سؤال بالنسبة للي رسب قبل كدا في المواد التكميلية (عماد الحسن وشواطىء افيدوني)

[Kaname]

بسم الله الرحمن الرحيم

السلام عليكم ورحمة الله وبركاته

عندي استفسار .. انا قبل كدا رسبت في احدى المواد التكميلية وطبعا عملت الغاء القيد ورجعت قدمت مرة تانية للماجستير وقبلوني الحمدلله
قسم كيمياء

طيب انا عندي مادتين تكميلية
وحدة رسبت فيها ووحدة نجحت فيها
دحين قبلوني برقم جامعي جديد وكأني اول مرة اقدم
هل اقدر اني ادرس مادة وحدة فقط اللي رسبت فيها ولا يلزموني اني اعيد المادة الاخرى اللي نجحت فيها
وكيف بالنسبة للاجراءات .. يعني ايش اسوي .. انا كلمت الدراسات العليا العمادة قالولي اتفاهمي مع القسم ..
فممكن اعرف ايش اعمل بالضبط

[طموحي فاق الحدود]

طيب ممكن اسالك

ليش عملتي الغاء قيد ..؟

نبغى نستفيد من تجربتك..؟؟


وان شاءاللله تلاقي الافادة من د/ عماد

[Kaname]

عشان اللي يرسب في المواد التكميلية ما يقدر يكمل ماجستير
وعشان تقدمي للماجستير من جديد لازم تعملي اخلاء طرف ..
فتقدمي من جديد كأنك اول مرة تقدمي وتنزل لكي مواد تكميلية من جديد
طبعا بعض الاقسام مافيها مواد تكميلية وبعض الاحيان تكون في مواد تكميلية ممكن تكون مادة وحدة او اتنين وبعضها ممكن 7 مواد تكميلية لازم تنجحي فيها كلها عشان تكملي ماجستير

تخيلي يعني وحدة تنجح في كل المواد التكميلية وترسب بس في مادة وحدة ما يحق لها تكمل ماجستير
بصراحة شرط صعب اتمنى انهم يعدلوه .. يعني على الاقل ما دام انقبلت من اول حتى لو رسبت في المواد التكميلية تعيد بس المادة اللي رسبت فيها
مو تعيد التقديم من جديد ... ممكن لو قدمت ما تنقبل في المرة التانية والماجستير فرصة الواحد ما يصدق ينقبل
اتمنى انهم يراعو دي النقطة خصوصا لو احد من مكان بعيد جاي يدرس وفي غربة :(

[همة همة همة]

طيب اختي كانيم الله يطرح البركة والتوفيق في حياتك العلمية والعلمية ويجعل لك في كل خطوة تيسير سعادة ..


طيب الي يرسب في احد مواد الماجستير (الله يبعد الشر والافكار هذه ولا تتحقق لاحد لا انا ولا انتم ..بس سؤال )اش يعمل واش يصير له ؟

تحياتي

[Kaname]

ههههههههه همة بسم الله عليكي لا توسوسي .. بإذن الله ما احد يرسب في مواد الماجستير ...
بس بصراحة ما عندي خلفية كبيرة لكن اعتقد انه رسوبه في مادة من مواد الماجستير ما يمنعه انه يكمل
يعني مو زي حكاية المواد التكميلية اذا رسب تضيع فرصته انه يكمل الماجستير

[عماد الحسن]

وفقكم الله أختي ،، كلامك صحيح لأن الرسوب في المواد التكميلية ينهي قيد الطالب
ولكن عودتكم طيبة إن شاء الله وتدل على الرغبة القوية في الدراسة
أما المواد السابقة فهي لا تحسب للطالب رسمياً ، لكن لو الكلية سمحت لكم من باب التعاون فمن حقك تطلبي معادلتها وتحسب بدون معدل،بشرط أن لا تتجاوز مدتها فصلين دراسية.
حاولي مراجعة الكلية وممكن أخوكم يراجع د.خالد أبو النجا لأنه المسئول عن هذه الأمور.

[Kaname]

جزاك الله خيرا اخي عماد
يعني احتمال ممكن انو الكلية ما توافق واعيد المادة الاخرى :(
وبصراحة ماعندي احد يقدر يراجع من قسم الاولاد
لكن الله كريم الله يسهل .. بسأل الشؤون الاكاديمية وربنا يسهلها في قسم البنات
اشكرك أستاذ عماد على الرد بارك الله فيك