تجربتي في معادلة مادة الإنجليزي باختبار الآيلتس

[المليحة]

بسم الله الرحمن الرحيم
السلام عليكم ورحمة الله وبكاته، حأتكلم عن تجربتي في معادلة مادة الإنجليزي عن طريق اختبار الآيلتس ممكن تشوفوا الموضوع طويل لكن لا تفكروا إنه من صعوبة الآيلتس والمعادلة ولكن لأنه ذكرت التفاصيل عن كل خطوة والي كنت أتمنى إنه أعرفها لما كنت بمكانكم
بداية .. بعد ما تطلع نتائج القبول وتأكدوا على الطلب راح تختاروا الوقت الي تختبروا فيه اختبار تحديد مستوى الإنجلش ووقت استلام البطاقة الجامعية ..
هذا الاختبار إلكتروني ، ويغطي كل مهارات اللغة تقريبًا عدا السبيكنق (المحادثة) ، بعد فترة راح تعرفوا مستواكم في اللغة إيش ، أعلى مستوى 4 وأقل مستوى 1 .. كل مستوى نصف ترم ، بمعنى :
المستوى الأول --- تدرسوا إنجلش طول السنة
المستوى الثاني --- تدرسوا الإنجلش ترم ونص
المستوى الثالث --- تدرسوا الإنجلش ترم
المستوى الرابع --- تدرسوا الإنجلش نص ترم
يعني كل ما قل مستواكم باللغة كل ما احتجتوا فترة أكثر تدرسوه .

*ملاحظة : ما حيقولوا لكم درجاتكم حيقولوا بس إنتوا انحطيتوا أي مستوى وحتى لو جبتوا الدرجة كاملة حتنحطوا في المستوى الرابع ..
الطريقة الوحيدة لمعادلة (حذف) الإنجلش هو تجيبي درجة معينة في اختبار الآيلتس أو التوفل
....
أنا اختبرت آيلتس-جنرال وحذكر تجربتي معاه بدءًا من الاستعداد والتسجيل إلى كيفية المعادلة وراح أعطيكم شوية نصائح في النهاية أتمنى تاخذوها بجد في عين الاعتبار
الاستعداد
أول حاجة في اختبار توفل وفي اختبار آيلتس أي واحد مقبول ، أنا اخترت الآيلتس لأنه حسيته أسهل والآيلتس نفسه في جنرال وفي أكاديمك اخترت الجنرال لأنه حسيته أسهل بالنسبة لي
فأنصحكم هنا تشوفوا في قوقل إش الفرق بين توفل وآيلتس وتختاروا الي تحسوه أسهل بالنسبة لكم وإذا اخترتوا آيلتس شوفوا الفرق بين الجنرال والأكاديمي واختاروا الأسهل بالنسبة لكم

لكن قبل هذا كله اتأكدوا إذا الجامعة حتقبل الشيء الي اخترتوه ولا لا ، ممكن يتغير النظام وما عاد يقبلوا الآيلتس الجنرال أو حاجة .. الحقيقة طلع كلام هالسنة إنه ما عاد يقبلوه لكن شكله إشاعات وعادي قبلوه ، فإنتوا تأكدوا من حسابات الجامعة بتويتر وإن شاء الله خير.

طبعًا بالآيلتس الجامعة طالبة كحد أدنى 4 ونص من 9 وبرضو تأكدوا من أقل درجة مطلوبة

أكبر مشكلة واجهتني شخصيًا هو كيف أعرف إذا مستواي في الإنجلش حيأهلني أجيب على الأقل 4 ونص ، كنت أتمنى أعرف أحد جاب هالدرجة وأقارن إنجليزيته بإنجليزيتي عشان أعرف إذا إنجليزيتي ممكن تخليني أتجاوز حد الأربعة ونص ولا لا ..

ما حبيت أترك أي شيء للاحتمالات ! لذلك قررت أزيد من مستوى إنجليزيتي خاصة المهارات الأضعف عندي وبعد ذلك استعد لاختبار الآيلتس ..

وحتى تكون بالصورة كان مستواي مستوى طالبة تجيب درجات عالية الحمد لله بالمدرسة وتقريبًا إنجليزتي كلها مكتسبة من الي درسناه (كنت أدرس ثانوية عامة) ولما اختبرت اختبار تحديد المستوى طلع مستواي هو 4 الحمد لله ونتيجتي بالآيلتس كانت الحمد لله 5 ونص
إش الأشياء الي طورت منها لغتي ؟
بداية أنصحكم بقناة أبو عمر English Place باليوتيوب فهي بالإضافة إلى أنها تحتوي دروس تعليمية للإنجلش هي أيضًا تجاوب على أسئلة مهمة كثيرة زي كيف أحفظ الكلمات-تطبيقات مفيدة للإنجلش-كيف أحسن مهارة السماعي وأشياء كثيرة إذا عندكم تساؤلات عنها ..
https://www.youtube.com/user/Abdullrhman

وبعدين learn English with misterduncan
هذي القناة أفادتني كثير بالسماعي الي كان نقطة ضعفي ، طبعًا تبدأ بأشياء سهلة وتتدرج بالصعوبة .. كنت أسمع المقطع وأحاول ما أطالع بالترجمة الإنجليزية تحت ، أسمع كذا مرة وكل مرة في كلمات توضح أكثر وأكثر حتى لو ما كنت أعرف معناها لكن على الأقل لو قلتي لي جملة أقدر أقلك هل انذكرت بالمقطع ولا لا ، وبعدين أشوف الترجمة وأكتب معاه الكلمات فهو كمان مفيد في جزئية الفوكاب .. والفوكابلري كل أسبوع تقريبًا أراجعها ( ومن فيديوهات أبو عمر حتشوفوا إش أحسن طريقة لحفظ الكلمات) .. فكان مفيد الحمد لله بالسماعي والفوكابلري ..

الحقيقة ما شفت كل 89 فيديو لكن حاولت أغطي أغلبها بما أنها قصيرة وكذا ..
لا تحاولوا تتعلموا أشياء كثيييرة مرة وحدة .. كذا ما حتسفيدوا ، حتكلم عن تنظيم الوقت إن شاء الله في جزئية نصائح

أيضًا في تطبيق جميييل ورائع في الجوال اسمه British English.. أسمعه وشوفوا مصطلحاته جدًا مفيد الصراحة خاصة 6 minutes English
الآن .. حسيت تقريبًا إنه حسنت اللغة عندي بشكل ممتاز حتى ابدأ مرحلة التدرب على اختبار الآيلتس

طبعًا إذا كان مستواكم عالي ممكن تتخطوا كل ما سبق وتبدأوا تدريب للآيلتس، لا تقولوا مستوانا عالي مو لازم تدريب! لازم على الأقل تتطلعوا وتشوفوا إش هم يبغوا منكم بالزبط يعني مثلا جزئية الكتابة إش الي لازم تكتبوه وكيف طريقة ترتيب االفقرات وكم كلمة وعلى إيش يقيموا وإيش الي يرفع الدرجة أو ينزلها وهكذا بالنسبة لكل قسم ، مهما كان لغتكم الإنجليزية عالية لا تدخلوا على عماكم ..
التدريب
كبداية شوفوا هذي القناة ، تعطيكم كل قسم إش فيه بالزبط وإش لازم تسووا عشان تجيبوا درجات أعلى ، بالإضافة إلى إنه تعطيكم نماذج على كل قسم ، فحلو جدًا كبداية
الجنرال :
https://www.youtube.com/user/GeneralIELTSHelp
الأكاديمي :
https://www.youtube.com/user/AcademicEnglishHelp

الفروقات بين الجنرال والأكاديمك في جزئية الرايتنق والريدنق يعني لو كنتوا جنرال تقدروا تشوفوا فيديوهات الأكاديمك الي تبع السبيكنق واللسننق والعكس لو كنتوا أكاديمك

بالنسبة للرايتنق والسبيكنق .. هذي قناة باليوتيوب جدًاااا رائعة وتنقلكم لمستوى عالي ، يعيطكم مثلا عبارات وجمل (قوية) ممكن تسخدمونها وكيف ومتى تستخدموها ، وطبعًا كل ما كانت جملكم أقوى كل ما زادت درجاتكم ، لا تدخلوا الاختبار بدون ماتشوفوا هالقناة عرفتها قبل اختباري بفترة قصيرة ولكن استفدت الحمد لله ، تمنيت لو عرفتها من قبل
https://www.youtube.com/user/EnglishRyan

طبعًا الاختبار مقدم من British council الي هو المجلس الثقافي البريطاني .. فما في أحسن من إنكم تتدربوا من موقعهم
https://learnenglish.britishcouncil.org/en/ielts
الموقع مفيد بشكل عام لتعلم الإنجلش مو بس الآيلتس ، وهذي جزئية الآيلتس ..

قبل الاختبار بأسبوع إلى أسبوعين

التدرييييييييب على النماذج مهم ، أكيد إنتوا اختبرتوا قدرات وتحصيلي وعارفين قد إيش الشيء هذا مهم ..
-الرايتنق دوروا بقوقل على نماذج وانتبهو إذا جنرال ولا أكاديمك مثلاً ielts general writing samples
واكتبوا بنفسكم قبل ما تشوفوا الجواب *هذي طريقة حلوة تثبتوا الي تعلمتوه من IELTS Ryan * واقروا الجواب بعدين وشوفوا ‘إذا في جملة عجبتكم أو شيء ممكن تستخدموها بالمرات القادمة

-الريدنق نفس الشيء دوروا على نماذج وتقريبًا هذا القسم الاغلبية بيقول إنه الأصعب ما قلت كذا عشان لا تستعدوا له بس عشان وإنتوا بتستعدوا قد تواجهوا صعوبة فأنا بقلكم اطمنوا السبب مو منكم غالبًا من صعوبة القسم نفسه ولكن استعدوا له عادي بغض النظر حسيتوه صعب ولا سهل

-اللسننق أسهل قسم برأي الأغلبية ، دوروا باليوتيوب على نماذج ومرة على مرة بتلاحظوا مستواكم صار أعلى وصرتوا تجابوا أسئلة أكثر

-السبيكنق عاد هذا القسم هو الي حسيته يتكرر من النماذج أكثر من غيره . شوفوا نماذج باليوتيوب ووقفوا المقطع قبل ما تسمعوا الجواب .. وحاولوا لما ما تحسوا إنكم جاوبتوا تمام تكتبوا الشيء الي تكلموا عنه في ورقة ، مثلا كان السؤال عن أفضل هدية حصلتي عليها وليش هي الأفضل .. وحسيتوا إنوا تلكعتوا بالكلام وأخذتوا وقت طويل على ما تجابوا اكتبوا السؤال وموضوعه "الهدية" على جنب وإذا خلصتوا دوروا بقوقل على إجابات أو على كلمات تتعلق بهذا الموضوع , وبكذا لو انسألتوا هالسؤال أو سؤال شبيه له مثلا أفضل هدية أعطيتها لشخص يكون عندك كلمات بهالموضوع وصورة عن إش ممكن تقولي فما تتأخري بالجواب كثير .. طبعًا الاختبار الهدف منه هو قياس لغتك فما في جواب صح ولا غلط أهم شيء تجاوبي .
التسجيل
من موقع British council :
https://www.britishcouncil.sa/exam/ielts
انزلوا تحت تلاقوا (سجل لامتحان IELTS الآن) ، وبعدين في أسفل الصفحة تلاقوا
View all test date in Saudi Arabia for the next 4 month وبعدين اختاروا اليوم ونوع الاختبار general or academic واختاروا المدينة وحتشوفوا المواعيد ، اختاروا الأنسب لكم قيمة الاختبار 970 تقدروا تدفعوا عن طريق الفيزا أو تروحوا لهم تدفعوا كاش ، فين ؟ تواصلوا معاهم هنا https://www.britishcouncil.sa/about/contact
انزلوا تحت شوفوا إنتوا أي مدينة واتصلوا على القسم المناسب لكم ، رجال أو نساء

-بالنسبة للوقت المناسب للاختبار : حطوا في بالكم إن الاختبار تطلع نتيجته بعد 13 يوم وعشان يعادلوه الجامعة ياخذ تقريبًا من يوم إلى أسبوع .. وعشان تحذفوا المادة لازم تعادلوا الإنجلش قبل ما تختبروا النهائي وكل ما كان قبل النهائي أكثر كل ما كان أحسن .. فإنتوا شوفوا الموعد الي يناسبكم ولا تستعجلوا مرة بحيث ما يمديكم تستعدوا ! يعني مثلاً لو كنتوا مستوى أول وما تحسوا إنكم مستعدين تمام قبل نهائي المستوى الأول مو مشكلة تخلصوا المستوى الأول وتختبروا الآيلتس بعد ما تخلصوا وتكونوا قد بدأتوا في المستوى الثاني فقبل نهائي المستوى الثاني بفترة اختبروا وبالتالي تعادلوا المستوى الثاني والثالث والرابع .
على فكرة المستوى الأول ما ينحسب في المعدل ولكن لازم تنجحوا فيه عشان تروحوا للمستوى الي بعده
كيفية المعادلة:
بعد 13 يوم تطلع النتيجة ويرسلوا لكم ع الجوال النتيجة ويعيطكم فترة محددة تجوا فيها تاخذوا الشهادة طبعًا يحدووا المكان والوقت الي ممكن تجي فيه وكل شيء ، واحتياطًا سوي سكان لهذي الشهادة وصوريها كذا نسخة وممكن تروحي عمادة القبول والتسجيل وتعطيهم نسخة (خلي الأصل معاك ممكن يبغوا يشوفوه) ، عمادة القبول والتسجيل الي جوا شطر الطالبات الي هو مبنى 63 أو تروحي تسلميها لمبنى 237 في مباني التحضيري الجديدة أطلعي آخر دور (المسؤولين عن الإنجلش وكذا ) وقولي لهم إنه بتعادلي عن طريق الآيلتس وكذا . وهما حيرسلوا لعمادة القبول والتسجيل يحذفوه من الجدول ، أنا عن نفسي كنت أدرس الترم الأول بمباني التحضيري فاستسهلت إنه أسلمها للي في 237 وزميلتي سلمتها مباشرة لعمادة القبول والتسجيل الي في الشطر وخلصوا لها أمورها أسرع فأحسن تسلموها لعمادة القبول والتسجيل على طول.

طبعًا أكيد مفجوعين إش شطر ومباني وو ، طمنوا بالكم حتعرفوا لما تبدأ السنة إن شاء الله إنتوا بس احفظوا المواقع هذي ، ومرة ثانية أنصح تسلموها لعمادة القبول والتسجيل طالما إنه يقبلوا ويخلصوا أسرع
نصائح :
أشكركم إنكم وصلتوا لهنا بالموضوع الطويل هذا ما كنت حابة أخليه طويل حتى ما يوحي إنه الاستعداد لهذا الاختبار شيء طويل وصعب ووو ولكن حبيت أحكي التفاصيل الي ممكن تجي في بالكم ويكون عندكم موضوع إلى حد ما متكامل يساعد دفعة تحضيري17 وما بعدها. وبالمناسبة حابة أشكر كل الي ساعدوني وجاوبوا على أسئلتي وقت ما كنت زيكم، جزاهم الله كل خير.

أنا هذي طريقة استعدادي وتدريبي طبعًا ممكن تستفيدوا من الروابط وكذا لكن كل واحد وحسب مستواه باللغة يعني لو أقل لازم تستعدوا أكثر ولفترة أطول ولو أعلى ممكن تستعدوا لفترة أقل ولكن بالنهاية الاستعداد لا بد منه ، وبالمناسبة أنا هذي المصادر الي استخدمتها والي أفادتني لكن إنتوا أدرى بنفسكم لو حسيتوا إنه مهارة من المهارات لا زالت مو بقد المستوى عندكم بكل بساطة ممكن تبحثوا عن مصادر أخرى . زي ما قلت إنتوا أدرى بحالكم

بالنسبة للوقت ، أنا تقريبًا بدأت قبل ما تبدأ السنة الدراسية (وأعيد كل ما كان مستواكم أقل ابدأوا بدري أكثر) ، على كثرة المصادر الي فوق لا تفكروا إنه كنت 24 ساعة أدرب نفسي !! لو الواحد ياخذ ساعتين ثلاث من اليوم الي عبارة عن 24 ساعة ما حيحس بالتعب والإرهاق ، حيبقى عندكم حوالي 21 ساعة سووا فيها الي تبغوا وعيشوا إجازتكم واستمتعوا فيها لأنه هذا الهدف الأساسي منها حتى نرجع للدراسة بنشاط ما نرجع مرهقين !

أنا اختبرت بداية السنة عشان كذا استعديت قبل ما تبدأ السنة وعادلت المادة قبل ما أدرس لفل فور الي كان يبدأ بنص الترم الأول وينتهي بنهايته ، لو حابين تختبروا بنص الترم الأول ممكن تبدأوا الاستعداد من بداية السنة ، ويعني بالهطريقة حسب الوقت الي حتختبروا فيه حطوا قبله مدة كافية للاستعداد

من كل قلبيييي أنصح إنوا تعادلوا الإنجلش سواء توفل ولا آيلتس ، ليش؟ دوام الإنجلش طويل يعني 4 ساعات باليوم وكل المواد فيها بس دوريين ونهائي لكن الإنجلش غير الدوريين والنهائي عندكم كويزات ولسسنق وسبيكنق ورايتنق فاحتمال النقص وارد هنا بشكل أكبر ، لو بدون الإنجلش يكون عندك باليوم محاضرة محاضرتين وما يجي الظهر إلا وإنت في بيتكم أو حتى قبل (حسب المسافة) لكن لو عندك إنجلش زودي أربع ساعات ! وفي الأسبوع قبل الاختبارات كنت أغيب وكان الي عندهم إنجلش يداوموا عشان عندهم اختبار السبيكنق وو ، وقد صادف إنه اختبار الإنجلش النهائي كان يوم وبعده ع طول اختبار نهائي مادة ثانية فانضغطوا البنات كثير لأنه العادة يكون بين المادة والمادة يوم على الأقل ، لو ما كان عندك إنجلش ممكن يكون عندك أيام أوف ما تداومي فيها
.
طبعًا مو معناته إذا ما عادلتوا الإنجلش ما حتجيبوا معدل لا بالعكس في ناس ما شاء الله بدأت من المستوى الأول ودرست للأخير وجابت درجات تدخلها طب وهندسة وو وهذي التخصصات الي تطلب درجات عالية + في ناس تعادل الإنجلش ومع ذلك مستواها في باقي المواد مش ولا بد، فرجاء احذفوا من راسكم فكرة إنه إذا عادلت حجيب معدل وإذا لا ما حقدر لأنه ضغط ودوام طويل ووو . لا بالعكسس كل شيء بترتيب الوقت يمشي ومع إنه دوام الإنجلش طويل لكن حتدخلي مستواك بالفعل مع ناس بنفس مستواك ومع أستاذة عارفة مستواكم فما راح تحسي بالصعوبة الي ممكن كنت تواجهينها بأيام الدراسة *إنك ما تفهمين وش الأستاذة والبنات يقولوا أصلا* .. ولكن الي أقصده إنه لطالما عندك القدرة على حذف مادة طويلة وتقللي الضغط على نفسك ليش لا ؟
إذا ربي قدر وما جبتوا الدرجة لا تتحلطموا أبدًاااااا إنتوا طورتوا من لغتكم وهالشيء مؤكد حيفيدكم في دراستكم إضافة إلى أنه صار عندك خبرة عن جو الاختبار ، ولو بيوم من الأيام كان في شيء يستعدي تختبريه أتوقع حتكوني فاهمة وعارفة كيف تستعدي وكيف طبيعة الاختبار ووو .. الاختبار ترا سهل ومو تعجيزي لدرجة إنه الي يستعد ما يتجاوزه ! ولكن برضو لازم أتكلم عن هذي النقطة

إذا عادلتوا الإنجلش مبروووك لكم وهذي فرصة ركزوا بباقي المواد ولا تتهاونوا وتتكاسلوا خاصة إنه باليوم ممكن محاضرة محاضرتين ! بالعكس اقلبوا هالنقطة لصالحكم واستغلوا حذف الإنجلش بشيء كويس .
إذا عادلتوا الإنجلش مو معناه تنسوا الإنجلش خلاص . لو سحبتوا عليه راح يروح كل شيء وتنسوه ، وتذكروا إنه الكليات العلمية دراستها إنجلش .. أنا برأيي طالما الإنسان صار مستواه فوق المتوسط باللغة حيصير تطوير اللغة شيء سهل ! مو لازم يعني يحفظ كلمات ووو وهالطريقة الاعتيادية ! لا كل اللي عليه يحيط نفسه ببيئة إنجليزية منها يمارس الي تعلمه ويتعلم شيء جديد، كيف؟ يتابع ناس أجانب بمواقع التواصل الاجتماعي واليوتيوب ، يتابع برامج أجنبية ، يتكلم إنجلش ويستعمل هاللغة كمان بمواقع التواصل الاجتماعي ، يسمع راديو مثلا تطبيق English radio بهالطريقة الواحد يستمتع ويتعلم بنفس الوقت

إذا في أي سؤال أو استفسار تفضلوا ..

[المليحة]

للإفادة أكثر هنا مجموعة تغريدات فيها نصائح للآيلتس الأكاديمي ..
https://twitter.com/abdulmohsen565/s...425152/photo/1
وطبعًا زي ما ذكرت إنه الجنرال والأكاديمي نفس الشيء في اللسننق والسبيكنق فممكن الي اختاروا جنرال يستفيدوا من الأجزاء المشتركة .

[بنت ناس وقلبي ألماس]

وعليكم السلام ورحمة الله وبركاته

الله يسعدك يا المليحة ويفتح لك أبواب الخير من كل مكان

تجربة مميزة وموضوع رائع وجميل

بارك الله في جهدك وسلمت يمناك

وتم تثبيت الموضوع

[المليحة]

اللهم آميـــن ، وإياك :)
وشكرًا على التثبيت

[Ghid ahmd]

هل انتي ما اختبرتي اختبار تحديد مستوى الانقلش ؟ وحطوك ف ليفل ون بعدين اختبرتي الايلتس وعادلولك هوا وحذفو الماده ؟
وبعدين
لو انا اختبرت تحديد المستوى وحطوني ف ليفل 4 هل ادرسه بداية السنه او وسط الترم الثاني ! ولو حطوني ف ليفل فور اقدر اختبر ايلتس واعادل برضو ولا ؟
وشكرا لمجهودك افدتينا مره 💖

[المليحة]

أنا اختبرت تحديد المستوى طبعًا وأنصح الكل يختبروه وإلا ينحطوا لفل ون
أنا لما اختبرته انحطيت لفل فور زي ما ذكرت وكان تبدأ الدراسة في نص الترم الأول
هو أصلا كان محطوط بالجدول وبعدين شالوه وقالوا نرجعه بنص الترم الأول وتخلصوا منه نهاية الترم الأول
وعادي لو دخلتِ لفل فور تعادلي زي ما سويت أنا .. :)

[Jujub]

السلام عليكم
انا عادلت الانجليزي بالايلتس وحابه اسأل كم سؤال
1- هل معادلة الانجليزي رح ينقص شي من المعدل ؟ بحكم اني ارغب بالدخول في الطب وحابه معدلي يكون عالي "بإذن الله".
2- كيف سيتم تقسيم درجات الانجليزي على باقي المواد؟

[المليحة]

وعليكم السلام ورحمة الله وبركاته
مبروك ما شاء الله عليك ، الله يوفقك
معادلة مادة الإنجليزي يعني حذفها نهائيًا من الجدول ومن المواد المقررة عليك ، كأنه ما في مادة إنجليزي نهاائيًا
وتقدري تجيبي معدل كامل حتى لو حذفتِ الإنجلش ، إنت استغلي حذف الإنجليزي بإنه تركزي ع باقي المواد وشدي حيلك والله يوفقك وتدخلي الطب

[المليحة]

للأهمية اطلعوا على هذا الموضوع .. تحديث جديد
http://www.skaau.com/vb/showthread.p...78#post7255778

[A7md440]

اشكركم على المجهود بس معليش ابغا استفسر انا سمعت انو اقدر اعادل الانقليزي باختبار الstep الي هو كفايات اللغة الانجليزية المقدم من قياس هل هذا صحيح ؟ و شكرا مقدما