توضيح بسيط ومهم لمادة الانجليزي لطلاب الانتظام مسار علمي(دفعة17) للسنة التحضيرية

[نيمار الاتحاد]

السلام عليكم ورحمة الله وبركاته.....

اخواني المستجدين،،، السنة التحضيرية للامانة من امتع السنوات الدراسية التي مرت علي في مسيرتي التعليمية ،،ولكن الاهمال والغياب حيقلبها لجحيم على الطالب وخاصة الغياب في كلاسات الانجليزي واللي بكل امانة اغلب الطلاب ضيعوا نفسهم بالانجليزي من كثر الغياب والاهمال لين ما جالهم حرمان بالمادة (dn) ## وحط في بالك انوا من اول يوم دراسة واول اسبوع في تحضير للانجليزي حسب اغلب الدكاترة الي مروا عليا وطبعا في دكاترة يحضروا من ثاني يوم ،،،،، واعرف كثير يجيلهم حرمان بعد تجاوز ساعات الغياب المسموحة والمقدرة بحوالي ال 21 ساعة او محاضرة تقريبا وطبعا في موقع مخصص لمادة الانجليزي ينزلك فيه الغياب يوميا او ممكن اسبوعيا يعني كل شيء محسوب عليك وحط في بالك ان يوميا حيكون فيه انجليزي وهيا 4 لفلات كل لفل تقريبا تدرسه قرابة ال 7 اسابيع يعني قول بالترم الواحد حتدرس 2 ليفل وبالجزء الي تحت وضحت لكم الساعات وبعض الامور،،،،

وطبعا الي ينشال عليه الانجلش ذا حيرتاح راحة ما بعدها راحة بالتحضيري وبيعيش ملك لان الدوام حيكون قليل جدا ومريح وطبعا الانجلش حينشال ب واحد من ال3 طرق (اختبار ايلتس او توفل او تختبرتحديد المستوى حق الجامعة الي اختبروه قبل كم اسبوع وتجيب درجة حلوة وممكن يشيلوه عيك ) بس للامانة اغلب الي اختبروا تحديد مستوى بحسب الي اعرفهم جابوا لفل4 ،، يعني بالعربي ما اعرف احد انشال عليه الانجلش لما اختبر تحديد المستوى والي يجيب لفل 4 برضه يعتبر شيء ممتاز وبيدرس ممكن 7 اسابيع انجلش ويخلص اما الي يجيب لفل1 الله يعينه سنة كاملة بيدس الانجلش وصراحة دوام الانجلش بالعربي كذا كرف يعني في ايام تداوم من 11 ل4 ( بريك ممكن 40 دقيقة من 12:20 ل1) العصر انجلش وفي ايام من 8 ل10 وطبعا بين كل كلاس وكلاس 10 دقائق بريك قصير ....ز.ولكن انصح الي بإمكانه يشيل الانجلش يشيله لان بيرتاح ويقدر يتفرغ للمواد الثانية ،،،، انا مثلا لما راح الانجلش صار عندي يومين اوف(اجازة) و3 ايام كنت اداوم ساعتين بس بخطة أ


بالنسبة لمستوى صعوبة المادة وال لفلات الي فيها ،،،، المادة ماهي صعبة ابدا ويمديك تجيب A+ بالراحة بشرط تركز مع الدكتور خصوصا في شرح القرمرات والرايتنق وهالامور ،،، وبالنسبة للفل 1 يعتبر تافه وسهل جدا ولفل 2 ايضا بسيط ما لفل 3 فيه شوية شغل ويبالك تشد فيه لانه يعتبر اصعب القرمرات فيه بس تجيب A او A+ بالراحة اما لفل 4 اشوفه اسهل من3 وتضمن ال a+ ،،، هي طبعا الانجلش تختلف من شخص لشخص يعني مثلا اعرف دوافير وخبصوا بالانجلش وجابوا B لان تأسيسه سيئ وما فراسه اي شيء وبعكس ذلك في ناس مستواها عادي بس لغتها كويسة وجابت درجات مميزة بالمادة ..


وبالنسبة للاختبارات .... (( تقريبا )) بما يقارب كل اسبوعين اختبار قصير من 10 درجات اسمه (كويز) وغالبا تكون اختبارين قصيرة وايضا في اختبارات كتابة ((رايتنق)) واللي ممكن توصل ل 4 ااو 3 اختبارات كتابة
وبعدين لما توصلوا لاخر اسبوعين في اللفل حتبدأ اختبارات نهائية للانجلش وهيا 3 اختبارات نهائية ( رايتنق من 10 درجات + سبيكنق من 10 درجات+ اختبار نظري من 40 درجة ويشمل مهارة الاستماع)
،، وغالبا اغلب الطلاب يخصوا في اختبار الرايتنق لانه في دكاترة يحسابوك على الكلمات الخاطئة والاحرف الناقصة واحيانا اذا ما فهم خطك يخسفك بالدرجة فأنتبه لهاذي الامور



### واخيرا اتمنى اني افدتكم ولو بالشيء القليل بخصوص مادة الانجليزي للسنة التحضيرية

[Azzoz1996]

يعطيك العافية، لكن تصحيحاً للمعلومة، الانجليزي ينشال بطريقتين اللي هي الآيلتس والتوفل فقط.. اختبار تحديد المستوى يحدد مستواك من 1 - 4 حتى لو جبت احسن درجة بالاختبار بيعطيك ليفل 4، مستحيل يحذفها

[أشواق الحارثي.]

ليتني اختبرت التوفل ):