يابنات تفضلوا الله يحيكم

[السوسن البهي]

بسم الله الرحمن الرحيم
السلام عليكم ورحمة الله وبركاته
حبيت اكتب هذا الموضوع عشان تعم الفائدة الجميع

نبدأ :
اتمنى من كل وحدة اخذت اي مادة مع دكتورة أو استاذة تكتب اسمها وشرحها كيف واسلوبها في الدرجات ؟؟؟؟؟؟؟؟

ماث 100 منال النهدي شرحها حلو والدرجات الي فيدها انتي تاخذينها بشطارتك يعني تطها على الكويزات .حاسب100 اسماء الشنقيطي نفس الي قبل بس المشاركة تحطها على شغلك طول الترم مناقشتها في المشروع مرة كويسة فيزياء 101 وجود ديري شرحها ما شاء الله روعة والمشاركة تحطها على الحضور

انجليزي 101 حنان جبر شرحها يجنن بس واجباتها كثيرة

ماث 101 اسيا زقزوق معرووووووووووفة مررررررررررررررررررة شرحها يجنن ومرة تساعد .
بس مااخذت معاها .

ماث 101 اماني سلوم شرحها روعة والمشاركة تحطها على الكويزات .......

هذولا الي اعرفهم اتمنى منكم تتفاعلوا مع الموضوع....

[=--> (أخـــر همـــي) <--=]

والله ياقلبي انا قديييييييييمه بالجامعه يعني انا تبع الخطه القديمه بس بقولك اللي اخذت معهم

ما كان عندنا ماث 100 بس عندي ماث 101 اخذته مع ايمان سمباوه بس الحين ماهي بكليه العلوم خطيييييره وشرحها كان مبسط

فيزياء 101 اخذتها مع دكتوره نجوى عنايه يعني انا اصلا مااحب الفيزياء ولا افهمها

اخذت ماث 202 مع استاذه ريم الحربي تجنــــــــــــــــــن مررره حلوه الماده معاها

مااخذت حاسب 100 لسه

بس اخذت حاسب 201 يعني مقدمه في البرمجه مع لبنى يعني الماده شوي لكم عليها بس كانت استاذه لبنى مبسطتها كثير

تقريبا هذي المواد العامه اللي اذكرها

بالتوفيق للجميع

[mS.rOsY]

اخدت فيزيا 101 مع دكتووره فاتن

انا ماحبها ولا احووب اركز بس كانت ممتااااااازه للامانه ركزت معاها مرتين في الترم كلو حسيتهاجنان البنات كمان كلهم يحبوها ماشالله عليها

انجليزي 100 مع مس هناء شرحها كوويس وتساعد

انجليزي 101 مع مس منى كوووويسه برررضوووو شرحها حلوو


يعطيكي العافيه موضوع مميز

[banoota mnkoosha]

اوكييييييشن ... انا حاتكلم عن المواد العامة بس :-

عربي 101 = هدى البطاطي
عربي 201 = تيسير

>>>>> الاثنين روعة ما شالله عليهم تخرجي حافظة الدرس وفاهمة كل شي واسئلتهم حلوة ... ويعملوا بونس وهفات يحضروا وهفات لأ ,,,

ثقافة 101 = رقية السعودي
ثقافة 201 = تهاني رجب
ثقافة 301 = سعادة الفقي
>>>>>> شرحهم عادي ... وتعاملهم برضو عادي ....

ثقافة 401 = هالة كشميري ,,,, شرحها رائع وتعاملها كمان اروع ....

طبعا الثقافة اهم شي الحضور ... عليه 10 درجات اذا ماكان في تكليف ....


مهارات اتصال = هاجر ابو الخير ... انسانة خطيرة ,,, تحببك في المادة وكانت تخلينا نطبق الدروس مرة اتبسط معاها واحيانا تحضر واحيانا لأ .. بس الحلو تحضر اخر المحاضرة ,,,

انجليزي 101 = امل الجارد
انجليزي 201 = امنة الشافعي
>>>> جيييييييييييدين ,,, بس يحاسبو عالحضور بالثانية ويعملوا كويزات قبل الاختبارات ومراجعة وكل شي ,,,,

ماث 100 = لمياء لقحطاني ... الله يسعدها يارب .. من جد تاسيس رائع
ماث 101 = اسيا زقزوق ... برضو رائعة ... تخرجي من المحاضرة فاهمة كل شي بس ترجعي تحلي بيدك....

فيزيا 100 = كورس الفيزيا ( وجود ديري ) وكورس الكيميا ( امل الحسيني )
>>>> برضو مرة كويسين وشرحهم حلو ...خاصة الفيزيا لاني اكره دي المادة بس الحمدلله فهمتها ما يحضروا دايما .. بس يخلو الحضور كبونس للبنات ,,,

فيزيا 101= ما اخدتها لين دحين ان شالله لو وقتها يناسبني اخدها في الصيف

حاسب 100= نوف ابو خضير .... ما شالله عليها بالها طووووووووووووووووووووووويل
والله جنناها بس كانت تصبر علينا وتعاملك كانك اختها ... تاخد وتعطي معاكي وطيبة في الدرجات اذا في سؤال الشعبة كلها غلطت فيه تحذفوا وزي كدة ... برضو تحضر اخر المحاضرة ..


اممممممممممممم اظن دي المواد العامة ...
اذا تبغو تخصص ولا مواد حرة ولا اختياري .. قولولي

[السوسن البهي]

الله يعطيكم العافية على الردود الحلوة والف شكر على تفاعلكم

[banoota mnkoosha]

صح نسيت مادة الاحصاء .. ما افتكر رمز المادة ,,, مرة كانت حلوة اخدتها مع لميس العمودي :)
شرحها مرة جيد ما شالله ... واختباراتها حلوة كمان )

[CrAzY]

مرحبـا حبيباتي ..

فكرة حلوة من بنوتة أمورة .. وان شاء الله ما نقصر ..
أول شي .. احب اقلك انو عندي زهايمر مبـكر .. ابدا مو راضي يطلع معي اسم كامل .. الحمد لله ع كل حال
لكن مع عصرة المخ مزبوووووط ح اقلك ايش طلع معايا :

=-=-=-=-=-=

أولا : اللي حبيتهم

حاسب 100 = ( أ.جاري تذكر اسم الاستاذة ) < مش اوي مع البنات .. طفشانه وتحسسك بالطفش
علوم 100 = الكيمياء (أ.د. اكرام دانش ) حبيتها من اول نظرة .. شرحها كويس نوعا ما .. اسئلتها تميل الى انها تكون صعبة بالنسبة للتحضير ما اتذكر .. بس مو اظن لازم نحضر عشان نفهم ولا كيف ؟ ممم وكمان عندها واجبات
الفيزياء ( وجود ديري ) عسسسل ..معاها !! أول مرة أحب الفيزيا ..الله يسعدها ويوفقها


ماث 100 = (أ. اسماء با... مرررة ناسية اسمها الكامل ) بس ماشاء الله عليها لازم اجيب اسمها عشان البنات ياخدو معاها عسل وطيبة وتفهم وتستحمل .. انا كنت ادخل الاختبار من غير مذاكرة سواء دوري أو كويزوحتى النهائي وجبت معاها 70 < ياخيبتك طبعا تحضر كل محاضرة

Elcs 101=(أ.نوف .. ) عسووووولة مرة .. تعطي درجات تعطي بونس وكل العروووض المغرية عندها .. بس الحضور مهم بالنسبة لها .. نصيحة لوجة الله اذا كانت لسا بتدرس جنرال انكم تاخدو معاها . أظن تعطي انجلش فور ساينس .
ثقافة 201 = ( أ.استشهاد حريري ) ياناسو عليها ماشاء الله تزننن . الله يحميها عسل .. تحب تساعدك بأي طريقة .. حتى ع المشاركة البسيط في المحاضرة تدي بونس .. بس اياكم والغياب تحضر كل محاضرة بمحاضرتها .بالنسبة ليا اتذكر اني أخدت جزئية وشرحتها للبنات من الكتاب كمان عملت لها بحث ووووو المشاركة في المحاضرة كلللو بدرجات طبعا .
عربي 201 = ( فوزية الغامدي ) ماشاء لله عليها حريصة على مصلحتك وشرحها كويس وتركز على اللي يجي ف يالاختبار .. بس أظن المنهج حق العربي اتغير فانصح اللي ما اخذو عربي انهم يستنو للترم الجاي او اللي بعدو عشان يستفيدو من خبرة اللي اخدوه وتانيا عشان نفس الاساتذة يتعودو على المنهج ويعرفو ايش الاسئلة وزي كدا يمكن يساعدووكم .وتحضر كمان كل محاضرة .
=-=-=-=-=

ثانيا : اللي عـادي او ما حبيتهم

ماث 101 = (أ. ناسية بس حجيبه ان شاء الله )عـاد دي الاستاذة انا اسكت أحسن لي .. بس من قاصرها لا تاخدوو معاها الا اذا كنتو تعشقو الرياضيات وحتنجحو من غير مساعدة منها .وتمرر ورقة التحضر البنات يحضرو نفسهم بس احيانا تسوي حركة بعد البنات ما يحضرو نفسهم وتقول 3 او 4 اسماء ,, وازا موجودين كللو سليم اما ازا مو موجودين .. الكل ينقص درجة عالحركة ..


Elcs201=(أ.حنان جبر) شرحها ممتاز بس بالنسبة ليا مرة ممل .. (أ.لينا ..) اعطتنا انجلش فور ساينس .. بس اصلا هيا قسمها ادبي .. اظن انها لو كانت تدرس في مجالها كان ابدعت .واجباتها كثيييييييير وتعطي بونس حلو .
طبعا يمووتوو في التحضير

ثقافة 301 = ( د.فاطمة الجليسي ) استغفر الله بس .. تخيلو خلتنا نذاكر اشياء محذوفة من المنهج !! آآآآآخ بس
ماعندها لا بونس ولا بحث ولا بطيخ .. ابعدوو عنها احسن .تحضر بالارقام طريقتها غريبة بس عملية ..

عربي 101 = ( أ تيسير الشريف ) جيدة .
مهارات اتصال = (د.دينا عرابي ) في الشرح مرة متحمسة .. تطمنك ع درجاتك وفي الفاينل تيجيكي الطامة الكبرى .مرة ما أنصح اي وحدة تاخد معاها .
( د. سميرة بافيل ) كمان دي صحباتي يشتكو منها .. وانا حضرتلها مرة واحدة ما قدرت استحمل خرجت في نص المحاضرة
=-=-=-=-=-=

وان شاء الله أول ما اتزكر اشياء تانية حكتبها هنا .. واي سؤال بالنسبة لمواد التخصص انا حاضرة :)

[السوسن البهي]

يعطيك الف عافية على الشرح وان شاء الكل يستفيد من الكويس ويبعد عن .............

[Jeddah Glamor]

اوكي

يا جرح من وين ابتدي آآه


ههههههههههههههههههه

ماث 100 رانيا الحربي أو اللهيبي كلهم واحد كيووووووووووت مررررره طالما ما راح تتخصي ماث خذي معاها لكن معرف اسلوبها مع بنات التخصص

اللي اعرفه انها محترمه جدا واخلاقها فووق كل شي وتعطي فرصه تعبري عن نفسك وتعرف نقطه ضعف كل بنت وتشتغل عليها


حبيت الماث معاها



ماث 101 ريم الضبيبان والسكشن بدرية القثامي

استاذة ريم عسسسسسسسسل مررررره وشرحها حلو أحلى شي انها تربط كل معلومه وتنبهك ع نقاط الغلط المعتادة وما عندها مشكلة تضيع الوقت عشان تشرح لوحده مو فاهمه وتتفهم دايما اتأخر لما اجي من المبنى ال 12 لكن هي حبوبه وكلمتها واستوعبتني ما أقول الا الله يقومها بالسلامه لأنه اليوم تم التصريح بأنها حامل

على فكرة نازلة ماث 101 معاها انصح اللي ما أخذتها تأخذها معاها

أستاذة بدرية أسلوبها غير... شديدة والضحكه ما تطلع ولو طلعت تحسينها تندم انها ضحكت

بس مره شرحت لنا سيكشن عشان كان فيه مشرفه وكان شرحها حلو


بس شوي اخلاقها يعني ممكن تطردك بدون ما تسمع عذرك


والا غير كذا أوكي ما بها شي




فيزياء 100 مع نعمت وكانت بصي يا حببتي وحبوبه مرررره بس شرحها ممكن تلخبطك فيه لكن أهم شي بفيزياء 100 تحضري حل تمارين اخر الفصل لأنها اللي تجي منها الاختبارات نصا

كيمياء 100 مع أستاذة ناسيه اسمها مصريه كمان بس والله حبوبه شرحها حلو بس طبعا انا ما احب محاضرات الساعه ونص والا هي كانت محترمه وتتفاهم مع البنات بأخلاق وتراجع


فيزياء 101 أخذتها مع أستاذة نجوى عناية والله تشرح بس لا أحد يقاطعها تلخبط وأنا زعلانه ع اللي صار لها وكنت مره احبها عسووووووووله مررررره

وبعدين شالوها وحطوا بدالها وجود ديري شرحها حلو ومتميز لا تتأخري عن المحاضرة أكثر من 5 دقايق تطرد ولو رن الجوال كمان برا

لكن من ناحية المادة شرحها حلو وتفهم كثير


والمعمل مع أستاذة العنود العامودي

تجنننننننننننننننننننننننننننننننننننننننننننننننن ننننننننننننننننننننننننننننننننننننننننننن وبس

مهارات اتصال مع أستاذة بدرية الجهني فنااااااانه بس زعلت منها عشان نقصتني كثير ع التكليفات والا ع الاختبارات جايبه الفول مارك

اختباراتها فيه شي حلو وشي مو حلو

الحلو انه الشي اللي تأكد عليه بالمحاضرة يجي واللي مو حلو مررره استخدامها للمفردات اللغوية اللي تلخبط

يعني ممكن تقول دائما ما يكون التشويش خارجي وكلمة دائما تخلي الاجابة غلط


بس انصح تاخذون معاها يكفي طول الوقت تضحك وتنكت وتشرح حلو والبنات يتفاعلوا معاها وتقدر تسيطر ع الحوار بلباقه وذوق


حاسب 100 مع نوف بوخضير كانت اوكي وحلو شرحها بس الحاسب ما فيه شرح الحاسب فيه شي اسمه نموذج تصحيح ملعون خيره
كانت استاذة نوف تتهاوش معاهم على اشياء تافهه يرتكبوها بحقنا

مثلا جانا سؤال مرة الاشارات اللي فوق بالصفحه التصغير والاستعادة والاغلاق وكان السؤال اي واحد منهم يصغر الصفحه اخترنا الشرطة الصغيرة هم قالوا لا احنا نبغى المربعين

كانت تدافع عن البنات بس مين يسمع



Elcs 101 مع منى صابر الجينرال وكانت جدا هادئة ورايقه ومحترمه بس حازمه بنفس الوقت

شرحها حلو وتسأل البنات بأول كلاس عن المهاراة اللي عندهم فيها مشكلة وتلاقيها تساعدك على انك تصيري احسن

EAP مع نهى حلبي كمان كووووووول مرررره وفله وشرحها حلو وأخلاقهم الثنتين فووووق مررره

انا حذفت مادة Elcs 102 عشان استاذة ماليزية ما ابغى اكسب ذنبها

وابغى اشوف استاذات كويسات بشرط انها تشرح كويس واخلاقها فوق ولو كانت سعودية يكون افضل

بلاش اخذ مع هندية والا مدري ايش جنسها

وكمان استاذة هدى خوجه هاديه وعاشقه ورايقه وحلو الانجلش معاها


هذا اللي عندي الحين وبالتوفيق للجميع

[السوسن البهي]

الله يوفق الجميع على الرد والتفاعل