استفساااار عن تخصص الطفوله لبنات المسار العلمي (موضوع مخالف تم تعديله)

[حمشور]

السلام عليكم و رحمة الله و بركاته..


انا سنة تحضيرية علمي و كنت ابى ادخل اقتصاد منزلي قسم طفولة على بالي انو زي زمان العلمي يقدروا يدخلوا اقسام ادبية و للاسف بعد ما انتهى اختيار التخصص عرفت انو ما اقدر ادخل طفولة لانو قسم ادبيو ما اقدر دحين اعدل الرغبات

فسؤالي هل اقدر انو اخد مواد ادبية و ادخل طفولة ؟


الله يسعدكم الي عندها اي معلومة عن كيف احول او شي تفيدني

[الحــــربيهـ]

لا تقدري تدخلي طفوله بس لازم معدلك يكون حلووو عشان يرضوا على طووول

[أرووش]

انا صاحبتي دخلت طفولة وهيا درست سنه تحضيرية مسار علمي

بس مو على طول قبلوها

خلوها تدرس ترم في اي تخصص علمي وبعدين تحول

وما تقدر تحول بعد السنه التحضيريه الا بعد ما تدرسي ترم في التخصص العلمي

هيا دفعة 09 درست ترم في الاحياء بعدين حولوها على اقتصاد منزلي بس عام بدون تخصص لانو لازم تدرسي المواد العامة في الكلية بعدين اتخصصت دراسات وهيا دحين بتدرس المستوى الرابع في خطة القسم

ربنا يوفقك

[Twix~}..]

^^

دا الي اعرفو انا كمان يعني نفس كلام أرووووش .

لانو من بعد ما نقسمنا مسار علمي واداري ماصار فيه حق لبنات العلمي يتخصصو مكان بنات الاداري ولا ايش حيبقى لبنات الاداري تخصصات ..

بس لا تشيلي هم حاووولي تدرسي مواد عامه باول سميستر وان شاء الله تتخصصي على السميستر التاني .. ويمكن معدلك يسسساعدك انك تتخصصي على طول ..

[ziiizooo a]

انا صاحبتي دخلت طفولة وهيا درست سنه تحضيرية مسار علمي

بس مو على طول قبلوها

خلوها تدرس ترم في اي تخصص علمي وبعدين تحول

وما تقدر تحول بعد السنه التحضيريه الا بعد ما تدرسي ترم في التخصص العلمي

هيا دفعة 09 درست ترم في الاحياء بعدين حولوها على اقتصاد منزلي بس عام بدون تخصص لانو لازم تدرسي المواد العامة في الكلية بعدين اتخصصت دراسات وهيا دحين بتدرس المستوى الرابع في خطة القسم

ربنا يوفقك




كيف أدرس ترم في العلمي ... وأنا درست سنة كاملة علمي...
يعني ايش فائدته ؟؟
لأني أنا نفس حكايتها
حبيت أسألكم ايش رأيكم بقسم الطفولة من ناحية الدراسة وهل حسيت نفسكم استفدتوا منه ؟؟؟


وسؤال أخير.. دراسات الطفولة الدراسة فيه عربي ولا انقلش ؟؟
وثااااااااانكس مقدما

[Twix~}..]

^^

الدرااااسه بالعربي .. وان شاء الله باقي الاسئله يفدوكي فيها بنات الطفولة ..

[أرووش]

زيزووو
تدرسي ترم في تخصص علمي, يعني غير السنة التحضيريه اللي درستيها
ولازم تدرسي الترم في التخصص العلمي عشان تحولي لأنو ما يقبلوكي في دراسات طفولة بعد السنة التحضيرية الا لما تكوني مسار اداري وانساني
عشان كدا لازم تضطري تتخصصي في اي شي من تخصصات المسار العلمي
وبعدها تطلبي تحويل للقسم اللي تبغيه
بس ما اعرف ايش الأحسن انك تتخصصي في اقسام اقتصاد منزلي العلمي وتحولي على الأقسام الأدبيه أو تعملي زي صاحبتي وهوا انك تتخصصي في اي كلية غير الاقتصاد المنزلي وبعدها تطلبي تحويل على كلية الاقتصاد المنزلي
والفرق بين الحالتين هوا انك لما تتخصصي في اقسام كلية اقتصاد منزلي حتطلبي تحويل على قسم في نفس الكلية وما اعرف حيرضولك ولا حيستهبلو ويقولو انك في قسم علمي وما يسير تحولي قسم أدبي
ولو اتخصصتي في كلية علوم او حاسبات حتطلبي تحويل على كلية اقتصاد منزلي وحيحولوكي بس ما حتتسكني في اي قسم فيها حتى لو كان علمي, حيخلوكي تدرسي ترم بدون تخصص تاخدي فيه المواد العامة حقت نفس الكلية وبعدين يسكنوكي في اي قسم تبغيه سواء كان علمي أو أدبي.
فهمتي؟؟؟


دحين حكلمك عن قسم دراسات الطفولة
هوا أكيد طبعا طبعا استفدت من دراستو وعرفت قد ايش مرحلة الروضة مره مهمه للطفل, وانو الأطفال اللي درسو في الروضة يجو أذكى بكتير من الأطفال اللي ما درسو روضة.
دراستو حلوه وممتعه مره وكلها بالعربي ما عدا المواد العامة زي أسس تغذية وصحة فرد بس كانت أسئلة الاختبار بالعربي.
وكمان التخصص مو بس عن الروضة يعني مو زي رياض الأطفال, دراسات الطفولة تدرسي فيه مواد عن التربية الخاصة, ودا ممكن يخليكي تشتغلي في جمعيات المعاقين كأستاذ مساعد,
والمواد أكترها عملي, يعني في الترم لازم يكون عندك مادتين على الأقل فيها معمل
وهوا بصراحه سهل بس للي يتعب ويشتغل, لأنو مره ضغط.
يعني طول الأسبوع وانتي تشتغلي في تكاليف لأكتر من مادة وبس تسلميها تبدأي تشتغلي في التكاليف اللي بعدها, يعني ما تفضي تحكي راسك,
فرص العمل مره كتير زي معلمة في الروضة, معلمة لمراحل الابتدائي أول وتاني وتالت فقط, معلمة مساعدة في التربية الخاصة (المعاقين),أخصائية نفسية واجتماعية للأطفال, وممكن تقدمي دورات عن مجالات الأطفال المختلفة سواء دورات لمعلمات الروضة أو للأمهات.


وبسس

[ziiizooo a]

مررررررة يسلمو أرووش
الله يسعدك يااارب
بس التكاليف سهلة ولا يبغالها شغل ... وايش تسوي في المواد العملية
وعلى فكرة أنا سألت الشؤون التعليمية في كلية الاقتصاد المنزلي وقالتلي انو لما اجي ارتب الرغبات حينزلوا لي كل التخصصات العلمية والادارية وانا ارتب اللي ابغاه
الله يعييييين

[أرووش]

عفوا يا قلبي

التكاليف فيها السهل وفيها الصعب

بس اللي مجنني انها كتير ويادوبك تلحقي عليها

المعامل مره ممتعه

كلها تدريبات على الأنشطة اللي تتقدم في الروضة

يعني مثلا نشاط حلقة عن اي مفهوم علمي أو رياضي أو لغوي

كل بنت تكتب استمارة عن النشاط حقها (كل اسبوع تسلمي استمارة) وكل اسبوع يجو 5 او 6 بنات ينفذو النشاط معانا

يعني نجلس في حلقة والبنت تجيب كل الأدوات وتبدأ تقدم الحلقة بالزبط كأنو أطفال جالسين قدامها وعلى دا الأساس تقيمها الأستاذه. تقريبا أكتر المعامل كدا

بس بصراحة أنا عن نفسي اللي رافع معدلي هيا تكاليف الجزء العملي في المواد
لاني في الثانوي كنت علمي وما أعرف أحفظ أبدا
والتخصص اكتر اختباراتو تعتمد على الحفظ+الفهم
بما انو الحفظ عندي معدوم فدرجاتي دايما في الاختبارات متنيله في ستين نيله

[أرووش]

زيزو

شوفي دا الموضوع
http://www.skaau.com/vb/showthread.php?t=9540
نبذة عن قسم دراسات الطفولة

ان شاء الله يفيدك