كل ما تريد معرفته عن المقابلة الشخصية لكلية الطب

[محمد عماد]

بسم الله الرحمن الرحيم

السلام عليكم ورحمة الله وبركاته

حبيت اوضح في هذا الموضوع المقابلة الشخصية لكلية الطب ..
البعض يعرفها .. لكن ان شاء الله الي ما عنده فكرة عنها يستفيد من هذا الموضوع ^^

1- المقابلة الشخصية الهدف منها معرفة قدرات الطالب وحالته ومدى سلامته وجاهزيته وهل هو مؤهل لدراسة الطب ام لا وهل هو مجبر على دراسة الطب ام دخلها برغبته ..و طبعا سبب وجود المقابلة هو الإعتماد الأكاديمي
2- المقابلة الشخصية حتكون ان شاء الله يوم السبت والأحد 12-13 شوال الموافق 10-11سبتمبر
3- المقابلة اجبارية لجميع طلاب وطالبات كلية الطب بجميع الفروع .. طلاب الطب فقط ( باقي الكليات الصحية ما فيها مقابلة )
4- المقابلة ان شاء الله تكون سهلة .. وغالبا ما ينبني عليها أي شيء... وكل الطلاب مقبولين فيها ان شاء الله لكن لابد من الحضور
5- الطالب المتغيب عن المقابلة حيكون موقفه جدا صعب واحتمال ينفصل من الكلية لانه هذا يدل على على عدم اهتمامه واحترامه لكلية الطب.. لذلك لابد الحضور في الموعد بدون تأخير
6- الإعلان عن اسماء الطلاب والمواعيد .. حيكون ان شاء الله قبل بداية الدراسة عن طريقة مسجات الجوال او من الشؤون التعليمية او ممكن تكون في اوراق معلقة على بوابة مبنى 2 بأسماء الطلاب
او ممكن ما يكون فيه اعلان اصلا .. ويكون الدخول للمقابلة عشوائيا .. وتختار انت اليوم الي تبغا تسوي القابلة فيه ( السبت او الأحد )
7- القائمين على المقابلة دكاترة من كلية الأداب ومن كلية الطب واساتذه في اللغة وعلم النفس
8- اهم شيء في المقابلة انك تكون مرتاح وواثق من نفسك ولا تحاول تكذب عليهم او تتكلم في شيء ما تعرف عنه ... يعني اذا سألك ايش اخر كتاب طبي قرأته ( وانت ما قرأت ولا كتاب ) لا تكذب وتقول اسماء كتب انت ما قرأتها .. لانه حيسألك عنها
واي سؤال ما فهمته اطلب منه توضيح السؤال .. وحاول قدر الإمكان انك تلتزم بصلب السؤال .. ولا " تتفلسف " وتحط نفسك في موقف محرج
9- الحضور للمقابلة بأي لبس لا يشترط لبس محدد .. اهم شيء تهتم بمظهرك ويكون لبسك مرتب... ومو شرط تلبس الاب كوت او تجيب الcv معاك
10- حاول انك تكون هادئ ومرن وسريع البديهة .. ممكن يسألك سؤالين بطريقتين مختلفة طبعا لازم يكون جوابك واحد للسؤالين
11- طريقة المقابلة : حيكون الدكاترة جالسين في اماكن مختلفة ( محطات ) وانت تنتقل بينهم .. وكل واحد منهم حيسألك اسئلة محددة
12- اصل المقابلة حتكون شفوية وبالإنجليزي .. لكن احتمال يكون فيها جزء تحريري ( كتابي ) فلازم تكون مستعد لهذا الشيء
13- طريقة الأسئلة حتكون كالتالي :
ما سبب اختيارك لكية الطب ؟؟ وفي جامعة الملك عبد العزيز بالذات
وما هو التخصص الذي ترغب الدخول اليه ؟؟ وكيف ترى نفسك بعد 10 سنوات ؟؟
وما موقف اهلك من دراستك للطب ؟؟
لو ما انقبلت في كلية الطب .. ايش حيكون موقفك او ردة فعلك ؟؟ وايش الكلية الي ممكن تدخلها ( غير الطب )
لو توظفت وتم تعيينك خارج مدينة جدة .. توافق ولا لا ؟؟
وممكن يسألك عن هواياتك .. مثلا : اذا كت تحب كرة القدم ايش هي الإصابات الي تصير في كرة القدم ؟؟
ممكن يدردش معاك ويسألك عن اشياء في جسم الإنسان .. مثلا ممكن يسألك أي يقع الرباط الصليبي او يسألك هل الكبد في المنطقة اليمنى او اليسرى من الجسم وهكذا
بالنسبة للبنات .. لو تزوجتي ورفض زوجك تكملي الطب .. ايش حيكون موقفك ؟؟
وممكن يسألك اسئلة عامة ليس لها علاقة بالطب مثلا : من هو قدوتك في الحياة .. وايش هي نقاط ضعفك وقوتك .. وهل مريت بتجربة فاشلة في حياتك .. الخ .. او يعطيك كلمة وتعطيه مرادف لها ( بالإنجليزي طبعا )
14- مدة المقابلة غالبا من 5- 10 دقائق
15- قبل فترة طلعت " اشاعة " انو في اختبار انجليزي .. ابدا مافي أي اختبار .. هي مقابلة فقط
واخيرا :
في اشياء كثير اعتقد كلكم تعرفوها عن المقابلات بصفة عامة وكيفية التعامل فيها .. مثل : المصافحة و الإبتسامة وطريقة الجلوس وطريقة الكلام وكيف تبدأ وكيف تنتهي من المقابلة و الخ

والي يبغا يستزيد من هذا الموضوع ويعرف اشياء كثيرة عنها ممكن يبحث في المنتديات التعليمية او يقرأ كتب متخصصة في هذا المجال ..

هذا كل ما اعرفه عن المقابلة .. ان شاء الله اكون افدتكم ولو بشيء بسيط :)

اتمنى من الشباب الي عندهم معلومات عن المقابلة .. اذا في معلومة خاطئة ذكرتها ياليت يصححوها لي .. واذا في شيء مهم نسيته يا ليت تذكروه ..
واي احد عنده سؤال يسأل

بالـــتــوفـــيــق للـــجـــمـــيـــع

[شفع]

المشاركة الأصلية كتبت بواسطة ريال سعودي 13- طريقة الأسئلة حتكون كالتالي : ما سبب اختيارك لكية الطب ؟؟ وفي جامعة الملك عبد العزيز بالذات وما هو التخصص الذي ترغب الدخول اليه ؟؟ وكيف ترى نفسك بعد 10 سنوات ؟؟ وما موقف اهلك من دراستك للطب ؟؟ لو ما انقبلت في كلية الطب .. ايش حيكون موقفك او ردة فعلك ؟؟ وايش الكلية الي ممكن تدخلها ( غير الطب ) لو توظفت وتم تعيينك خارج مدينة جدة .. توافق ولا لا ؟؟ وممكن يسألك عن هواياتك .. مثلا : اذا كت تحب كرة القدم ايش هي الإصابات الي تصير في كرة القدم ؟؟ ممكن يدردش معاك ويسألك عن اشياء في جسم الإنسان .. مثلا ممكن يسألك أي يقع الرباط الصليبي او يسألك هل الكبد في المنطقة اليمنى او اليسرى من الجسم وهكذا بالنسبة للبنات .. لو تزوجتي ورفض زوجك تكملي الطب .. ايش حيكون موقفك ؟؟ وممكن يسألك اسئلة عامة ليس لها علاقة بالطب مثلا : من هو قدوتك في الحياة .. وايش هي نقاط ضعفك وقوتك .. وهل مريت بتجربة فاشلة في حياتك .. الخ .. او يعطيك كلمة وتعطيه مرادف لها ( بالإنجليزي طبعا ) 14- مدة المقابلة غالبا من 5- 10 دقائق

أول شيء يعطيك الف عافية ع المعلومات القيمة .. و ع الجهد و ع الحرص عالفائدة للجميع الله يسعدك و يوفقك ..
ثاني شيء حبيت اسألك متأكد من كلامك هذا ..؟ خصوصاً في نوعية الاسئلة و مدة المقابلة ..
وطريقة المحطات كلها هذي مش ممكن تجي مع بعض يعني اذا كانت الاسئلة من هـ النوعية
فما راح تكفي المدة 5 ولا 10 ولا 15 دقيقة .. و إذا كانت المدة مثل ما تقول فما اضن الاسئلة
راح تكون من هـ النوعية .
المهم الحين أهم شيء نعرفه كلنا عن المقابلة الشخصية ان " الكل ناجح فيها مقدماً " بمجرد
حضوره ..
فأنا اقول يكفي ياجماعة ترعيب وترهيب الدكاتره و الدكتورات .. لأنهم توهم يعني في اول طموحهم
والله ما يحتاج كل هذا .. واللي يطلع اشاعات يتقي ربه لأنه ممكن ينقلب كيده عليه ..!
شكراً و اسف على اللهجه .. بس تعبت والله من موضوع المقابلة هذا و النفخ فيه وتضخيمه ..

خلينا متفائلين .. و كل شي بعلم الغيب غيب .. والحمد لله على كل حال

[د. هدّولا]

يعطيك ربي ألف عافية دكتور محمد..
المقآبلة دي رآح تكون ولا شئ قدآم المقابلات اللي رآح تواجهنا كدكآترة ...
فإن شاء الله نحن قدها وقدود , والله يسهل لنا ..



بالتوفيق =)

[بنت الضحى]

المشاركة الأصلية كتبت بواسطة ريال سعودي بسم الله الرحمن الرحيم السلام عليكم ورحمة الله وبركاته 6- الإعلان عن اسماء الطلاب والمواعيد .. حيكون ان شاء الله قبل بداية الدراسة عن طريقة مسجات الجوال او من الشؤون التعليمية او ممكن تكون في اوراق معلقة على بوابة مبنى 2 بأسماء الطلاب او ممكن ما يكون فيه اعلان اصلا .. ويكون الدخول للمقابلة عشوائيا .. وتختار انت اليوم الي تبغا تسوي القابلة فيه ( السبت او الأحد )

وعليكم السلام ورحمة الله وبركاته

شكرا ع الموضوع اللي جاوب على كثير من أسئلتنا

لكن عندي سؤال ،،كيف نعرف بأي طريقة ح يكون الاختيار؟؟ يعني مثلا لو كان أوراق معلقة كيف نعرف إنها تعلقت؟؟

[The last word]

أنا صراحة من أشد المؤيدين للمقابلة لا سما وأنه خلال أيام الدورة لما سأل الدكتور الطلاب عن سبب رئيس لدخولهم كلية الطب أجاب الغالبية (( الدخل المادي ورغبة الأهل )) .. وهي قمة في التناقض مع أهداف الطب السامية ..
اللي يبي المال في ألف طريقة أسهل من الطب للحصول عليه .. ولا أتوقع ان رغبة الأهل ستقف أمام هذه الطرق للحصول على المال ..

لذلك أتمنى ترقية الأهداف وتصحيح النية .. وبالتوفيق يااارب للجميع ...

ألف شكراً دكتور محمد ..

[~RAN~]

جزاك الله كل خير يارب

بس متأكد انه كل الكليات الطبيه الثانيه مافيها مقابله ؟؟
حتى طب الاسنان ؟

[محمد عماد]

أول شيء يعطيك الف عافية ع المعلومات القيمة .. و ع الجهد و ع الحرص عالفائدة للجميع الله يسعدك و يوفقك ..

الله يعافيك اخوي ..

ثاني شيء حبيت اسألك متأكد من كلامك هذا ..؟ خصوصاً في نوعية الاسئلة و مدة المقابلة .. وطريقة المحطات كلها هذي مش ممكن تجي مع بعض يعني اذا كانت الاسئلة من هـ النوعية فما راح تكفي المدة 5 ولا 10 ولا 15 دقيقة .. و إذا كانت المدة مثل ما تقول فما اضن الاسئلة راح تكون من هـ النوعية .

كل الي كتبته قالها لنا د. سلمان وباقي الشباب جزاهم الله خير في الدورة .. ولما قابلته امس قلي على طريقة المقابلة
واعتقد انو 10 دقائق تكفي في المقابلة وبزيادة .. غالبا كل سؤال ما يتجاوز دقيقة واحدة

المهم الحين أهم شيء نعرفه كلنا عن المقابلة الشخصية ان " الكل ناجح فيها مقدماً " بمجرد حضوره ..

الكل ناجح ان شاء الله

فأنا اقول يكفي ياجماعة ترعيب وترهيب الدكاتره و الدكتورات .. لأنهم توهم يعني في اول طموحهم والله ما يحتاج كل هذا .. واللي يطلع اشاعات يتقي ربه لأنه ممكن ينقلب كيده عليه ..! شكراً و اسف على اللهجه .. بس تعبت والله من موضوع المقابلة هذا و النفخ فيه وتضخيمه ..

انا مني شايف اي رهبة او تضخيم في الكلام الي قلته .. بس حبيت اوضح لكم موضوع المقابلة

[محمد عماد]

المشاركة الأصلية كتبت بواسطة د. هدّولا يعطيك ربي ألف عافية دكتور محمد.. المقآبلة دي رآح تكون ولا شئ قدآم المقابلات اللي رآح تواجهنا كدكآترة ... فإن شاء الله نحن قدها وقدود , والله يسهل لنا .. بالتوفيق =)

العفو اختي د. هديل ،،

فعلا .. المقابلة هذي ما تمثل اي شيء من الي راح نواجهه في الطب
وان شاء الله الكل يجتازها

[محمد عماد]

المشاركة الأصلية كتبت بواسطة بنت الضحى وعليكم السلام ورحمة الله وبركاته شكرا ع الموضوع اللي جاوب على كثير من أسئلتنا لكن عندي سؤال ،،كيف نعرف بأي طريقة ح يكون الاختيار؟؟ يعني مثلا لو كان أوراق معلقة كيف نعرف إنها تعلقت؟؟

العفو ^ــ^

صراحة ما اعرف الطريقة الي حتستخدمها الكلية بالضبط في الإعلان

لكن اذا علقو اوراق اكيد حيعلنو عنها و حيوصل لك خبر من صحباتك انو في ورق بأسمائكم ومواعيدكم في المقابلة
وعاد انتو البنات الأخبار تنتشر بينكم بسرعة

[محمد عماد]

المشاركة الأصلية كتبت بواسطة the last word أنا صراحة من أشد المؤيدين للمقابلة لا سما وأنه خلال أيام الدورة لما سأل الدكتور الطلاب عن سبب رئيس لدخولهم كلية الطب أجاب الغالبية (( الدخل المادي ورغبة الأهل )) .. وهي قمة في التناقض مع أهداف الطب السامية .. اللي يبي المال في ألف طريقة أسهل من الطب للحصول عليه .. ولا أتوقع ان رغبة الأهل ستقف أمام هذه الطرق للحصول على المال .. لذلك أتمنى ترقية الأهداف وتصحيح النية .. وبالتوفيق يااارب للجميع ... ألف شكراً دكتور محمد ..

العفو د. خالد

ممكن البعض دخل الطب عشان شيء مادي او رغبة من الأهل ويقول في المقابلة انو دخل الطب عشان رغبته ..
لكن انا متأكد انو الي دخل الطب بدون دافع ورغبة نفسية حيحول من اول سنة او سنتين

يسلمو على المرور ^^