هل اكتفي بالملخصات دون الكتب؟

[sesoo]

السلام عليكم ورحمة الله وبركاته

انا طالب انتساب وهدا اول ترم لي .... سجلت متأخر والحين متوهق ..

اصحاب الخبره افيدوني جزاكم الله خير ...

هل اكتفي في مداكرتي بالملخصات دون الكتب؟؟

مع العلم في المكتبه اقنعني بالملخصات دون الكتب وانا ما اقتنعت بس مافي وقت اختم الكتب

[الشمالي....]

عليكم السلام هلا فيك اخوي
الكتب يبيلها وقت واكثرها كلام حشو..
اما الملخصات تختصر لك المنهج والوقت وغالبية الاساله الامتحانات
منها وركز على اساله الامتحانات تحصلها باخر الملخصات وبالمنتدى
انا لي سنتين على الطريقه والحمد لله اموري ماشيه

[بنت ناس وقلبي ألماس]

وعليكم السلام ورحمة الله وبركاته

تم نقل الموضوع للقسم المناسب

[تجربة انسان]

كل شيء جديد في جديد.
ياخوان اي شخص اختباره عن طريق الحاسب اللكتروني :::: مانصحه بالملخصات.
في خطة ب الترم الماضي مهارات التفكير ووسائل الاتصال اعتمدت على الكتب وكانت النتائج رائعة
واعتمدت في الاحصاء على شرح عبدالله الغامدي باليوتيوب سهل وممتتع وجبت درجة زينه شامل
وكامل الله يوفقه


بس خطة أ في هالترم اعتمدت على الملخصات وكانت النتائج ماهي زينه ابدا ولاتقارن بنتائج خطة ب ودمرت المعدل واحتمال فيه حمل مواد
اللغة والثقافة لاتعتمد على الملخصات نهائيا وذاكر من الكتاب. الرياضيات استخدم شرح كمان الغامدي .
الحاسب ركز على الاوفيس 2013 معظم الاسئلة منه الورد اكسل البوربونت وبداية الكتاب فيما يخص نظام التشغيل
معظم الاسئلة ماهي بالملخصات وخاصة العربي 101 والثقافة الاسلامية ولا كانت في اسئلة الاعوام السابقة كل شيء جديد في جديد.
بل لم تتطرق الى اسئلة العام الماضي . مجرد نصيحة من واقع وتجربة خلال الايام الماضية

اليوم بالعربي مثال جانا تستخدم اللغة العربية يعني حروفها في عدة لغات هذي معلومه سهلة ماهي بالملخص الفارسية والاردو
كمان سيرة الشاعر مثل ابو فراس ماتطرق لها الملخص وجاء منها اسئلة هل شارك ابو فراس في الحروب مع سيف الدولة
بعض ابيات الشعر ماهي مكتوبة قصيدة ابن حزم الربيع جاء منها كم سؤال ذكر بيت الشعر التالي للشاعر يعني لازم تكون عارف قصيدة كل شاعر
نصيحة خليك على الكتاب لو بس قراءة واطلاع افضل من ملخص يحولك خارج التغطية
امنياتي للجميع بالتوفيق

[majed_kau]

تجربة انسان جميع ما ذكرته موجود في ملخصات ابن سينا
بالاضافة انك لازم تتابع شرح معلم المادة بالبلاك بورد وتطبع بعض الاضافات برنت سكرين
وهذا ما يقلل من اهميه الكتب . ولكن من تجربة ملخصات ابن سيناء رائعه وانصح فيها ..

بالتوفيق للجميع ..

[Mnadi]

والله المذاكرة والقراءة في الكتب فائدة عظيمة
وعلم مستديم

[تجربة انسان]

والله وانا اخوك ماندري من ملخصاته الصحيحة انا قلت تجربتي المريرة ولن اكرر تجربة الملخصات وراح اشتري الكتب لو كلفتني دبل الرسوم ونصيحتي الي يبي معدل ممتاز يتجاهل شيء اسمه ملخص اما من يريد فقط ان ينجح من اجل النجاح دون الاهتمام بالمعدل . مع ملاحظة ان الملخص تعتمد على فهم من عمل الملخص بعد ماطلع على الكتاب يتجاهل بعض المعلومات التي علمها من خلال اطلاعه بينما من يعتمد على الملخص قد يكون يجهلها مثال سؤال اللغه العربية تستخدم في عدة لغات سؤال سهل بس لما تجيك خيارات وانت مامرت فيك المعلومة يصبح سؤال صعب لانك ماتعلم اضافة لابيات بعض القصائد من القائل الشخص مومطلوب منه الحفظ ولذلك مايركز على حفظها كمان معلومة عن سيرة ابو فراس ومشاركته في الحروب ماتطرق لها الملخص ولم يتطرق لسيرة اي شاعر . انا اتكلم عن الملخص الي حصلت عليه من خوارزم.
اما بخصوص المحاضرات انا وقتي والله بين العمل والاسرة واعتمد على ذاتي في دراستي كون اي شيء بالكتاب من السهل فهمه عند البحث عن التوضيح الدقيق قد يستعين الشخص باهل الخبرة من اهل الاختصاص وتجربتي في الفصل الاول على الكتب هي دافعي الاول والاخير لكتابة ماسبق . اسال الله لي ولكم بالتوفيق وسامحونا اذا كان ماكتبت ضد بعض قناعتكم فهي وجهة نظر شخصية من واقع تجربة والله المستعان

[هلالي منتسب]

كلام سليم اخوي تجربه انسان
الملخصات تخليك تآكل مقلب
وع بالك انك ذاكرت
وتنصدم يوم الاختبار بمنهج مختلف

افضل طريقه وعن تجربتي الشخصيه
انك تطلع ع الكتاب
وتكتب الاشياء اللي مهمه ورئيسيه
في مذكره خارجيه
بعدها تذاكر وانت مطمن بحول الله وقوته .....