طالبة ماجستير ارجوكم افيدوني بخبرتكم ‍‍‍

[نـبض الوفـا]

السلام عليكم ورحمة الله وبركاته

بداية أحب ابارك للجميع دخول الشهر الفضيل أعاده الله علينا
بالخير وياليمن والمسرات سنوات عديده



أنا طالبة ماجستير ادارة اعمال اريد استشارتكم هل اختار رسالة أو بحث علمي وايش الفرق بينهم
مع العلم بأني موظفة وقد حصلت و الحمدلله على تفرغ يومين بالأسبوع من العمل

أفيدوني جزاكم الله خيرا عني فأنا في حيرة من أمري
وياليت تفيدوني بخبرتكم اللي اخذت رسالة أو اخذت بحث علمي ومع مين من الدكاتره تنصحوني اخذ فأنت تعلمون أن هناك دكاتره يصعبون على الطالب إنهاء مهمته


ارجوكم ساعدوووني



اختكم

نبض الوفا

[Amazon]

احدثك عن الرساله العلميه .......
تحتاج لتفرغ ومتابعه مستمره والمام بكل جوانب الموضوع تبع الرساله وعمل استبانات ومسح ميداني وتحليل للنتائج وكتبة رساله علميه متكامله مكونه من لايقل عن 200 صفحه خاليه من الاخطاء الاملائية واللغوية ثم بعد الانتهاء من كتابها تعرض على القسم العلمي في الكلية لمراجعتها ثم تعاد للتعديل ثم بعد الموافقة عليها يتم تحديد لجنة مناقشة ( مكونه على الاقل من ثلاثة من اعضاء هيئة التدريس ) ثم بعد الموافقه على لجنة المناقشة يتم تحديد موعد للمناقشه ثم لا يمكن ان تجاز الرساله الا بعد ان تتم الموافقه عليها من ثلثي لجنة المناقشه ...... وجع راس ...... ولذلك انصحك بالبحث العلمي ..... اذا كان القسم يوفر لكم امكانية الاختيار بين الرساله او البحث العلمي

[نـبض الوفـا]

اشكرك على الاهتمام و الرد


لكن على حد علمي ان الرسالة ليس عليها درجات يعني معدلي يحسب حسب درجاتي في المواد


هل هذا الكلام صحيح فقط اجتاز الرسالة


و هل لمن بكمل دكتوراه يطالبوني برسالة في الماجستر

[بنت الشريف3]

أخوي amazon الله يعطيك العافيه .... والله انك ماتقصر

أنا بعد نفس حالة الأخت نبض الوفا ماني فاهمه وش الفرق بين الرساله والبحث وانت وضحت وش هي الرساله بس ماوضحت وش هو البحث..

أنا ماجستير اداره عامه وانشا الله بكمل دكتوراه .. ولكن هل اختيار الرساله أو البحث يؤثر على القبول في الدكتوراه

أخوي شكلي بنشبلك بما انك مخلص الماجستير

بس حابه أسألك وش هو تخصصك في الماجستير والدكتوراه؟؟؟

والله لايحرمك الأجر في هذا الشهر الفضيل

[Me to you]

الاخت بنت الشريف
انا زيك ادارة عامة بس مالنا الا خيار واحد الرسالة

[كلام كليم]

عليكم السلام ورحمة الله وبركاته

وكل عام وانتي والأمة الأسلامية بخير




شي حلو نشوف طلاب وطالبات ماجستير إدارة الأعمال (المجاني))

انت رابع عضو

الى الآن ماشفت من طلاب وطالبات إدارة الأعمال الا ثلاث طالبات وأنا الطالب الوحيد يعني كلنا على بعضنا اربعة


اتمنى اشوف البقية لأن اللي اعرفه إن القسم قبل 40 طالب في ماجستير إدارة الأعمال (المجاني)

20 طالب و 20 طالبة نتمنى نشوفهم معنا كما نتمنى ان نرى الطلاب القدماء سواء اللي تخرجوا او اللي مازالوا على رأس الدراسة


أختي نبض الوفاء قبل كل شي اسمحيلي اعرف انتي موظفة تقصدي انك معلمة والا موظفة تمارسي تخصص إدارة الأعمال


عموما ان بعطيك نصيحتي من خلال خبرة 6 سنوات في سوق العمل لكن قبل كذا بعطيك الفرق بين الرسالة والمشروع البحثي




الرسالة

1- تتخرج ماجستير إدارة أعمال (عام) يعني بدون مسار
2- الرسالة تاخذ وقت كبير من وقتك لأن كثير من اللي اعرفهم جلسوا في الرسالة سنة أو أكثر



المشروع البحثي

1- تتخرج ماجستير إدارة اعمال بمسار ( تمويل - نظم معلومات - تسويق - موارد بشرية - ... الخ)
2- اقل مجهود واقل وقت من الرسالة



بالنسبة لي وبغض النظر عن التعب والوقت اللي تأخذه الرسالة ارى من وجهة السبب الأول مهم بشكل كبير (95%) ... لأنه وبصراحة من تجربة 6 سنوات في سوق العمل ومن خلال عملي في أحد اكبر الشركات في المملكة ارى ان تخصص إدارة أعمال بدون مسار مايفيد الفائدة المرجوة

أنا عن نفسي كذا مرة تجيني عروض من شركات أخرى وبمزايا اكبر ولما يعرفوا ان متخصص بدون مسار مايوافقون علي عشان كذا قدمت في الماجستير وإن شاء الله بختار المشروع البحثي



هذي وجهة نظر شخصية بحته ومايعني انها صح


على فكرة أنا سألتك هل تمارسي تخصصك إدارة الأعمال في عملك عشان لو اخترتي المشروع البحثي تختاري المسار اللي يناسب عملك أنا مثلا امارس عمل مالي عشان كذا نفسي اتخصص في (مسار التمويل)

آسف على الإطالة وبالتوفيق للجميع

[بنت الشريف3]

أختي me to you أتشرف والله بمعرفتك...............

بس ودي أعرف ليش رساله مو البحث..

[كلام كليم]

أختي نبض الوفاء

اليك هذا الرابط عشا تفيدي وتستفيدي برضه عشان تعرفي على زميلاتك اللي راح يدرسون معك إن شاء الله


http://www.skaau.com/vb/showthread.php?t=17741

[المستبدة]

نبض اهلا فيكي واتمنى ان ردود الاعضاء افادتك
ونتمنى منك مشاركتك في ملتقى طلاب ادارة الاعمال عشان نستفيد من خبرتك

[Me to you]

المشاركة الأصلية كتبت بواسطة بنت الشريف3 أختي me to you أتشرف والله بمعرفتك............... بس ودي أعرف ليش رساله مو البحث..

وانا كمان ليا الشرف
وبالنسبة لسؤاللك والله ما اعرف بس في نظري اشوف ماجستير بالرسالة افضل وارقى

بعدين مو كله في النهاية بحث ومناقشة سواء رسالة او مشروع بحثي <<<<<على كدا الرسالة افضل


انا حطيت موضوع طالما تخصصك البكالريوس ادارة عامة ياريت تروحي تجاوبي على اسئلتي بعد اذنك طبعا .............