طبعا اصعب من مهارة الاتصال وبامانه يبغالك تركز فيه خاصة بالاختبار النظري لانه يجيب لك بعض الاحيان اسئله تعصر دماغك وهي سهله فذاكرها بتركيز يعني اقراها بتركيز اكثر والاختبار العملي قبل الاختبار بيوم شوف المواضيع الي حددلك هيا والبرامج الي بتشتغل فيها وروح طبقها من الكتاب للكمبيوترك طبقها مره ومرتين لين ماتفهم كل خطوه كيف تسويها وبس وتوكل على الله ... النتيجه: 93 ولله الحمد

انتبه : من الغيااب لاتغيب لانه لو غبت كثير وتعديت الغياب المسموح راح تاخذ DN مؤكد وكمان زي مهارة الاتصال حاول تروح عند استاذ سعودي يعني لو حطوك عند اجنبي مصري ولا تونسي حاول تنقل لاي استاذ سعودي لانه هاه يساعدك بالعملي ويدفك شويات .


مصطلح يمكن ماتعرفوه الي هو ( منسق الماده ): يعني الدكتور الي يحط اسئلة الاختبار والي الماده تحت تصرفه .


بخصوص الدكاتره الخصوصين الي رحتلهم وكلهم من افضل الدكاتره بحط اساميهم هنا عشان لاتلخبط (للامانه ذولا من تجاربي الشخصيه وانتو شايفين نتايجي فعشان كذا اضمن لك لاتروح الا عندهم)

جمال السعدي : رياضيات
السيد ابراهيم : كيمياء
احمد العربي : فيزياء .. وعندك ايضا اشرف بركات ممتاز لاكن ماجربته

طبعا ذولا المدرسين الي ذكرت اساميهم تقدر تاخذ ارقامهم وتحجز عندهم من مكتبة 2000 بحي السليمانيه

__________________________________________________ _______

بكذا موضوعي انتهى

لاكن الحين بقولكم وش الي اخرني ماكتب الموضوع انا انقبلت بكلية الهندسه موازي وغبت عن المنتدى فتره بعد اعلان نتائج التسكين ولما رجعت ادخل عليه قبل كم يوم تفاجات كم طالب كانو زيي هندسه وموازي وراحو الجامعه حولوهم الى كليات اخرى بسبب ان موازي الهندسه يتسع ل 60 طالب فقط وحصل لخبطه وبدو يشيلو الي تحت انا مره انفجعت وشيكت على الاودس حصلت لا خلاص حطوني هندسه موازي اكيد وسالت ان النتائج صارت موكده ومثبته الي هندسه هندسه والي بكلية اخرها خلاص هو فيها وبكذا تطممنت وقدرت اكتب الموضوع مع انه بقي في خوف شوي مابتطمن الا لما اشوف الجدول هههههههه



اتمنى والله من قلبي انكم استفدتو من الموضوع ولاحبيت يكون فيه كلمات رسميه زي مايقولو الي بقلبي وبتجربتي بكل صدق وامانه كتبتها لكم مابغى شكرا ابغاك تستفيد من طالب مستواه متوسط قدر يدخل بالهندسه وانك تتفادى اخطائي وتمشي على نصائحي وتجربتي اضمن لك بكل امانه الطب مو الهندسه

وعلى فكره انا جايب بالثانوي 95 والقدرات 73 والتحصيلي 77

يعني طالب مستواه متوسط وقدرت ادخل الهندسه ولله الحمد استفييد من تجربتي عشان تروح للي تبغاه نصيحه لك

واسسف طولت عليكم لاكن احب اوصل فكرتي كاامله

والسلام خير الختاام

[R_D]

موضوع جميييل جدا اخويا ياخالد !! و ان شاء الله يستفيدوا منك دفعة 14 .....

تبى الصراحة انا بقرا الموضوع حقك و احس انو انا اللي كتبت الموضوع لانو نظامي في الجامعة كان زيك بنسبة 99.9 !!!


لكن الحمدلله قدرنا نتخصص ولله الحمد اللي نبغاه و عقبال اللي بعدنا ان شاء الله !

[YSS]

انا اسميها مغامرات التحضيري

ربي يوفقك ف الهندسة يا بش مهندس

[khalid al]

ويوفقك يارب

[picasso]

المشاركة الأصلية كتبت بواسطة khalid al (بيقولولك الرسوب من 18 لاكن في الواقع لو جبت من فوق 60 وحتى لو غبت 30 غياب راح تنجح )

غير صحيح يعطى حرمان dn بمنتصف الجبهة خخخ
تعتمد على الدكتور نفسه ، البعض يتخطى الغيابات ويمشي
لكن نظاميا يعطى حرمان واكثر الاجانب نظامييا
وموقف يا بش مهندس

[Alaa asiri]

الله يعطيك العافيه ويسعدك ويحققلك الي تتمناه..
موضوع جداً جميل..

[ismart]

معليش اخوي خالد ع السؤال اللقوفي بس كم معدلك في الترم الاول وكم صار في الترم الثاني
خويي من دفعتكم معدله 4.4 من 5 وما قبلوه وموزونته 83 فرع الشمال ؟؟

[R_D]

معليش على التدخل بس مااتوقع تصير موزونته 83 و معدله 4.4 لانو انا معدلي زيه

بس موزونتي 87.93 !!!!

[ismart]

المشاركة الأصلية كتبت بواسطة r_d معليش على التدخل بس مااتوقع تصير موزونته 83 و معدله 4.4 لانو انا معدلي زيه بس موزونتي 87.93 !!!!

ماشاء الله بس اعتقد الموزونه مالها صلاح بالمعدل يمكن يكون مخبص هوا في ماده نزلت عليه الموزونه والمواد الثانيه كويسه فمعدله طلع حلو

[R_D]

المشاركة الأصلية كتبت بواسطة ismart ماشاء الله بس اعتقد الموزونه مالها صلاح بالمعدل يمكن يكون مخبص هوا في ماده نزلت عليه الموزونه والمواد الثانيه كويسه فمعدله طلع حلو

ممكن برضو بس ماعتقد يوصل الفرق ل 5 نسب ممكن اثنين او ثلاثة بالكثير !!