تجربتي لأول ترم هندسة شمال جدة للفصل الدراسي الأول 1435هـ

[aboowoody]

بسم الله الرحمن الرحيم

اليوم بشرح لكم تجربي عن الهندسة الفصل الأول في فرع شمال جدة
رح أتكلم عن كل مادة وعن دكتورها وعن اختباراتها وعن تقسيم درجاتها


1- اقتصاد هندسي
مادة سهلة جدا أسهل مادة من مواد الهندسة تتكلم عن الربح والمقارنة بين المنتجات
طبعا المادة مالها إلا دكتور واحد واسمه منذر (أردني)
المنهج دسم جدا وفيه لف ودوران لكنه سهل
والدكتور كان مسهلة لنا ما يجيب في الاختبار إلا اللي شرحه
تقسيم الدرجات 20 دوري دوري أول
(3 أسئلة فقط سؤالين 7 درجات + 7 درجات وسؤال 6 درجات )
وزيها للدوري الثاني
و20 درجة على الحضور والمشاركة ( كلنا أعطانا 20 )
ونهائي 40 درجة

-------------------------------


2-علم المواد
احنا أول دفعة تدرسها في أول سنة (أصلا المادة للمتخصصين)
المادة فيها شوية معلومات عن كيمياء 110 و كمان تتكلم عن المادة والتغيرات اللي ممكن تصير عليها
دكتورها اسمه محمد زين العابدين ( باكستاني ) وكمان لها دكتور ثاني ( مصري)
الباكستاني يدرس الطلاب المستجدين والمصري للمتخصصين
بداية الترم ما كنا نبغا الباكستاني لأنه ما يعرف عربي ولهجته الانجليزية شبه معدومة لكنه فاهم اللغة
الآدمي حقاني في الدرجات يشرح من سلايدات هوه سواها
تقريبا كان كل دوري 6 لكتشرات (محاضرات )
وكل لكتشر (محاضرة) من 6 إلى 12 سلايد (شريحة )
اختباراته سهلة نسبيا 95% من السلايدات و ال 5% الباقية من فهمك
يبغالك تحفظ السلايد أكثر من اسمك لأنه ما يرضى انك تنقص ولا حاجة حتى ولو كانت كلمة وحدة وكمان يبغالك تحفظ الرسومات اللي في السلايدات اللي يقلكم عليها واللي يركز عليها في المحاضرة
والمادة لها واجبين في الترم كل واجب 10 درجات
الواجب الأول عبارة عن رسم و الواجب الثاني يطلب منك انك تكتب كم مسألة بالحل حقها طبعا و بالنص وكمان لا تنسى تكتب القانون و أي رسمه تتعلق بالمسألة (المسائل من الكتاب الرئيسي للمادة )
توزيع الدرجات 20 دوري أول + 20 دوري ثاني + 20 واجبين + 40 نهائي

---------------------------


3- استاتيكا
هذي المادة اسوأ مادة من حيث الدرجات
المادة تتكلم عن القوى وتحليل القوى والقوى الخارجية والعزوم
دكتورها اسمه محمد عبدالفضيل ( مصري )
شرحه متوسط ( مو ذاك الزود ) يعاملك على أساس انك ماخذ المادة من قبل
يشرح من الكتاب الرئيسي للمادة الكتاب مرتب وشامل كل الأفكار اللي ممكن تتخيلها
طبعا فيه مسائل تو دايمنشن (2d ) و مسائل ثري دايمنشن (3d )
هوه يركز على مسال (3d) بنسبة 75 % من أسئلته وهذا السبب في أن الدرجات سيئة
70 % من أسئلة الاختبار من أمثلة الكتاب و 30% يجيبها من برا الكتاب
توزيع الدرجات 10 كوز 1 +20 دوري أول +10 كوز 2 +20 دوري ثاني + 40 نهائي



---------------------------


4- ورش عمل أساسية
هذي أكثر مادة رح تحس فيها انك مهندس
المادة تتكلم عن الأدوات الهندسية وطريقة استخدامها يعيب المادة هو عدم وجود معمل في فرع الشمال فرح تضطروا إنكم تروحون لفرع الجنوب وأحيانا إلى كلية التقنية في جنوب جدة لوجود معامل مجهزة فيها
وممنوع دخول أي معمل / ورشة إلا تكون لابس لاب كوت + سيفتي شوز ( جزمه حماية للقدم )
تقريبا رح تروحوا 4 أو 5 مرات في الترم كل مره رح تأخذون ورشة مختلفة
ورشة خراطة – ورشة برادة – ورشة سباكة – وورشة لحام
كل ورشة رح تسوون عليها تقرير وكل تقرير عليه 10 درجات
التقرير يكون عن الأشياء اللي شفتها واشتغلت عليها في الورشة بالانجليزي
و أنصحك انك تأخذ معك ورقة وقلم كل مره تروح فيه للورشة وتسجل اللي أنت شفته والأشياء اللي رح يقلك عليها المهندس عشان تسهل على نفسك كتابة التقرير
لا مانع انك تجيب معلومات من الانترنت وصور ترفقها معك في التقارير
وفي نهاية الترم تقريبا آخر شهر من الترم رح يطلب منكم الدكتور تقسمون أنفسكم مجموعات
كل مجموعة كحد أقصى 4 طلاب تسوون عرض عن ورشة اخذتوها
طبعا الدكتور هوه اللي يختار موضوع المجموعة و العرض عليه من 30 إلى 40 درجة
واختبار نهائي عليه من 20 إلى 30 درجة
الاختبار من السلايدات اللي يشرح منها المحاضرة بالنص

----------------------



5- فيزياء 202
المادة سهله تقريبا لكن قوانينها كثيرة جدا ممكن أكثر من 100 قانون
دكتورها اسمه خالد (مصري ) الدكتور فلاوي
كانت محاضرتنا يومين في الأسبوع ساعة ونص كل محاضره
هوه كان يأخذها ساعة وحدة بالكثير
وشرحه مو ذاك الزود يقرا من السلايدات حقته بس
وكان المنهج 10 شباتر ممكن المحاضرة الواحدة يأخذ فيها شبتر او شبتر ونص
وإذا كان في اختبارات للسنة التحضيرية ما كان يجينا ويعطينا راحة أسبوع وأحيانا أسبوعين
تقريبا 6 إلى 10 محاضرات في التزم يلغيها
ورح تتفاجأ بعد 10 محاضرات شرح فيها انك مخلص المنهج
توزيع الدرجات
30 درجة دوري (أول 4 شباتر) + 40 درجة نهائي +30 درجة معامل
المعامل رح تطبق فيها اللي أخذته في الفيزياء طبعا المعمل يدرسك فيه معيدين
كل اللي عليك انك تكتب التقارير بالعربي طبعا (تقريبا 8 تقارير في الترم ) وتطبق اللي يشرحه
توزيع درجات المعمل
التقارير عليها 3 درجات فقط + 12 درجة دوري (بعد 5 تجارب ) + 15 درجة اختبار نهائي
الاختبار الدوري نظري والنهائي عملي تطبق فيه تجربة كاملة بالتقرير حقها
طبعا أنت رح تأخذ رقم وكل رقم تجربة مختلفة أنت وحضك
ممكن تجي لك تجربة أنت فاهمها وممكن العكس


------------------



6- معامل فيزياء 281
هذي المادة سهلة جدا اللي رح يدرسك فيه نفس المعيدين اللي في 202
فكرتها نفس فكرة معامل 202 بس يختلف انك رح تطبق فيها تجارب فيزياء 110 اللي أخذتها في التحضيري
توزيع الدرجات
40 دوري (بعد 5 تجارب ) +20 درجة للتقارير + 40 درجة نهائي



------------------------


7- ثقافة اسلامية

طبعا المادة غنية عن التعريف دكتورنا الزهراني نسيت اسمه
بداية الترم يطلب منك واجب عليه 10 درجات
الواجب تختار من بين 4 أشياء
1- تكتب تقرير عن وحده في المنهج
2- تشرح وحد كاملة
3- تسوي عرض باوربوينت عن وحدة
4- تسمع سورة الملك
الدكتور ما ينمل من كلامه اغلب شرحه من خارج الدرس
يأخذ النقاط من الكتاب ويشرح النقطة بأسلوبه الجميل وهذا الشيء اللي يحببك في المحاضرة بزيادة
توزيع الدرجات
25 درجة دوري أول (30 سؤال) + 25 درجة دوري ثاني (30 سؤال )+ 10 درجات واجب
+ 40 درجة نهائي



وأخيرا هذي هيه تجربتي للترم الأول
وان شاء الله رح اذكر تجربتي للترم الثاني في نهاية السنة

وبالتوفيق للجميع